Vanofiki ida Jesu-ra vanaabinivini
14
1-2 Hari.
Oniaroa,
mahi ꞌbamiki radahani naothinia judeus kaijaꞌaria vanamonahaki bana ida Páscoa kaihinikani.
Ihinika-ra vanamonahavini oadani pão kathoramananiriki-ra vakahaha.
Hari.
Vajoroniꞌaha adani sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama,
vaabono vara vakaniꞌakhamaꞌaha:
—Ijaꞌaria avigaravini kabaꞌi,
agathihava ada Jesus,
anaabinira kaimoni.
Niha aniꞌaꞌavini agathiki koda ada?
Mahi ꞌbamiki radahahi anamonahaki bana ida Páscoa kaihinikani.
Ihinika kania vajoroniki bana adani ijaꞌari vaipohiki Jesu-ra vavajahaki.
Ihinika-ra anamonahavini oadani,
ni-Jesu-ra agathivini jahaki.
Jesu-ra agathihi;
haria vidaha bana adani ijaꞌari — vaabono vakaniꞌakhamaꞌaha.
Gamoa bikavamisaihaꞌiki ada Jesus
3 Oniaroa,
Betânia ibavia hojaꞌaha ada Jesus.
Simão hoariha gorana hojaꞌaha.
Mahi ꞌboꞌdakari Jesua bianiꞌiki ida Simão kakavamoni asafi namania hojaki.
Simão gorana Jesus ꞌbaina kabaꞌi,
oꞌoiꞌihi ida gamo,
bivikhamiꞌihi ida misai mitxaki,
kaidivani arafiaki.
Misai onini naado.
Hari.
Bivikhamiꞌihi ida misai bavini,
biakoꞌdanikhamaꞌihi,
biahoariꞌihi ida misai Jesus ꞌdaꞌdi aꞌania.
4 Vahoariha vaihamahiꞌaha,
vaabono vakaniꞌakhamaꞌaha:
—Nahina kaimoni gamoa binakavithimaki ida misai.
5 Pavakari binihaja vaha;
jiniro ahapini-ra gathanimanihi vaha;
vakanahinariki-ra vaꞌora noꞌavini himanihi vaha ida jiniro.
Misai kaidivani 300 jiniro ꞌbaꞌdani prata amonahani ipohini — vaabono vakaniꞌakhamaꞌaha.
—Jakana hojava kaho.
Nahina kaimoni athii khanakia avaniꞌaki hida gamo?
Jahaki ida kidibadani kodimoni hini.
7 Mahi hahavi vani vahojara adani vakanahinariki avakadiania vaꞌora avakajoamorara kaimoni.
Ni-mahi hahavi ohojaki avakadiania hora avakajoamoraja kaimoni.
Oabinina amaakariki bana ho.
8 Hora kajoamoravini-ra nofivini mani ida nikia kanabadanini hija.
Hora kamisaivini hija oabinina viahania.
9 Kaꞌoa oamani hida oniꞌaki.
Arabo hahavi,
ibavi hahavia ijaꞌari vara bivaniꞌaki bana ida omonina jahaki,
vara vavaniꞌaki jaboni bana hida gamo kabadani jahaki.
Vakavaꞌihokiki bana hida gamo kabadani — vaꞌora niꞌaha ada Jesus.
Judas Iscariotes varani hina hida
10 Hari.
12 vihiki adani Jesus ipohina.
Hoarana Judas Iscariotes oniki.
Oniaroa,
sasidotxi vavakaꞌdaꞌdiva vakadiania okhaꞌaha ada Judas.
Vaꞌora niꞌaha:
—Jesu-ra oarakhavini-ra avanofihi;
oarakhaha avakadiania.
11 Oniaroa,
Judas kavarani-ra mitha vaniꞌaha,
khai vakhaniꞌaha,
vaniꞌaha:
—Jiniroa ira anoꞌaki bana hari,
Jesu-ra iarakhavini-ra anaabosija kaimoni — vaniꞌaha.
Hari.
Ajihiꞌaha ada Judas,
abono-ra niꞌaha:
—Niha oniꞌaꞌaki koda hada Jesus oarakhavini vakadiania — abono-ra niꞌaha ada Judas.
Viꞌbaijabanaꞌiki adani Jesus
12 Hari.
Ihinika kamaꞌdani kamahini vani,
ovilia vadorohana vaipohiki-ra vanaabiniꞌaha adani judeus kaijaꞌari,
Páscoa kaihinikani koꞌbaini kaimoni.
