Jaharia bikaboroboroki ada Jesus
4
Hari.
Jordão vaini onikia ajihiꞌaha ada Jesus.
Maꞌonahai Jahaki Jesus vaꞌi-ra nahonariahihivini.
Maꞌonahai Jahakia biavikhaꞌaha ada Jesus amasia.
40 mahi hojaꞌaha.
Kaijaꞌaririhi ida amasi.
2 Ni-nahina-ra haki.
ꞌBairina mani ida Jesu-ra navaiꞌamiꞌia.
Oniaroa,
okhaꞌaha ada Jahari Jesus kania.
Bikaboroboroꞌaha ada Jesus bada biniꞌaja kaimoni ida badani Deua binofiriki.
Jesua ni-bikapoaripaꞌitxiki ida athi.
3 Jaharia biniꞌaha:
—Deus kaisai ihihi;
jaꞌdi-ra ꞌbai anihaꞌa.
4 Jesua biniꞌaha:
—Iniani.
Ni-Deus hora honariaki jaꞌdi-ra ꞌbai oanihavini.
Deus athi kapapirania hojaki ida athi:
“Ni-ꞌbai kaꞌoa binahokiki ida ijaꞌari.
Deus athi hahavi-ra anaabavini mani ida ijaꞌari-ra nahokija.”
— Jesua biniꞌaha ada Jahari.
5 Oniaroa,
arabo namahikia Jaharia biavikhaha ada Jesus,
binanokiahivini vihiha adani arabo hahavi kaijaꞌarini,
vakadiarabo hiki.
Jorakia binanokiahiha.
6-7 Biniꞌaha ada Jesus:
—Vaꞌora ohonariahaꞌoadahaki adani ijaꞌari hahavi,
vakadikaꞌdaꞌdi ohiki ho.
Hora kanamasiviꞌa bana!
Hora ikanamasivihi;
vaꞌora ihonariavini vaꞌora ovaꞌahaha vakadikaꞌdaꞌdi ihija kaimoni.
Vakadinahina kaidivakia ira onoꞌahi jaboni.
Ogathanihi ida arabo hahavi,
ohonariaki ida ijaꞌari hahavi,
vakadikaꞌdaꞌdi vihiki,
kodibadani-ra bada vaniꞌara kaimoni.
Kodiani hahavi adani ijaꞌari.
Hoariha kaꞌdaꞌdi hina-ra onofihi;
ovaꞌahaha.
Hora ikanamasivihi;
vakadikaꞌdaꞌdi ihini-ra ovaꞌahahi — niha ada Jahari,
Jesu-ra kaborovini,
bada biniꞌaja kaimoni ida Deua bivajahariki.
8 Hari.
Jesua biniꞌaha:
—Iniani.
Jokoa ira okanamasivirihi.
Deus athi kapapirania hojaki ida athi haria navaꞌisohiki kaimoni:
“Deus kaꞌoa-ra kanamasiviꞌa bana,
avakadikaꞌdaꞌdi hira
kaimoni.
Deus athi kaꞌoa-ra
vanaabaꞌa.”
— Jesua biniꞌaha ada Jahari.
9 Oniaroa,
Jerusalém sidajia Jaharia biavikhaha ijaꞌari Deu-ra khai vaniꞌavini kagorani ꞌdaꞌdini aꞌani sohiriamaꞌoki kania,
biniꞌaha:
—Araofarariꞌa bana naboꞌajaja.
Deus kaisai ihini mani ida ira akadavaꞌajahakivini hija,
iahaharia kaimoni.
10-11 Deus athi kapapirania biniꞌaki:
“Deus vaꞌora honariaki adani ibavi kaijaꞌarini kadania ira avagathanivini,
ivigarirariria kaimoni
ida jaꞌdi,
iabononi aꞌbororia
kaimoni jaboni.”
Nimania ida Deus athi — Jaharia biniꞌaha.
Asia vara niki ada Jahari:
—Deus kaisai ihihi;
araofarariꞌa naboꞌajaja mahija Deus ira akadavaꞌavini-ra ikaijoꞌavini.
12 Jesua bigathanihi ida athi:
—Iniani.
Jokoa iathini-ra onaabarihi.
Jokoa oaraofararirihi.
