JOÃO
Joãoa vara bivaniꞌaki ida Jesus monina jahaki
Jesus Cristo onina hoariha Athii
1
Hahavi amonahani kamaꞌdani viahania hojahahaꞌoadahaki ada Athiia oniki.
Deus kania hojaki ada Athiia oniki.
Deus mani ada Athiia onira.
2 Hahavi kamaꞌdani viahania Deus kania hojahahaꞌoadahaki ada Athiia oniki.
A Palavra (João 1:1-18)
3 Deua binakamaꞌdaꞌiki ida hahavi hojaki.
Athiia oniki vania binamonahaꞌia ida.
Deua binakamaꞌdaravini oadani,
ni-nahina hoariha hojaki.
4 Ni-nahina binahokiki ada Athiia oniki,
ovani oa hokihahaꞌoadahara ada.
Ovaria binakamaꞌdaki ida ijaꞌari kamahi anokhomiriki Deus kania.
Vagaki ada Athiia oniki.
Binavagaki ida ijaꞌari kavaꞌibodivarani,
Deu-ra ogaja kaimoni.
5 Bakibakini kania khaꞌiki ada Athiia oniki.
Bakibakinia ni-bikaabokaki ida mahi vagani fori hiki-ra namokhivini.
Nimania jaboni ida Athiia oniki vagana.
Ni-ijaꞌari vakadihojai jaharikia bikaabokaki ida Athiia oniki-ra vanadabavini.
6 Hari.
Deua bikaronaꞌiki ada makhira João Batista oniki,
Athiia oniki monina-ra avikhananavaki.
7 João-ra arakhananavaki Jesus Cristo monina-ra vara vaniꞌara kaimoni ijaꞌari vakadiania,
ijaꞌari hahavia vakamithaja kaimoni ida Athiia oniki vagana kavaranihi,
kidiania vaabono gahinai vanihara kaimoni.
Jesus Cristo onina hoariha ida Athii.
8 Athiia oniki hiriha ada João Batista.
João Batista hiriha ada ijaꞌari kavaꞌibodivarani-ra navagara.
Athiia oniki vani ada ijaꞌari kavaꞌibodivarani-ra navagara,
Deu-ra avigara kaimoni.
João-ra rakhaki ijaꞌari vakadiania vara bivaniꞌaja kaimoni ida Athiia oniki vagana kavaranihi.
9 Kaꞌoa hiki ida Athiia oniki vagana.
Khaꞌaha ada Athiia oniki,
Deu-ra avigara kaimoni adani arabo hahavi kaijaꞌarini.
Athiia oniki imidia ijaꞌari vakadivaꞌibodivarani-ra navagaꞌiki.
10 Hiꞌada Athiia oniki araboa khaꞌiki ijaꞌari vakadiania.
Deus,
Athiia oniki khama vanamonahavini kabaꞌi ida arabo,
ijaꞌari hiki,
ni-ijaꞌaria avigaꞌiaki ada Jesus Cristo Deus hina,
ni-vavakaijokaki.
11 Kidijaꞌari vakadiarabo kania khaꞌaha,
ni-judeus kaijaꞌaria vagathaniki.
12 Judeus kaijaꞌari vahoariha vaipohiriki vani adani Jesu-ra vagathanijahakiꞌara.
Vajariꞌdariki vania vavakaijokara ada,
oniani ida Deus kaisai vaꞌora nihaja.
13 Ijaꞌari kaisai vani ida gamo jahani bodinia namithaja.
Makhira binofihi ida gamo-ra vaisavini,
oniani ida vakadisai-ra vanamonahavini hija.
Ni-nikia Deus kidisai-ra vaꞌora namonahaꞌiki.
Deus vaꞌora nofiki adani ijaꞌari kidisai vihira kaimoni,
ovani oa vaꞌora nagathogathora adani ijaꞌari,
oniani ida vakadiabiꞌi nihana hija.
