João Batista kavaranihi hida
3
Hari.
Nazaré sidajia hojana kabaꞌi ada Jesus,
Judéia kaarabonia khaha ada makhira Deua bikaronaki,
onina João Batista.
Amasia hojaki ada.
Kagorarihi ida amasi.
João Batista kania avikhaha adani ijaꞌari,
vaꞌora niꞌabakhiaꞌaha:
2 —Avakadihojai asohiriki-ra vakavaꞌipahinikaꞌoaꞌa bana.
Maakariki ida mahi Deus ijaꞌari hahavi-ra vakaꞌdaꞌdivini — niha ada João Batista.
3 ꞌBoꞌdakari Deus athi namoniva abono,
Isaías kohana onikia vara bivaniꞌajoraꞌiki ada João Batista.
Isaías kohana athi jiriki hojaki Deus athi kapapirani pitania,
niha:
“Amasia hojaki ada makhira,
ijaꞌari-ra vara niꞌaꞌaha athi ꞌbarakia:
‘Amaakariki ida avakadikaꞌdaꞌdi kaikahina kamahini.
Vanasohi bana ida avakadimahi,
avakadikaꞌdaꞌdi khana-ra vanaviahanokha bana!’ ”
Nihi ida Deus athi.
4 João Batista ni-bikaimahaki ida makari kaidivaki,
kidimakari hiki ida camelo asafi amonahaki.
Bikaimahaki jaboni jararia baasafi kacinturãohi.
Kidiꞌbai hiki omavari,
bahina aꞌbana hiki.
Elias kohana kamakari,
kidiꞌbai,
kidihojai fori hiki ida João Batista kahojai.
5 Jerusalém sidaji kaijaꞌarini vaipohiki João Batista kani-ra avanikhabakhiaki.
Judéia kaaraboni kaijaꞌarini jaboni vaipohiki João Batista kani-ra avanikhabakhiaki.
Jordão vainia hojaki ida ibavi ipohiki kaijaꞌarini João Batista kani-ra avanikhabakhiaki.
Vaipohiꞌoamanira adani ijaꞌari João Batista kavarani-ra vakamithavini-ra vanofiki.
6 Vakavaꞌipahinivini vanofivini ida vakadihojai asohiriki afohahavi,
oniania Deus kania vara vavaniꞌavini Deus binaꞌbiraja kaimoni.
Vara vavaniꞌavini naothinia,
João Batista vaꞌora kanaꞌaha afohanana Jordão vaini onikia.
7 Hari.
João Batista kania avikhaki adani farisio vaipohiki,
sadosio vihiki.
Farisio vaoniki vanaabajahakiki ida vakadijaꞌari avikhananavaki vakadihojai.
Vanofiki jaboni João Batista vaꞌora kanavini.
João Batista vaꞌora niꞌaha:
—Jahari kabadani-ra avakavaꞌipahinivini-ra avakahiꞌbadaraki aꞌoni.
Deua bikaronaki bana ida avakadihojai asohiriki abosini.
Ni-avakaabokaki ida Deu-ra avakorijanahavini.
8 Hojai asohikia vakahojaiꞌa bana mahija Deus biogavini ida avakadihojai asohiriki-ra avanofijanaravini.
9 Hariꞌa vakavaꞌibodivarani:
“Deus vaꞌora nagathogathoꞌboꞌdaꞌiki adani Abraão,
kidihanodi vanamitharonisiagaki vihiki,
kidijaꞌari vihira kaimoni.
Jahaki ada akadiabiꞌi okhananavaki Abraão kohana,
oniani ida akadihojai asohiriki Deua bikavaꞌibodiravini hija,
haria akavaꞌijoaki bana ada Deus.”
Nimania ida avaabononi avaniꞌaꞌbadaravini.
Asohiki ida Abraão kahojai.
Avakadihojai ni-asohiki.
Abraão kaisai vavijavaronisiagaki avihini kabaꞌi,
ni-Deus aꞌonira akavaꞌijoaki.
