Ahokiki ada Jesus
24
Hari.
Domingo vani mahi avagani kamaꞌdani avikhaꞌianaha adani gamo abaꞌoi kaꞌdamahani ibavini kania.
Avavikhaꞌihi ida misai vanakabodiꞌiki.
2 Oniaroa,
avakhanoꞌaha vanokiꞌihi ida jaꞌdi hodini kaathani katapajanarini.
Aniaꞌiki ida jaꞌdi.
Lucas 24:1-53
3 Hari.
Avikhajakosiꞌaha,
ni-vakaragaki ida Jesus vakadikaꞌdaꞌdi abaꞌona.
4 Vakavaꞌibodivaraniꞌihi ida Jesus abaꞌona hojajanarini,
ni-avigaki ida abaꞌona niha ninini avisoniꞌini.
Vavaꞌi bodini vara nini kabaꞌi,
vaviaha vanokiajorakiꞌaha adani makhira viꞌbamiki.
Vakaimahaki ida makari vagaki.
5 Hari.
Vaimahidaꞌaha adani gamo.
Vaimahidakarahona mani ida vaꞌora hasi niꞌaja.
Vanokho-ra vakaꞌoahaꞌaha.
Oniaroa,
vaꞌora vaniꞌaha adani gamo:
—Nahina mani ida abaꞌoi kaꞌdamahani ibavini kania ijaꞌari ahokiki-ra avanakoꞌdihavini hija?
6 Ni-hida hojajanariha ada Jesus.
Ada ahokiꞌaha.
Vakavaꞌibodivaraniꞌa bana ida aꞌonira niꞌavini hiꞌiki Galiléia kaarabonia avahojani kari.
7 Jesus aꞌonira niꞌaꞌiki aꞌoni:
“Hovani ijaꞌari hahavi vakadiꞌaajo ho.
Vahoariha hora avarakhaki
bana ijaꞌari vakadihojai
asohiriki vasaꞌa kabodinia,
ava akasanakhamakia hora avakaꞌitapoamisahanaki bana adani.
Oabinina naothinia radahahi ida mahi ahoarabakosiki oniaroa,
oahokiki bana ho.”
Aꞌonira niꞌaꞌiki ada.
8 Gamoa mitha vaniꞌaꞌihi ida makhira vaathi,
vakavaꞌihokiꞌiki ida Jesus athi vaꞌora navaꞌisohijoravini hiꞌiki.
9 Oniaroa,
ai vihiꞌaha,
vajoiꞌaha.
Jesus ipohina 11 vihiki vaipohina vakadiania vaꞌora vananamithavini hiꞌihi ida vanokiꞌiki,
vakamithaꞌiki.
Vahoariha-ra vaꞌora vananamithaꞌaha jaboni.
10 Hari.
Hiꞌadani gamo abaꞌoi kaꞌdamahani ibavini kania avikhaꞌiki vaonina Maria Madalena,
Joana,
Tiago kaamia Maria oniki vihiki.
Gamo vahoariha jaboni vaꞌora vavaipohihaꞌavini ꞌdama kania.
Vaꞌajihina naothinia Jesus athi avavaadahaoniva abono vakadiania avikhaꞌaha adani gamo,
vaꞌora vananamithara kaimoni vanokiꞌikia.
11 Oniaroa,
vakamithaꞌihi ida gamo vakadivarani,
vakajariꞌdamanihi.
Vakavaꞌibodivaraniki ida ijaꞌari kabajadiki kavarani fori hini ida gamo vakadivarani.
12 Hari.
Pedro vani ada gaaꞌaha,
ajihiꞌaha,
kiꞌdarahaꞌaha,
abaꞌoi kaꞌdamahani ibavini kani-ra anikhaꞌavini.
Akhanoꞌaha,
vada bianiꞌajakosiꞌihi ida jaꞌdi hodijamaꞌoni,
binokiꞌihi ida makari,
Jesus abaꞌona karafoani hiki.
Ni-nahina hoariha-ra nokiꞌiki ada Pedro.
Oniaroa,
gora vavahojaki kania joiꞌaha,
bikavaꞌibodivaranikarahoꞌihi ida namithaꞌiki.
Emaús kaibavini kahagihinia avikhaꞌiki adani Jesus ipohina
13 Hari.
Domingo vani vaꞌajihiꞌaha adani Jesus ipohina viꞌbamiki.
