MATEUS
Mateua vara bivaniꞌaki ida Jesus monina jahaki
Jesus Cristo kaijaꞌari avikhananavaki
1
Hida vani Jesus Cristo kaijaꞌari avikhananavaki vaonina.
Davi kohana kaijaꞌari namitharonisiagaki ada Jesus Cristo.
Abraão kaijaꞌari namitharonisiagaki ada Davi.
2 Isaque kaabiꞌi ada Abraão kohana.
Jacó kaabiꞌi ada Isaque kohana.
Judá vakadiabiꞌi ada Jacó.
3 Peres Zera khama vakadiabiꞌi kohana ada Judá.
Vakadiamia kohana Tamar oniki.
Esrom kaabiꞌi ada Peres kohana.
Arão kaabiꞌi ada Esrom kohana.
4 Aminadabe kaabiꞌi ada Arão kohana.
Nasom kaabiꞌi ada Aminadabe kohana.
Salmom kaabiꞌi ada Nasom kohana.
5 Boaz kaabiꞌi ada Salmom kohana.
Boaz kaamia kohana Raabe oniki.
Obede kaabiꞌi ada Boaz kohana.
Obede kaamia kohana Rute oniki.
Jessé kaabiꞌi ada Obede kohana.
6 Davi kaabiꞌi ada Jessé kohana.
Arabo kakaꞌdaꞌdini ada Davi kohana.
Salomão kaabiꞌi ada Davi kohana.
Davia bivahojaꞌiki ida Urias kohana kagamo,
Salomão kaamia ida.
7 Roboão kaabiꞌi ada Salomão kohana.
Abias kaabiꞌi ada Roboão kohana.
Asa kaabiꞌi ada Abias kohana.
8 Josafá kaabiꞌi ada Asa kohana.
Jorão kaabiꞌi ada Josafá kohana.
Uzias kaabiꞌi ada Jorão kohana.
9 Jotão kaabiꞌi ada Uzias kohana.
Acaz kaabiꞌi ada Jotão kohana.
Ezequias kaabiꞌi ada Acaz kohana.
10 Manassés kaabiꞌi ada Ezequias kohana.
Amom kaabiꞌi ada Manassés kohana.
Josias kaabiꞌi ada Amom kohana.
11 Jeconias vakadiabiꞌi ada Josias kohana.
Josias kohana hokina kari Babilônia kaijaꞌarini vaꞌora vagathiꞌiki adani Israel kaijaꞌari Babilônia kaarabonia avikhara kaimoni.
12 Israel kaijaꞌari Babilônia kaarabonia osahi vihina naothinia,
hojaki ada Salatiel oniki.
Salatiel kaabiꞌi ada Jeconias kohana.
Zorobabel kaabiꞌi ada Salatiel kohana.
13 Abiúde de kaabiꞌi ada Zorobabel kohana.
Eliaquim kaabiꞌi Abiúde kohana.
Azor kaabiꞌi ada Eliaquim kohana.
14 Sadoque kaabiꞌi ada Azor kohana.
Aquim kaabiꞌi ada Sadoque kohana.
Eliúde kaabiꞌi ada Aquim kohana.
15 Eleazar kaabiꞌi ada Eliúde kohana.
Matã kaabiꞌi ada Eleazar kohana.
Jacó kaabiꞌi ada Matã kohana.
16 José kaabiꞌi ada Jacó kohana.
Maria kamakhira ada José,
Jesus kaamia ida Maria.
Cristo ada Jesus Deua binagathogathoꞌiki.
17 Asia hojaki hida Jesus kaijaꞌari avikhananavaki varani vihina.
Abraão kahanodi hanodina hanodiꞌianana,
hanodiꞌianana,
kahanodiꞌianana onivani fori vihiꞌianaha adani 14 vihiki vakadisai vahanodironisiagana vaꞌoaniaro maina,
oniaroa,
hojaꞌaha ada Davi ovari maina.
Davi abiniꞌina naothinia onivani fori vihiha adani 14 vaipohina vihiki afoꞌiana,
vahanodiꞌianana adani vakadihanodi vahanodironisiagana,
oniania osahi vihiꞌaha adani Israel kaijaꞌari Babilônia kaarabonia.
Babilônia kaarabonia avikhana naothinia 14 ipohini vani fori vihiꞌianaha vahanodiꞌianana adani vakadihanodi vahanodironisiagana,
oniania,
hojaꞌaha ada Cristo.
Jesus Cristo ꞌbanaꞌina varani hini hida
18 Hari.
Vara ovaniꞌaki bana hida Jesus Cristo bivaꞌbanaꞌiki kamahini varani hini.
Maria oniki ida Jesus kaamia.
Joséa binofiki ida Maria-ra kanagamohavini.
Joséa biviꞌomaravini oadani kajahavidoꞌihi ida Maria.
Ni-Joséa bivaisaꞌiki.
Maꞌonahai Jahaki vani ada Maria-ra vaisaꞌara.
Nokiariha ada Maꞌonahai Jahaki.
19 Ni-Joséa biogaki kaho ida niha ninini Maria kajahavidoni.
Makhira hoariha kaisai bivanihamanihi.
Maria kajahavidoni mani ida José kidigamo kaimoni-ra nofijanaravini hija.
Jahaki,
asohiki ida José kahojai,
ni-binofiki ida Maria vaꞌini-ra anaipahihivini vahoariha vaviaha bianaathidanoararivini badani jaharikia kabadanini bikahivini.
Ijaꞌari vaipohiki avigaravini oadani,
binofiki ida akarai kapapirani-ra naꞌbiravini,
kidigamo hijanaria kaimoni ida Maria.
20 Bikavaꞌibodivaranivini kabaꞌi ida Maria-ra kavaꞌipahinivini,
Deus ibavi kaijaꞌarini abono-ra nanokiaꞌaha vadamia.
Biniꞌaha ada Davi kohana kaijaꞌari namitharonisiagaki José oniki:
—José,
hariꞌa ikavaꞌibodivaranijana ida Maria-ra ikanagamohavini-ra ikavaꞌipahinivini.
Ni-makhira bivaisaki ida Maria.
Maꞌonahai Jahaki vania bivaisaja ida.
21 Makhira isani ada isai Maria biakaijohara.
ꞌBanaꞌaha inaoni bana ada isai ‘Jesua’.
Jesus onina akavaꞌijoahi abono.
Jesus vaꞌora akavaꞌijoaki bana adani kidijaꞌari vakamitharia kaimoni ida vakadihojai asohiriki abosini imai ꞌbanania Ibavi Jaharikaꞌoaki kania — niha ada Deus ibavi kaijaꞌarini.
22-23 ꞌBoꞌdakari Deua binavaꞌisohijoraꞌiki ada athi namoniva abono:
“Kajahavidoki bana ida
imaꞌinavi.
ꞌBanaha ada isai ijaꞌaria
vanaonivini bana
‘Emanuel’.”
Nimania ida Deus athi namoniva abono athi afojora.
(Emanuel oniki Deus akadiania hojaki.)
Hari.
Oniaroa,
Maria kania namithaꞌihi ida athii.
24 Oniaroa,
nokhoꞌaforaꞌaha ada José,
binaabaꞌihi ida Deus ibavi kaijaꞌarini athi,
kidigamo hikaꞌoaꞌia kaimoni ida Maria.
25 Maria kaisai ꞌbanarina oadani Joséa ni-biviꞌomapaꞌitxiki ida kidigamo.
ꞌBanaꞌina naothinia Jesus vania Joséa binaoniꞌaha ada isai.