Makhira vanakoꞌdihaki ada isai
2
Hari.
Judéia kaarabonia ꞌbanaꞌaha ada Jesus,
Belém sidajia.
Jesua bivaꞌbanaki kari arabo kakaꞌdaꞌdini ada Iroji.
Jesua bivaꞌbanaki kari vani,
nokiabiininira ada boviri karaho jaꞌdi.
Arabo napaja safinia bivikhamananiki kaniaja vahojaki adani makhira boviri-ra vada avaniꞌasibakhiaki,
avigaja kaimoni ida namithaꞌiariki.
Vakadihojai oamani hiki ida.
Judeus kaijaꞌari vihiriha adani.
Hari.
Vanokiꞌaha ada boviri jaꞌdi,
vaabono vakaniꞌakhamaꞌaha:
—Judeus kaijaꞌari vakadikaꞌdaꞌdi jaꞌdi ꞌbanaꞌina karajomini o boviri jaꞌdi.
Anakoꞌdihava ada isai tanaki.
Oniaroa,
vaibavia ai vihiꞌaha,
Judéia kaarabonia Jerusaléa avikhaꞌaha.
2 Jerusalém sidajia vakaikahiꞌaha,
vaꞌora vananaꞌdohiꞌaha adani sidaji kaijaꞌarini:
—Ada hana vania isai ꞌbanaꞌiki,
ovari judeus kaijaꞌari-ra vaꞌora vakaꞌdaꞌdiki kaimoni ada?
Akadiarabo arihojana vani anokira ada boviri jaꞌdi,
safinia bivikhamananiki kaniaja khamananina,
khaꞌaha ada boviri hidiaja.
Boviri jaꞌdia bikarajomiki ida kaꞌdaꞌdi danoki ꞌbanaꞌina,
oniani hida haria rakhaja hida.
Anofiki ida judeus kaijaꞌari vakadikaꞌdaꞌdi-ra akanamasivivini — vakhaniha.
Visita dos mágicos (Mateus 2:1-23)
3 Oniaroa,
Irojia bikamithaꞌihi ida makhira vakaikahina vamonina,
bikamithaꞌihi ida kaꞌdaꞌdi danoki ꞌbanaꞌina varani hina.
Iroji kaꞌdaꞌdi hijanarina-ra finivini mani ida Iroji-ra anavaꞌisokonija.
Jerusalém sidaji kaijaꞌarini Iroji-ra vifiniki,
oniani ida kaꞌdaꞌdi jaꞌdini kavaranihi-ra avakavaꞌisokonivini hija jaboni.
4 Hari.
Iroji vaꞌora baranahaꞌaha adani sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama kidiania vajoronina.
Vaꞌora nanaꞌdohiꞌaha ada Iroji:
—Hana hini ibavia ꞌbanaki bana ada ijaꞌari hahavi vakadikaꞌdaꞌdi Cristoa oniki?
5 Vagathaniꞌihi ida Iroji kanaꞌdohi:
—Judéia kaarabonia,
Belém kasidajini vania ꞌbanara bana ada.
ꞌBoꞌdakari Deus athi namoniva abono kohana binajiriꞌiki ida papira afojora:
6 “Belém sidaji kaijaꞌarini aꞌoni.
Hariꞌa avavaꞌini-ra anaipahihiva ida Belém sidaji paꞌitxini.
Paꞌitxini kabaꞌi ida avakadisidaji,
oniania ꞌbanara bana ada akadijaꞌari vakadikaꞌdaꞌdi.
Israel kaijaꞌari vakadimahi nasohiva kaimoni ada ovari.”
Nihi ida Deus athi papira hojaki.
Nimania ida Deus athi namoniva abono kajirihi athini — Iroji-ra vaniꞌaha adani judeus kaijaꞌari vakaꞌojomoꞌiva abono.
7 Oniaroa,
Iroji abono-ra niꞌaha:
—Vaꞌora okorijanahaki bana adani makhira boviri-ra vanokiꞌiki,
isai-ra vakaragavini naothinia,
ovahonariahiki bana ada abinina.
Oniaroa,
Iroji vaꞌora kaboaꞌiꞌaha adani makhira boviri-ra vanokiꞌiki,
hiꞌadani safini khamananina kaniaja vikhaꞌiki.
Kidiania vikhajakosiꞌaha.
Ni-ijaꞌari vahoariha oꞌoiki vakadiania.
Irojia ni-binofiki ida vahoariha vakadivarani avigavini.
Hari,
vaꞌora nanaꞌdohiꞌaha:
—Hana hina masiko nokiabiininira ada boviri jaꞌdi?
8 Kidinaꞌdohi vagathanivini naothinia Iroji vaꞌora karonaꞌaha Belém sidajia avikhaꞌina.
Vaꞌora honariaꞌaha:
—Avikhaꞌa Belém sidajia mahija isaia bivahojaki ibavini-ra avananaꞌdohivini.
Avakaragaha,
vajoi bana hida mahija hora avanavaꞌisohivini.
Onofiki jaboni ida isai-ra onavanavanahavini okanamasivira kaimoni — vaꞌora niꞌaha.
9-10 Oniaroa,
Iroji kania ai vihiꞌaha adani makhira.
Hagihia avikharimananina vanokiꞌianaha ada boviri jaꞌdi vaviaha okhananavaki.
Khai vaniꞌaha ada boviri okhananavaki vanokivini,
vavaꞌi jahaꞌoamanira adani.
Jesua bivahojaki namania akhanoꞌaha ada boviri.
11 Oniaroa,
Jesua bivahojaki gora avakhanoha,
avikhajakosiꞌaha,
vaꞌora vanokiꞌaha adani isai,
kidiamia vihiki.
