DANIEL
Babilônia Kaarabonia hojaki ada Daniel
1
Hari. Oniaroa, badara ahoarabosiki Jeoaquim vo'ora vaka'da'diki adani Judá kaaraboni kaija'arini. Jerusalém sidajia hojaki ada. Oniaroa Babilônia kaaraboni kaija'arini vakadika'da'di, kidisorara khama avikha'aha Jerusaléa. Vá'ora vagathivini va'ora vanofiki adani sidaji'arini, oniani ida sidaji kavasasibanini nama hiki kania va'ora najoroniribanaonija. Sidaji banininija vahojaki adani sorara. Ni-va'ora vava'ahaki adani ija'ari sidajia avi'oina, ni-va'ora vava'ahaki vikhaonanina.2 Masiko ipohikia vahojaribanaonina naothinia Deua biva'aha'aha ada sorara vaka'da'diva Nabucodonosor oniki sidaji kaija'arini-ra va'ora gathivini. Nabucodonosor, kidisorara khama va'ora vagathi'aha kidisorara khama va'ora vagathi'aha adani sidaji kaija'arini, visaari'iki ida vakadinahina hahavi. Visaari'ihi ida vavi ipohiki Deus khai ni'ana kagorani bodinia hojaki jaboni. Nabucodonosor va'ora avisa'aha adani Jerusalém sidaji kaija'arini, nahina hahavi visaari'iki hiki Babilônia kaarabonia. Biosa'ihi ida bavi ipohiki visaari'iki Deus khai ni'ana kagorani bodinia, binaibavi'ihi kidideus gorana bodinia. Nahina kaidivaki akadava'ani kagorania hojaki ida. Nabucodonosoa ni-biogaki ada Judá kaaraboni kaija'arini vakadiDeus. Ni-hihaviki ida bavi avikha'ahi hi'iki.
3 Hari. Oniaroa, Babilônia kaaraboni kaija'arini vakadika'da'di Nabucodonosor onikia bihonariaha ada gorana akadava'ava abono vakadika'da'di khana kidiania. Aspenaz oniki ada. Kidibadani hiki ida honai abono-ra va'ora honariafiahavini ka'da'di gorana bodinia bada vakhanina.
Hari. Khani'aha ada Aspenaz kidika'da'di kania. Nabucodonosoa bihonariaha ada Aspenaz:
- Va'ora inagathogathovini va'ora onofiki adani imakhinava Israel kaija'ari vakadi'ogahai abono, vakadika'da'di kaija'ari vihiki vahararana. Va'ora inagathogathovini naothinia va'ora anahoariha bana adani imakhinava mahija ogorana bodinia vahojavini.
4 Onofiki ida va'ora inagathogathovini imakhinava vanokiana jahaki, niha vakhanina makhaniriki, vakadiarabo aagahai-ra avigajahakiki. Va'ora onofiki adani imakhinava akadiarabo aagahai-ra vaka-ojomo'ijorakivini-ra vakaabokaki. Va'ora ka'ojomo'i bana ariathia, akadiarabo kaija'arini vakadi'ogahai, vakadipapira athini hikia mahija avigavini naothinia, kodihonai abono vihina.
5 Va'ora no'a bana adani hi'adani va'ora inagathogathoki kaimoni 'bai, vinho hikia kodimesa hojakia mahi hahavi. Onofiki ida badara ahoarabakosiki va'ora avaka'ojomo'ivini kadaipohiki khama. Va'ora avaranigahivini naothinia va'ora ova'ahaki bana adani kodiania vahojana hora vaakodiahara kaimoni-niha ada Nabucodonosor.
6 Hari. Oniaroa, Aspenaz binaaba'ihi ida kidika'da'di athi. Judá kaaraboni kaija'arini vakadiania va'ora nagathogatho'aha adani imakhinava. Vahararana vahjaki adani Daniel, Ananias, Misael, Azarias vihiki. Vakadija'ari avikhananavaki afohahavi ada Judá oniki.
7 Aspenaz athia vaonina bianahoariha'iki adani. Binaoniki ada Ananias, Sadraquea. Binaoniki ada Daniel Beltessazara. Binaoniki ada Ananias, Sadraquea. Binaoniki ada Misael, Mesaquea. Binaoniki ada Azarias, Abed-Negoa.
8 Hari. Daniea bikava'ibodivaraniki ida arabo kaka'da'dini ko'bai-ra haravini. Deus athi kapapirani kania hojaki ida kaabanahi. Va'ora honariaki adani Israel kaija'ari vakadija'ari vihiriki vakadi'bai, vinho hiki vakadikaaji hini.
Hari. Daniea bikanikhariaha ada Aspenaz:
- Iva'aha bana ida kadaka'da'di ko'bai jahaki-ra ariharavini?
Akadikaaji hiki ida 'bai deus amovana kanava'igani ko'baini. Kidi'bai arihahi; haria najaharihi Deus viaha.
