MARCOS
Marcoa vara bivaniꞌaki ida Jesus monina jahaki
João Batista varani hina
1
Jesus Cristo kavarani hiki ida monina jahaki.
Deus kaisai ada Jesus Cristo.
2 Hida vani varani moni jahaki kamaꞌdani.
ꞌBoꞌdakari hojaki ada Deus athi namoniva abono Isaías oniki.
Isaías kohana binajiriꞌiki ida Deus athi kapapirani pitani.
Biniꞌaki:
—Deus Jesu-ra navaꞌisohivini:
“Kodisai,
iokhani viahania
okaronaki bana ada makhira oathi avikhava abono hira kaimoni.
Ovari vaꞌora navaꞌisohiki adani ijaꞌari hahavi
ikaikahini-ra vanaviahanokhara kaimoni.
3 Oniaroa,
amasia hojaki bana ada iviahania okaronaki,
ijaꞌari-ra vaꞌora niꞌaꞌaha bana athi ꞌbarakia:
‘Amaakariki ida akadikaꞌdaꞌdi kaikahina kamahini.
Vanamonahaꞌa ida hagihi
sohiki
akadikaꞌdaꞌdia bivaadahaki kaimoni.
Vanajahaꞌa ida hagihi kidimoni.’ ”
Nimania ida Isaías kohana athi papira hojaki.
Isaías kohana vara bivaniꞌaki ida hagihi-ra najahaki,
kidivarani kaꞌoa ida ijaꞌari kamahi-ra nasohija.
4 Hari.
Oniaroa,
kaikahiꞌaha ada makhira Deua bikaronaki,
onina João Batista.
Amasia hojaki ada.
Kagorarihi ida amasi.
Hari.
Vaꞌora navaꞌisohibakhiaki adani ijaꞌari vaipohiki.
Vaꞌora niꞌavini:
—Jahari kahojai-ra vakavaꞌipahinikaꞌoa bana.
Hariꞌa vanofijana bana ida Jahari kahojaia avakahojaibakhiani mahija aꞌonira okanavini,
Deua binaꞌbiraja kaimoni ida avakadihojai asohiriki bada avaniꞌabakhiaki — vaꞌora niꞌaha ada João Batista.
Jesus é batizado (Marcos 1:4-11)
5 João Batista kania vakhanoꞌaha adani ijaꞌari vaipohiki.
Judéia kaaraboni kaijaꞌarini João kani-ra avanikhabakhiaki.
Jerusalém sidaji kaijaꞌarini João kani-ra avanikhabakhiaki jaboni.
João kavarani-ra vakamithavini-ra vanofiki.
Deus kania vara vavaniꞌavini hiki ida vakadihojai asohiriki hahavi.
Vakavaꞌipahinivini vanofivini,
Deus binaꞌbiraja kaimoni ida vakadihojai asohiriki.
Vara vavaniꞌavini naothinia,
João vaꞌora kanaꞌaha afohanana Jordão vaini onikia.
6 João Batista kamakari hiki ida camelo asafi amonahaki.
Bikaimahaki jaboni jararia baasafi kacinturãohi.
Kidiꞌbai hiki omavari fori hiki,
bahina aꞌbana hiki.
7 Hari.
João Batista ijaꞌari-ra vaꞌora niꞌaha:
—Onaothia khaki bana ada hoariha.
Kaꞌdaꞌdi kaꞌoa ada ovari.
Hovani kidihonai abono ho.
Arafiaki ida kidihojai asohikaꞌoani.
Kodihojai jahani fori hirihi ida kidihojai jahani arafiaki,
kabaꞌi hora nagathogathoha oakodiara kaimoni.
8 Hovani aꞌonira okanaja paha bodinia.
Ovaria bikaronaki bana ada Maꞌonahai Jahaki avavaꞌini-ra nahonariahihiki kaimoni — vaꞌora niꞌaha ada João Batista.