Jesus viaha vakajoꞌatharariꞌaha vakanamasiviꞌaha.
Oniania,
vadaina-ra avarabikhaiꞌaha,
vidioniꞌihi ida vaꞌiga Jesus kaimoni.
Vanoꞌaꞌaha ouro,
incenso,
miha hikia.
Kaidivaki ida ouro oniki.
Misai mitxaki kaidivaki fori hiki ida incenso,
miha hiki.
12 Joma vania Deus vaꞌora kaabaniꞌaha adani makhira vadamia:
—Hariꞌa bana avajoi Iroji kania!
Oniaroa,
hagihi hoariha vania vajoiꞌaha,
vakadiarabo-ra avanajoihaꞌavini.
Egito kaarabonia avikhaki adani José avigaꞌina
13 Hari.
Makhira ai vihina naothinia,
Deus ibavi kaijaꞌarini abono-ra nanokiaha José kania vadamia.
José-ra niꞌaha:
—Irojia bana binofiki binaabinivini ada isai.
Gaamananiꞌa,
Egito kaarabonia vaꞌora avikhaꞌa adani isai,
kidiamia vihiki mahija avaraihotavini.
Ira onavaꞌisohiravini oadani hariꞌa vajoi hihida araboa.
14 Oniaroa,
gaamananiꞌaha ada José.
Joma vania ai vihiꞌaha,
José vaꞌora avikhaꞌaha Egito kaarabonia.
15 Iroji abinirina oadani Egito kaarabonia vahojaꞌaha.
ꞌBoꞌdakari Deua binavaꞌisohijoraꞌiki ida athi namoniva abono:
“Egito kaarabonia hojaki bana ada kodisai.
Obaranahaki bana ada kodisai joira kaimoni.”
Niha ada Deus.
Hari.
Jesus hojaꞌiki Egito kaarabonia,
naothinia José vaꞌora avajoiꞌaha vakadiaraboa.
Nimania ida namithaꞌiki Deus athi namoniva abono binavaꞌisohijoravini hiꞌiki.
Iroji vaꞌora naabiniki adani isai vaipohiki
16 Oniaroa,
Iroji vaꞌora nokhaha adani makhira boviri-ra vanokiꞌiki vajoina kidiania.
Abono-ra niꞌaha:
—Hora vakorijanahaꞌiki adani makhira.
Jokoa vajoijanariha adani kodiania.
Hari,
ihamahikarahoꞌaha ada Iroji.
Oniaroa,
bikavaꞌihokiꞌihi ida makhira vakadivarani,
badara hoarani boviri jaꞌdi-ra vanokibiininiꞌavini.
Vaꞌora honariaha adani kidisorara isai makhira isani-ra vanaabinihavini.
Vaꞌora niꞌaha:
—Belém sidajia avikhaꞌa mahija makhira isani-ra vaꞌora avanakoꞌdihavini sidaji bodinia,
sidaji hararania jaboni.
Makhira isani badara ꞌbamikia vakabadarariki,
vakabadaraki kaho-ra jaboni avakaragaꞌihi,
vaꞌora vanaabini bana.
Vaꞌajihiꞌaha adani sorara,
vanaabaꞌihi ida Iroji athi.
17 Nimania ida namithaꞌiki Deus athi namoniva abono Jeremias onikia biniꞌaꞌboꞌdaꞌiki:
18 “Kamithavahaki ida saani karaho Belém sidajia
vakadisai hahavi vaabinina-ra vakaasaraꞌahapikiꞌiki adani gamo.
Raquel kohana kidisai-ra vaꞌora kaasaraꞌavini vani fori vihiki adani gamo
vabarariariana.
Raquea bikaabokariki ida kidisai-ra vaꞌora
navijavavini,
oniani ida vaꞌini najaharini hija.”
Egito kaarabonia ai vihiꞌiki adani José
19 Oniaroa,
abiniꞌaha ada Iroji.
Iroji abinina naothinia Deus ibavi kaijaꞌarini abono-ra nanokiaꞌianaha José kania vadamia.
Asia Egito kaarabonia vahojaha adani José.
20 Deus ibavi kaijaꞌarinia biniꞌaha:
—Vaabinihahaviꞌiki adani isai-ra vanaabinivini-ra vanofiki.
José,
gaamananiꞌa vaꞌora avajoiꞌa adani isai,
kidiamia vihiki Israel kaarabonia.
21 Hari.
Oniaroa,
ai vihiꞌaha adani José,
vaꞌora avikhaha adani isai,
kidiamia khama.
Israel kaarabonia avajoiꞌaha.
Judeus kaijaꞌari vaonina hoariha Israel kaijaꞌari.
22 Hari,
Joséa bikamithaꞌihi ida ijaꞌari vakadivarani:
—Abiniꞌiki ada arabo kakaꞌdaꞌdini Iroji.
Judéia kaarabonia hojaki ada Iroji kohana kaisai Arquelau oniki,
ovari maina ada Judéia kaaraboni kaijaꞌarini vakadikaꞌdaꞌdi hira — vakhaniꞌaha.
Oniani ida José vajoina-ra finivini hija.
Vadamia Deua binavaꞌisohiꞌianaha ada José:
—José,
hariꞌa Judéia kaarabonia avajoi!
Galiléia kaaraboni maina avikha — Deua biniꞌaha ada José vadamia.
Oniaroa,
avikhaꞌaha Galiléia kaarabonia.
Avakhanoꞌaha.
23 Nazaré sidaji oniki vania vahojaꞌaha.
Nimania ida namithaꞌiki Deus athi namoniva abono kohana vaꞌora navaꞌisohijoravini hiꞌiki:
“Nazaré sidaji kaijaꞌarinia vanaoniki bana ada ovari okaronaki.”
Niha ada Deus.