3 Hari.

Jesu-ra vanamaakaribakhiaha,

vakapatabakhiavini vaniꞌaha:

—Ivani judeus kaijaꞌari vakadikaꞌdaꞌdi i.

Jahaki ida vaꞌora ivakaꞌdaꞌdivini — Jesu-ra avigarahavini vaniꞌabakhiaha.

4 Hari.

Gorana joionaniꞌianaha ada Pilatos,

vaꞌora niꞌaha adani ijaꞌari vajoroniki:

—Mitha vaniꞌa!

Ovahonariahiki bana ada Jesus khaonanina avarigaja kaimoni ida Jahari kabadani-ra bada niꞌaravini.

Ni-nahina kaimoni abinina ovahonariahiki — Pilatos vaꞌora niꞌaꞌianaha.

5 Khaonaniꞌaha ada Jesus.

Asia mani biakaꞌdaꞌdihahi ida kajamari kajaroki,

bikaimahaki ida makari nadaraki.

Pilatos vaꞌora niꞌaha:

—Vada vaniꞌa o hiꞌo makhira.

6 Sasidotxi vavakaꞌdaꞌdiva vanokiꞌaha ada Jesus,

vabodiꞌbaraꞌaha:

—Ivahonariahi ava akasanakhamakia akaꞌitapoamisahanaꞌina — athii ꞌbarakia vaniꞌabakhiaha ada Pilatos.

Vabodiꞌbarahaki jaboni adani ijaꞌari Deu-ra khai vaniꞌavini kagorani-ra avakadavaꞌaki.

—Jahaki oni abinina ava akasanakhamakia — vakhaniꞌaha.

Pilatos vaꞌora niꞌaꞌianaha:

—Aꞌonivani avavikhaꞌa bana mahija avanaabinivini.

Ni-okaragaki ida badani asohiriki bada biniꞌaki.

Ni-onofiki ida abinina ovahonariahivini.

7 Vajoronikia vagathaniꞌihi ida athi:

—Deus kaisai hina-ra kahiki ada.

Jahariki ida athii nikia kavaranina.

Akadijaꞌari avikhananavaki kavaꞌisohihi jiriki kapapirani haria honariavini hiki ida ijaꞌari nikia kavaraniki-ra anaabinivini.

Kidivarani jahariki abosini ida abinini — vakhaniha.

8 Hari.

Pilatoa bikamithaꞌihi ida Deus kaisai hina vakahivini,

ofinikarahoꞌaha.

9 Gorana ajoijakosiꞌianaha,

Jesu-ra nanaꞌdohiꞌianaha:

—Hana hini ibavi kaijaꞌarini mani i?

Ni-Jesua bigathaniꞌiki ida kidinaꞌdohi.

10 Pilatoa biniꞌaꞌaha:

—Nahina mani ida oathi-ra ikavisohavini hija?

Hariꞌa bana iakavaꞌiꞌbiriniꞌa ida ira onavaꞌisohivini hiki.

Iꞌajihini-ra ovahonariahivini-ra onofihi;

ovahonariahihi.

Iabinini-ra ovahonariahivini-ra onofihi;

ovahonariahihi.

Nahina-ra onofihi;

okaabokahi.

11 Jesua biniꞌaha:

—Deua bivaꞌahahi ida oabinina-ra ivahonariahivini;

ikaabokahi.

Bivaꞌaharihi;

ni-ikaabokaki ida oabinina-ra ivahonariahivini.

Oabinina-ra ivahonariahihi;

Jahari kabadania ikabadaniki bana i Deus viaha.

Jahari kabadani arafiakia kabadaniꞌiki ada makhira hora arakhaꞌiki kadania.

12 Pilatoa bikamithaꞌihi ida Jesua vara biniꞌavini hiꞌiki,

oniania binofihi ida Jesu-ra anaihotavini.