Joãoa bikanaki ada Jesus
9 Oniaro kari,
Galiléia kaarabonia hojaha ada Jesus.
Nazaré sidajia hojaha.
Oniaroa,
ajihiꞌaha,
okhaꞌaha Jordão vaini onikia.
João Batista kania akhanofoniꞌaha.
Joãoa bikanaꞌaha ada Jesus vainia.
10 Jesus kanana naothinia ogaimoriꞌaha.
Binokiꞌihi ida nama arabikhajahavahaki,
binokiha jaboni ada Maꞌonahai Jahaki gariꞌina kidiania,
hoꞌdoko aagariki fori hina.
11 Nama kamithavahaki ida Deus athi:
—Ivani kodisai i.
Ira onofijahakiki i.
Khai oniꞌaki ida ihojani.
Jaharia bikaboroboroki ada Jesus
12 Oniaroa,
Maꞌonahai Jahakia bihonariaha ada Jesus amasia okhana.
Kaijaꞌaririhi ida amasi.
13 Hari.
40 mahi vani hojara ada Jesus amasia.
Mahi hahavi okhaha ada Jahari Jesus kania bikaborobakhiaꞌaha ada Jesus,
bada biniꞌaja kaimoni ida badani Deua bivajahariki.
Jesua ni-bikapoaripaꞌitxiki ida athi.
Tapoꞌija vahojaki jaboni amasia.
Oniaroa,
vigaariha adani Deus ibavi kaijaꞌarini Jesu-ra akadavaꞌara kaimoni.
Jesus kabadani kamaꞌdani Galiléia kaarabonia
14 Hari.
Arabo kakaꞌdaꞌdinia gathana bivahonariahiꞌaha ada João Batista,
cadeia avibaira kaimoni.
Hari.
Oniaroa,
Galiléia kaarabonia okhaꞌaha ada Jesus.
Ijaꞌari-ra vara vaꞌora niꞌavini hiꞌihi ida Deus monina jahaki.
15 Vaꞌora niꞌaha:
—Hidakabaꞌi Deua binofiki ida athi avanaabavini.
Maakariki ida mahi Deus ijaꞌari hahavi-ra vakaꞌdaꞌdivini.
Avakadihojai asohiriki-ra vakavaꞌipahinikaꞌoa bana.
Hariꞌa vanofijana.
Vavakaijokakaꞌoa bana ida Deus monina varani hini.
Aꞌonira akavaꞌijoavini-ra nofiki bana ada — vaꞌora niꞌaha ada Jesus.
16 Oniaroa,
Galiléia ꞌdako vadinia khabaoniha ada Jesus,
vaꞌora kanokiha adani araba abono viꞌbamiki vakatahafahaki.
Aajojahiki Simão Pedro,
kajoꞌojahiki André.
17 Jesus vaꞌora kaniꞌaha:
—Hora vavaipohiha mahija badani hoariha aꞌonira okaꞌojomoꞌivini.
Aꞌonira okaꞌojomoꞌivini hiki ijaꞌari vahoariha-ra avakaboaꞌivini kodijaꞌari vihira kaimoni — vaꞌora niꞌaha ada Jesus.
18 Oniaroa,
vakahagi kabodinia vakanahojaꞌihi ida vakaditahafa,
Jesu-ra vavaipohihaꞌaha.
19 Avikhaꞌianaha adani Jesus,
vaꞌora vakanokiha adani araba abono vahoariha vakoꞌbamiki,
vakadiabiꞌi khama.
Aajojahiki Tiago,
kajoꞌojahiki João.
Vakadiabiꞌi Zebedeu oniki.
Vakahagi kabodinia vahojaki adani.
Bada vakhaniki adani tahafa-ra avakanajaꞌdivini.
20 Jesus vaꞌora baranahaha adani viꞌbamiki:
—Hora vavaipohiha!
Jorakia vakahagi-ra vakanahojahaꞌaha.
