João Batista kavarani hida
3
1-2 Hari.
Judéia kaarabonia khaha ada makhira Deua bikaronaki,
onina João Batista.
Amasia hojaki ada.
Kagorariki ida amasi.
Zacarias kaisai ada.
Oniaroa,
João Batista-ra vara niꞌaha ada Deus:
—João,
vaꞌora nanamitha bana adani ijaꞌari hahavi omonina.
Vaꞌora kaꞌojomoꞌi bana oathia ira onavaꞌisohivini hiꞌikia — niha ada Deus.
Oniaro kari,
arabo hahavi kakaꞌdaꞌdini hiki ada Tibério.
15 badara ipohini vani arabo hahavi kaijaꞌarini-ra vaꞌora vakaꞌdaꞌdira ada Tibério.
Oniaro kari,
Judéia kaaraboni kakaꞌdaꞌdini ada Pôncio Pilatos.
Galiléia kaaraboni kakaꞌdaꞌdini ada Iroji.
Ituréia kaaraboni,
Traconites kaaraboni hiki kakaꞌdaꞌdini ada Iroji kakajoꞌo Filipe oniki.
Abilene kaaraboni kakaꞌdaꞌdini ada Lisânias.
Sasidotxi vavakaꞌdaꞌdiva adani Anás,
Caifás khama.
Lucas 3:1-4:13
3 Hari.
Oniaroa,
ajihiꞌaha ada João Batista.
Jordão vaini kaarabonia aadahaoniꞌaha,
ijaꞌari-ra vaꞌora niꞌabakhiaꞌaha:
—Avakadihojai asohiriki-ra vakavaꞌipahinikaꞌoa bana mahija aꞌonira okanavini,
Deua binaꞌbiraja kaimoni ida avakadihojai asohiriki bada avaniꞌabakhiaki — niha ada João Batista.
4 ꞌBoꞌdakari Deus athi namoniva abono Isaías kohana onikia vara bivaniꞌajoraꞌiki ida João Batista ijaꞌari-ra kaꞌojomoꞌivini.
Isaías kohana athi jiriki hojaki Deus athi kapapirani pitania:
“Amasia hojaki ada makhira,
ijaꞌari-ra vara niꞌaꞌaha athi ꞌbarakia:
‘Amaakariki ida akadikaꞌdaꞌdi kaikahina kamahini.
Vanasohi bana ida
avakadimahi,
avakadikaꞌdaꞌdi khana-ra vanaviahanokha bana!
Vanamonahaꞌa bana ida
hagihi sohiki akadikaꞌdaꞌdia
bivaadahaki kaimoni.
Hagihi sohiki fori hiki ida ijaꞌari kamahi sohiki.
5 Vanaimamamananaha ida
arabo daꞌbadaꞌbahani
hahavi.
Vanasohi bana ida hagihi
tonotonohani sohija kaimoni.
Vanaimamamananahana bana jaboni ida hagihi
daꞌbadaꞌbahani,
arabo tiratirahania jaboni.
6 Ijaꞌari hahavia vanokiki bana ada aihotahi abono Deua bikaronaki.’
Niki ida Isaías athi.”
Isaías kohana vara bivaniꞌaki ida hagihi sohini.
Kidivarani kaꞌoa ida ijaꞌari kamahi-ra nasohija.
7 Hari.
Vajoroniha adani ijaꞌari vaipohiki João Batista kania,
vanofiki ida João Batista vaꞌora kanavini.
Vaꞌora niꞌaha adani ijaꞌari hahavi:
—Jahari kahojai-ra avakavaꞌipahinivini-ra avakahiꞌbadaraki aꞌoni.
Deua bikaronaki bana ida avakadihojai asohiriki abosini.
Nahina jahariki-ra avagathaniriki avaabononi avavanihamanija koda bana ida avakadihojai asohiriki abosini?
8 Avahojani hiva ida hojai asohiki mahija hojai asohiriki-ra avanofijanaravinia Deu-ra avananokiahivini.
Hariꞌa avaabononi vakanavaranihakhama:
“Akadiabiꞌi okhananavaki
ada Abraão kohana”.
Asohiki ida Abraão kahojai.
Avakadihojai ni-asohiki.
Abraão kaisai vavijavaronisiagaki avihini kabaꞌi,
ni-Deus aꞌonira akavaꞌijoaki.
Deus vaꞌora akavaꞌijoaki adani vakadihojai asohiriki-ra vakavaꞌipahiniꞌiki.
9 Ihiꞌai avani fori avihiki aꞌoni.
Hojai asohikia avakahojairihi;
ihiꞌai avani bonobakhiariki fori avihihi.
Makhira kajoriki fori hiki ada Deus.
Khaki bana ada makhira binobaja kaimoni ida ihiꞌai avani bonobakhiariki ꞌdamania.