14 Hari.
Oniaroa,
ijaꞌari hiꞌina ada Jesus Cristo,
akadiania khaꞌaha,
hojaꞌaha.
Harivani,
Jesus ipohina hari,
anokiꞌiki ida jahana arafiaki.
Ijaꞌari-ra nakaidivavini arafiani mani ida ijaꞌari-ra vaꞌora kajoamoravini hija.
Kaꞌoa hiki ada Athiia oniki.
Jahaꞌoamanija ida Athiia oniki kahojai,
danoki ada,
ogahaki ada jaboni.
Deus kaisai hoarana ada,
oniani ida Deus kahojaia kanahojaina hija.
Deus kaisaia binanokiaki ida Deus danona,
jahana,
vagana hiki.
15 João Batista vara bivaniꞌaꞌiki ada Athiia oniki.
Varani ꞌbarakia vara vaꞌora niꞌaꞌaha adani ijaꞌari vajoroniki kidiania:
—Hada vani hihada aꞌonira onavaꞌisohivini hiꞌiki.
Onaothia khaki bana ada ovari.
Kaꞌdaꞌdi kaꞌoa ada.
Hovani ni-kaꞌdaꞌdi ohirihi.
Homiroꞌa oꞌbanana kabaꞌi,
otanana viahania hojaꞌboꞌdaꞌiki ada — vaꞌora niꞌaꞌaha ada João Batista.
16 Jesus haria nakaidivavini arafiani mani ida haria kajoamorahahavivini hija afobakhia.
Aꞌbaꞌdibakhiaki ida haria kajoamoravini.
Bikavaꞌibodivaranihaꞌoadahaki ida haria kajoamorabakhiavini,
oniani ida haria kajoamorahaꞌoadahavini hiꞌia.
17 Hari.
Moisés kohana bigathaniꞌboꞌdaꞌiki ida Deus kavaꞌisohihi jiriki.
Bigathanihi,
vaꞌora honariaha adani ijaꞌari vanaabaja kaimoni.
Deua biakavaꞌijoaki ida ijaꞌari vaꞌisohihi jiriki hahavi-ra naabahahaꞌoadahaꞌiki.
Nimania ida Moisés athi.
Moisés kohana athi fori hirihi ida Jesus Cristo athi.
Jesus Cristo vani haria kakodiaja Deus athi-ra anaabavini.
Jesus Cristo vania binanokiaja ida Deus ijaꞌari-ra kajoamoravini niha ninini.
Kaꞌoa mani ida Jesua bivikhaki ijaꞌari-ra akavaꞌijoavini kavaranihi.
18 Ni-ijaꞌaria binokiꞌiaki kaho ada Deus.
Kidisai hoarana vania binokira ada.
Kidiabiꞌi ꞌdihana hojaki ada.
Deus hiki jaboni ada.
Ovaria binanokiaki ida Deus danona,
jahana,
vagana hiki niha ninina,
aogara kaimoni ada Deus.
João Batista varani hina hida
19 Judeus kaijaꞌari vanavaꞌisohiva abono Jerusaléa vahojaki vaꞌora vahonariaha adani sasidotxi,
judeus kaijaꞌari vakaꞌojomoꞌiva abono vihiki João Batista kania avikhana,
vananaꞌdohira kaimoni.
Avakhanoha,
vananaꞌdohiꞌaha:
—Hana ihini mani i?
Cristo mani i?
Ivani Deus ira karonaja ijaꞌari hahavi-ra vaꞌora ivakaꞌdaꞌdiꞌia kaimoni i?
João batiza Jesus (João 1:19-34)
20 Vakadinaꞌdohi bigathanimaniꞌaha.
Vaꞌora navaꞌisohijahakivini,
vaꞌora niꞌaha:
—Ni-Cristo Deua bikaronaki ohirihi.
21 Hari.
João Batista-ra vananaꞌdohiꞌianaha:
—Cristo ihirini-ra ikahihi,
hana ihini mani i?
Elias kohana ahokina mani i?