Vakahaki jaboni ida pão kathoramananiriki,
ovilia imana hiki,
avakavaꞌiꞌbiriniria kaimoni ida mahi ꞌboꞌdakari Deus vakadiꞌarahoda avikhananavaki-ra vaꞌora vaꞌadivini.
Oniaroa,
ihinika kamaꞌdani kamahini vani ipohina vananaꞌdohiꞌaha ada Jesus:
—Ida hanaja vania hojahi ibavi Páscoa kaihinikani koꞌbaini-ra anamonahavini kaimoni?
A Última Ceia (Marcos 14:12-26)
13 Oniaroa,
vaꞌora karonaha adani viꞌbamiki,
vaꞌora niꞌaꞌaha:
—Jerusalém sidajia avikhaꞌa bana.
Avanokiki bana ada makhira paha bavini-ra kaibaꞌiki.
Gora bodinia okhajakosiha,
avikhajakosi jaboni bana.
14 Gora kakaꞌdaꞌdini-ra bana vaniꞌa:
“Jesus vani haria honariavini hida
ira ananaꞌdohihavini hija,
ida hanaja vania hojahi
Páscoa kaihinikani koꞌbaini-ra anamonahavini ibavini
kaimoni kodipohi khama?”
15 Aꞌonira nanokiahivini hiki bana ida ibavi,
gora kaꞌobani kakanamajakhamaki kania.
Nahinaro avanofiki,
hojaꞌiki afohahavi.
Hiꞌoni ibavia ꞌbai-ra vanamonahaꞌa bana akadimoni — vaꞌora niha ada Jesus.
16 Hari.
Ai vihiꞌaha adani viꞌbamiki.
Sidajia avikhaꞌaha.
Vakaragaꞌihi ida ibavi Jesus vaꞌora navaꞌisohijoravini hiꞌiki.
Oniaroa,
Páscoa kaihinikani koꞌbaini-ra vanamonahaꞌaha.
17 Mithani vaivaini vani vakaikahiꞌaha adani Jesus Páscoa kaihinikani ibavini kania.
Vakaikahiꞌaha,
avikasiꞌaha gora kaꞌobani kakanamajakhamakia.
Vaagakosoaꞌaha adani Jesus 12 vihiki ipohina khama.
18 Viꞌbaina kabaꞌi Jesua biniꞌaꞌaha:
—Kaꞌoa oamani ida oniꞌaki.
Hoarana avakadiania hojaki hora arakhaki bana,
vahoariha hora vanaabinija kaimoni.
19 Vavaꞌi mokara niꞌaha,
Jesu-ra vaniꞌahahaviꞌaha afohanana:
—Aajo,
vara hora ivaniꞌamanija koda?
Jokoa ira oarakharihi — vakhaninanaꞌaha.
20 Jesus vaꞌora niꞌaha:
—Hoarana hora arakhaki ho,
hiꞌo pão-ra oakobaꞌahavini-ra oviꞌbamivini hiki,
hihada vani hada hora arakhara vahoariha vasaꞌa kabodinia,
hora vanaabinira kaimoni.
21 Hovani ijaꞌari hahavi vakadiꞌaajo ho.
Oabiniki bana ho.
Deus athi kapapirania binamonijoraki ida oabinina.
Jahariki bana ida kidimoni hora arakhaki kaimoni.
Deua binapohimajaki bana ada hora arakhaki.
Namitharara vaha;
ni-pohimajaki vaha — niha ada Jesus.
Jesua vara bivaniꞌajoraꞌiki ida amana ahovariki ijaꞌari vakadimoni
22 Hari.
Viꞌbaina kabaꞌi,
Jesua bikanabiiniꞌihi ida pão,
Deu-ra niꞌaꞌaha:
—Deus,
ivani ijahaki i.
Pãoa haria inoꞌaꞌiki i.
Vara nina naothinia,
bikanapitahatahaꞌihi,
kidipohi-ra vaꞌora noꞌavini kihiꞌihi,
vaꞌora niꞌaha:
—Vaagathaniꞌa hida pão mahija avakahahahavivini.
Oimana hida pão.
23 Vakahavini naothinia,
copo maina-ra nabiiniha,
Deu-ra vara niꞌaꞌianaha:
—Deus,
ivani ijahaki i.
Vinho haria inoꞌaꞌiki i.
Vinho kacoponi maina vaꞌora noꞌaꞌaha.
Vaꞌora niꞌaha:
—Viꞌavihahavi.
