Jesua binajahaꞌiki ada makhira kavamonia asafi namani binajahariki
8
Hari.
Okharafoniꞌaha ada Jesus.
Ijaꞌari vaipohikia vavaipohihaꞌaha.
2 Oniaroa,
Jesus kania okhaꞌaha ada makhira kavamoniki.
Asafi hahavi namani-ra najaharikia kavamoniki ada.
Binamaakariꞌaha kajoꞌatharariꞌaha Jesus viaha.
Biniꞌaha:
—Jesus,
hora kajoamora bana!
Hora inajahavini-ra inofihi;
hora inajahahi — niha ada makhira.
3 Jesua bikanaibaviꞌihi ida saꞌa makhira namana,
bikadasaꞌaha,
biniꞌaha:
—Haꞌa,
onofiki ida ira onajahaꞌavini.
Jahaꞌa bana!
—Hariꞌa bana vahoariha-ra nanamithaꞌa ira onajahaꞌavini.
Okhaꞌa bana sasidotxi kania mahija iasafini namani-ra nokivini,
biogaja kaimoni ida ijahaꞌini.
Deus kavaꞌisohihi jirikia bihonariaki ida ijaꞌari jahaꞌiki Deu-ra kanavaꞌigavini igitha abononi ahaꞌdikia,
vahoariha avigaja kaimoni ida jahaꞌiki.
Sasidotxi ira nokivini naothinia inaabaꞌa bana ida Deus kavaꞌisohihi jiriki — niha ada Jesus.
Ajihiꞌaha ada makhira.
Jesua bianaihotaꞌiki ada sorara vakadikaꞌdaꞌdi kahonai abono
5 Hari.
Cafarnaum sidajia oꞌoiꞌaha ada Jesus.
Jesu-ra karagararihaha ada Roma sidaji kakaꞌdaꞌdini kasorarani.
6 Biniꞌaha:
—Jesus,
hora kajoamora bana!
Kavamoniki ada kodihonai abono.
Ada ogorana hojaha.
Kavamonikarahoki ada.
Imai ꞌbanani karaho-ra kamithaki ada,
ni-bikaabokaki ida giragirana — niha ada sorara vakaꞌdaꞌdiva.
7 Jesua biniꞌaha:
—Ookhaki ho kadania,
oanaihotaki bana ada kadahonai abono — niha ada Jesus.
8 Roma sidaji kakaꞌdaꞌdini kasorarania bigathaniꞌihi ida Jesus kavarani.
Biniꞌaha:
—Jesus,
ivani kaꞌdaꞌdi i.
Nahina ohirina mani ida ogorana ioꞌoini-ra onofiravini hija.
Ogorana iokharini kabaꞌi,
napaja ihojani kabaꞌi,
ihonaria bana ida kavamoni akaraꞌoni aihotara kaimoni ada kodihonai abono.
9 Hovani jaboni onaabaki ida athi hora vakaꞌdaꞌdiki hora honariabakhiavini hiki.
Vaꞌora ovakaꞌdaꞌdiki adani vahoariha,
oathi-ra vanaababakhiaki adani.
Okhana ohonariaha ada sorara,
okhamaniha.
Hida khana obaranahaha ada hoariha,
khamaniha.
Kodihonai abono-ra ohonariahi hihida badani-ra namonaha,
binamonahamanihi.
Oathi-ra vanaabaki adani vaꞌora ovakaꞌdaꞌdiki.
Ivani jaboni kaꞌdaꞌdi i.
Nahina-ra ihonariahi;
iathini-ra naabahi.
Kavamoni akaraꞌoni-ra ihonariahi kodihonai abono kania,
akaraꞌomanihi bana — Jesu-ra niꞌaha ada sorara vakadikaꞌdaꞌdi.
10 Jesua bikamithaꞌihi ida sorara vakadikaꞌdaꞌdi kavarani,
bikavaꞌibodivaranikarahoꞌihi.
Ijaꞌari vaipohihana hiki-ra niꞌaha:
—Ni-okaragaꞌiaki kaho ada judeus kaijaꞌari hoarana hora kajariꞌdariki,
hihada Roma sidaji kakaꞌdaꞌdini kasorarani hora kajariꞌdaravini fori hiki.
Judeus kaijaꞌari hirina kabaꞌi,
ni-hora kajariꞌdaki — vaꞌora niꞌaha ada Jesus.
11 Asia vara niha ada Jesus:
—Aꞌonira onavaꞌisohivini hiki.
