Vanofiki ida Jesu-ra vanaabinivini
26
Hari hiꞌihi ida Jesus kavarani ijaꞌari-ra vaꞌora kaꞌojomoꞌivini.
Vaꞌora niꞌaha adani kidipohi:
2 —Avarigaki ida mahi ꞌbamiki radahani naothinia anamonahaki bana ida Páscoa kaihinikani.
Hovani ijaꞌari hahavi vakadiꞌaajo ho.
Páscoa kaihinikani amonahani vani hora avarakhaki bana adani vahoariha.
Ava akasanakhamakia hora avakaꞌitapoamisira kaimoni — vaꞌora niꞌaha ada Jesus.
3 Oniaroa,
Caifás gorana vajoroniꞌaha adani sasidotxi vavakaꞌdaꞌdiva,
judeus kaijaꞌari vanavaꞌisohiva abono khama.
Sasidotxi hahavi vakadikaꞌdaꞌdi Caifás oniki.
4 Vaabono vara vakaniꞌakhamaꞌaha:
—Ijaꞌaria avigaravini kabaꞌi,
agathiva ada Jesus,
anaabinira kaimoni.
Niha aniꞌaꞌavini agathiki koda ada?
5 Páscoa kaihinikani kania vajoroniki adani ijaꞌari vaipohiki Jesu-ra vavajahaki.
Ihinika-ra anamonahavini oadani ni-Jesu-ra agathivini jahaki.
Jesu-ra agathihi;
haria vidaha bana adani ijaꞌari — vaabono vakaniꞌakhamaꞌaha.
Gamoa bikavamisaihaki ada Jesus
6 Oniaroa,
Betânia ibavia hojaꞌaha ada Jesus.
Simão hoariha gorana hojaꞌaha.
Mahi ꞌboꞌdakari Jesua bianiꞌiki ida Simão kakavamoni asafi namania hojaki.
7 Simão gorana oꞌoiꞌihi ida gamo,
bivikhamiꞌihi ida misai mitxaki,
kaidivani arafiaki.
Jaꞌdi vaforiki ida misai bavini hija.
Abononi niꞌaꞌihi:
—Mahi ipohijanariki bana ida Jesus abinina kamahini.
Okavamisaihaki ada abinina viahania.
ꞌBaina kabaꞌi ada Jesus,
gamoa binamaakariꞌaha biahoariꞌihi ida misai Jesus ꞌdaꞌdi aꞌania.
8 Jesus ipohina vanokihi ida gamo kabadani,
vaihamahiꞌaha,
vananaꞌdohiꞌaha:
—Nahina kaimoni gamoa binakavithimaki ida misai?
9 Pavakari binihaja vaha;
jiniro ahapini-ra gathanihi vaha;
vakanahinariki-ra vaha vaꞌora noꞌavini himanihi vaha ida jiniro — vaniꞌaha.
10 Oniaroa,
Jesua biogaꞌiki ida vakadivarani nahina hini,
vaꞌora niꞌaha:
—Jakana hojava kaho.
Nahina kaimoni athi khanakia avaniꞌaki hida gamo?
Jahaki ida kidibadani kodimoni hini.
11 Mahi hahavi vani vahojara adani vakanahinariki avakadiania vaꞌora avakajoamorara kaimoni.
Ni-mahi hahavi ohojaki avakadiania hora avakajoamoraja kaimoni.
12 Hora kavamisaihavini hiki oabinina viahania.
Jaꞌdi hodijamaꞌoki bodinia oabaꞌona-ra avibaivini viahani mani ida hora kavamisaihavini hija.
13 Kaꞌoa oamani hida oniꞌaki.
Arabo hahavi,
ibavi hahavia ijaꞌaria vara bivaniꞌaki bana ida omonina jahaki,
vara vavaniꞌaki jaboni bana hida gamo kabadani jahaki.
Vakavaꞌihokiki bana hida gamo kabadani — vaꞌora niꞌaha ada Jesus.
Judas Iscariotes varani hina hida
14 Oniaroa,
abono-ra niꞌaꞌaha ada Jesus ipohina Judas Iscariotes oniki:
—Hari.
Oarakhaki bana ada Jesus sasidotxi vavakaꞌdaꞌdiva vasaꞌa kabodinia.