Deus athi haria navaꞌisohiki hari jaboni:
“Hariꞌa Deu-ra kaijoꞌa bana
badani danokia kabadanina,
iogaja kaimoni ida Deus hojana kadania.”
13 Oniaroa,
hari hiꞌimidiaꞌihi ida Jesus Jaharia bikaboroborovini.
Jesua ni-binaabaki ida Jahari athi.
Ajihiꞌaha ada Jahari.
Binokhahi ida mahi hoariha Jesu-ra kaboroboroꞌianavini kamahini kaimoni.
Jesus kabadani kamaꞌdani Galiléia kaarabonia
14 Hari.
Galiléia kaarabonia ajoiꞌaha ada Jesus.
Maꞌonahai Jahaki danona Jesus vaꞌi-ra nahonariahihiha.
Ijaꞌari hahavia vakamithaki ida Jesus varani hina Galiléia kaarabonia.
Lucas 4:14-44
15 Judeus kaijaꞌari Deu-ra vara vaniꞌavini kagorania,
Jesus vaꞌora kaꞌojomoꞌibakhiaki adani ijaꞌari vajoroniki.
Vakamithava vara vaabono vakaniꞌakhamaꞌaha:
—Jahaki ida Jesus kavarani.
Nazaré sidajia okhaha ada Jesus
16 Hari.
Okhaꞌaha ada Jesus Nazaré sidajia,
ibavi bivavijavaki kania.
Jesus hojana hiki ida judeus kaijaꞌari Deu-ra vara vaniꞌavini kagorania okhana avakoirina kamahini.
Oniania,
okhajakosiꞌaha ada Jesus,
vithiꞌaha.
Hojana oadani,
gaamananiꞌaha vara bivaniꞌaja kaimoni ida Deus athi kapapirani.
17 Deus athi kapapirani akadavaꞌava abonoa biarakhaꞌihi ida Deus athi kapapira pitani Jesus kania.
Isaías kohana athi kapapirani ida.
Jesua biarabikhaihi,
bikaragaꞌihi ida athii pitani Cristo varani hina-ra vavaꞌisohihijoravini.
Niha:
18 “Maꞌonahai Jahaki hora
aviꞌonanivini.
Hora nagathogathovini hiki
vakanahinariki-ra vaꞌora onanamithavini Deus
monina jahakia.
Hora nagathogathovini hiki
vaꞌora oakavaꞌijoara kaimoni adani ijaꞌari
vagathaki.
Hora nagathogathovini hiki
ijaꞌari vakamaodorohaki vanokho ꞌbaꞌdani-ra
oanavagahavini.
Hora nagathogathovini hiki
jaboni vaꞌora oakavaꞌijoara kaimoni adani ijaꞌari
vahoariha vaꞌora vanajaharihariki.
19 Hora nagathogathovini hiki
jaboni vaꞌora vara oniꞌara kaimoni adani ijaꞌari
hahavi:
‘Deua binofiki ida kidijaꞌari
vaꞌora oakavaꞌijoavini.’ ”
Nimania ida Isaías kohana athi — vara niha ada Jesus.
20 Jesua binahojaꞌimidiaꞌihi ida papira.
Deus athi kapapirani akadavaꞌava abono-ra noꞌavini hiꞌihi.
Vithiꞌianaha ada Jesus.
Ijaꞌari judeus kaijaꞌari Deu-ra vara vaniꞌavini kagorania vajoroniki Jesu-ra vada vaniꞌahahaꞌoadahaꞌaha.
21 Jesus vaꞌora niꞌaha:
—Deus hora nagathogathovini hiki bada oniꞌaja kaimoni ida badani athi kapapirania vara aꞌonira oniꞌavini hiꞌiki.
22 Varani-ra vakamithaꞌiki vaabono vara vakaniꞌakhamaꞌiki:
—Jahaki o Jesus.
Avajahaki ida vara bivaniꞌaꞌiki athi.
Akavaꞌibodivaraniki ida kidivarani jahaki.
José kaisai mani koda ada Jesus?
Nihaniki vania biogaja ida Deus athi nahina hini?
— vaabono vakaniꞌakhamaꞌaha.
23 Jesus vaꞌora niꞌaha:
—Hora vara avaniꞌaki bana aꞌoni varani paꞌitxia.
