Pilatos kania Jesu-ra avisaki adani
27
Hari.
Oniaroa,
vagavagani vaabono vara vakaniꞌakhamaha adani sasidotxi vavakaꞌdaꞌdiva,
judeus kaijaꞌari vanavaꞌisohiva abono khama.
Vakhaniha:
—Deus kaisai hina-ra kahiꞌbadaraki ada Jesus.
Jahaki ida abinina bana.
2 Naothinia Jesus dabohana-ra vavahonariahiꞌaha,
Pilatos kania avisaꞌaha ada Jesus,
avarakhaꞌaha.
Arabo kakaꞌdaꞌdini ada Pilatos.
Abono-ra naabiniꞌiki ada Judas Iscariotes
3 Oniaroa,
Judas Iscariotea bikamithaꞌihi ida Jesus varani hina,
judeus kaijaꞌari vanavaꞌisohiva abono abinina-ra vavahonariahivini-ra vanofivini.
Hiꞌo Judas Iscariotes Jesu-ra arakhaꞌiki.
Monina-ra kamithaꞌaha,
abono-ra kaꞌdaꞌdigariaꞌaha.
Hari.
Sasidotxi vavakaꞌdaꞌdiva,
judeus kaijaꞌari vanavaꞌisohiva abono vakadiania okhaꞌaha ada Judas.
Kaikahiꞌaha,
binajoiki ida jiniro ꞌbaꞌdani 30 hiki ipohini vakadiania.
4 Vaꞌora niꞌaha:
—Asohiriꞌoamanija ida Jahari kabadania okabadanina.
Oarakhaꞌiki ada Jesus avakadiania.
Ni-Jesua bada biniꞌapaꞌitxiki ida Jahari kabadani!
Judas Iscariote-ra vaniꞌaha:
—Ni-akavaꞌibodiki ida kadabadani asohini asohirini.
Ba ivani inasohi.
5 Oniaroa,
Judas Iscariotea bisonarariꞌihi ida jiniro Deu-ra khai vaniꞌavini kagorani bodinia,
vaꞌora nahojahaꞌaha,
ajihiꞌaha.
Okhaꞌaha kanabidi-ra akanaforaꞌaha,
abono-ra naabiniꞌaha.
6 Judas Iscariotes ajihiꞌina naothinia sasidotxi vavakaꞌdaꞌdiva vidoraꞌihi ida jiniro,
vakhanihaꞌaha:
—Niha aniꞌaꞌaki koda hida jiniro?
Hihida jiniro Juda-ra anoꞌavini hiꞌiki Jesu-ra arakhavini anaabosivini abinira kaimoni ada Jesus.
Ni-jahaki ida jiniro ijaꞌari abinini abosini hiki,
ijaꞌari Deu-ra vakanavaꞌigavini kaimoni hini.
Nimania ida Deus kavaꞌisohihi jiriki athini.
Oniania,
ni-jahaki aobaivini hida jiniro bavinia Deu-ra khai aniꞌavini kagorani bodinia hojaki — vakhaniha.
7 Oniaroa,
naothinia vaabono vakanavaꞌisohikhamavini hiꞌihi ida ibavi-ra vanaabosivini,
jiniro Judas Iscariotea binajoiꞌikia.
Hojaki ida ibavi ijaꞌari nami-ra vikhorivini ibavini vakadibavi amonahani kaimoni.
Vakapavakariꞌihi ida ibavi.
Vanaabosivini naothinia,
ijaꞌaria vanamonahaꞌihi ida kaꞌdamahi ibavini kaimoni.
Judeus kaijaꞌari vihiriki vabaꞌona kaꞌdamahani ibavini kaimoni.
8 Ama ahovariꞌiki abosini ida jiniro,
oniani ida ibavi-ra vanaonivini hija:
“Ibavi ama biavahovariꞌikia.”
9 Nimania ida Deus athi namoniva abono kohana Jeremias oniki athi.
Jeremia vara bivaniꞌajoraꞌiki ida namithaki kaimoni:
“Vidoraꞌihi ida jiniro ꞌbaꞌdani 30 hiki ipohini.
