Jesua bikosokonanaki ida ipohina vaꞌdama
13
Hari.
Oniaroa,
hojaki mahi hoarani Páscoa kaihinikani kamaꞌdani viahani.
Hari.
Jesua biogaki ida abono-ra vaꞌahavini abinina kamahini kaikahini,
kidiabiꞌi kania ajoisira kaimoni.
Jesus vaꞌora nakaidivahaꞌoadahaki adani ipohina.
Abinirina oadani haria nakaidivajahakiki ada.
Haria nanokiahivini hiki ida haria nakaidivavini arafiani.
Nimania hida varani.
2 Hari.
Mithani vani viꞌbaijabanaꞌaha adani Jesus kidipohi khama.
Vakadiꞌbai viahania Jaharia vara biniꞌaꞌaha ada Judas Iscariotes kohana vaꞌi bodinia,
Juda bikavaꞌibodivaranija kaimoni ida Jesu-ra arakhavini,
vahoariha vanaabinira kaimoni.
Jesus lava os pés dos discípulos (João 13:1-17)
3 Jesua biogaki ida danona kidiabiꞌia binoꞌavini hiki,
bikaabokaja kaimoni ida hahavi-ra nofivini.
Jesua biogaki jaboni ida Deus kania khaꞌina,
Deus kania ajoisina bana nama,
ijaꞌari hahavi-ra vaꞌora vakaꞌdaꞌdira kaimoni.
4 Oniaroa,
viꞌbaina viahania gaamananiꞌaha ada Jesus,
bianiꞌihi ida kidikarahobi bikaimahaki kanamajaki,
binabiiniꞌihi ida saꞌai kajohani,
jarari-ra dabomisivini hiꞌihi.
5 Bihovararihi ida paha paha bavini bodinia,
bikosokohananaja kaimoni ida ipohina vaꞌdama.
Bikanajohaꞌihi ida vaꞌdama makari jararia dabohamisini hikia.
Honai abono kapavakarivahaki kabadani ida ijaꞌari ꞌdamani-ra kosokovini.
6 Hari.
Simão Pedro kania maakariꞌaha,
bikosokoja kaimoni ida ꞌdama.
Simãoa biniꞌaꞌaha ada Jesus:
—Jesus,
honai abono ihirihi.
Kodikaꞌdaꞌdi i,
oniani hida oꞌdama-ra ikosokovini-ra onofiravini hija.
7 Jesua biniꞌaꞌaha:
—Ni-iogaki kaho ida nahina kaimoni iꞌdamani-ra okosokovini hiki.
Mitihini iogaki bana ida.
8 —Iniani.
Ni-asohiki hida oꞌdama-ra ikosokovini.
Honai abono ihirihi.
Ni-okavaꞌahapaꞌitxirihi hida oꞌdama-ra ikosokovini — niha ada Pedro.
Jesua biniꞌaꞌaha:
—Iꞌdamani-ra okosokorihi;
ni-kodipohi ihijanarihi bana.
9 Simão Pedroa bigathaniꞌihi ida Jesus athi:
—Iniani,
Jesus.
Onofiki hida iipohini ohina.
Ba ikosoko hida oꞌdama.
Ikosoko bana jaboni hida osaꞌa,
okaꞌdaꞌdi kihiki.
10 Jesua biniꞌaha:
—Kanai naothinia jahaki ida ijaꞌari abononi hahavi,
ni-abononi sokojorakijanaki kaho.
Gaimoriꞌihi ida ijaꞌari,
bikosokoꞌianaki ida ꞌdamani kaꞌoa hahavi jahaja kaimoni.
Aꞌonivani avajahaki aꞌoni afohahavi.
Hoarana kaꞌoa ni-jahaki.
11 Jesua biogajoraki ada hana hina ipohina arakhana hiki kaimoni,
oniania ida hoarana kaꞌoa jaharina-ra kahivini hija.
12 Vaꞌdama bikosokovini naothinia Jesua biaragariꞌianahi ida kidikarahobi bikaimahaki kanamajaki,
joimiꞌaha kidivithi ibavinia.