Binahokahiki ida ihiꞌai avani obaki siho kabodinia.
Nini vani jaboni Deus vaꞌora arakhaki bana adani athi naabani vihiriki nahina jaharikia — vaꞌora niꞌaha ada João Batista.
10 Hari.
João Batista athi-ra vakamithaꞌikia vananaꞌdohiꞌaha:
—Nahina-ra koda bana bada aniꞌaki hari,
jaharikia Deus haria arakharia kaimoni?
11 Oniaroa,
João Batista bigathaniꞌihi ida vakadinaꞌdohi:
—Avavahojaki ida karahobi ꞌbamiki;
kanahinariki-ra vanoꞌa hoarania.
Ivahojahi ida ꞌbai;
kanahinariki-ra noꞌa pitania — vaꞌora niꞌaha ada João Batista.
12 Hari.
Vakaikahiꞌaha adani imposto gathaniva abono vaipohiriki jaboni João Batista kania,
vananaꞌdohiꞌaha:
—Nahina-ra koda bana bada aniꞌaki hari,
jaharikia Deus haria arakharia kaimoni?
13 —Avakadibadani hiki ida imposto kajinironi-ra avagathanivini arabo hahavi kakaꞌdaꞌdini kaimoni.
Hariꞌa vanakaraho ida imposto kajinironi-ra avakanikhariavini ijaꞌari vakadiania.
Asohirihi ida vakadijiniro avaanivini avakadimoni hini — niha ada João Batista.
14 Vahararana vahojaha adani sorara jaboni,
vananaꞌdohiꞌaha:
—Harivani,
nahina-ra koda bana bada aniꞌaki hari,
jaharikia Deus haria arakharia kaimoni?
—Hariꞌa vahoariha vakadibadani asohirini-ra avanaathidanoarariꞌimarini vakadijiniro-ra avarakhara kaimoni avakadiania.
Khai vaniꞌa avakadibadani abosini kajinironi ipohini avagathaniki — niha ada João Batista.
15 João Batista athi-ra vakamithakia vanokhahahaꞌoadahaki ada aihotahi abono Deua bikaronaki,
oniania vaabono vakaniꞌakhamabakhiaha:
—Aihotahi abono mani koda ada João Batista?
16 Oniaroa,
João Batista vaꞌora niꞌaha:
—Aꞌonira okanaki ho paha bodinia.
Khaki bana ada hoariha,
kaꞌdaꞌdi kaꞌoa ada ovari.
Hovani kidihonai abono ho.
Arafiaki ida kidihojai asohikaꞌoani.
Kodihojai jahani fori hirihi ida kidihojai jahani arafiaki,
kabaꞌi hora nagathogathovini oakodiara kaimoni.
Ovaria bikaronaki ada Maꞌonahai Jahaki ijaꞌari vaꞌini-ra nahonariahihiki kaimoni.
Siho kakhororoki fori hiki bana ada Maꞌonahai Jahaki ijaꞌari kania khana.
Binihimaki ida ijaꞌari kahojai asohiriki — vaꞌora niꞌaha ada João Batista.
17 Hari.
Vara niꞌianaha ada João Batista.
Ijaꞌari-ra kavarajomivini ida trigo ꞌbaꞌdani akaꞌdiririhaki:
—Akaꞌdiririhaki ida trigo ꞌbaꞌdani aaniaja kaimoni ida baꞌbaꞌda asafini.
Anabavihi ida trigo ꞌbaꞌdani soꞌoroa.
Siho kabodinia anahokahiꞌihi ida asafini.
Nimania jaboni ida onaothia khaki ijaꞌari-ra kanahoarihakhamavini.
Vaꞌora aniki adani ijaꞌari hojai asohikia vakahojaiki,
ijaꞌari hojai asohikia vakahojaiki vahararana.
Ovari vaꞌora vahojaki adani ijaꞌari hojai asohikia vakahojaiki kidiania.
Vaꞌora nahokahiki adani ijaꞌari hojai asohirikia vakahojaiki Ibavi Jaharikaꞌoaki siho kaihimiriki kania.
18 Hari.
João Batista vara bivaniꞌaki ida Deus monina jahaki,
ijaꞌari-ra navaꞌisohiꞌaha Deua binofiki vakadiania.
19 João Batista vara biniꞌaha ada arabo kakaꞌdaꞌdini Iroji oniki:
—Ni-Deua bivajahapaꞌitxiki ida kadakajoꞌo kagamo Irodisi oniki-ra ivahojavini.
Ipohiki ida kadahojai asohiriki hoariha jaboni — niha ada João Batista.
20 Hari.
Irojia ni-bivajahaki ida João Batista kavaꞌisohihi,
oniani ida kidihojai asohiriki-ra anarafiavini hija.