Israel kaijaꞌari vaabono vakanavaꞌisohikhamavini hiki ida jiniro ipohini,
vanaabosira kaimoni ada ovari.
10 Vakapavakariꞌiki ida ibavi ijaꞌari nami-ra khorivini ibavini.
Nimania ida Deus hora honariavini hiki okapavakariꞌiki.”
Arabo kakaꞌdaꞌdini Pilatos oniki viaha hojaki ada Jesus
11 Oniaroa,
Pilatos viaha hojaki ada Jesus.
Pilatoa binanaꞌdohiꞌaha:
—Ivani,
judeus kaijaꞌari vakaꞌdaꞌdiva i?
—Haꞌa,
kaꞌoa oamani ida iniꞌaki — Jesua biniꞌaha.
12 Pilatos kania sasidotxi vavakaꞌdaꞌdiva,
judeus kaijaꞌari vanavaꞌisohiva abono khama,
Jesu-ra avanaathidanoarariꞌaha,
ni-Jesua bigathaniꞌiki ida vakadivarani.
13 Pilatoa binanaꞌdohiꞌianaha ada Jesus:
—Ikamitharia ida ira avanaathidanoarariꞌahapikivini athini?
14 Ni-Jesua bigathaniki ida Pilatos athi.
Pilatoa bikavaꞌibodivaranikarahohi ida Jesua athi bigathaniravini.
Jesua abinina-ra vahonariahiꞌiki ada Pilatos
15 Hari.
Páscoa ihinika kamahini Pilatoa bivaꞌahaki ada makhira hoarana cadeia kabodinia hojaki ajihina,
aihotara kaimoni.
Ihinika-ra vanamonahakia vanagathogathoꞌiki ada makhira hana hina cadeia okhaonanina-ra vanofivini.
Pilatos hojana hiki ida makhira-ra arakhaonanivini.
16 Hari.
Hojaki ada Barrabás oniki cadeia kabodinia.
Ijaꞌari vaipohikia avigaki ada Barrabás.
17 Oniaroa,
Pilatos kania vajoroniꞌaha adani ijaꞌari vâipohiki.
Pilatos vaꞌora niꞌaha:
—Hana hina makhira-ra koda cadeia okhaonanina-ra avanofija?
Barrabás vani ada avanofira?
Jesus vani ada avanofira?
Hiꞌo Cristoa avanaoniki.
18 Pilatos abono-ra niꞌavini:
—Ijaꞌari vaipohikia vavajahaki ada Jesus.
Jesu-ra avakabaivini adani sasidotxi vavakaꞌdaꞌdiva.
Vakadiꞌakabajahi oamani ida Jesu-ra avarakhavini hija kodiania — abono-ra niꞌaha ada Pilatos.
19 Ijaꞌari-ra nasohivini kagorani bodinia vithiꞌaha ada Pilatos.
Kidigamoa bikaronaꞌihi ida athini kidimoni,
biniꞌaha ada kidimakhira:
—Hariꞌa jaharikia iarakha bana ada Jesus.
Ni-nahina jaharikia kabadaniki.
Hihida joma kodivadami hiki ada ovari.
Hora naimahidaki hida onokivini kodivadamia — nihi ida Pilatos kagamo athini bikaronaꞌiki.
20 Sasidotxi vavakaꞌdaꞌdiva,
judeus kaijaꞌari vanavaꞌisohiva abono khama vaꞌora vara vaniꞌabakhiaki afodanoki adani ijaꞌari vaipohiki Barrabás arakhana-ra vakanikhariavini.
Oniania,
vanaabaꞌihi ida sasidotxi vavakaꞌdaꞌdiva vakadihonari.
Pilato-ra vaniꞌaha:
—Anofiki bana ada Barrabás iarakhavini akadiania.
Anofiki ida Jesus abinina-ra ivahonariahivini.
21 Oniaroa,
vaꞌora nanaꞌdohiꞌianaha ada Pilatos:
—Hana hina makhira koda ada oarakhavini avanofira avakadiania?
