Daijanarihi ida jaꞌdi hodijamaꞌoki bodini
20
Hari.
Domingo vani okhaꞌihi ida Maria Madalena Jesus kaꞌdamahana ibavini kania.
Avagarini vani okhaꞌihi.
Amaakariꞌihi,
binokiꞌihi ida jaꞌdi karaho aniaꞌini jaꞌdi hodini kaathania,
kaꞌoahajanarihi ida abaꞌoi kaꞌdamahani ibavini.
2 Ajihihi ajoiꞌihi Pedro vakadiania.
Pedro ꞌbamina ada Jesus ipohina hoariha Jesua binofijahakiki.
Kiꞌdarahani okhaꞌihi vakadiania,
vaꞌora navaꞌisohiꞌihi:
—Oigamina,
ida aniaꞌihi akadikaꞌdaꞌdi abaꞌona kaꞌdamahani ibavini bodinia.
Ida avisaꞌihi idakabaꞌi,
ni-aogajanaki ida abaꞌona hanaja avibaivini — vaꞌora niꞌaꞌihi ida Maria Madalena.
3 Oniaroa,
kaꞌdamahana ibavini kania avikhaꞌaha adani Pedro,
ꞌbamina khama.
4 Vakiꞌdarahaꞌbamakhamaꞌaha.
Pedro ꞌbamina jorakia kiꞌdarahana ovari miroꞌa kaikahiꞌaha ꞌdama kania.
5 Hasi nina vada inijakosiꞌaha jaꞌdi hodijamaꞌoki bodinia,
bianokijakosihi ida makari Jesus abaꞌona karafoani hiki,
ni-oꞌoiꞌiki.
6 Akhanosiagaꞌaha ada Pedro,
jorakia okhajakosiꞌaha.
Binokihi ida makari Jesus abaꞌona karafoani hiki kaꞌoa.
7 Binokiki jaboni ida kaꞌdaꞌdi kakarafoani hiki makari napaja paꞌitxia hojaki ida kaꞌdaꞌdi vakanaroaroavini hiki.
8 Hari.
Oꞌoisiagaꞌaha jaboni ada Pedro ꞌbamina,
binokiꞌihi,
ni-bikajariꞌdaꞌiki.
9 Papira athinia Deua vara bivaniꞌajoraꞌiki ida Cristo abinina naothinia ahokina.
Ni-avigaꞌiaki kaho ida Cristo ahokina kavaranihi nahina hini.
10 Vanokivini naothinia vajoiꞌaha gora vavahojaki kania.
Jesus abono-ra nanokiaꞌiki Maria Madalena kania
11 Hari.
Joisiagaꞌihi ida Maria Madalena.
Hojaroniꞌihi asarani Jesus abaꞌona kaꞌdamahani ibavini banininia.
Asarani kabaꞌi hasi nini vada inijakosiꞌihi.
12 Vaꞌora nokiꞌaha adani Deus ibavi kaijaꞌarini viꞌbamiki.
Vakaimahaki ida makari vaforiki.
Jesus abaꞌona ibavinia vavithiki adani Deus ibavi kaijaꞌarini.
Hoarana biavakaꞌdaꞌdikija vithiki.
Hoariha biavaꞌdamaki kaniaja vithiki.
13 Vananaꞌdohiꞌihi:
—Maria,
niha inimanija iasaraki?
Maria bigathaniꞌihi ida vakadinaꞌdohi:
—Ida vaaniꞌihi kodikaꞌdaꞌdi abaꞌona,
ni-oogaki ida ibavi avavaibavivini hiki.
14 Roiribaniꞌihi,
binokiꞌaha ada Jesus gaakosoana ꞌdihania.
Ni-biogajorakiki Jesus hina.
15 Jesua binanaꞌdohiꞌihi:
—Niha inimanija iasaraki?
Nahina mani ida inakoꞌdija?
Maria ibavi akadavaꞌava abono bivanihamaniha ada Jesus,
oniani ida biniꞌavini hija:
—Abaꞌoi-ra iosahi;
hora bana avanamithaha abaꞌoi-ra oanikhaja kaimoni.
Onofiki ida ibavi hoariha oavikhavini.
16 Jesua biniꞌaꞌihi:
—Maria.
Joiribaniꞌihi kidiania,
hebreu athinia Maria biniꞌaha:
—Raboni!
—Hariꞌa hora gathi bana.
Ni-oajoisiki kaho kodiabiꞌi kania nama.
Oigamina vakadiania okhaꞌa.
Vaꞌora navaꞌisohiha oathia:
Oajoisiki bana ho kodiabiꞌi kania,
vakadiabiꞌi ada,
kodiDeus ada,
vakadiDeus ada jaboni.
Vaꞌora niꞌa bana — niha ada Jesus.
18 Oniaroa,
ajoiꞌihi ida Maria Madalena,
Jesus ipohina vakadiania okhaꞌihi.