—Iniani.
Elias kohana ohirihi — João vaꞌora niꞌaha.
—Deus athi namoniva abono Moisés kohana vara bivaniꞌajoraki mani i?
—Iniani — vaathi bigathaniꞌianamaniha.
22 Hari.
João Batista-ra vaniꞌaꞌianaha:
—Haria nanamitha bana hana ihini,
aogaja kaimoni ida kadavarani.
Anofiki vaꞌora anavaꞌisohivini adani haria vakaronaki akhana kadania.
Nahina mani ida iabono vara ivaniꞌavini hija?
23 João Batista bigathaniꞌihi ida vakadinaꞌdohi.
Vara bivaniꞌaꞌihi ida Deus athi namoniva abono Isaías kohana oniki kavarani ꞌboꞌdakari:
—Hovani ijaꞌari amasia adahaki athii ꞌbarakia oathiki ho:
“Vanajaha ida hagihi
akadikaꞌdaꞌdia bivaadahaki kaimoni.”
Nimania ida Isaías kohana vara hora vaniꞌaꞌboꞌdaꞌavini.
Hagihi najahani fori hiki hida kodibadani,
ijaꞌari-ra onavaꞌisohivini hiki Jahari kahojai-ra vakavaꞌipahinira kaimoni,
akadikaꞌdaꞌdi khana viahania — vaꞌora niꞌaꞌaha ada João Batista.
24 Farisio adani makhira João Batista-ra vananaꞌdohibakhiaꞌiki.
25 João Batista-ra vananaꞌdohiꞌianaha:
—Ni-Cristo,
ni-Elias kohana,
ni-Deus athi namoniva abono anokhaki ihirihi.
Nahina mani ida ijaꞌari-ra ikanavini hija?
26 João Batista vaꞌora niꞌaha:
—Vaꞌora okanavini paha bodinia.
Vaꞌora ohonariaꞌiki adani ijaꞌari kanai karajomihia.
Avakadiania hojaki ada hoariha avarigaꞌiariki.
27 Kodikaꞌdaꞌdi kaꞌoa ada ovari.
Onaothia khaki bana ada.
Kaꞌdaꞌdi oamani ada ovari.
Hovani kidihonai abono ho.
Arafiaki ida kidihojai jahakaꞌoaki.
Ovari fori ohirihi bana,
kabaꞌi hora nagathogathoꞌiki ada,
oakodiara kaimoni — niha ada João Batista.
28 Betânia ibavia vara vaabono vakaniꞌakhamaꞌaha adani João Batista,
nanaꞌdohina vihiki khama.
João Batista ijaꞌari-ra kanavini ibavini nobanija Jordão vainia.
João Batista vara bivaniꞌaki ada Jesus
29 Kaꞌafokajomani vani João Batista bianokiha ada Jesus kidiania khaꞌina.
Niha ada João:
—Ada vani hiꞌada ovilia dorona fori hiki Deua bikaronaki.
Hojai Deua bivajahariki abosini ida ijaꞌari abinini.
Ovilia dorona-ra anaabinihi;
ijaꞌari-ra akavaꞌijoaha.
Onivani fori hija bana ida ovilia dorona fori hiki abinina,
haria akavaꞌijoara kaimoni.
Ovaria bianiki bana ida ijaꞌari hahavi vakadihojai asohiriki.
30 Vara ovaniꞌaꞌiki ada ovari.
Kodivarani hiꞌiki ada:
“Onaothia khaki bana ada hoariha.
Kaꞌdaꞌdi oamani ada ovari.
Hovani ni-kaꞌdaꞌdi ohirihi.
Homiroꞌa oꞌbanana kabaꞌi,
otanana viahania
hojaꞌboꞌdaꞌiki ada.”
Nimania hida kodivarani aꞌonira onanamithavini hiꞌiki.