Oniaroa,
ajihiꞌaha,
okhaꞌaha vakadiania.
15 Judas Iscariotes vaꞌora niꞌaha adani sasidotxi vavakaꞌdaꞌdiva:
—Nihafori jiniro ꞌbaꞌdania hora avanoꞌaja bana Jesu-ra avakadiania oarakhavini abosini kaimoni?
Hari.
Varajomaꞌihi hida 30 jiniro ꞌbaꞌdani prata amonahaki ipohini,
Juda-ra vanoꞌavini hiꞌiki.
16 Ajihiꞌaha ada Judas,
abono-ra niꞌaha:
—Niha oniꞌaꞌaki koda hada Jesus oarakhavini vakadiania?
Viꞌbaijabanaꞌiki adani Jesus
17 Hari.
Oniaroa,
kamaꞌdaꞌihi ida judeus kaijaꞌari vakadihinika.
Ihinika amonahani oadani pão kathoramananiriki vakahaki adani.
Hari.
Jesus ipohina vanamaakariha,
vananaꞌdohiꞌaha:
—Jesus,
hanaja vania hojahi ibavi Páscoa kaihinikani koꞌbaini-ra anamonahavini kaimoni?
18 Jesua bigathaniꞌihi ida vakadinaꞌdohi:
—Jerusalém sidajia avikhaꞌa bana.
Vanakoꞌdiha bana ada makhira vara oniꞌajoraꞌiki.
Vaniꞌa bana:
“Jesus ira navaꞌisohivini hiki bana ida akadiania hojana kamahini ipohijanarini.
Binofiki ida Páscoa kaihinikani ihinika koꞌbaini
arihavini kidipohi khama igorania.”
Vaniꞌa bana.
19 Hari.
Ai vihiꞌaha adani Jesus ipohina,
vakaragaꞌihi ida makhira ibavi Jesua biniꞌaꞌiki.
Vanamonahaꞌiki ida ihinika koꞌbaini kaimoni.
20 Mithani vaivaini vani vakaikahiꞌaha adani Jesus Páscoa kaihinikani koꞌbaini kania.
Mesa kaiꞌoarinia vadosidosiriahaꞌaha,
viꞌbaina-ra vakavahojaivini ida.
Vigaakosoaꞌaha adani Jesus ipohina 12 vihiki.
21 Viꞌbaina kabaꞌi Jesua biniꞌaꞌaha:
—Kaꞌoa oamani hida oniꞌaki.
Hoarana avakadiania hojaki hora arakhaki bana vahoariha hora vanaabinija kaimoni.
22 Avakavaꞌisokonivini,
avigaravini ada Jesu-ra arakhaki.
Vaniꞌaha afohanana:
—Jesus,
vara hora ivaniꞌamanija koda?
Jokoa ira oarakharihi — vakhaninanaꞌaha.
23 Jesus vaꞌora niꞌaha:
—Hoarana hora arakhaki ho,
hiꞌo pão-ra oakobaꞌahavini-ra oviꞌbamivini hiki,
hihada vani hada hora arakhara vahoariha vasaꞌa kabodinia,
hora vanaabinira kaimoni.
24 Hovani ijaꞌari hahavi vakadiꞌaajo ho.
Oabiniki bana ho.
Deus athi kapapirania binamonijoraki ida oabinina.
Jahariki bana ida kidimoni hora arakhaki kaimoni.
Deua binaimaꞌbanakarahoki bana ada Ibavi Jaharikaꞌoakia.
Namitharara vaha;
ni-pohimajaki vaha — niha ada Jesus.
25 Oniaroa,
Judas Iscariotes Jesus kavaꞌahi ꞌbadara biniꞌaha:
—Jesus,
vara hora ivaniꞌamanija koda?
Jokoa ira oarakharihi.
Jesua biniꞌaha:
—Ivani oa hora iarakhaja bana.
Jesua vara bivaniꞌajoraꞌiki ida amana ahovariki akadimoni hini
26 Hari.
Viꞌbaina kabaꞌi Jesua bikanabiiniꞌihi ida pão,
Deu-ra niꞌaꞌaha:
—Deus,
ivani ijahaki i.
Pãoa haria inoꞌaki i — niꞌaha.
