Vahoariha-ra vaꞌora anasohivini varani hini hida
7
Hari.
Jesus vaꞌora niꞌaha adani vajoroniki:
—Hariꞌa vaꞌora avanaathidanoarari bana adani vahoariha Jahari kabadania vakabadanina,
avarigaravini oadani ida vanamonahavini vanamonaharavini.
Vaꞌora avaranaathidanoaraririha;
ni-Deus aꞌonira anaathidanoarariki bana jaboni.
2 Vara avavaniꞌabakhiahi ida vahoariha vakadihojai jahaki;
Deua vara bivaniꞌahi ida avakadihojai jahaki jaboni.
Vara avavaniꞌabakhiahi ida vahoariha vakadihojai jahariki;
Deua vara bivaniꞌahi ida avakadihojai jahariki jaboni.
3 Hogoi moramorani nokhoi ꞌbaꞌdania hojaki fori hiki ida hojai jahariki.
Inokhoni ꞌbaꞌdania hojani oadani ida ava pitani karaho,
hariꞌa ikaijoꞌa ida hogoi moramorani iigamini nokho ꞌbaꞌdania aniani.
4 Inokhoni ꞌbaꞌdania ava pitani karaho aniarini oadani,
hariꞌa iigamini-ra niꞌa:
“Aajo,
onofiki ida hogoi moramorani pitani paꞌitxi-ra oanivini
inokhoni ꞌbaꞌdania.”
5 Ijahani-ra ikahiꞌbadaraki i.
Imiroꞌa iani oni ava pitani karaho inokhoni ꞌbaꞌdania hojaki.
Ianivini naothinia ikaabokaki ida vada inijahakini,
oniani ida iigamini nokho ꞌbaꞌdania hogoi moramorani aniani-ra ikaabokavini hija.
Bada iniꞌavini oadani ida hojai asohiriki,
asohipaꞌitxirihi ida iigamini-ra inavaꞌisohivini,
bikavaꞌipahinija kaimoni ida kidihojai asohiriki.
Imiroꞌa ikavaꞌipahini hida bana kadahojai,
kadavarani asohiriki — niha ada Jesus.
6 Asia vara niha ada Jesus:
—Hariꞌa vara vaꞌora vaniꞌahahaꞌoadaha adani Deu-ra vakajoniki Deus varani hina.
Aꞌonira vakaihamahiki adani.
Jomahi vaihamahiki fori vihiki adani.
Anakaidivava ida Deus athi.
Nahina kaidivaki fori hiki ida.
Ni-hirari-ra avanoꞌavini hiki ida nahina kaidivaki.
Avanoꞌavini hija vaha,
bikadaꞌahaꞌahamanihi vaha,
ni-binakaidivaki vaha.
Hirari fori vihiki adani hojai asohiriki-ra vakavaꞌipahinivini-ra vanofiriki.
Jahaki ada Deus
7 Hari.
Jesus vaꞌora kaꞌojomoꞌiki adani ijaꞌari Deu-ra vakanikhariabakhiaki.
Biniꞌaha:
—Aꞌonira onavaꞌisohiki ho.
Deu-ra vakanikharia bana avanofikia mahija avagathanivini.
Deus kania vakanikhariahaꞌoadaha bana ida avanofiki mahija aꞌonira noꞌavini hini ida avakanikhariaki.
8 Ijaꞌari hahavi nahina jahakia Deu-ra vakanikhariaha;
vagathanihi ida vakanikhariaki.
Ijaꞌaria binakoꞌdiha ada Deus;
bikaragaha.
9 Kadaisai pãoa ira kanikhariahi,
jaꞌdi vania koda bana inoꞌara ada?
Iniani.
Jokoa nahina jaharikia inoꞌariha ada.
10 Abaisana ira kanikhariaha,
makha vania koda bana inoꞌara ada?
Iniani.
Jokoa nahina jaharikia inoꞌariha ada.
11 Aꞌonivani hojai asohirikia avakahojaini kabaꞌi,
avarigaki ida nahina jahakia avakadisai-ra vaꞌora avanoꞌavini.
Jahaꞌoamanira ada avakadiabiꞌi nama hojaki.
Aꞌonira noꞌaki bana ada nahina jahaki avakanikhariavini hikia.
12 Avavajahaki ida vahoariha aꞌonira vakajoamoravini.
Vaꞌora vakajoamora bana adani vahoariha.
Nimania ida Deus kavaꞌisohihi jiriki athini.
Nimania jaboni ida Deus athi namoniva abono vaathi ijaꞌari-ra vakaꞌojomoꞌivini hiki.
Bakatha karabodiriki varani hini hida
13-14 Hari.
Vara niꞌianaha ada Jesus.
Kidivarani hiki ida hagihi rabodiki hagihi rabodiriki ijaꞌaria vavaadahaki kaimoni.
Vaꞌora niꞌaha:
—Bakatha karabodirikia aviꞌoi bana mahija hagihi rabodirikia avaadahavini.
Ibavi Jahakaꞌoaki kania okhaki ida hagihi rabodiriki.
Ibavi Jaharikaꞌoaki kania okhaki ida hagihi rabodiki.
Ijaꞌari vaipohiki vaadahaki hagihi rabodikia.
Vakanakoꞌdivini kabaꞌi ida bakatha karabodiriki,
ni-ijaꞌari hahavia vaakaragaki,
oniani ida ijaꞌari vaipohiriki-ra naadahaja hagihi rabodirikia.