Vakaaminaꞌaha ada vakadiabiꞌi,
vakadihonai abono vihiki jaboni,
Jesu-ra vavaipohihaꞌaha.
Avikhaꞌaha.
Jesua bianaihotaki ada makhira kabajadiki
21 Hari.
Cafarnaum sidaji onikia avakhanoha adani Jesus,
vahojaꞌaha.
Avakoirina kamahini judeus kaijaꞌari Deu-ra vara vaniꞌavini kagorania aviꞌoiꞌaha.
Vaꞌora kaꞌojomoꞌiꞌaha adani ijaꞌari vajoroniꞌiki.
22 Vakavaꞌibodivaraniki ida vaꞌora kaꞌojomoꞌivini niha ninini Jesua biogajahakiki ida nahina Deua binofiki,
oniani ida Deus athia vaꞌora kaꞌojomoꞌijahakivini hija.
Judeus kaijaꞌari vakaꞌojomoꞌiva abonoa ni-avigajahakiki,
Jesus fori vihiriha adani.
23 Hari.
Oniaroa,
judeus kaijaꞌari Deu-ra vara vaniꞌavini kagorania hojaha ada makhira kabajadiki.
Bodiꞌbarahaꞌaha:
24 —Jesus,
nahina hida akadiania inofija?
Haria inihimamaniki i koda?
Ira oogaki ho.
Ivani ijahakaꞌoaki i,
Deus ira karonavini hida ikhani — makhira biniꞌaha ada Jesus.
25 Oniaroa,
Jesua bikaabaniꞌihi ida bajadi:
—Avisoniꞌa!
Makhira kania akaraꞌoꞌa bana!
26 Hari.
Bajadia binaraiꞌaha ada makhira,
bodiꞌbaraꞌihi,
ajihiꞌihi.
27 Vahoariha mitha vaniꞌaꞌihi,
vakavaꞌibodivaraniꞌihi ida Jesus kavarani.
Vaabono vakaniꞌakhamaꞌaha:
—Nahina nimania ida Jesus kaꞌojomoꞌihi athini jaꞌdini akamithabiininiꞌiki.
Kaꞌdaꞌdi oamani ada Jesus.
Ovaria bikaabokaki ida bajadi akaraꞌoꞌini-ra honariavini.
Bajadia binaabaꞌiki ida athi — vaabono vakaniꞌakhamaꞌaha.
28 Ijaꞌaria vara avavaniꞌaoniꞌiki ida Jesus varani hina.
Galiléia kaaraboni kaijaꞌarini vaipohikia vakamithaꞌihi.
Jesua bianaihotaki ida Simão Pedro kamasodini
29 Hari.
Oniaroa,
judeus kaijaꞌari Deu-ra vara vaniꞌavini kagorania ai vihiꞌaha adani Jesus,
kidipohi khama,
Tiago João vihiki.
Simão,
André vihiki vagorana avikhaꞌaha adani Jesus.
Vakaikahiha,
gora bodinia aviꞌoiꞌaha.
30 Simão kamasodini kabaravaki,
omaki.
Jesu-ra vara vaniꞌavini hiꞌihi hida kidikavamoni.
31 Biviꞌomaki kania okhamiha ada Jesus,
saꞌani biagathiꞌihi,
bikajoamoravini biragamaꞌihi.
Oniaroa,
jorakia radahaꞌihi ida kidibarava,
vaꞌora kahinanikaꞌihi.
32 Hari.
Mithani vaivaini vani,
Jesus kania ijaꞌari vaꞌora vavikhaꞌaha adani ijaꞌari vahoariha vaipohiki vakavamoniki.
Vakabajadiki-ra vaꞌora vavikhaꞌavini jaboni.
33 Gora banininija vajoronihahaviha adani sidaji kaijaꞌarini vâipohiki bakatha.
34 Vakavamoniki-ra vaꞌora anaihotaꞌaha ada Jesus.
Ipohiki ida vakadikavamoni.