Emaús ibavi-ra avanikhahavini.
Emaús kanapajahikhamarihi ida Jerusalém sidaji.
Safini sohirarina vaꞌajihiꞌaha,
mithani vaivaini vakaikahira kaimoni.
14 Vaadahana kabaꞌi,
vaabono vara vakaniꞌakhamaꞌaha.
Vakadivarani hiki ida Jesus abiniꞌina,
abaꞌona avisoniꞌini jaꞌdi hodijamaꞌokia.
15 Vara vakhanina kabaꞌi,
vaꞌora namaakariꞌaha ada Jesus,
adahaꞌaha vakadiania.
16 Jesus ipohina vanokiꞌaha ada makhira,
ni-avigajorakiki ada makhira Jesus hina.
Deua bivaꞌaharihi ida Jesus hina avigavini.
17 Oniaroa,
Jesus vaꞌora nanaꞌdohiꞌaha:
—Nahina mani hida avakadivarani hija?
18 Vada vakhaniꞌaha vavaꞌi mokara niꞌini,
Cleopas onikia biniꞌaꞌaha:
—Ivani ihoarani Jerusaléa ihojani kabaꞌi iogaria koda ida namithaꞌiki hidanija,
hidanija hoariha hiki?
19 — Nahina mani ida namithaꞌia?
— vaꞌora nanaꞌdohiꞌaha.
Vagathaniꞌihi ida kidinaꞌdohi:
—Ada pohimajaꞌaha Jesus.
Nazaré kasidajini kaijaꞌarini ada.
Deus athi namoniva abono ada.
Ijaꞌari vaipohikia vakavaꞌibodivaraniki ida Deus kidibadani danoki,
kidivarani hiki-ra kakodiavini.
Ijaꞌari hoariha kabadani fori hirihi ida kidibadani danoki.
Kidivarani Deus kavarani fori hiki ida.
20 Sasidotxi vavakaꞌdaꞌdiva,
judeus kaijaꞌari vanavaꞌisohiva abono khama Jesu-ra avarakhaꞌiki Pilatos kania,
ovaria bivahonariahira kaimoni abinina.
Oniaroa,
Jesu-ra vanaabiniꞌiki adani,
ava akasanakhamakia avakaꞌitapoamisahaꞌiki ada.
21 Akadijaꞌari-ra vaꞌora akavaꞌijoaki kaimoni avanihaki ada Jesus,
haria vavajaharikia vavahojajanaria kaimoni hida akadiarabo.
Hidanija hoariha viahania pohimajaꞌiki ada Jesus.
22-23 Akadiania vahojaki adani gamo Jesu-ra avavaipohioniꞌiki.
Hidakabaꞌi vagavagani vani avikhaꞌaha adani vaꞌoaniaro Jesus abaꞌona kaꞌdamahani ibavinia,
ni-vakaragaꞌiki ida abaꞌona.
Vajoiꞌaha akadiania haria vaniꞌaꞌaha:
“Vaꞌora anokiꞌiki adani Deus ibavi kaijaꞌarini ꞌdama kania.
Haria vanavaꞌisohivini hiꞌiki ida Jesus ahokiꞌina.”
Vakhaniꞌaha.
Akavaꞌibodivaranikarahoki ida gamo vakadivarani.
24 Vakadivarani mitha vaniꞌavini naothinia,
aipohina viꞌbamiki ꞌdama kania avikhaꞌaha.
Vanokiꞌiki ida abaꞌona kaꞌdamahani ibavini dairini.
Gamo haria navaꞌisohivini fori hiki ida vanokiꞌiki.
Ni-Jesu-ra vanokiꞌiki — vaniꞌaha.
25 Oniaroa,
Jesus vaꞌora niꞌaha:
—Asia avarigariki ida varani Deus athi namoniva abono Cristo-ra vara vavaniꞌaꞌboꞌdavini.
Avakajariꞌdaki ida vakadivarani.
Ni-avarigajorakiki ida vakadivarani nahina hini.
26 Deua binofiki ida Cristo imana ꞌbanani.
Binofiki ida abiniꞌina naothinia kidiania ajoina.
Deua khai biniꞌaki bana ida kidibadani jahaki ijaꞌari vahararana.
Vithi ibavini jahaki vagaki Deus ꞌdihana Cristo-ra noꞌavini — niha ada Jesus.