31-33 Oniaroa,
João Batista vaꞌora navaꞌisohiꞌiki adani vajoroniki,
niha ninina Cristo-ra ogavini:
—Jesus khana viahania ni-oogaꞌiaki ada makhira hana hina ovilia dorona fori hiki.
Deus hora honariaꞌavini ijaꞌari-ra okanavini.
Oniaroa,
hora navaꞌisohijoravini hiꞌiki jaboni ada makhira hana hina Cristo hina:
“Inokiki bana ada Maꞌonahai Jahaki garina
makhira kania,
hojaꞌina kidiania.
Ovaria bikaronaki bana ada Maꞌonahai Jahaki okhana
ijaꞌari vakadiania,
vavaꞌi nahonariahihini hiki kaimoni.”
Nimania ida Deus hora navaꞌisohijoravini athini.
Asia vara niha ada João Batista:
—Oniaroa,
onokiꞌiki ada Maꞌonahai Jahaki nama gariꞌina,
hoꞌdoko kanokiani fori hiꞌina.
Makhira kania hojaꞌiki ada Maꞌonahai Jahaki.
Oniania oogaꞌaha ada makhira Cristo hina.
Hora rakhaki hida ijaꞌari-ra vaꞌora okanaja kaimoni paha bodinia.
Onanamithaki ada onaothia khaki,
akadijaꞌaria avigara kaimoni Cristo hina.
34 Oniaroa,
onokiꞌiki ada Maꞌonahai Jahaki gariꞌina,
hojaꞌina kidiania.
Onokivini vani oogaꞌiki ada makhira Deus hora navaꞌisohijoravini hiꞌiki,
oniani ida onanamithavini hija Deus kaisai hina ada makhira — niha ada João Batista.
André, Simão Pedro khama vavaipohihaꞌiki ada Jesus
35 Kaꞌafokajomani João Batista binokiꞌianaha ada Jesus.
Asia hojamaniha ada João Batista ijaꞌari-ra kanavini ibavini kania.
Kidiania vahojaki adani kidipohi viꞌbamiki.
Os discípulos seguem Jesus (João 1:35-51)
36 Hari.
João Batista binokiha ada Jesus radahana,
vaꞌora niꞌaha:
—Adavani hiꞌada ovilia dorona fori hiki Deua bikaronaꞌiki.
37 João Batista athi-ra vakamithaꞌaha adani ipohina viꞌbamiki,
oniaroa Jesus naothia avikasiagaꞌaha.
38 Viaharibaniꞌaha ada Jesus,
vaꞌora nokiꞌaha adani vikasiagaki,
vaꞌora nanaꞌdohiꞌaha:
—Nahina mani hida kodiania avanakoꞌdija?
—Jesus,
hanaja vania iibavija?
39 —Vanavanavanaha — Jesus vaꞌora niꞌaꞌaha.
Oniaroa,
Jesu-ra vavaipohihaꞌaha adani viꞌbamiki.
Vanokiꞌihi ida gora Jesua bivahojaki.
Safini ajorana vani vakaikahiꞌaha,
avikhajakosiꞌaha.
Kidiania vahojaꞌina safini-ra avavapahisiriꞌaha.
Naothinia ai vihiꞌaha adani viꞌbamiki.
40 Viꞌbamiki adani João Batista ipohina Jesus naothia avikasiagaꞌiki.
André oniki ada hoarana João Batista athi-ra kamithaꞌiki.
Jesus naothia okasiagaꞌiki ada André.
41 Hari.
Andréa binakoꞌdihaꞌimidiaha ada kidiꞌaajo.
Simão Pedro oniki ada.
Biniꞌaꞌaha:
—Aajo,
ada akaragaꞌaha Deua bikaronaki,
Messias oniki — niha ada André.
(Messias onina athii hoariha Cristo.
Aihotahi abono ada.)
42 Oniaroa,
Jesus kania Andréa biavikhaꞌaha ada kidiꞌaajo.
Simão,
André khama vakadiabiꞌi onina João jaboni.
Jesua vada biniꞌaha ada Simão,
biniꞌaha:
—Ionini Simão.