Pilatos vaꞌora niꞌaha adani vaipohiki vajoroniki:

—Jakaho oanaihotava ada Jesus.

Vabodiꞌbaraꞌianaha,

vagathaniꞌihi ida Pilatos athi:

—Arabo kakaꞌdaꞌdini hina-ra kahiꞌbadaraki ada Jesus.

Binofiki ida César kaarabo-ra saarivini.

Arabo ipohiki kakaꞌdaꞌdini César onikia bikaihamahiki bana ada nofina hiriki.

César Jesus kaꞌdaꞌdi hina-ra kahivini-ra kamithaki bana,

bikaihamahiha.

Jesu-ra ianaihotavini varani hini-ra kamithaha;

ira kaihamahiha jaboni — vakhaniha.

13 Pilatoa mitha biniꞌaꞌihi ida vakadibodiꞌbarahi,

biavikhaonaniꞌaha ada Jesus vakadiania.

Oniaja hojaki ida ijaꞌari nasohiva abono kavithi ibavini ijaꞌari kaadahai ibavini jaꞌdi sohiriamaꞌoki namani.

Ibavi onini hebreu athinia Gabatá.

Hari.

Ijaꞌari nasohiva abono kavithi ibavinia vithirariꞌaha ada Pilatos.

14 Páscoa kaihinikani amonahani kamaꞌdani viahania safini sohirarina amaakarina,

Pilatos vaꞌora niꞌaha adani judeus kaijaꞌari:

—Vada vaniꞌa o hiꞌo avakadikaꞌdaꞌdi!

15 Vabodiꞌbaraꞌianaha:

—Ivahonariahi ava akasanakhamakia abinina!

— vakhaniha afohaꞌoadaha.

Pilatos vaꞌora nanaꞌdohiꞌaha:

—Avanofimanija ida avakadikaꞌdaꞌdi abinina-ra ovahonariahivini ava akasanakhamakia akaꞌitapoamisahanana?

Sasidotxi vavakaꞌdaꞌdiva vagathaniꞌihi ida kidinaꞌdohi:

—Akadikaꞌdaꞌdi kaꞌoa ada arabo ipohiki kakaꞌdaꞌdini,

César oniki.

16 Oniaroa,

Pilatoa biarakhaꞌaha ada Jesus sorara vakadiania.

Vagathaniha,

avavikhaꞌaha.

17 Hari.

Oniaroa,

sidajia avavikhaonaniꞌaha.

Jesua biakaibaꞌiꞌihi ida ava akasanakhamaki,

avakhanoꞌaha kaꞌdaꞌdi kajaroni kaibavinia ibavi onikia.

Ibavi onini hebreu athini “Gólgota”.

18 Avakhanoꞌaha,

Jesu-ra avakaꞌitapoamisahanaꞌaha ava akasanakhamakia,

varagaamananiꞌihi ida ava.

Vaꞌora avakaꞌitapoamisahanaꞌaha adani makhira viꞌbamiki jaboni.

Hoarana Jesus pitana kaꞌaniajania,

hoariha Jesus pitana kajasonija.

19 Pilatoa binajiriꞌihi ida athi tábua kapaꞌitxi kanamania,

vaꞌora honariaha adani sorara:

—Jesus kaꞌdaꞌdi kanamania avakakaꞌitapoamisiꞌa hida taoba — niha.

Ijaꞌari athini ahoarabakosikia jiriki ida Jesus kaꞌdaꞌdi kanamania hojaki jirihi athini.

Hebreu athini,

Roma sidaji kaijaꞌarini athini,

grego athini hiki ida jirini.

Pilatos athi jiriki ida:

20 Hari.

Ijaꞌari vaipohikia vada vaniꞌaꞌihi ida jirihi.

Jerusalém sidaji baninini maakarini ida ibavi Jesu-ra avakaꞌitapoamisahanavini hiꞌiki ibavini,

oniani ida ijaꞌari vaipohiki jirihi-ra vanokivini hija.