Ijaꞌari vaipohiki vakavamoniki avaꞌaihotaꞌiki afohanana.
Jesua bihonariahi ida bajadi akaraꞌoꞌini ijaꞌari kania,
akaraꞌomaniꞌihi.
Bajadia avigaki ada Jesus Deus kaisai hina,
oniani ida Jesus bajadi vara vakhanina-ra vaꞌaharavini hija.
Galiléia kaarabonia aadahaoniki ada Jesus
35 Hari.
Oniaroa,
kaꞌafokajomani avagarini vani gamaꞌaha ada Jesus,
ajihiꞌaha,
kaijaꞌaririki kani-ra anikhahaꞌavini.
Amasia kaikahiꞌaha,
Deu-ra vara niꞌaha.
36 Oniaroa,
vanokhoꞌaforaꞌaha adani Simão.
Ai vihiꞌaha,
Jesu-ra avanakoꞌdionivini.
37 Vakaragaꞌaha,
Jesu-ra vaniꞌaꞌaha:
—Ijaꞌari vahoariha vaibavi maakarikia aokhaꞌava mahija Deus athia vaꞌora okanamonivini,
oniani hida hora arakhaja — vaꞌora niꞌaha ada Jesus.
39 Oniaroa,
avaadahaoniꞌaha Galiléia kaaraboni kaibavinia vahihaviꞌaha.
Judeus kaijaꞌari Deu-ra vara vaniꞌavini kagorani hahavia vaꞌora kanamonivini hiki hida Deus athi.
Jesus vaꞌora nokiha adani ijaꞌari vakabajadiki,
bajadi akaraꞌoꞌini-ra honariaꞌaha.
Jesua binajahaki ada makhira kavamonia asafi namani binajahariki
40 Hari.
Jesus kania khaꞌaha ada makhira kavamoniki.
Asafi hahavi namani-ra najaharikia kakavamoniki ada.
Binamaakariꞌaha,
kajoꞌatharariꞌaha Jesus viaha.
Biniꞌaha:
—Jesus,
hora kajoamora bana.
Hora inajahavini-ra inofihi;
hora inajahahi — niha ada makhira.
41 Jesua binakaidivamaniha,
bikanaibaviꞌihi ida saꞌa makhira namana,
bikadasaꞌaha,
biniꞌaha:
—Haꞌa.
Onofiki ida ira onajahavini.
42 Vara nina kabaꞌi avisoniꞌihi ida kidikavamoni asafi namania.
Jahaꞌaha ada makhira.
43 Hari.
Jesua bikaabanidanokiꞌaha:
44 —Hariꞌa bana vahoariha-ra nanamithaꞌa ira onajahaꞌavini.
Okhaꞌa bana sasidotxi kania mahija iasafini namani-ra nokivini,
biogaja kaimoni ida ijahaꞌini.
Deus kavaꞌisohihi jirikia bihonariaꞌiki ida ijaꞌari jahaꞌiki Deu-ra kanavaꞌigavini igitha abononi ahaꞌdikia vahoariha avigaja kaimoni ida jahaꞌiki.
Sasidotxi ira nokivini naothinia inaabaꞌa bana ida Deus kavaꞌisohihi jiriki.
Okhaꞌa bana mahija oathi-ra inaabavini — Jesua biniꞌaꞌaha.
45 Hari.
Ajihiꞌaha ada makhira.
Ijaꞌari vaipohiki vakadiania vara biavaniꞌaoniꞌihi ida Jesua bianaihotaꞌavini.
Sidaji bodinia ijaꞌari vaipohikia vanokhaha ada Jesus kaikahina.
Oniaroa,
ni-oꞌoijanaki ada Jesus sidajia.
Amasia,
ibavi kagorariki kania hojaꞌaha.
Ibavi ipohikia avikhaonaninanibakhiaꞌaha adani ijaꞌari Jesus kani-ra avanikhahaꞌavini.