Deus athi namoniva abono vihina-ra vakahiꞌbadaraki
15 Asia vara niha ada Jesus:
—Vaꞌora avakavaꞌigairi bana adani Deus athi namoniva abono vihina vakahiꞌbadaraki.
Jahani kamithavahaki ida vanivaha vakadivarani,
vanofiki ida aꞌonira vakaborovini bada avaniꞌaja kaimoni ida Deua bivajahariki.
Vaꞌora avakavaꞌigairi bana.
16 Vada vaniꞌabakhia bana ida Deus athi namoniva abono vakadihojai.
Badani Deua bivajahariki-ra bada vaniꞌaha;
Deus athi namoniva abono vihirina vaꞌora avarigaha.
Badani Deua bivajahaki-ra bada vaniꞌaha;
Deus vaꞌora karonavini vaꞌora avarigaha.
Ijaꞌari kahojai-ra avanokivini vani avarigaja ida ijaꞌari jahani jaharini.
Ni-hojai jaharikia kahojaiki ida ijaꞌari jahaki.
17 Ihiꞌai avani fori hiki ida ijaꞌari.
Jahahi ida ihiꞌai avani,
jahahi ida ihiꞌai bononi.
Jaharihi ida ihiꞌai avani,
jaharihi jaboni ida bononi.
18 Ihiꞌai avani jahaki kania ni-hojaki ida ihiꞌai bononi jahariki.
Ihiꞌai avani jahariki kania ni-hojaki ida ihiꞌai bononi jahaki.
Ihiꞌai fori hiki ida ijaꞌari kahojai.
Jahahi ida ijaꞌari,
jahahi jaboni ida kidihojai.
Jaharihi ida ijaꞌari,
ni-jahaki ida kidihojai jaboni.
19 Ijaꞌaria binobaki ida ihiꞌai avani ihiꞌai bononi jahariki-ra vahojaki.
Binobavini naothinia bioꞌboniꞌihi siho kabodinia.
20 Oniaroa,
vada avaniꞌahi ida Deus athi namoniva abono vakadihojai hahavi.
Jaharihi ida vakadihojai vaꞌora avarigaha adani Deus kaijaꞌari vihina-ra vakahiꞌbadaraki.
Deus ibavia oꞌoini varani hini
21 Hari.
Vara niꞌianaha ada Jesus:
—Ni-aviꞌoiki bana adani ijaꞌari hahavi Deus ibavia nama kaꞌdaꞌdia hora vanaonibakhiaki.
Aviꞌoiki bana adani ijaꞌari kodiabiꞌi athi-ra vanaabaki.
Nama hojaki ada kodiabiꞌi.
22 Ijaꞌari-ra nasohivini kamahini ijaꞌari vaipohiki hora vaniꞌaki bana ho:
“Jesus,
vaꞌora akanamonibakhiaki adani ijaꞌari
vaipohiki Deus athia.
Bajadi-ra aniꞌahananaki jaboni hari:
‘Jesus Cristo ira honariaki i ijaꞌari kania akaraꞌoꞌa.’
Akhanibakhiaki hari.
Jesus,
bada aniꞌabakhiaꞌiki jaboni ida kadabadani danoki ipohiki.”
“Hojai jaharikia avakahojaibakhiaki aꞌoni,
oniani ida kodijaꞌari aꞌonira niharija.
Ni-aꞌonira oogaki.
Akaraꞌo bana kodiania!”
Ijaꞌari Jesus athi-ra naabavini varani hini
24 Hari.
Rajomi kavaranihi hoariha vaꞌora vara niꞌaha ada Jesus:
—Oathi-ra mitha niꞌakia binaabaki ida oathi.
Gora kaaraki-ra namonahaki vani fori hija hida ijaꞌari ogahaki.
Bikhoriꞌimidiahi ida hodi abihiaki,
gora avani arokhojahani ibavini kaimoni aꞌdaimaki.
25 Gora aꞌdiahini naothinia,
jiꞌbinini kamaꞌdaꞌihi ida vaini kapahani.
Vaini kapahani jorania bigathiꞌihi ida gora avani,
ni-hoꞌdohoꞌdoꞌiki ida gora.
Abihiaki ida gora avani nami imani bodinia.
26 Gora-ra namonahaki vani fori hija jaboni ida ijaꞌari hoariha ogahariki,
bikamithahi ida oathi,
ni-binaabaꞌiki.
Binamonahahi ida hodi abihiariki,
arokhojahajahakirihi ida gora avani.
Binaibaviꞌihi ida gora avani hodi abihiariki bodinia.
27 Gora aꞌdiahini naothinia,
jiꞌbinini kamaꞌdaꞌihi ida vaini kapahani.
Vaini kapahani jorania bigathiꞌihi ida gora avani,
adariꞌihi ihimikaꞌoaꞌihi ida gora — niha ada Jesus.
Jesus kaꞌojomoꞌihi kavaranihi
28 Anokhomiꞌiki ida Jesus kavarani vara vaꞌora niꞌavini hiki adani ijaꞌari vaipohiki.
Vakavaꞌibodivaraniꞌihi ida niha ninini vaꞌora kaꞌojomoꞌivini hiki.
29 Vaabono vakaniꞌakhamaꞌaha:
—Akadijaꞌari vakaꞌojomoꞌiva abono fori hiriha ada Jesus.
Jesua biogaki ida nahina Deua binofiki,
oniani ida Deus athia vaꞌora kaꞌojomoꞌijahakivini hija.
Akadijaꞌari vakaꞌojomoꞌiva abono ni-Deu-ra avigajahakiki,
ni-vavaasohihijahakiki ida Deus athi nahina hini Deua vara bivaniꞌaꞌiki.