Jaharia bikaboroboroki ada Jesus
4
1-3 Hari.
Oniaroa,
Maꞌonahai Jahakia biavikhaꞌaha ada Jesus amasia,
40 mahi hojaꞌaha.
Kaijaꞌaririhi ida amasi.
Ni-nahina-ra haki.
ꞌBairina mani ida Jesu-ra navaiꞌamiꞌia.
Oniaroa,
okhaꞌaha ada Jahari Jesus kania.
Bikaboroboroꞌaha ada Jesus bada biniꞌaja kaimoni ida badani Deua binofiriki.
Jesua ni-bikapoaripaꞌitxiki ida athi.
Jaharia biniꞌaha:
—Deus kaisai ihihi,
jaꞌdi-ra ꞌbai anihaꞌa.
4 Jesua biniꞌaha:
—Iniani,
ni-Deus hora honariaki jaꞌdi-ra ꞌbai oanihavini.
Deus athi kapapirania hojaki hida athi:
“Ni-ꞌbai kaꞌoa binahokiki
ida ijaꞌari.
Deus athi hahavi-ra anaabavini mani ida ijaꞌari-ra nahokija.”
— Jesua biniꞌaha ada Jahari.
5 Oniaroa,
Jerusalém sidajia Jaharia biavikhaꞌaha,
ijaꞌari Deu-ra khai vaniꞌavini kagorani ꞌdaꞌdini aꞌani sohiriamaꞌoki kania,
biniꞌaha:
6 —Deus kaisai ihihi,
araofarariꞌa bana naboꞌajaja.
Deus athi kapapirania biniꞌaki:
“Deus vaꞌora honariaki bana adani ibavi kaijaꞌarini kadania ira avagathanivini,
ivigarirariria kaimoni ida jaꞌdi,
iabononi aꞌbororia kaimoni jaboni.”
7 Jesua bigathanihi ida athi:
—Iniani.
Jokoa iathini-ra onaabarihi.
Jokoa oaraofararirihi.
Deus athi haria navaꞌisohiki hari jaboni:
“Hariꞌa Deu-ra kaijoꞌa bana badani danokia kabadanina,
iogaja kaimoni ida Deus hojana kadania.”
8 Oniaroa,
arabo namahikia Jaharia biavikhaha ada Jesus.
Binanokiahivini vihiha adani arabo hahavi kaijaꞌarini,
vakadiarabo,
vakadinahina hiki.
Jahaꞌoamanija ida hahavi Jesu-ra nanokiahivini hiꞌiki.
Biniꞌaha ada Jesus:
9 —Oviaha ikajoꞌathararihi hora ikanamasivivini,
oniani ida hahavi ira onanokiahivini hiꞌikia ira onoꞌavini hija bana — niha ada Jahari,
Jesu-ra kaboroborovini,
bada biniꞌaja kaimoni ida Deua binofiriki.
10 Oniaroa,
Jesua biniꞌaha:
—Jahari,
ajihiꞌa.
Jokoa ira okanamasivirihi.
Deus athi kapapirania hojaki ida athi haria navaꞌisohiki kaimoni:
“Deus kaꞌoa-ra kanamasiviꞌa bana avakadikaꞌdaꞌdi hira kaimoni.
Deus athi kaꞌoa-ra vanaabaꞌa.”
— Jesua biniꞌaha ada Jahari.
11 Oniaroa,
ajihiꞌaha ada Jahari.
Jesus kania vikhaꞌaha adani Deus ibavi kaijaꞌarini Jesu-ra vaakodiahavini.
Naothinia,
ajihiꞌaha ada Jesus amasia.
Jesus kabadani kamaꞌdani Galiléia kaarabonia
12 Hari.
Arabo kakaꞌdaꞌdinia bivahonariahiꞌaha ada João Batista gathana cadeia avibaira kaimoni.
Jesua bikamithaꞌihi ida João monina cadeia hojana,
oniani ida Galiléia kaarabonia arakhana hiꞌihi.
13 Ni-Nazaré sidajia ibavijanaki ada Jesus.
Cafarnaum kasidajini vania okhaꞌaha,
hojaꞌaha.
Galiléia kaꞌdakoni maakarinia hojaki ida Cafarnaum sidaji.
Zebulom Naftali kaarabonia hojaki ida ꞌdako.
14-15 Mahi ꞌboꞌdakari Deus athi namoniva abono Isaías onikia biniꞌaꞌiki:
“Deus vaꞌora kajoamoraki bana adani Zebulom kaaraboni kaijaꞌarini,
Naftali kaaraboni kaijaꞌarini vihiki.