Vara nina naothinia,
bikanapitahatahahi,
kidipohi-ra vaꞌora noꞌavini kihiꞌihi,
vaꞌora niꞌaha:
—Vaagathaniꞌa hida pão mahija avakahahahavivini.
Oimana hida pão.
27 Vakahavini naothinia,
copo maina-ra nabiiniha.
Deu-ra vara niꞌaꞌianaha:
—Deus,
ivani ijahaki i.
Vinho haria inoꞌaki i.
Vinho kacoponi maina vaꞌora noꞌaꞌaha.
Vaꞌora niꞌaꞌaha:
—Viꞌavihahavi.
28 Hihida vinho oamana hida.
Oabinina kamahini oamana ahovariki bana.
Oabono ovaꞌahaki ho oabinina,
ijaꞌari vaipohiki-ra vaꞌora oakavaꞌijoaja kaimoni.
Oamana-ra anahovariki bana vakadihojai asohiriki ꞌbirani abosini kaimoni.
Oamana ahovarini mani ida Deu-ra vakajariꞌdaravini vaꞌora kapoarivini hija,
kidijaꞌari vihira kaimoni,
oniani ida kidiania vaꞌora arakhaja bana.
Nimania ida Deus kavaꞌiponahi aꞌboꞌdaki jaꞌdini.
29 Kaꞌoa oamani ida oniꞌaki.
Jokoa oabinirina oadani oꞌavijanarihi hida vinho.
Deus aꞌonira vakaꞌdaꞌdivini kamahini kidiania nama oꞌaviꞌianaki bana ida vinho jaꞌdini avakadiania — Jesus vaꞌora niꞌaha.
30 Oniaroa,
viꞌavivini naothinia,
moro vaahiaꞌaha Deu-ra khai vaniꞌavini.
Ai vihiꞌaha.
Arabo namahiki monte das Oliveiras onikia avikhaꞌaha.
Jesua binavaꞌisohijoraki ada Pedro
31 Hari.
Jesus vaꞌora niꞌaꞌaha adani Pedro:
—Deus athi kapapirania hojaki hida athii:
“Ovilia akadavaꞌava abono-ra onaabiniki bana ho.
Avigaki bana adani ovilia.”
Nihi ida athii.
Hihida joma hora avanahojahaki bana aꞌoni afohahavi avarigani.
Ovilia avigana vani fori avihija bana avarigani.
32 Oahokina naothinia,
Galiléia kaarabonia aꞌonira onaviahanokhaki bana ho — vaꞌora niꞌaha ada Jesus.
33 Oniaroa,
Pedroa biniꞌaha:
—Ira vanahojahavini kabaꞌi adani vahoariha,
hovani ni-ira onahojahaki — niha ada Pedro.
34 Jesua biniꞌaha ada Pedro:
—Kaꞌoa oamani hida ira oniꞌavini hiki.
Hihida joma arakava ahiana viahania,
ivani iathini nija bana:
“Jesus ipohina ohirihi.”
Ahoarabakosikia oipohina ihirini-ra ikahiki bana i — Jesua biniꞌaha ada Pedro.
35 Oniaroa,
Pedro biniꞌaha:
—Iniani,
oabinihi kadania,
oabinihi,
jokoa iipohini ohirina-ra okahirihi — niha ada Pedro.
Vahoariha vaniꞌavini afohahavi:
—Jokoa iipohini arihirina-ra akahirihi — vakhaniha.
Getsêmani ibavi onikia avikhaki adani Jesus
36 Hari.
Ai vihiꞌianaha adani Jesus,
Getsêmani ibavi maakariki-ra avanikhahavini.
Avakhanoha,
ipohina-ra vaꞌora niꞌaha:
—Onia vavithimaꞌo,
okhananavaki ho Deu-ra vara oniꞌaki ho.
37 Vavithimaꞌona,
Jesus vaꞌora niꞌaha adani Zebedeu kaisai viꞌbamiki,
Pedro jaboni:
—Pedro,
Tiago,
João,
hora vavaipohiha bana!
Ai vihiꞌaha adani avakoꞌbamahakhamaki.
Vaꞌi mokara nikarahoꞌaha ada Jesus.
Vaꞌi rogo inikarahoki ada jaboni.
38 Vaꞌora niꞌaha:
—Kodivaꞌisokoꞌini karaho hora naabinikamariki ho.