27 Oniaroa,
Jesus vaꞌora navaꞌisohijahakiꞌaha papira athinia Deus vara bivaniꞌajoraꞌiki ada Cristo.
Jesus vaꞌora navaꞌisohiꞌimidiavini hiki ida Cristo varani hina Moiséa binajiriꞌiki.
Naothinia vaꞌora navaꞌisohihi ida Cristo varani hina Deus athi namoniva abono hahavia vanajirihananaꞌiki.
28 Hari.
Vanamaakariꞌihi ida ibavi Jesus ipohina avanikhaki.
Vagorana vakaikahiꞌina radahana-ra nofiꞌaha ada Jesus,
ni-okhajakosiꞌiki.
29 Oniaroa,
Jesu-ra vakaboaꞌibakhiadanokivini hiki vakadiania hojara kaimoni.
Ni-avigaꞌiaki kaho ida Jesus vakadiania adahana.
Vaniꞌaha:
—Akadiania hojaꞌa bana.
Bakibakini kamaꞌdaꞌiki hida joma.
Oniaroa,
okhajakosiꞌaha ada Jesus kidipohi viꞌbamiki vakadiania.
30 Mesa kania vithiꞌaha vakadiania.
Jesua bikanabiiniꞌihi ida pão,
Deu-ra niꞌaꞌaha:
—Deus,
ivani ijahaki i,
pãoa haria inoꞌaꞌiki i.
Deu-ra vara niꞌavini naothinia,
Jesua bikanapitahatahahi ida pão,
vaꞌora noꞌavini kihiꞌihi.
31 Oniaroa,
vanokho avagahaki fori vihiꞌaha,
Jesu-ra vanokiꞌaha,
avigaꞌiki ada Jesus.
Jorakia avisoniꞌaha,
ni-vanokijanaki.
32 Oniaroa,
Jesus ipohina biniꞌaha ada hoariha:
—Hagihia ariadahana oadani Jesus vara haria niꞌavini hiki ida varani hina Deus athi kapapirania hojaꞌiki,
akamithaꞌiki ida avaꞌi bodinia khai akhanina.
33 Hari.
Jorakia vigaaꞌaha,
ai vihiꞌaha Jerusaléa vajoiꞌaha.
Vaꞌora vakaragaꞌaha adani Jesus ipohina 11 vihiki vajoroniki vahoariha khama.
34 Vajoroniki vaꞌora vaniꞌaha adani viꞌbamiki:
—Kaꞌoa hiki ida Jesus ahokiꞌina varani hini.
Simãoa binokiꞌiki ada akadikaꞌdaꞌdi Jesus.
35 Oniaroa,
Jesus ipohina viꞌbamiki vaꞌora vananamithavini hiꞌihi ida varani hina,
hagihia vaꞌora vaipohihaꞌavini.
Vaꞌora vaniꞌaha:
—Ni-aogajorakiki ada Jesus akadiania adahaꞌina.
Pão-ra kanapitahatahaꞌaha ada Jesus bona aogaꞌaha.
Ipohina vakadiania abono-ra nanokiaꞌiki ada Jesus
36 Hari.
Vanokiꞌava vahoariha-ra vaꞌora vara vaniꞌavini kabaꞌi,
jorakia abono-ra nanokiaꞌaha ada Jesus vahararana.
Vaꞌora niꞌaha:
—Onofiki ida avavaꞌini jahajahani.
37 Vaꞌora narapataꞌihi ida Jesus abono-ra nanokiaꞌavini,
vaimahidaꞌaha,
Jesus maꞌonahana-ra vanokiꞌiki vaabono vavanihaꞌaha.
38 Oniaroa,
Jesus vaꞌora niꞌaha:
—Niha avakhanimanija avarapataki?
Niha avakhanimanija avajariꞌdaki?
39 Vada vakaniꞌa bana hida osaꞌa,
oꞌdama kihiki mahija hora avarigavini.
Hora vakaabada mahija oahokina-ra avakajariꞌdaravini.
Omaꞌonahana ohija vaha;
ni-hojaki ida oimana,
ojarona hiki.
Vada hora avaniꞌahi;
oimana-ra avanokihi,
ojarona-ra avanokihi jaboni.
40 Hari.
Vara nina naothinia,
vaꞌora nanokiahivini kihiꞌihi ida saꞌa,
ꞌdama kihiki.