9 Hari. Aspenz bivajahaki ada Daniel. Deus vania biakodiara ada makhira va'i bidini vara nini jahakia, binofija kaimoni ida Danie-ra kajoamoravini.
10 Oniaroa Aspenaz athi bigathani'aha ada Daniel:
- Ofiniki ada kodika'da'di, hi'ada akadiarabo-ra vaka'da'diki.
Ovaria bihonariaki ida kidi'bai jahakia a'onira ono'abakhiavini, avahaki kaimoni. Kidi'baia a'onira ono'abakhiarihi; ni-avanokiani jahajanaki bana. A'onira nokiki bana ada kodika'da'di imakhianava vahoariha vahararana. Avanokiani jahajanarini, avajaroni fajafajahani-ra nokiha, oafinina-ra vahonariahiha bana. Kidi'baia a'onira ono'aravini vani oabinina-ra vahonariahira bana ada. Oabiniki bana ho, hora avarisaniki a'oni.
11 Hari. Oniaroa, okhami'aha ada Daniel makhira vakadi'bai-ra ravinaki kania. Aspenaz bihonaria'iki ada ovari Daniea bini'aha ada honai abono 'bai-ra ravinaki:
- Ivani haria iakadava'aki i kodipohi khama. Oipohina vaonina Ananias, Misael, Azarias vihiki.
12 Onofiki bana ida mahi sa'ai ko'bamihani hiki ipohini haria ikaijo'avini. Haria no'avinihi bana ida rakhajahi jo'doni, rakhajahi bononi, paha hiki ka'oa.
13 Radahahi ida mahi sa'ai ko'bamihani hiki ipohini, vada haria ni'a bana. Vada va'ora ni'a bana jaboni adani imakhinava vahoariha arabo kaka'da'dini ko'bai-ra vahaki mahija ajana nokiani vajahana nokiani-ra aradavini inokivini.
Haria vada ini'avini naothinia ivani ihonaria bana ida inofiki akadiania-niha ada Daniel.
14 Oniaroa, 'bai-ra ravinakia bivajahaki ida Daniel athi, va'ora kaijo'a'aha adani Daniel mahi sa'ai ko'bamihani hiki ipohini.
15 Hari. Anokhomi'ihi ida mahi sa'ai ko'bamihani hiki ipohini. Daniel kidipohi khama vanokiana jahania biaradaki ida vahoariha vanokiaja jahani. Ni-vaviradahapa'itxiki, vabasinaki adani Daniel. Ni-vanokho jahajahaki adani vahoariha arabo kaka'da'dini ko'bai-ra vahaki.
16 Naothinia ni'bai kaaji hiki arabo kaka'da'dini ko'baia Daniel vagahinajanaki. Rakhajahi jo'doni, avaafani hiki ka'oa vagahinaki adani.
17 Deus vani va'ora kajoamora'ara adani imakhinava avako'bamahakhamaki. Deus va'ora anigaha'iki adani kidi'ogahaia. Avigaki jaboni ida papira athini, agahai hoariha hiki Babilônia kaaraboni kaija'arini va'ora vaka'ojomo'ivni hi'iki. Daniea bioga'iki jaboni ida vadami fori hiki, vadami ka'oa hiki-ra ogavini nahina hini.
18 Oniaroa, radaha'ihi ida badara ahoarabakosiki Nabocodonosor bini'aki, kidihonai abono va'ora vaka'ojomo'ira kaimoni adani Daniel, imakhinava hahavi vahoariha va'ora vanagathogatho'iki. Oniaroa, gora akadava'ava abono Aspenaz oniki va'ora vikhami'aha Nabocodonosor viaha.
19 Ovari vara va'ora ni'ahanana'aha adani imakhinava. Va'ora nana'dohi'aha afohana, biogaja kaimoni ida vakadi'ogahai niha ninini. Daniel, ipohina khama vakadi'ogahaia biaradaki ida imakhinava vahoariha vakadi'ogahai, oniani ida arabo kaka'da'dini Nabocodonosor Danie-ra va'ora nofivini hija kidihonai abono vihina. Gorana bodinia vahoja'aha.
20 Arabo kaka'da'dini va'ora nana'dohivini hiki ida nahina biogariki, Daniel kidipohi khama vanava'isohijahaki'aha. Hova'oani kidihonai abono vahoariha, arabani vihiki, kaijorahi ofgava abono vihiki, ogahai abono vahoariha ni-avigajahakiki. Daniel fori vihinha adani. Arafiaki ida Daniel, ipohina khama vakadi'ogahai.
21 Hari, Oniaroa, badara ipohiki arabo kaka'da'dini kahonai abono hiki ada Daniel. Arabo kaka'da'dini Ciro oniki arabo kaija'arini hahavi-ra va'ora hoariafiahavini kama'dani kari asia hojaki ada Daniel Babilônia sidajia. Na'arihavi hiki ada Daniel.