Kaikahihi,
vaꞌora niꞌaꞌihi:
—Ada onokiꞌaha akadikaꞌdaꞌdi.
Maria vara vaꞌora niꞌavini hihi ida athi hahavi Jesua vara biniꞌavini hiꞌiki.
Jesus abono-ra nanokiaꞌiki kidipohi vakadiania
19 Hari.
Domingo safini ajorana vani asia vakajoronikosoaꞌaha adani Jesus ipohina.
Kakaꞌoahamanihi ida bakatha,
hoariha oꞌoiria kaimoni.
Vaꞌora vifiniki adani judeus kaijaꞌari vanavaꞌisohiva abono vaꞌoaniaro maina vaꞌora vavahonariahivini vagathana.
Hari.
Oniaroa,
abono-ra nanokiaꞌaha ada Jesus,
vahararana gaakosoaꞌina hojaꞌina.
Vaꞌora niꞌaꞌaha:
—Avavaꞌini jahajahaꞌava.
Jesus aparece para os discípulos (João 20:19-31)
20 Vara nina naothinia vaꞌora nanokiahiꞌaha saꞌa kasiini jarari siini hiki kaakhaniꞌikia.
Vakadikaꞌdaꞌdi-ra vanokiꞌianavini,
khai vaꞌora niꞌaꞌahapikiꞌaha adani ipohina.
21 Jesus vaꞌora niꞌaꞌianaha:
—Avavaꞌini jahajahaꞌava.
Kodiabiꞌi hora karonaꞌavini vani fori hija ida aꞌonira okaronavini jaboni Deus athi-ra avanamonija kaimoni.
22 Jesus vanamana bikarafofofiahaꞌaha afonana,
vaꞌora niꞌaha:
“Aakavaꞌiꞌbirinihi hida
kadahojai jahariki,
ira aakariakahi.”
Avaniꞌahi,
oniani ida Deus ijaꞌari kahojai jahariki abosini-ra naꞌbiravini hija bana,
biakariakaki jaboni ida ijaꞌari.
Avaniꞌahi ida ijaꞌari:
“Jokoa aakavaꞌiꞌbirinirihi hida kadahojai jahariki,
ni-ira aakariakaki.”
Avaniꞌahi,
oniani ida Deus kidihojai jahariki binaꞌbiraravini hija jaboni,
ni-biakariakaki jaboni ida ijaꞌari.
Toméa binokiꞌiki ada Jesus
24 Hari.
Oniaroa,
Jesus abono-ra nanokiavini vani kidipohi vakadiania,
ni-hojaki ada ipohina Tomé oniki.
Tomé onina hoariha Soi.
25 Hari.
Kaikahiꞌaha ada Tomé Jesus ipohina vakadiania,
vaniꞌaha:
—Tomé,
anokiꞌiki ada akadikaꞌdaꞌdi Jesus.
Vaathi bigathaniꞌaha:
—Okanokiravini oadani ida itapoa kaibavini Jesus saꞌa,
okaabadaravini oadani ida itapoa kaibavini osaꞌa nokhonia,
jarari siini hiki osaꞌa,
okajariꞌdapaꞌitxiki ida ahokiꞌina — vaꞌora niꞌaꞌaha ada Tomé.
26 Hari.
Radahaꞌihi ida semana hoarani,
vakajoronikosoaꞌianaha adani Jesus ipohina.
Tomé hojaꞌiki jaboni.
Kakaꞌoahajahakiꞌianaki ida gora kaathani.
Hari.
Nokiaꞌianaha ada Jesus vahararana gaakosoaꞌina hojaꞌianaha,
vaꞌora niꞌaha:
—Avavaꞌini jahajahaꞌava.
27 Oniaroa,
Tomé-ra niꞌaꞌaha:
—Tomé,
isaꞌani-ra kanaibavi itapoa kaibavini-ra vada kaniꞌa.
Isaꞌani-ra kanaibavi ojarari siini kaakhaniꞌiki kani mahija ikaabadavini.
Hariꞌa oahokiꞌina-ra kajariꞌdajana.
Hora vakaijokaꞌa bana.
28 Toméa biniꞌaꞌaha:
—Oahokina-ra inokiꞌavini mani ida hora ikajariꞌdajanaravini hija.
Deus vaꞌora kajoamoraki adani vajariꞌdariki hora vanokiravini kabaꞌi.
Joãoa binajiriki hida Jesus monina jahaki
30 Ni-onajirihahaviki ida Jesus kabadani danoki hihida papira.
Harivani Jesus ipohina hari,
anokibakhiaki ida kidibadani danoki ipohiki hoariha.
31 Kidibadani danoki kavaranihi onajirivini hiki Jesu-ra avakajariꞌdaravini.
Onofiki ida avakajariꞌdaravini Cristo Deua bikaronaꞌavini.
Deus kaisai ada Jesus.
Jesu-ra avavakaijokahi;
mahi jaꞌdini anokhomiriki-ra avavahojahi Deus kania hidiaja,
namajaja jaboni.