Deus kania nama vikhaki bana adani arabo hahavi kaijaꞌarini,
ijaꞌari Deus athi-ra vanaababakhiaꞌiki.
Arabo hahavia vikhaki bana adani,
vavithirarina viꞌbaijabanaki bana adani Deus kania.
Akadijaꞌari avikhananavaki Abraão kohana,
Isaque kohana,
Jacó kohana vakadiania vavithiki bana adani.
12 Ijaꞌari vahoariha judeus kaijaꞌari vihina kabaꞌi,
ni-vanofiki ida Deus athi-ra vanaabavini.
Deus vaꞌora nagathogathovini kabaꞌi kidijaꞌari vihira kaimoni,
ni-aviꞌoiki Deus ibavia.
Oniani ida bana Deus vaꞌora nahokahivini hija Ibavi Jaharikaꞌoakia.
Bakibakini kania vaasaraꞌoamanira adani.
Vaofinina vakanada kakiroromisiꞌoamanira adani ijaꞌari Ibavi Jaharikaꞌoakia vahojaki.
13 Jesua biniꞌaha ada Roma sidaji kakaꞌdaꞌdini kasorarani:
—Igorania ajoiꞌa.
Ikajariꞌdarihi ida kadahonai abono-ra oanaihotavini,
oniani ida oanaihotavini hija — niha ada Jesus.
Hari.
Oniaroa,
jorakia aihotaꞌiki ada kidihonai abono.
Hari.
Joiꞌaha ada sorara vakaꞌdaꞌdiva gorana.
Jesua bianaihotaki ida Pedro kamasodini
14 Hari.
Ajihiꞌaha ada Jesus.
Pedro gorana okhaꞌaha.
Kaikahiꞌaha gora bodinia oꞌoiꞌaha.
Pedro kamasodini kabaravaki,
omaki.
15 Jesua biakaabadaꞌihi ida saꞌani.
Jorakia radahaꞌihi ida kidibarava.
Gamaꞌihi,
vaꞌora kahinanikaꞌihi.
16 Hari.
Mithani vaivaini vani Jesus kania ijaꞌari vaꞌora vavikhaꞌaha adani ijaꞌari vaipohiki,
vakabajadiki,
vakavamoniki vihiki.
Hoaranija Jesus bihonariahi ida bajadi akaraꞌoꞌini ijaꞌari kania,
akaraꞌomaniꞌihi.
Ijaꞌari hahavi vakavamoniki avaihotaꞌiki afohanana.
Vara vaꞌora niꞌaha,
avaihotamaniꞌaha.
17 ꞌBoꞌdakari Deus athi namoniva abono Isaías onikia vara bivaniꞌajoraꞌiki ida Jesus ijaꞌari-ra kajoamoravini.
Niha ada Isaías kohana:
“Ovari akadikavamoni-ra aniki,
haria anaihotaki ada.”
Hari.
Jesua bada biniꞌaꞌiki ida kidibadani danoki,
namithaꞌiki ida Isaías kohana bivavaꞌisohihijoraꞌiki.
Ijaꞌaria vanofiki ida Jesus ipohina vihina
18 Hari.
Jesus vaꞌora nokiꞌaha adani ijaꞌari vaipohiki kidiania vajoroniki.
Vaꞌora niꞌaha adani kidipohi:
—Avaakakafiani bana ꞌdako pitanija.
19 Oniaroa,
Jesus kania okhaha ada judeus kaijaꞌari kaꞌojomoꞌiva abono,
biniꞌaha:
—Jesus,
onofiki ida ira ovaipohihaꞌavini.
Ibavi hana hinia iokhahi,
ookhahi jaboni.
20 Oniaroa,
Jesua binavaꞌisohiꞌaha ada makhira ipohina hina-ra nofiki kidimahi niha nininia,
oniani ida athi bigathanivini hija:
—Igitha vavahojaki ida vagorana ava hodinia akoirija kaimoni.
Igitha varabokia vavahojaki ida vagorana ava vadinia.
Hovani ijaꞌari hahavi vakadiꞌaajo ohina kabaꞌi,
ni-hojaki ida ibavi oavakoiriki kaimoni — niha ada Jesus.
21 Hari.
Jesus kania okhaha ada makhira hoariha,
Jesus ipohina ada.
Biniꞌaha:
—Jesus,
jakana oajoiꞌimidiava kaho kodiabiꞌi abaꞌona-ra okaꞌdamahavini naothinia bona ira ovaipohihahi.