Vithirarina naothinia vaꞌora niꞌaꞌaha:
—Aꞌonira onavaꞌisohivini hiki hida nahina kaimoni avaꞌdamani-ra okosokovini.
13 Hora avanaonivini “haria kaꞌojomoꞌiva abono”.
Hora avanaonivini jaboni “akadikaꞌdaꞌdi”.
Asohiki hida hora avanaonivini.
14 Hovani avakadikaꞌdaꞌdi ho,
aꞌonira okaꞌojomoꞌiki ho jaboni,
kabaꞌi avaꞌdamani-ra okosokohi.
Avaꞌdamani-ra avakosokokhamavini-ra ohonariaki ho jaboni.
15 Avanokiki hida aꞌonira okajoamoravini avaꞌdamani-ra okosokovinia.
Onofiki hida hoariha-ra okajoamoravini-ra avakabanafovini,
avaabononi avakakajoamorakhamabakhiaja kaimoni.
Nimania hida kodiꞌojomoꞌihi athini.
16 Kaꞌoa hiki hida kodivarani.
Kaꞌdaꞌdia bivakaꞌdaꞌdiki ada kidihonai abono.
Kaꞌdaꞌdi hiriha ada honai abono.
Ni-bihonariaki ada kidikaꞌdaꞌdi.
Ni-athi avikhava abonoa bivakaꞌdaꞌdiki ada athi-ra karonaki.
17 Avarigajahakiki ida honai abono kavaranihia aꞌonira okaꞌojomoꞌivini hiꞌiki.
Avaabononi avakakajoamorakhamavini kavaranihi-ra avanaabahi;
Deus aꞌonira kajoamorahi.
18 Aꞌonivani vara aꞌonira ovaniꞌahahaviki aꞌoni.
Hoarana ni-vara ovaniꞌaki.
Oogajahakiki ida ijaꞌari vaꞌora onagathogathoki vakadihojai.
Namithaki bana hida athi kodiania Deus athi kapapirania hojaꞌboꞌdaꞌiki:
“Ovari kodiania ꞌbaiki
hora najaharihariki bana ada.”
Niki ida athii.
Jesus prediz traição (João 13:18-38)
19 Aꞌonira onanamithajoravini hiki bana ida namithaki kaimoni kodiania,
hora avakajariꞌdaria kaimoni.
Hora arakhavini kamahini avakajariꞌdarihi ida Hovani oa ohina.
20 Kaꞌoa hiki hida kodivarani.
Ijaꞌaria bigathanijahakihi ida ijaꞌari okaronaki,
hora gathanijahakihi jaboni.
Ijaꞌari hora gathanijahakikia bigathanijahakiki jaboni ada hora karonaꞌiki — Jesus vaꞌora niꞌaha adani ipohina.
Jesus vaꞌora nanamithavini hiki ada hana hina arakhana hiki kaimoni
21 Hari.
Oniaroa,
vaꞌi soko inikarahoꞌaha ada Jesus.
Vaꞌora navaꞌisohijahakiꞌaha adani ipohina:
—Kaꞌoa hida kodivarani.
Hora arakhaki bana ada hoarana avakadiania hojaki.
22 Hari.
Vadavada vaabono vakaniꞌakhamaꞌaha adani ipohina,
ni-avigapaꞌitxiki ida Jesus abono-ra vara vaniꞌavini hiki.
23 Jesus ꞌdihana hojaꞌiki ada hiꞌada ipohina Jesua binofijahakiki.
24 Simão Pedroa saꞌa bikanarajomiha ada ovari,
biniꞌaha:
—Inanaꞌdohi bana ada hana hina Jesua vara bivaniꞌaki.
25 Sananamiꞌianaha ada Jesus ꞌdihana vithiki,
binanaꞌdohiꞌaha:
—Jesus,
hana hina ada?