24 Vaꞌora niꞌaha:
—Hihida vinho oamana hida.
Oabinina kamahini oamana ahovariki bana.
Oabono ovaꞌahaki ho oabinina,
ijaꞌari vaipohiki-ra vaꞌora oakavaꞌijoaja kaimoni.
Oamana ahovariki bana,
vakadihojai asohiriki ꞌbirani abosija kaimoni.
Oamana ahovarini mani ida Deu-ra vakajariꞌdariki-ra vaꞌora kapoarivini hija,
kidijaꞌari vihira kaimoni,
oniani ida kidiania vaꞌora arakhaja bana.
Nimania ida Deus kavaꞌiponahi aꞌboꞌdaki jaꞌdini.
25 Kaꞌoa oamani ida oniꞌaki.
Jokoa oabinirina oadani oꞌavijanarihi hida vinho.
Deus aꞌonira vakaꞌdaꞌdivini kamahini kidiania nama oꞌaviꞌianaki bana hida vinho jaꞌdini avakadiania — Jesus vaꞌora niꞌaha.
26 Oniaroa,
viꞌavivini naothinia,
moroa vaahiaha Deu-ra khai vaniꞌavini.
Ai vihiꞌaha.
Arabo namahiki monte das Oliveiras oniki avikhaꞌaha.
Jesua binavaꞌisohijoraki ada Pedro
27 Hari.
Jesus vaꞌora niꞌaꞌaha adani Pedro:
—Deus athi kapapirania hojaki hida athii:
“Ovilia akadavaꞌava abono-ra onaabiniki bana ho.
Avigaki bana adani ovilia.”
Nihi ida athii.
Hihida joma hora avanahojahaki bana aꞌoni afohahavi avarigani.
Ovilia avigana vani fori avihija bana avarigani.
28 Oahokina naothinia,
Galiléia kaarabonia aꞌonira onaviahanokhaki bana ho — vaꞌora niꞌaha ada Jesus.
29 Oniaroa,
Pedroa biniꞌaha:
—Ira vanahojahavini kabaꞌi adani vahoariha,
hovani ni-ira onahojahaki — niha ada Pedro.
30 Jesua biniꞌaha ada Pedro:
—Kaꞌoa oamani ida ira oniꞌavini hiki.
Hihida joma arakava ahiana akoꞌbamini viahania,
ivani iathini nija bana:
“Jesus ipohina ohirihi.”
Ahoarabakosikia oipohina ihirini-ra ikahiki bana i — Jesua biniꞌaha ada Pedro.
31 Oniaroa,
Pedro biniꞌadanokiꞌaha:
—Iniani,
oabinihi kadania oabinihi.
Jokoa iipohini ohirina-ra okahirihi — niha ada Pedro.
Vahoariha vaniꞌavini afohahavi:
—Jokoa iipohini arihirina-ra akahirihi — vakhaniha.
Getsêmani ibavi onikia avikhaki adani Jesus
32 Hari.
Ai vihiꞌianaha adani Jesus,
Getsêmani ibavi maakariki-ra avanikhahavini.
Avakhanoha,
ipohina-ra vaꞌora niꞌaha:
—Onia vavithimaꞌo,
okhananavaki ho,
Deu-ra vara oniꞌaki ho.
Jesus é preso e interrogado (Marcos 14:32-72)
33 Vavithimaꞌona,
Jesus vaꞌora niꞌaha:
—Pedro,
Tiago,
João,
hora vavaipohiha bana.
Ai vihiꞌaha adani avakoꞌbamahakhamaki.
Vaꞌi mokara nikarahoha ada Jesus.
Vaꞌi rogo inikarahoki ada jaboni.
34 Vaꞌora niꞌaha:
—Kodivaꞌisokoꞌini karaho hora naabinikamariki ho.
Hida vahoja.
Vanoki bana!
— vaꞌora niꞌaha.
35-36 Okhananavapaꞌitxiha,
aasiamaꞌoha,
Deu-ra vara niꞌaꞌaha:
—Kodiabiꞌi,
okavaꞌisokonihi ida ijaꞌari hahavi vakadihojai asohirini abosini-ra ogathanivini.
Nahina hahavi-ra ikaabokahi.
Hora vanaimaꞌbanavini inofirihi;
hora ivaꞌadivini-ra ikaabokaki i.
Hora vanaimaꞌbanavini inofihi;
onofiki jaboni.
Nahina-ra inofihi;
onofiki jaboni — Deu-ra niꞌaha ada Jesus.