“Mijiko ihini,
iabono anaihotaꞌa.”
Hora avaniꞌaki bana jaboni aꞌoni:
“Akamithaꞌiki ida varani ihini
Cafarnaum kasidajinia
ijaꞌari vakavamoniki-ra vaꞌora ianaihotaꞌavini.
Kaꞌoa hihi ida varani ihini,
hihida sidaji Nazaré
onikia iavijavaki i,
bada iniꞌa jaboni ida kadabadani danoki.”
— Hora avaniꞌaki bana aꞌoni.
24 Asia vara niki ada Jesus:
— Aꞌonira onavaꞌisohiki bana ho.
Deus athi namoniva abono-ra vagathanijahakiriha adani ibavi bivavijavaki kasidajini kaijaꞌarini.
25 Mitha vakhaniꞌa.
Vara ovaniꞌaki ada Deus athi namoniva abono Elias kohana varani hina.
Kidijaꞌaria vagathanijahakiriha ada Elias kohana.
Elias hokina kari Deu-ra kanikhariaꞌiki ada.
Badara ahoarabakosiki khararijanariha ada bahi.
Vaiꞌami abani vihiꞌiki adani arabo kaijaꞌarini hahavi.
Vaipohiki adani kaariha Israel kaijaꞌari vahararana vahojaki,
vakainamoki ida vakadiꞌbai.
26 Kabaꞌi,
ni-Israel kaijaꞌari kaariha vihiki vakadiania Deua bikaronaꞌiki ada Elias okhana.
Arabo hoariha kaijaꞌarini kaariha kania Deua bikaronaꞌiki ada Elias,
Sarepta sidajia okhana,
Sidom kaarabonia.
27 Vara ovaniꞌaki jaboni ada Deus athi namoniva abono hoariha Eliseu oniki.
Kidijaꞌaria vagathanijahakiriha ada Eliseu kohana.
Eliseu hokina kari vaipohiki adani ijaꞌari asafi namani-ra najaharikia vakavamoniki,
Israel kaijaꞌari vahararana vahojaki.
Ni-Deus vaꞌora anaihotaki.
Naamã hoarana Síria kaaraboni kaijaꞌari vani ada Deua binajahaꞌara.
Aꞌonivani fori hiki hida oabono vara ovaniꞌavini.
Deus athi namoniva abono ohina mani ida oibavi ovavijavaki kasidajini kaijaꞌarini hora vagathanijahakiravini hija — vaꞌora niꞌaha ada Jesus.
28 Jesus athi-ra mitha vaniꞌaha adani ijaꞌari vajoroniki judeus kaijaꞌari Deu-ra vara vaniꞌavini kagorania,
vavajahariꞌihi ida kidivarani,
vaihamahikarahoꞌaha.
29 Oniaroa,
vigaamananiꞌaha,
Jesu-ra vagathiꞌaha avarahokaonaniꞌaha sidaji banininija.
Arabo namahiki kania hojaki ida Nazaré sidaji.
Jesu-ra avavikhaꞌaha.
Ipaꞌita namahiki kania vanofiki ida Jesu-ra avarokojohofonivini abinira kaimoni.
30 Ni-vakaabokaki avarokojohofonivini.
Radahaꞌoamaniꞌaha ada Jesus ijaꞌari vaipohiki vahararana,
ajihiꞌaha.
Jesua bianaihotaki ada makhira kabajadiki
31 Hari.
Okhaꞌaha ada Jesus Cafarnaum sidajia Galiléia kaarabonia.
Akhanoꞌaha,
hojaꞌaha.
Avakoirina kamahini judeus kaijaꞌari Deu-ra vara vaniꞌavini kagorania aviꞌoiꞌaha.
Vaꞌora kaꞌojomoꞌiꞌaha adani ijaꞌari vajoroniꞌiki.
32 Vakavaꞌibodivaraniki ida vaꞌora kaꞌojomoꞌivini niha ninini Jesua biogajahakiki ida nahina Deua binofiki,
oniani ida Deus athia vaꞌora kaꞌojomoꞌijahakivini hija.
33 Oniaroa,
judeus kaijaꞌari Deu-ra vara vaniꞌavini kagorania hojaha ada makhira kabajadiki.