26 Jesua bigathanihi ida kidinaꞌdohi:
—Oakobafiki bana hida pão kabobini baꞌba,
naothinia onoꞌaki bana ada hora arakhaki kaimoni — niha ada Jesus.
Oniaroa,
Jesua bikanabiiniꞌihi ida pão kabobini,
biakobafiꞌihi baꞌba,
Judas Iscariote-ra noꞌavini kihiꞌihi.
27 Judas Iscariotea biagathaniꞌihi ida pão,
jorakia Sataná biaviꞌonaniꞌaha ada Judas.
Jesua biniꞌaꞌaha ada Judas:
—Jorakia badani inofikia kabadaniꞌa bana.
28-29 Jesus ipohina vahoariha mesa kaiꞌoarinia vahojakia vakamithahi ida Judas Iscariote-ra honariavini,
ni-avigaki nahina kaimoni hini.
Judas vania biakadavaꞌaja ida vakadijiniro bavini,
oniani ida vahoariha ihinika koꞌbaini-ra kapavakarihavinia Jesua bihonariaki vavanihavini hija jaboni.
Vahoariha vani adani vakanahinariki-ra kajoamoravinia Jesua bihonariaki vavanihavini hija jaboni.
Ni-avigaki nahina kaimoni Jesua bihonariavini ada Judas Iscariotes.
30 Hari.
Judas pão-ra kagathanivini naothinia okhaonaniꞌaha.
Joma bakibakinia ajihiꞌaha.
Honari jaꞌdini varani hini hida
31 Hari.
Oniaroa,
Judas Iscariotes ajihiꞌina naothinia Jesus vaꞌora niꞌaꞌaha adani ipohina:
—Ijaꞌari hahavi vakadiꞌaajo ho.
Amaakariꞌoamaniꞌia hida oabinina kamahini.
Oabinina kamahini Deua binanokiaki hida ojahana,
odanona hiki.
Oabinina mani ida Deus jahana,
danona hiki-ra onanokiavini hija bana jaboni.
32 Deus jahana,
danona hiki-ra onanokiaki bana ho,
oniani ida Deus ojahana,
odanona hiki-ra nanokiavini hija bana.
Deus vania binanokiajorakija ida.
33 Oigamina,
ni-mahi ipohikia ohojajanaki avakadiania afojana.
Hora avanakoꞌdiki bana aꞌoni.
Aꞌonira onavaꞌisohivini hiki bana ida varani akadijaꞌari vanavaꞌisohiva abono-ra vaꞌora vara oniꞌavini hiꞌiki.
“Ni-avakaabokaki ida bana ovahojaki kania avarikhani.”
34 Hari.
Aꞌonira ohonariaki ho bana hojai jaꞌdinia avakahojaija kaimoni.
Avaabononi vakanakaidivakhama bana.
Aꞌonira onakaidivajahakivini vani fori hini onofija ida avaabononi avakanakaidivakhamavini.
35 Avaabononi avakanakaidivakhamahi;
ijaꞌari hahavi kodipohi avihini-ra avigaha.
Jesua binavaꞌisohijoraki ada Pedro
36 Hari.
Oniaroa,
Simão Pedroa binanaꞌdohiꞌaha ada Jesus:
—Jesus,
hanaja vania iokhaki i?
Jesua bigathaniꞌihi ida kidinaꞌdohi:
—Ni-ikaabokajorakiki ida onaothia ikasiagani ovahojaki kania iokhani.
Naothinia iokasiagaki bana i.
37 Pedroa binanaꞌdohiꞌianaha:
—Niha onimanija ookasiagarina-ra ikahiki?
Oabono ovaꞌahaki ho oabinina ira oakavaꞌijoaja kaimoni — Pedroa biniꞌaha.
38 —Iabono ivaꞌahamanija koda bana iabinini kodimoni ihini?
Kaꞌoa hiki hida varani ira onavaꞌisohivini hiki:
Arakava ahiana viahania ahoarabakosikia iabono iniꞌaki bana i,
oipohina ihirini-ra ikahiki bana i — niha ada Jesus.