21 Hari.

Sasidotxi vavakaꞌdaꞌdiva vaniꞌaꞌaha ada Pilatos:

—Hariꞌa inajiri:

“Judeus kaijaꞌari vakadikaꞌdaꞌdi hada.”

Ianaabosi bana ida iathini inajiriꞌiki.

Inajiri bana:

“Judeus kaijaꞌari vakadikaꞌdaꞌdi hina-ra kahiki hada makhira.”

— Pilato-ra vaniꞌaha.

22 Pilatos vaꞌora niꞌaꞌaha:

—Iniani.

Onajiriꞌiki ida,

jakaho hojaꞌava ida onajiriꞌiki.

23 Oniaroa,

Jesu-ra avakaꞌitapoamisahanavini naothinia adani sorara,

vaabono vakaanihananaꞌaha Jesus kamakari hoarahanana.

Avakoꞌbamahakhamaki adani sorara.

Aaniki ida Jesus kamakari hoariha amonahani rokhojahariki.

24 Vaabono vakaniꞌakhamaꞌaha adani sorara:

—Hariꞌa anaꞌbirava hida kidimakari.

Anavararava hida jaꞌdi pitahani akoꞌbamahakhamaki hoarani jiriki,

aogaja kaimoni ida makaria gahinaki kaimoni — vakhaniꞌaha.

Hari.

Deus athi kapapirania hojaꞌboꞌdaki ida athii jiriki:

25 Oniaroa,

ava akasanakhamakia Jesus maakarina vahojaꞌaha adani Jesus kaamia,

kidiꞌaaso,

Clopas kagamo Maria oniki,

Maria Madalena vihiki.

26 Jesua binokirariꞌihi ida kidiamia,

binokiꞌaha jaboni ada ipohina hoariha binofijahakiki Jesus kaamia ꞌdihania hojana.

Jesua biniꞌaꞌihi ida kidiamia:

—Hiꞌo kadaisai o.

—Hiꞌoni kadamia oni.

Jesua binofiki ida kidiamia Joãoa bikahinanikavini,

kidiamia kaꞌoa-ra kahinanikaki fori binihavini,

oniani ida kidisaia binaonivini hija.

Oniaroa,

Jesus ipohina biavikhaꞌihi ida Jesus kaamia gorana bikahinanikaja kaimoni.

28 Hari.

Jesua biogaꞌiki ida kidibadani hahavi-ra ananokhomiꞌavini.

Namithaki kaimoni hida kanabidi akaaforani kavaranihi Deus athi kapapirania hojaꞌboꞌdaꞌiki,

Jesua biniꞌaꞌiki:

—Okanabidi akaaforaꞌiki ho.

29 Maakarina kahojaki ida vao vinho kaidivariki kadaiki.

Jesus athi-ra kamithakia bianathoranihi ida masana bono araꞌokhoki fori hiki vinho kaidivarikia,

hisopo avani nokhonia binaibavihi,

biarakasihi Jesus bodia.

30 Jesua binadomidomivini naothinia nihaha:

—Anokhomiꞌiki hida kodibadani.

Vara nina naothinia hasi khanirariꞌihi ida kaꞌdaꞌdi,

abiniꞌaha.

31 Hari.

Oniaroa,

Pilatos kania avikhaꞌaha adani judeus kaijaꞌari vanavaꞌisohiva abono,

vaniꞌaha ada Pilatos:

—Vaꞌora anofiki adani makhira avakaꞌitapoamisahanaki ava akasanakhamaki kania vaaniana akadiꞌakoiri kamahini viahania.

Vaꞌora honaria bana adani sorara,

hiꞌadani ava akasanakhamaki kania vahojaki vaavana-ra viꞌdanira kaimoni,

vaabinijorakira kaimoni.