41 Vakavaꞌibodivaranikarahoꞌihi ida vanokiꞌiki,
khai vakhanina kabaꞌi,
asia vajariꞌdaki adani.
Oniaroa,
Jesus vaꞌora nanaꞌdohiꞌaha:
—Ida hojamanihi ꞌbai ohaki kaimoni?
42 Jesu-ra vanoꞌaꞌaha abaisana kodanahakia.
43 Bigathaniꞌaha,
vada vaniꞌavini oadani bihaꞌaha.
44 Bihavini naothinia vaꞌora niꞌaha:
—Oabinina viahania avakadiania ohojana oadani,
vara aꞌonira oniꞌabakhiaꞌiki ho afojora athi kapapirania Deus vara hora vaniꞌajoravini hiꞌiki.
Deus kavaꞌisohihi jirikia hojaki ida varani ohina.
Deus athi namoniva abonoa vanajiriꞌboꞌdaꞌiki jaboni ida varani ohina.
Moro kakapapirana hojaki jaboni ida varani ohina.
Deua bivavaꞌisohihijoraki ida athi kapapirania namithaki kaimoni kodiania.
45 Oniaroa,
Jesus vaꞌora kajoamoraꞌaha,
avigaja kaimoni ida Deus athi papira hojaki.
46 Vaꞌora niꞌaha;
—Deus athi kapapirania vara bivaniꞌajoraꞌiki ada Cristo.
Hovani Cristo ho,
Deus hora karonaꞌiki,
ijaꞌari-ra oakavaꞌijoaja kaimoni.
Papira jirini athini ida Deus oimana ꞌbanani-ra nofivini.
Binofiki ida oabiniꞌina,
binofiki ida mahi ahoarabakosikia ꞌdama kania ohojana.
Binofiki ida oahokiꞌina.
47 Deua binofiki jaboni ida arabo hahavi kaijaꞌarini-ra vaꞌora avarakanamonionivini omonina jahakia.
Vaꞌora vanavaꞌisohi bana:
“Jesus Cristo aꞌonira honariavini,
vakavaꞌipahinikaꞌoa bana ida Jahari kabadania avakabadanibakhiani
mahija Deua binaꞌbiravini
mahija aꞌonira akariakavini jaboni.”
Vaꞌora vara vaniꞌa bana.
Jerusalém kaijaꞌarini-ra vaꞌora avakanamonioni afoꞌimidia.
Naothinia arabo hahavi kaijaꞌarini vakadiania avikhaꞌa mahija vaꞌora avarakanamonionivini.
48 Aꞌonivani avanokihahaviꞌiki ida kodibadani afohahavi.
Avanokiki jaboni ida oimana ꞌbanani,
oabiniꞌina naothinia oahokiꞌina.
Vaꞌora vananamithavini hida avanokiꞌiki.
49 Hovani okaronaki bana ada Maꞌonahai Jahaki kodiabiꞌia bivavaꞌisohihijoraꞌiki avakadiania okhana.
Hojana oadani ada Maꞌonahai Jahaki,
aꞌonira noꞌaha Deus danona.
Kharina oadani,
Jerusaléa vanokha bana — vaꞌora niꞌaha ada Jesus.
Deus kania okasiꞌiki ada Jesus
50 Hari.
Oniaroa,
Jerusalém sidajia Jesus vaꞌora avikhaonaniꞌaha adani kidipohi.
Vaꞌora avikharimananiꞌaha Betânia ibavia.
Vakaikahiꞌaha.
Jesua bikanabiiniꞌihi ida saꞌa,
Deu-ra niꞌaꞌaha:
—Deus,
vaꞌora kajoamora bana hadani oipohina — niha ada Jesus.
51 Vara nina oadani,
akaraꞌoꞌaha ada Jesus vakadiania.
Nama okasiꞌina vani,
Deua bigathaniꞌaha.
52 Jesu-ra vakanamasiviꞌaha adani ipohina.
Jerusalém sidajia avajoiꞌaha khai vakhanina.
53 Hari.
Mahi hahavi Deu-ra khai vaniꞌavini kagorani kavasiribanini bodinia vahojaha,
Deu-ra khai vaniꞌahahaꞌoadahaꞌaha.
Hari ida vani oamani Lucas kavarani anokhomiꞌini.