22 Jesua biniꞌaha:
—Iniani.
Jakaho ijaꞌari abiniki-ra vakaꞌdamava adani ijaꞌari vahoariha vahokina kabaꞌi Deus viaha vaabiniki fori vihiki.
Ivani hora vaipohihaꞌa bana — niha ada Jesus.
Jesua bikaabaniki ida sirisiriki, komini kihiki
23-24 Hari.
Kanava kabodinia vakiꞌdamaꞌaha adani Jesus kidipohi khama.
Ai vakihiꞌaha.
ꞌDako pitanija aavakakafianina kabaꞌi,
jorakia kamaꞌdaꞌihi ida sirisiriki danoki.
Komini kanaꞌbahaki kakatarararahaki kanava kanamani-ra akaradafarahanaki.
Vadimaniha ada Jesus.
25 Avikhamahanaꞌaha adani Jesus ipohina kidiania,
vakananokiahaꞌaha:
—Jesus,
Jesus,
haria akavaꞌijoa,
ahidananaki bana hari!
—Radahaꞌa!
Radahaꞌihi ida sirisiriki,
karadahaꞌihi jaboni ida komini kanaꞌbahaki.
Ipohina-ra vaꞌora kaniꞌaꞌaha:
—Niha avakhanimanija avaofiniki?
Deu-ra vavakaijoka bana.
Avakajariꞌdamanija ida Deus aꞌonira akadavaꞌavini?
27 Sirisiriki,
komini kihiki jorakia karadahani mani ida vaꞌora navaꞌibodivaranikarahoja.
Vaabono vakaniꞌakhamaꞌaha:
—Makhira kaꞌoa hiriha hada.
Ni-anokiꞌiaki kaho ida ijaꞌari hoariha ovari fori hiki sirisiriki,
komini kihikia athi bikamithaki — vaabono vakaniꞌakhamaꞌaha.
Makhira vakabajadiki avaihotana varani vihina hida
28 Hari.
Galiléia oniki ꞌdakoa avakakafianiꞌaha adani Jesus.
Gadara kaarabonia avakoꞌomisiꞌaha.
Avigaimoriꞌaha.
Oniaroa,
Jesu-ra vakaragararihaꞌaha adani makhira vakabajadiki viꞌbamiki,
ꞌdama kania vikhanaiki adani.
Jaꞌdi kahodijamaꞌoki bodinia vaibaviki adani makhira vakabajadiki.
Vaihamahiki adani.
Ijaꞌari vaꞌora vifinivini mani ida vamaakarina varadahana-ra vanofiravini hija.
29 Vakabajadikia vaniꞌaꞌaha vabodiꞌbarahana:
—Jesus,
ivani Deus kaisai i.
Jakaho arihojava.
Ni-kaikahiki kaho ida mahi jaharikia haria iarakhaja kaimoni.
30 Hari.
Vahojamaniha adani hirari vaipohiki viꞌbaiki maakaria.
31 Bajadi Jesu-ra vakanikhariadanokiꞌaha:
—Haria vaꞌadi bana!
Aakaraꞌona-ra ihonariahi;
haria karonaꞌa hirari vakadiania mahija haria vavaadahaꞌavini.
32 —Vaadahaꞌa — Jesus vaꞌora niꞌaha adani bajadi.
Hari.
Makhira kania vakaraꞌoꞌaha adani bajadi,
hirari-ra vagathiꞌaha.
Vaipohiꞌoamanira adani hirari.
Vakiꞌdarahahaꞌaha,
avikharafoniꞌaha,
arabo aꞌdomarariki kania avakiꞌdafafoniꞌaha,
avahidanaꞌaha.
33 Oniaroa,
vaofiniꞌaha adani makhira hirari-ra avakadavaꞌaki.
Avigaꞌaha.
Ijaꞌari vaibavia avakhanoꞌaha,
vaꞌora vakanamoniꞌaha makhira viꞌbamiki vamonina.
Vakhanihaꞌaha:
—Jesus vaꞌora honariaꞌiki adani bajadi makhira viꞌbamiki vakadiania avakaraꞌoꞌina.
Ai vihiꞌaha adani bajadi.
Ni-vakabajadijanaki adani makhira — vaꞌora niꞌaha.
34 Hari.
Ijaꞌari afohahavi sidaji vahojaki moni-ra vakamithaꞌiki Jesus kania avikhaꞌiki.
Vanokiha,
vaniꞌaha:
—Ajihiꞌa bana akadiaraboa.