Pilato-ra vaniꞌaha:
—Barrabás vani ada anofira.
22 Pilatos vaꞌora nanaꞌdohiꞌianaha:
—Niha oniꞌaꞌaki koda ada Jesus,
Cristoa avanaoniki?
—Ivahonariahi ava akasanakhamakia akaꞌitapoamisahanana abinira kaimoni — vaniꞌaꞌaha ada Pilatos.
23 Pilatos vaꞌora nanaꞌdohiꞌianaha:
—Nahina kaimoni ida Jesu-ra ovahonariahivini hija abinina?
Nahina mani ida kidibadani jahariki hija?
— vaꞌora nanaꞌdohiha ada Pilatos.
Bodiꞌbarahia vaniꞌaha.
—Ivahonariahi bana ava akasanakhamakia akaꞌitapoamisahanaꞌina.
24 Pilatoa ni-bikaabokajanaki ida ijaꞌari vaipohiki vakadibodiꞌbarahi.
Ni-athi vakamithapaꞌitxijanaki.
Pilatos vaꞌora finiꞌiki adani ijaꞌari vaipohiki kidisorara-ra vaꞌora vidavini,
oniani ida kidihonai abono-ra niꞌavini hija:
—Hora kavikha paha osaꞌa-ra okosokoja kaimoni.
Hari.
Ijaꞌari vaipohikia vanokivini kabaꞌi,
Pilatoa bikosokoꞌihi ida saꞌa,
vaꞌora niꞌaha:
—Osaꞌa hida okosokoja,
avarigaja kaimoni ida Jesus abinina-ra onofiravini.
Aꞌonivani avanofija ida abinina — vaꞌora niꞌaha ada Pilatos.
25 Ijaꞌari vajoronikia ni-vavamakhaniki ida Jesus abinina,
oniani ida Pilatos athi-ra vagathanivini hija:
—Jahaki ida abinina;
harivani agathaniki ida abinina abosini nahina jaharikia.
Akadijaꞌari vanamitharonisiagakia vagathaniki jaboni bana ida nahina jahariki Jesus abinina abosini.
26 Oniaroa,
Pilatoa bivahonariahiꞌaha ada Barrabás arakhana aihotara kaimoni.
Pilatos sorara-ra vaꞌora honariavini Jesu-ra vidafiahavini xikotxia.
Jaꞌdi sajoki vaꞌa ipohikia ahoki ida xikotxi oniki.
Vidafiahavini naothinia,
Pilatoa bivahonariahiꞌaha ada Jesus akaꞌitapoamisahanana ava akasanakhamakia abinira kaimoni.
Sorara vanajaharihariki ada Jesus
27 Hari.
Avakaꞌitapoamisahanavini viahania,
sorara vania avavikhamiha ada Jesus ibavi hoariha Pilatos gorana bodinia.
Avavikhamiha,
vaꞌora vakaboaꞌiha adani sorara vaipohiki vajoronira kaimoni.
Vabodi pana hojaha ada Jesus avigarahara kaimoni.
28 Oniaroa,
vaaniꞌihi ida kidikarahobi bikaimahaki.
Avanaragarahivini hiꞌihi ida karahobi nadaraki.
29 Vakanamonahahi ida kajamari kajaroki.
Kaꞌdaꞌdia avakaragariꞌihi.
Vanaibaviꞌihi ida ava saꞌa aniaja,
arabo kakaꞌdaꞌdinia bivahojaki fori hiki.
Jesus viaha vakajoꞌatharariꞌaha.
Judeus kaijaꞌari vakadikaꞌdaꞌdi hina vakahiꞌbadaraꞌaha.
Jesu-ra vaniꞌahahaviha:
—Ivani judeus kaijaꞌari vakaꞌdaꞌdiva i — vaniꞌabakhiaha.
30 Jesu-ra vakaiꞌbaiꞌaha.
Visaariꞌihi ida ava,
kaꞌdaꞌdi vakodafiaꞌaha jaboni.