Hida vahoja.
Vanoki bana!
— vaꞌora niꞌaha.
39 Okhananavapaꞌitxiha,
aasiamaꞌoha,
Deu-ra vara niꞌaꞌaha:
—Kodiabiꞌi,
oakavaꞌisokonihi ida ijaꞌari hahavi vakadihojai asohirini abosini-ra ogathanivini.
Nahina hahavi-ra ikaabokaki.
Hora vanaimaꞌbanavini inofirihi;
hora ivaꞌadivini-ra ikaabokaki i.
Hora vanaimaꞌbanavini inofihi;
onofiki jaboni.
Nahina-ra inofihi;
onofiki jaboni — Deu-ra niꞌaha ada Jesus.
40 Hari.
Pedro vakadiania joimiha ada Jesus.
Pedro vavadina-ra karagahaꞌaha,
vaꞌora niꞌaha:
—Pedro,
avavadimanija?
Avanokipaꞌitxini-ra koda avakaabokaria?
41 Hariꞌa vavadi!
Deu-ra vara vaniꞌa bana mahija Jahari athi aꞌonira kaboroborovini-ra avakamitharavini.
Jahari kahojai-ra avanofiravini kabaꞌi,
ni-avakaabokaki ida Jahari aꞌonira kaboroborovini-ra avakajonivini.
42 Ajoimiꞌianaha ada Jesus,
Deu-ra vara niꞌaꞌianaha.
Biniꞌaha:
—Kodiabiꞌi,
oogaki ida hora vanaimaꞌbanavini-ra inofivini,
oniani ida hora vanaimaꞌbanavini-ra okapoarivini hija.
Nahina-ra inofihi;
onofiki jaboni.
43 Kidipohi vakadiania joimiꞌianaha.
Vavadiꞌianana vani vaꞌora karagaꞌianaha.
Vanokhoꞌdaꞌboꞌdaꞌboꞌianamaniha.
Ni-vakaabokaki ida vanokina.
44 Ajoimiꞌianaha ada Jesus,
ahoarabakosikia Deu-ra vara niꞌaꞌianaha,
oniani ida athi hiꞌianahi.
45 Oniaroa,
kidipohi vakadiania okhamiꞌianaha,
vaꞌora niꞌaꞌaha:
—Asia mani avavadija avarakoirini?
Hari.
Kamaꞌdaꞌiki ida oimana ꞌbanani.
Hovani ijaꞌari hahavi vakadiꞌaajo ho.
Hoariha hora arakhaki bana ada,
makhira vajahariki vasaꞌa kabodinia.
46 Vigaaꞌa.
Ai arihiꞌava.
Vada vaniꞌa o vasaꞌa kabodinia hora arakhaki kaikahina.
Vagathiki ada Jesus
47 Hari.
Jesus vara nina kabaꞌi,
kaikahiꞌaha ada ipohina Judas Iscariotes oniki.
Judas vaꞌora vikhaꞌaha adani ijaꞌari vaipohiki vakasaꞌaiki.
Vavikhahi ida ava,
tarasara hiki,
vakadisaꞌai kaimoni.
Sasidotxi vavakaꞌdaꞌdiva,
judeus kaijaꞌari vanavaꞌisohiva abono khama vaꞌora vakaronaꞌaha adani vakasaꞌaiki Juda-ra vavaipohihara kaimoni.
48 Judas vaꞌora niꞌavini vakaikahina viahania:
—Hiꞌada makhira okaꞌivanitiki,
oramosiki vani-ra vagathijahaki bana — vaꞌora navaꞌisohijoraha ada Judas.
Jesu-ra vakavarajomivini hiki Juda biramosivini.
49 Hari.
Jesus vavahojaki kania vakaikahiꞌaha adani Judas,
binamaakariꞌaha,
biniꞌaha:
—Aajo,
ivaniti.
Deus ira noꞌaki i vaꞌi jahajahania.
—Judas,
bada iniꞌajorakiꞌa ida inofiki!
Hari.
Vakasaꞌaiki Jesu-ra vanamaakariꞌaha,
vagathiꞌaha,
vidaboꞌaha.