Bodiꞌbarahaꞌaha:
34 —Jesus,
nahina hida akadiania inofija?
Haria inihimamaniki i koda?
Ira oogaki ho.
Ivani ijahakaꞌoaki i,
Deus ira karonaki i — makhira biniꞌaha ada Jesus.
35 Oniaroa,
Jesua bikaabaniꞌihi ida bajadi:
—Avisoniꞌa!
Makhira kania akaraꞌoꞌa bana!
Hari.
Bajadia binaraiꞌaha ada makhira vajoroniki vaviaha,
ajihiꞌihi ida bajadi.
Ni-makhanina hojaroniꞌiki ada makhira.
36 Vahoariha mitha vaniꞌaꞌihi,
vakavaꞌibodivaraniꞌihi ida Jesus kavarani.
Vaabono vakaniꞌakhamaꞌaha:
—Nahina nimania ida Jesus kavarani.
Kaꞌdaꞌdi oamani ada.
Danoki ida kidibadani.
Bikaabokaki ida bajadi akaraꞌoꞌini ijaꞌari kania.
Bajadia binaabaꞌiki ida athi — vaabono vakaniꞌakhamaꞌaha.
37 Galiléia kaarabonia akarafarakhamaki ida Jesus monina.
Jesus aihotahi abono hina kavaranihi
38 Hari.
Judeus kaijaꞌari Deu-ra vara vaniꞌavini kagorania ajihiꞌaha ada Jesus.
Simão gorana okhaꞌaha.
Kaikahiꞌaha gora bodinia oꞌoiꞌaha.
Kabaravakarahoki ida Simão kamasodini.
Simão Jesu-ra vara vaniꞌavini hiꞌini hida kidikavamoni.
39 Oniaroa,
biviꞌomaki kania okhamiha ada Jesus.
Biniꞌahi:
—Barava,
akaraꞌoꞌa gamo kania!
Jorakia radahaꞌihi ida kidibarava.
Gamaꞌihi ida Simão kamasodini.
Vaꞌora kahinanikaꞌihi.
40 Hari.
Mithani vaivaini vani,
Jesus kania ijaꞌari vaꞌora vavikhaꞌaha adani vakadivaꞌahi vakavamoniki.
Ipohiki ida vakadikavamoni.
Jesus vaꞌora kaabadaronahaꞌaha adani ijaꞌari vakavamoniki,
vaꞌora anaihotaꞌaha.
41 Vahararana vahojaki adani ijaꞌari vakabajadiki.
Ijaꞌari vakadiania avakaraꞌoꞌaha adani bajadi,
vabodiꞌbarahaꞌaha:
—Jesus,
ivani kaꞌdaꞌdi i!
Deus kaisai i!
Bajadia avigaki ada aihotahi abono Deua bikaronaꞌiki,
oniani ida vara vakhanijanarina Jesus vaꞌora kaabanivini hija.
Jesus monina hida
42 Hari.
Oniaroa,
kaꞌafokajomani vagavagani sidajia okhaonaniꞌaha ada Jesus.
Kaijaꞌaririki kani-ra anikhahaꞌavini.
Akhanoꞌaha hojaꞌaha.
Ijaꞌari Jesu-ra vanakoꞌdihavini,
vakaragaꞌaha amasia.
Vanofirihi ida Jesus ajihina ibavi hoariha okhana.
43 Oniania,
ijaꞌari vaipohiki-ra vaꞌora niꞌaha ada Jesus:
—Sidaji ipohiki,
ijaꞌari vahoariha vakadiania ookhaki ho.
Nini vani Deua binofija ida.
Vaꞌora okanamonivini hiki Deus ijaꞌari hahavi-ra vakaꞌdaꞌdivini kavaranihia.
Binofiki ida ijaꞌari hahavi-ra vakaꞌdaꞌdivini,
vakamithahahavija kaimoni ida Deus athi — vaꞌora niꞌaha ada Jesus.
44 Oniaroa,
ibavi hahavia aadahaoniꞌaha ada Jesus.
Judeus kaijaꞌari Deu-ra vara vaniꞌavini kagorania vaꞌora akaꞌojomoꞌionivini,
vaꞌora kanamonivini hiꞌihi ida Deus athi.