31 Oniaroa,
avigarahavini naothinia,
vaaniꞌihi ida karahobi nadaraki,
Jesu-ra vakanakarahobiꞌianara kaimoni kidikarahobia.
Oniaroa,
ai vavanihaꞌaha ava akasanakhamakia avakaꞌitapoamisahanara kaimoni ada Jesus.
Ava akasanakhamakia avakaꞌitapoamisahanaꞌiki ada Jesus
32 Hari.
Ai vavanihaha.
Avikhana kabaꞌi vakaragarariꞌaha ada Simão.
Cirene sidaji kaijaꞌarini ada.
Hari.
Sorara Simão-ra vanokiha,
vahonariaꞌaha:
—Ivani,
Jesu-ra kakaibaꞌahivini hihida ava akasanakhamaki — sorara vaniꞌaha ada Simão.
33 Hari.
Bikaibaꞌiꞌihi ida ava akasanakhamaki.
Oniaroa,
Gólgota ibavi onikia vakaikahiꞌaha.
(Gólgota ibavi oniki kaꞌdaꞌdi kajaroni kaibavini ida.)
34 Sorara Jesu-ra vanoꞌavini hiki ida vinho aꞌbani bariokhana kabodiki.
Imana ꞌbanani fai inija kaimoni.
Bikaijoꞌahi,
ni-binofiki.
35 Hari.
Ava akasanakhamakia Jesu-ra avakaꞌitapoamisahanaꞌaha adani sorara.
Varagaamananivini ida ava akasanakhamaki nami khorahaki bodinia.
Hari hiꞌihi ida vakadibadani.
Oniaroa,
vakosonakhamaki ida jaꞌdi pitani jiriki,
avigaja kaimoni ida kidimakari ravinaꞌini.
36 Naothinia,
vavithiriamaꞌoꞌaha adani sorara Jesu-ra avakadavaꞌavini.
37 Hari.
Jesus kaꞌdaꞌdi kanamania avakakaꞌitapoamisiꞌihi ida tábua kajiriki rajomi kaimoni,
ijaꞌaria avigaja kaimoni ida nahina kaimoni Jesu-ra vanaabinivini.
Vanajirivini athini:
“Hihada Jesus.
Judeus kaijaꞌari vakadikaꞌdaꞌdi hada.”
Jesu-ra avanaathidanoararivini hiki judeus kaijaꞌari vakadikaꞌdaꞌdi hina-ra kahivini.
38 Hari.
Sorara vani vaꞌora vavikhaha adani daiki-ra avanahoroabakhiaki viꞌbamiki.
Vaꞌora avakaꞌitapoamisahanaꞌaha jaboni.
Vanaibaviꞌaha ada hoariha Jesus pitana aniaja,
vanaibaviꞌaha ada hoariha Jesus pitana kajasonija.
39 Hari.
Ijaꞌari varadahaꞌaha avigarahaꞌaha ada Jesus.
Jesu-ra vakaihimoravini oamani ida varani niki-ra vara vavaniꞌavini hija.
Onii jaharikia Jesu-ra vaniꞌaha:
40 —Deu-ra khai aniꞌavini kagorani-ra inathararavini-ra ikahiki i,
mahi ahoarabakosikia ianajaꞌdivini ikahiki i.
Deus kaisai ihini-ra ikahiki i;
iabono akavaꞌijoaꞌa.
Iabono aniꞌa ava akasanakhamakia — Jesu-ra vaniꞌaha.
41 Jesu-ra avigarahaꞌaha jaboni adani sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono,
judeus kaijaꞌari vanavaꞌisohiva abono vihiki.
Vaabono vakaniꞌakhamaꞌaha:
42 —Jesus vaꞌora akavaꞌijoaꞌiki adani vahoariha.
Ni-abono-ra maha akavaꞌijoavini-ra kaabokaꞌiki.
Akadijaꞌari vakaꞌdaꞌdiva hiriha o.
Abono-ra anivini anokiha,
ava akasanakhamakia gaarina anokiha;
ni-akajariꞌdajanaki.