Jordão vaini kahararakhamania hojaki ida vakadiarabo.
Galiléia kaarabonia oniki jaboni ida vakadiarabo.
Ni-Deu-ra avigariha adani.
16 Bakibakiki fori hiki ida vakadiarabo vavaibaviki.
Hari.
Vanokiki bana ida vagani fori hiki karaho.
Vagahahaviki bana ida vaibavi.
Vaꞌora navagaki bana adani ijaꞌari vaabiniki fori vihiki.
Ni-Deu-ra avigariha adani.”
Nimania ida Deus athi kapapirani Isaías kohana binajiriꞌiki.
Isaías kohana vara bivaniꞌaꞌboꞌdaꞌiki hihida vaibavia Jesus aadahaonina,
oniani ida kidivarani nanamithani hiꞌia.
17 Hari.
Cafarnaum sidajia Jesus hojana vara bivaniꞌaꞌihi ida moni jahaki.
Vaꞌora niꞌaha adani ijaꞌari:
—Avakadihojai asohiriki-ra vakavaꞌipahinikaꞌoa bana.
Maakariꞌiki ida mahi Deus ijaꞌari hahavi-ra vakaꞌdaꞌdivini — vaꞌora niꞌaha ada Jesus.
Jesus vaꞌora kaboaꞌiha adani araba abono
18 Oniaroa,
Galiléia ꞌdako vadinia khabaoniha ada Jesus.
Vaꞌora kanokiha adani araba abono viꞌbamiki vakatahafahaki.
Aajojahiki Simão Pedro,
kajoꞌojahiki André.
19 Vaꞌora kaniꞌaha ada Jesus:
—Hora vavaipohiha mahija badani hoariha aꞌonira okaꞌojomoꞌivini.
Aꞌonira okaꞌojomoꞌivini hiki ijaꞌari vahoariha-ra avakaboaꞌivini kodijaꞌari vihira kaimoni — vaꞌora niꞌaha ada Jesus.
20 Oniaroa,
vakahagi kabodinia vakanahojahaꞌihi ida vakaditahafa,
Jesu-ra vavaipohihaꞌaha.
21 Avikhaꞌianaha adani Jesus,
vaꞌora vakanokiha adani araba abono vakahoariha viꞌbamiki vakadiabiꞌi khama.
Aajojahiki Tiago,
kajoꞌojahiki João.
Vakadiabiꞌi Zebedeu oniki.
Vakahagi kabodinia vahojaki adani.
Bada vakhaniki adani tahafa-ra avakanajaꞌdivini.
Jesus vaꞌora baranahaha adani viꞌbamiki:
—Hora vavaipohiha!
22 Jorakia vakahagi-ra vakanahojahaꞌaha.
Vakaaminaꞌaha ada vakadiabiꞌi.
Jesu-ra vavaipohihaꞌaha.
Avikhaꞌaha.
Jesus vaꞌora anaihotaki adani ijaꞌari vaipohiki
23 Hari.
Galiléia kaaraboni kaibavinia aadahaoniꞌaha ada Jesus.
Judeus kaijaꞌari Deu-ra vara vaniꞌavini kagorani vaipohikia okhajakosioniꞌaha.
Vaꞌora akaꞌojomoꞌioniha adani ijaꞌari.
Jesus vaꞌora akanamonionivini hida Deus athi,
ijaꞌari hahavi vakadikaꞌdaꞌdi ada Deus.
Vaꞌora anaihotaki jaboni adani ijaꞌari vakavamoniki.
Ipohiki ida vakadikavamoni.
24 Síria kaaraboni kaijaꞌarini vaipohikia jaboni avananamithaoniꞌihi ida Jesus ijaꞌari-ra anaihotavini kavaranihi.
Oniania vaꞌora vavikhaꞌaha adani ijaꞌari vakavamoniki,
vakabajadiki,
varaiꞌabakhiaki,
vajoꞌo abaꞌoronisiagaki vihiki.
Kavamoni ipohiki-ra vavahojaki adani ijaꞌari,
vaꞌora vavikhaꞌaha Jesus viaha.
Jesus vaꞌora anaihotahahavimaniꞌaha.
25 Ijaꞌari vaipohiki Jesu-ra vavaipohihaꞌaha.
Galiléia kaaraboni kaijaꞌarini,
Judéia kaaraboni kaijaꞌarini,
Decápolis kaaraboni kaijaꞌarini,
Jerusalém sidaji kaijaꞌarini vihiki Jordão vaini banininiaja vahojaki Jesu-ra vavaipohihaꞌiki jaboni.