Jaꞌdi onini ida ionini hiꞌia.
Ira onoꞌavini hiki onii hoariha Cefas — nihaꞌaha ada Jesus.
(Jaꞌdi karaho onini ida Pedro ariathia.
Pedro onina ida Cefas judeus kaijaꞌari vaathia.)
Jesus vaꞌora kaboaꞌiki adani Filipe, Natanael khama
43 Kaꞌafokajomani vani Jesua binofiki ida Galiléia kaarabonia okhana.
Okhana viahania Filipe-ra nakoꞌdiꞌaha,
bikaragaꞌaha,
biniꞌaꞌaha:
—Filipe,
hora vaipohihaꞌa bana.
Oniaroa,
Filipea bivaipohihaꞌaha.
44 Betsaida sidaji kaijaꞌarini ada Filipe.
André,
Pedro khama vaibavi ida Betsaida sidaji oniki jaboni.
45 Hari.
Filipea binakoꞌdihaha ada kidivaꞌahi Natanael oniki,
bikaragaꞌaha,
biniꞌaꞌaha:
—Natanael,
akaragaꞌiki ada makhira Moisés kohana vara bivaniꞌaꞌboꞌdaꞌiki.
Deus kavaꞌisohihi jiriki kapapirania Moiséa binajiriꞌiki ida varani hina.
Deus athi namoniva abono kohana vahoariha jabonia vanajiriꞌiki ida varani hina.
Jesus oniki ada ovari.
José oniki ada Jesus kabadia.
Nazaré sidajia avijavaꞌiki ada Jesus.
46 Natanaea biniꞌaha ada Filipe:
—Okajariꞌdaki ida nahina jahaki Nazaré sidajia namithaꞌiki.
Ni-Nazaré sidajia namithaki ada Cristo Deua bikaronaki.
—Inavanavanaha mahija inokivini — Filipea bigathanihi ida athi.
Vaꞌajihiꞌaha,
Jesus kania avikhaꞌaha.
47 Oniaroa,
Jesua binokiha ada Natanael khana kidiania,
vaꞌora niꞌaha adani ipohina:
—Hiꞌo khaki Israel kaijaꞌari oamani o.
Ni-ijaꞌari-ra navaꞌiponiꞌimariniki.
48 Jesu-ra namaakariꞌaha,
Natanaea binanaꞌdohiꞌaha ada Jesus:
—Nihaniki vania hora iogaja hora inokibiininivini kabaꞌi?
Jesua biniꞌaꞌaha ada Natanael:
—Filipe ira baranahavini viahania ivithimaꞌoni-ra onokiꞌiki ho figira avani naboꞌani amokhinini kania.
49 Natanaea biniꞌaꞌaha:
—Jesus,
ivani Deus kaisai i.
Ivani akadijaꞌari vakadikaꞌdaꞌdi kaimoni i — niha ada Natanael vaꞌi bodini vara nikarahoꞌini.
50 Jesua bigathanihi ida Natanael athi:
—Figira avani amokhininia ira onokivini-ra okahihi,
oniani ida hora ivakaijokavini hija.
Kodiꞌogahai paꞌitxi hida ira onanokiahivini hija.
Inokiki bana ida kodiꞌogahai danoki karaho.
51 Jesus vaꞌora niꞌaha:
—Kaꞌoa hiki hida kodivarani vara aꞌonira oniꞌavini hiki bana:
Avanokiki bana ida nama arabikhajahani,
Jacó kohana binokiki fori hiki.
Vaꞌora avanokiki jaboni adani Deus ibavi kaijaꞌarini avikasina,
vigarina kodiania.
Ijaꞌari Deus kania okasini kakaraꞌinani kaꞌoa ho.
Ijaꞌari hahavi vakadiꞌaajo ho — vaꞌora niꞌaꞌaha ada Jesus.
Oniaroa,
ai vihiꞌaha adani Jesus kidipohi khama.