43 Jesua bivakaijokaki ada Deus.
Deus kaisai hina-ra kahiki ada jaboni.
Kaꞌoa hija vaha ida kidivarani;
Deua binofiha vaha;
biakavaꞌijoaha vaha — vakhaniha.
44 Hiꞌadani viꞌbamiki avakaꞌitapoamisahanakia avigarahaki jaboni ada Jesus.
Abiniꞌiki ada Jesus
45 Hari.
Safini sohirarina vani bakibakini kamaꞌdaꞌihi ida arabo afohahavi.
Safini ajorana vani avagani kamaꞌdaꞌianahi.
46 Safini ajorana vani bodiꞌbarahaꞌaha ada Jesus athia:
—“Eli,
Eli,
lemá sabactani” — niha ada Jesus athia.
“KodiDeus,
kodiDeus,
niha onina mani hida hora inahojahavini hiꞌia?”
— niha ada Jesus.
47 Ijaꞌari vahojakia vakamithahi ida kidibodiꞌbarai,
vakhaniha:
—Mitha vaniꞌa.
Elias kohana-ra baranahaki ada — vakhaniha.
Elias kohana-ra baranahaki vavanihaha ada Jesus.
48 Kiꞌdarahaꞌaha ida ijaꞌari athi-ra kamithaki,
bianathoraniꞌihi ida makari fori hiki vinho kaidivarikia.
Ava oadaki sanarahakia binahojaꞌihi.
Bivikhahi,
Jesus viaha biarakasiꞌihi,
Jesua binadomidomija kaimoni ida vinho aꞌbani.
49 Vahoariha ava akasanakhamaki kania vahojakia vaniꞌaha ada vinho-ra vikhaki:
—Hariꞌa kaho.
Ada kaho vahabini khaha Elias,
ava akasanakhamakia biakavaꞌijoara kaimoni ada Jesus.
Vada aniꞌava.
50 Oniaroa,
bodiꞌbaraꞌianaha ada Jesus,
abiniꞌaha.
51 Hari.
Abinina kabaꞌi ꞌbiraꞌihi ida makari katokihi Deu-ra khai vaniꞌavini kagorani kaꞌoahafianihiki.
Makaria bikatapafiaki ida gora pitani Ibavi Katokini Jahakaꞌoaki oniki ijaꞌari oꞌoiria kaimoni.
Khiorarini akapitakhamaꞌihi.
Hoꞌdohoꞌdoꞌihi ida arabo.
ꞌBoroꞌboroꞌihi ida jaꞌdi naꞌbahaki.
52-53 Arabikhajaꞌihi ida ijaꞌari vabaꞌona kaꞌdamahani ibavini ipohiki,
Deus athi-ra vanaabaꞌiki kohana vaipohiki avahokiꞌiki ꞌdama kania vikhaonaniꞌiki.
Jesus ahokiꞌina naothinia,
Jerusalém sidajia aviꞌoiꞌaha adani ijaꞌari avahokiꞌiki,
ijaꞌari vahoariha vaꞌora vanokiꞌaha.
54 Oniaroa,
ava akasanakhamaki kania vahojaki adani sorara,
sorara kakaꞌdaꞌdi khama.
Jesu-ra avakadavaꞌaki adani.
Vanokiꞌihi ida arabo hoꞌdohoꞌdoki,
vakamithaki jaboni ada Jesus bodiꞌbaraꞌina.
Jesus abinina-ra vanokiꞌaha,
vaimahidakarahoꞌaha,
vaniꞌaha:
—Deus kaisai oamani hada hihada makhira.
55 Hari.
Vahojamaniha adani gamo ava akasanakhamaki kania.
Abinina vanokivini napaja paꞌitxia.
Galiléia kaarabonia Jesus hojana kari,
Jesu-ra vavaipohihabakhiaꞌiki adani gamo,
Jesu-ra vakaijahitavini jaboni.
56 Gamo vahararana vahojaki adani Maria Madalena.
Tiago,
José vihiki vakadiamia Maria oniki jaboni hojaki.