Vaabinina naothinia vabaꞌona aniani ivahonariahi bana — Pilato-ra vakanikhariaha adani ijaꞌari vanavaꞌisohiva abono.

Hari.

Vakadiꞌakoiri kamahini kamaꞌdani amaakarini mani ida Pilato-ra vakanikhariavini hija vabaꞌona aniani.

Páscoa kaihinikani kamahini amonahani mani ida vakadiꞌakoiri kamahini nakarahoni hija.

32 Hari.

Oniaroa,

Pilatos vaꞌora honariaꞌaha adani sorara ava akasanakhamaki kania avikhana.

Viꞌdaniꞌimidiahi ida makhira Jesus ꞌdihana hojaki avana afoꞌbamakhama.

Naothinia,

viꞌdaniꞌianahi ida makhira hoariha avana.

33 Jesu-ra vanamaakariha,

abiniꞌina vanokiha,

oniani ida Jesus avana-ra viꞌdaniravini hija.

34 Sorara hoarana bisakaꞌihi ida Jesus jarari kidisaꞌaia.

Khaonanijorakiꞌihi ida amana,

paha hiki.

35 Hiꞌada ipohina Jesus abinina-ra nokiꞌikia vara bivaniꞌaꞌiki jaboni ida niha niniꞌina abiniꞌina,

avakajariꞌdaria kaimoni.

Kaꞌoa hiki hida kidivarani.

Ovaria biogaki ida varani kaꞌoa hini.

36 Namithaꞌiki ida Jesus kania Deus athi kapapirania bivavaꞌisohihijoraꞌiki:

38 Hari.

Oniaroa,

Jesus abinina naothinia Pilatos kania okhaꞌaha ada José.

Arimatéia sidaji kaijaꞌarini ada.

Pilato-ra niꞌaha:

—Ivaꞌahamanija koda ida Jesus abaꞌona-ra oanivini ava akasanakhamaki kania,

okaꞌdamahaja kaimoni?

— niha ada José.

Jesus kania abono-ra gahinai nihaꞌboꞌdaꞌiki ada José.

Vakadijaꞌari vanavaꞌisohiva abono-ra vaꞌora finivini mani ida Jesus kaijaꞌari hina-ra nanamitharavini hija vahoariha vakadiania.

Hari.

Pilatoa biniꞌaꞌaha ada José:

—Ba ianiha ida abaꞌona.

Joiꞌaha ada José ava akasanakhamaki kania,

bianiꞌihi ida Jesus abaꞌona.

39 Nicodemoa bivaipohihaꞌaha ada José.

Hiꞌada Nicodemos mahi ꞌboꞌdakari,

joma vani Jesu-ra navanavanahaꞌara ada.

Hari.

Nicodemoa biavikhaꞌihi ida aloés,

miha kabodihadihaki ꞌbathajorakiria kaimoni ida Jesus abaꞌona.

35 quilos ipohini ida biavikhaki,

abaꞌona karafoani bodinia biobaija kaimoni.

40 José,

Nicodemos khama avavikhaꞌihi ida Jesus abaꞌona,

vakarafoaꞌihi makari oadakia.

Vanaibaviꞌihi ida miha,

aloés hiki,

Jesus karafoana hararania.

Judeus kaijaꞌari vakadihojai ida vakadibadani hiki.

41 Jesua bivaabiniki ibavini maakarinia hojaki ida ibavi ihiꞌai avani ipohiki.

Idiaja hojaki ida jaꞌdi khorahaki.

Kaꞌdamahi ibavini kaimoni ida jaꞌdi hodijamaꞌoki.

Ni-nahina kaꞌdamahaꞌiaki kaho hiꞌida jaꞌdi hodini bodinia.

42 Jesua bivaabiniki ibavini maakarinia hojaki ida jaꞌdi hodijamaꞌoki.

Vakadiꞌakoiri kamahini kamaꞌdani mani ida Jesus abaꞌona-ra avibaivini hija.