Deus vaꞌora akavaꞌijoaki adani vakadihojai asohiriki-ra vakavaꞌipahiniꞌiki.
10 Ihiꞌai avani fori avihiki aꞌoni.
Hojai asohikia avakahojairihi;
ihiꞌai avani bonobakhiariki fori avihihi.
Makhira kajoriki fori hiki ada Deus.
Khaki bana ada makhira binobaja kaimoni ida ihiꞌai avani bonobakhiariki ꞌdamani.
Binahokahiki ida ihiꞌai avani obaki siho kabodinia.
Nini vani jaboni Deus vaꞌora arakhaki bana adani athi naabani vihiriki nahina jaharikia — vaꞌora niꞌaha ada João Batista.
11 Asia João Batista vaꞌora vara niꞌaha adani ijaꞌari vajoroniki:
—Aꞌonira okanaki ho paha bodinia.
Avakadihojai asohirikia avaabononi avakaꞌdaꞌdigariavini-ra avigara kaimoni adani vahoariha.
Khaki bana ada hoariha,
kaꞌdaꞌdi kaꞌoa ada ovari.
Hovani kidihonai abono ho.
Arafiaki ida kidihojai asohikaꞌoani.
Kodihojai jahani fori hirihi ida kidihojai jahani arafiaki,
kabaꞌi hora nagathogathovini oakodiara kaimoni.
Ovaria bikaronaki ada Maꞌonahai Jahaki ijaꞌari vaꞌini-ra nahonariahihiki kaimoni.
Siho kakhororoki fori hiki bana ada Maꞌonahai Jahaki ijaꞌari kania.
Binihimaki bana ida ijaꞌari kahojai asohiriki — vaꞌora niꞌaha ada João Batista.
12 Vara niꞌianaha ada João Batista.
Ijaꞌari-ra kavarajomivini ida trigo ꞌbaꞌdani akaꞌdiririhaki:
—Akaꞌdiririhaki ida trigo ꞌbaꞌdani aaniaja kaimoni ida baꞌbaꞌda asafini.
Anabavihi ida trigo ꞌbaꞌdani soꞌoroa.
Siho kabodinia anahokahiꞌihi ida asafini.
Nimania jaboni ida onaothia khaki ijaꞌari-ra kanahoarihakhamavini.
Vaꞌora aniki adani ijaꞌari hojai asohirikia vakahojaiki,
ijaꞌari hojai asohikia vakahojaiki vahararana.
Ovari vaꞌora vahojaki adani ijaꞌari hojai asohikia vakahojaiki kidiania.
Vaꞌora nahokahiki adani hojai asohirikia vakahojaiki Ibavi Jaharikaꞌoaki siho kaihimiriki kania — vaꞌora niꞌaha ada João Batista.
João Batista bikanaki ada Jesus
13 Oniaro kari,
Galiléia kaarabonia hojaha ada Jesus.
Hari.
Oniaroa,
ajihiꞌaha,
okhaꞌaha,
Jordão vaini onikia akhanofoniꞌaha,
João Batista-ra niꞌaha:
—Hora kanaꞌa bana!
14 Hari.
João Batista biniꞌaha ada Jesus:
—Iniani,
ni-Jahari kabadania ikabadanirihi ikavaꞌipahinija kaimoni.
15 Jesua biniꞌaha:
—Kabaꞌi,
jahaki ida hora ikanavini.
Hora ikanahi;
Deua binofikia akabadanihahavihi — niha ada Jesus.
Oniaroa,
João Batista bikanaꞌaha.
16 Jesus kanana naothinia ogaimoriꞌaha.
Binokiꞌihi ida nama arabikhajahaki.
Binokiha jaboni ada Maꞌonahai Jahaki gaariꞌina kidiania,
hoꞌdoko aagariki fori hiki.
17 Nama kamithavahaki ida athii:
—Hiꞌo kodisai o.
Onofijahakiki o.
Khai oniꞌaki ida kodisai hojana.