51 Jesus ipohina hoarana bidioniꞌihi ida tarasara fori hiki bavinia,
binobaꞌaha ada sasidotxi vakadikaꞌdaꞌdi kahonai abono,
biavaꞌboarabakosiꞌihi ida morobo.
52 Oniaroa,
Jesua biniꞌaha:
—Inaibavijaha bana oni kadasaꞌai!
Ijaꞌaria binaabinihi ida hoariha saꞌaia,
hoariha bikavasaꞌaihaki ida jaboni bana.
53 Ikavaꞌibodivarani ida kodiabiꞌi hora akavaꞌijoavini-ra kaabokaravini.
Deus hora akavaꞌijoavini-ra okanikhariaja vaha;
Deus vaꞌora karonajorakiha vaha adani ibavi kaijaꞌarini vaipohiki kodiania hora vaakodiara kaimoni.
54 Ni-onofiki ida hora vaakodiavini.
Hora vaakodiara vaha oabinirina kaimoni;
ni-namithaki vaha ida Deus athi papira hojaki vara hora vaniꞌajoravini hiꞌiki.
Onofiki ida Deus hora vara vaniꞌavini namithani kodiania.
55 Naothinia,
Jesus vaꞌora niꞌaha:
—Ijaꞌaria vavikhaki ida ava,
tarasara hiki vagathira kaimoni ada kaabiniki.
Onivani fori hini avavikhaja ida avakadisaꞌai hora avagathija kaimoni.
Okaabiniki hora avavanihamania koda?
Mahi hahavi ijaꞌari-ra okaꞌojomoꞌihi Deu-ra khai aniꞌavini kagorani kavasiribanini bodinia,
ni-hora avagathiꞌiki.
56 Namithaꞌiki ida Deus athi namoniva abono kohana vanajiriꞌboꞌdaꞌiki Deus athi kapapirania — vaꞌora niꞌaha ada Jesus.
Hari.
Jesu-ra vanahojahaꞌaha adani ipohina,
avigaꞌaha.
Judeus kaijaꞌari vanasohiva abono vavakaꞌdaꞌdiva vakadiania hojaki ada Jesus
57 Hari.
Oniaroa,
hiꞌadani ijaꞌari Jesu-ra vagathiꞌiki sasidotxi vakaꞌdaꞌdiva gorana avisaꞌaha,
Caifás oniki ada.
Sasidotxi vakadikaꞌdaꞌdi gorana bodinia vajoroniha adani judeus kaijaꞌari vakaꞌojomoꞌiva abono,
judeus kaijaꞌari vanavaꞌisohiva abono khama.
58 Hari.
Napaja kasiagaha ada Pedro.
Sasidotxi vakadikaꞌdaꞌdi gorana khanona,
gora iꞌoarini kavasiribanini bodinia oꞌoiꞌaha ada Pedro,
vithimaꞌoꞌaha,
gora avakadavaꞌava abono vakadiania,
vaꞌoaniaro sorara fori vihiki adani.
Pedroa binokhaki ida Jesus monina-ra kamithavini.
59-60 Sasidotxi vavakaꞌdaꞌdiva,
judeus kaijaꞌari vanasohiva abono vavakaꞌdaꞌdiva khama vaabono vara vakaniꞌakhamaꞌaha.
Vanofiki Jesus abinina-ra vavahonariahivini.
Vanakoꞌdiki ida badani asohiriki Jesus kania,
ni-vakaragaki.
Jesus athi kamithava abono-ra vaꞌora vakaboaꞌiha Jesu-ra avakaraganahara kaimoni afohanana.
Jesu-ra vakanavaranihavini adani ijaꞌari vaipohiki afohanana.
Korijanahia vakavaranina mani ida vakadivarani-ra avakanasohikhamaravini hija.
61 Hari.
Makhira viꞌbamiki vahoariha aviꞌoiꞌaha.
Sasidotxi vavakaꞌdaꞌdiva-ra vaꞌora vaniꞌaha:
—Akamithaki ida Jesus athi.
Biniꞌaki:
“Onathararavini bana ida Deu-ra khai aniꞌavini kagorani.
Mahi ahoarabakosikia onamonahaꞌianaki bana ida gora.”
Nimania ida Jesus athi akamithaꞌiki — vakhaniha.
62 Oniaroa,
gaaꞌaha ada sasidotxi vakadikaꞌdaꞌdi.