Bivahonariahiꞌaha ada João Batista cadeia oꞌoina.
João Batista bikanaki ada Jesus
21 Hari.
João Batista cadeia hojana viahania ijaꞌari vaipohiki avikhabakhiaꞌiki kidiania,
vaꞌora kanaꞌaha.
Oniaroa,
Jesus João Batista kania akhanofoniꞌiki jaboni.
João Batista Jesu-ra kanaꞌiki.
Kanana naothinia Deu-ra vara niꞌaha ada Jesus.
Vara nina kabaꞌi,
binokiꞌihi ida nama arabikhajahaki.
22 Jesus kania gaariꞌaha ada Maꞌonahai Jahaki,
hoꞌdoko kanokiani fori hiki ada.
Nama kamithavahaki ida athii:
—Ivani kodisai i.
Ira onofijahakiki i.
Khai oniꞌaki ida ihojaꞌini.
Jesus kaijaꞌari avikhananavaki
23 Hari.
Jesus kabadarana ipohini 30 hiꞌini,
ijaꞌari kaꞌojomoꞌivini kamaꞌdaꞌaha.
Jesus kaabiꞌi ijaꞌaria vavanihaki ada José.
Eli kohana kaisai ada José.
24 Matate kohana kaisai ada Eli.
Levi kohana kaisai ada Matate.
Melqui kohana kaisai ada Levi.
Janai kohana kaisai ada Melqui.
José kohana kaisai ada Janai.
Matatias kohana kaisai ada José.
25 Amós kohana kaisai ada Matatias.
Naum kohana kaisai ada Amós.
Esli kohana kaisai ada Naum.
Nagai kohana kaisai ada Esli.
26 Maate kohana kaisai ada Nagai.
Matatias kohana kaisai ada Maate.
Semei kohana kaisai ada Matatias.
José kohana kaisai ada Semei.
Joda kohana kaisai ada José.
Joanã kohana kaisai ada Joda.
27 Resa kohana kaisai ada Joanã.
Zorobabel kohana kaisai ada Resa.
Salatiel kohana kaisai ada Zorobabel.
Neri kohana kaisai ada Salatiel.
28 Melqui kohana kaisai ada Neri.
Adi kohana kaisai ada Melqui.
Cosã kohana kaisai ada Adi.
Elmadã kohana kaisai ada Cosã.
Er kohana kaisai ada Elmadã.
29 Josué kohana kaisai ada Er.
Eliézer kohana kaisai ada Josué.
Jorim kohana kaisai ada Eliézer.
Matate kohana kaisai ada Jorim.
Levi kohana kaisai ada Matate.
30 Simeão kohana kaisai ada Levi.
Judá kohana kaisai ada Simeão.
José kohana kaisai ada Judá.
Jonã kohana kaisai ada José.
Eliaquim kohana kaisai ada Jonã.
31 Meleá kohana kaisai ada Eliaquim.
Mena kohana kaisai ada Meleá.
Matata kohana kaisai ada Mena.
Natã kohana kaisai ada Matata.
Davi kohana kaisai ada Natã.
32 Jessé kohana kaisai ada Davi.
Obede kohana kaisai ada Jessé.
Boaz kohana kaisai ada Obede.
Sala kohana kaisai ada Boaz.
Nassom kohana kaisai ada Sala.
33 Aminadabe kohana kaisai ada Nassom.
Admim kohana kaisai ada Aminadabe.
Arni kohana kaisai ada Admim.
Esrom kohana kaisai ada Arni.
Peres kohana kaisai ada Esrom.
Judá kohana kaisai ada Peres.
34 Jacó kohana kaisai ada Judá.
Isaque kohana kaisai ada Jacó.
Abraão kohana kaisai ada Isaque.
Tera kohana kaisai ada Abraão.
Nacor kohana kaisai ada Tera.
35 Seruque kohana kaisai ada Nacor.
Ragaú kohana kaisai ada Seruque.
Faleque kohana kaisai ada Ragaú.
Éber kohana kaisai ada Faleque.
Sala kohana kaisai ada Éber.
36 Cainã kohana kaisai ada Sala.
Arfaxade kohana kaisai ada Cainã.
Sem kohana kaisai ada Arfaxade.
Noé kohana kaisai ada Sem
Lameque kohana kaisai ada Noé.
37 Metusalém kohana kaisai ada Lameque.
Enoque kohana kaisai ada Metusalém.
Jarete kohana kaisai ada Enoque.
Maleleel kohana kaisai ada Jarete.
Cainã kohana kaisai ada Maleleel.
38 Enos kohana kaisai ada Cainã.
Sete kohana kaisai ada Enos.
Adão kohana kaisai ada Sete.
Deus kaisai ada Adão.
Deua binamonahaꞌiki ada Adão.