Zebedeu kaisai vakadiamia jaboni hojaki gamo vahoariha vakadiania.
Vakaꞌdamaꞌiki ida Jesus abaꞌona
57 Hari.
Mithani vaivaini kaikahiꞌaha ada makhira kanahinaki José oniki.
Arimatéia sidaji kaijaꞌarini ada.
Jesus ipohina ada José de Arimatéia.
58 Hari.
Pilatos kania okhaꞌaha,
bikanikhariaꞌihi ida Jesus abaꞌona,
bikaꞌdamahaja kaimoni.
Pilatoa bihonariaha ada sorara Jesus abaꞌona-ra arakhavini José kania.
59 Oniaroa,
Joséa bianikhaꞌihi ida Jesus abaꞌona ava akasanakhamaki kania,
bikarafoaꞌihi makari jahakia.
60 Kaꞌdamahi ibavini biavikhaꞌihi.
Jaꞌdi hodijamaꞌoki bodinia biobaihaꞌihi ida Jesus abaꞌona.
Mahi ipohiriki viahania Joséa bihonariaꞌiki ida hodi khorahani jaꞌdi karaho bodinia José abinina kamahini kaꞌdamahana ibavini kaimoni.
Vakadihojai hiki.
Hari.
Jesus abaꞌona-ra obaivini naothinia,
bikaꞌoahaꞌihi ida jaꞌdi hodini kaathani,
jaꞌdi karahoa.
Ajihiꞌaha ada José.
61 Jaꞌdi hodijamaꞌoki viahania vavithiꞌaha adani Maria Madalena,
Maria hoariha khama,
José vakadibadani-ra vada vaniꞌavini.
José ajihina naothinia,
vaꞌajihiꞌaha adani gamo jaboni.
Sorara avakadavaꞌaki ida kaꞌdamahi ibavini
62 Hari.
Kaꞌafokajomani vani vajoroniꞌianaha adani sasidotxi vakaꞌdaꞌdiva,
farisio vihiki khama Pilatos kania.
Vakadiꞌakoiri kamahini hini kabaꞌi vani vajoroniki adani.
Hari.
Vaniꞌaꞌaha ada Pilatos:
63 —Pilatos,
akavaꞌihokiki ida Jesus kohana abinirina oadani haria niꞌavini hiꞌiki athi:
“Radahaꞌihi ida mahi ahoarabakosiki oahokiki bana ho.”
Nimania ida korijanahi abono athi.
64 Oniania vaꞌora honaria bana adani sorara Jesus kaꞌdamana-ra avakadavaꞌavini.
Mahi ahoarabakosiki radaharini oadani vahojara kaimoni,
kidipohi abaꞌona boꞌdihirija kaimoni.
Vaboꞌdiavini naothinia vaꞌora vaniꞌaki bana adani vahoariha:
“Ahokiꞌiki ada Jesus.”
Jahariki ida Jesus kohana kakorijanahi,
jaharini arafiaki bana ida ipohina vakadikorijanahi,
Jesus ahokiꞌina-ra vakahivini bana — vaꞌora niꞌaha adani sasidotxi vavakaꞌdaꞌdiva.
65 Pilatos vaꞌora niꞌaha:
—Jakaho vaꞌora ovaꞌahava adani kodisorara abaꞌoi kaꞌdamani-ra avakadavaꞌavini.
Vaꞌora avavikhaꞌa hadani sorara mahija Jesus ipohina abaꞌona vaboꞌdiaravini kaimoni.
66 Ai vihiꞌaha adani sasidotxi vavakaꞌdaꞌdiva.
Kaꞌdamahi kania avikhaꞌaha,
avanathanaꞌihi ida jaꞌdi katapani karaho namanija,
avigaja kaimoni ida ijaꞌari aviꞌoirina jaꞌdi kahodihi bodinia.
Vanaibavivini naothinia vaꞌora vanahojaha adani sorara abaꞌoi kaꞌdamahani ibavini-ra avakadavaꞌavini.