Jesu-ra nanaꞌdohiꞌaha:
—Igathanivini inofiria ida ira vakanavaranihavini?
63 Jesua viso biniꞌahi ida athi,
ni-bigathaniki.
Oniaroa,
sasidotxi vakadikaꞌdaꞌdia biniꞌaha:
—Iathini-ra kamithara kaimoni ada Deus hokiki,
ira ohonariavini hiki hida kodinaꞌdohi-ra igathanivini.
Ivani Cristo Deus ira nagathogathoꞌiki i,
ijaꞌari hahavi vakadikaꞌdaꞌdi ihija kaimoni?
Deus kaisai mani i?
64 Jesua bigathaniꞌihi ida athi:
—Ivani hora iniꞌaja Deus kaisai ohina.
Kaꞌoa hini hida kadavarani.
Hovani ijaꞌari hahavi vakadiꞌaajo ho.
Deus danoki pitana aniaja ovithiki bana ho.
Kaꞌdaꞌdi ohina.
Ovithina-ra avanokiki bana aꞌoni.
Bahi vaforiki namana vani nama ogarina-ra avanokija bana — niha ada Jesus.
65 Oniaroa,
sasidotxi vakadikaꞌdaꞌdia binaꞌbiraꞌihi ida kidikarahobi bikaimahaki,
bikavarajomija kaimoni ida Jesus Deus hina kavaranihi-ra vajaharavini.
Vaꞌora niꞌaha:
—Jahariki ida Jesus kavarani.
Deus kaisai hina-ra kahiꞌbadaraki ada.
Nahina kaimoni vaꞌora anihajanariha adani Jesus vara vaniꞌava abono.
Akamithaꞌiki hida Jesus Deus kaisai hina-ra kahivini.
66 Niha aniꞌaꞌaki koda hada Jesus?
Vagathaniꞌihi ida athi:
—Jahariki hida kidivarani.
Jahaki ida abinina — vakhanihahaviꞌaha.
67 Naothinia Jesus nokho-ra vakaiꞌbaiꞌaha,
vidajahaꞌaha jaboni.
Vahoariha vakajoiriꞌaha.
68 Vaniꞌaha:
—Aihotahi abono,
hana hina vani ira kajoirija?
Pedro Jesu-ra ogaravini-ra kahiki
69 Hari.
Gora banininia asia hojaha ada Pedro vithiꞌina.
Khaꞌihi ida sasidotxi vakadikaꞌdaꞌdi kabadani abono.
Pedro-ra namaakariꞌihi,
biniꞌaha:
—Ivani ivaipohihara ada Jesus oniki.
70 Pedro abono-ra vajariꞌdaha ijaꞌari vahojaki vaviaha:
—Iniani,
ovaipohihariha ada.
Ni-oogajahakiki ida kadavarani nahina nini.
71 Hari.
Ajihiꞌaha,
gora kavasiribanini kaathania okhamiha.
Badani abono hoariha binokiha,
vahoariha-ra vaꞌora niꞌahi:
—Ovani hiꞌo Jesus ipohina,
Nazaré sidaji oniki kaijaꞌarini ada Jesus.
72 Pedroa biniꞌaꞌianahi:
—Iniani,
ipohina ohirihi.
Deua bikamithaki ida aꞌonira oniꞌavini hiki,
ni-oogaki ada makhira.
73 Mitihini vahojakia vanamaakariꞌaha ada Pedro,
vaniꞌaꞌianaha:
—Hai oamani,
kidipohi oamani i,
iathini fori hiki ida Jesus athi,
Galiléia kaaraboni kaijaꞌarini aꞌoni afoꞌbamakhama.
74 Oniaroa,
Pedro vaꞌora niꞌaha:
—Deua bikamithaki hida kodivarani.
Ni-oogaki ada makhira.
Ipohina ohirihi.
Korijanahia okavaranihi,
Deus hora naimaꞌbanakarahovini-ra onofihi.
“Hihida joma arakava ahiana viahania,
ivani inihaki i:
‘Jesus ipohina ohirihi.’
Ahoarabakosikia inihi.”
Jesus athi-ra kavaꞌihokiha,
ajihiꞌaha ada Pedro,
asaraꞌahapikiꞌaha.