37 Hari,
Pedro vakadiania joimiha ada Jesus.
Pedro vavadina-ra karagaꞌaha,
vaꞌora niꞌaha:
—Simão Pedro,
ivadimania?
Inokipaꞌitxini-ra koda ikaabokaria?
Hariꞌa vavadi!
38 Deu-ra vara vaniꞌa bana mahija Jahari athi aꞌonira kaboroborovini-ra avakamitharavini.
Jahari kahojai-ra avanofiravini kabaꞌi,
ni-avakaabokaki ida Jahari aꞌonira kaboroborovini-ra avakajonivini.
39 Ajoimiꞌianaha ada Jesus,
Deu-ra vara niꞌaꞌianaha.
Biniꞌaha:
—Kodiabiꞌi,
oogaki ida hora vanaimaꞌbanavini-ra inofivini,
oniani ida hora vanaimaꞌbanavini okapoarivini hija.
Nahina-ra inofihi;
onofiki jaboni.
40 Pedro vakadiania joimiꞌianaha.
Vavadiꞌianana vani vaꞌora karagaꞌianaha.
Vanokhoꞌdaꞌboꞌdaꞌboꞌianamaniha.
Ni-vakaabokaki ida vanokina.
Jesus vara vaꞌora niꞌaha,
ni-avigaki ida vagathanivini kaimoni.
Ajoimiꞌianaha ada Jesus,
ahoarabakosikia Deu-ra vara niꞌaꞌianaha,
oniani ida athi hiꞌianahi.
41 Oniaroa,
kidipohi vakadiania okhamiꞌianaha,
vaꞌora niꞌaꞌaha:
—Asia mani avavadija,
avarakoirini?
Hari.
Kamaꞌdaꞌiki ida oimana ꞌbanani.
Hovani ijaꞌari hahavi vakadiꞌaajo ho.
Hoariha hora arakhaki bana ada,
makhira vajahariki vasaꞌa kabodinia.
42 Vigaaꞌa.
Ai arihiꞌava.
Vada vaniꞌa o,
vasaꞌa kabodinia hora arakhaki kaikahina.
Vagathiki ada Jesus
43 Hari.
Vara nina kabaꞌi,
kaikahiꞌaha ada ipohina Judas Iscariotes oniki.
Judas vaꞌora vikhaꞌaha adani ijaꞌari vaipohiki vakasaꞌaiki.
Vavikhaki ida ava,
tarasara hiki,
vakadisaꞌai kaimoni.
Vakasaꞌaiki-ra vaꞌora vakaronaꞌaha adani sasidotxi vavakaꞌdaꞌdiva,
judeus kaijaꞌari vanavaꞌisohiva abono,
judeus kaijaꞌari vakaꞌojomoꞌiva abono vihiki,
Judas vaꞌora vaipohihara kaimoni.
44 Judas vaꞌora niꞌavini vakaikahina viahania:
—Hiꞌada makhira okaꞌivanitiki,
oramosiki vani-ra vagathi bana — vaꞌora navaꞌisohijoraꞌaha ada Judas.
Jesu-ra vakavarajomivini hiki Juda biramosivini.
45 Hari.
Jesus vavahojaki kania vakaikahiꞌaha adani Judas,
binamaakariꞌaha,
biniꞌaha:
—Aajo,
ivaniti.
Jesu-ra ramosiꞌaha.
46 Hari.
Vakasaꞌaiki Jesu-ra vagathiꞌaha,
vidabohaꞌaha.
47 Jesus ipohina hoarana bidioniꞌihi ida tarasara fori hiki bavinia,
bidafiaꞌaha ada sasidotxi vakadikaꞌdaꞌdi kahonai abono,
biavaꞌboarabakosiꞌihi ida morobo.
48 Oniaroa,
Jesua biniꞌaha:
—Ijaꞌaria vavikhaki ida ava,
tarasara hiki vagathira kaimoni ada kaabiniki.
Onivani fori hini avavikhaja ida avakadisaꞌai hora avagathija kaimoni.
Okaabiniki hora avavanihamania koda?
49 Mahi hahavi aꞌonira okaꞌojomoꞌihi Deu-ra khai aniꞌavini kagorani kavasiribanini bodinia,
ni-hora avagathiꞌiki.
Namithaꞌiki ida Deus athi vanamoniva abono kohana vanajiriꞌboꞌdaꞌiki Deus athi kapapirania — vaꞌora niꞌaha ada Jesus.
50 Oniaroa,
Jesu-ra vanahojahaꞌaha adani ipohina,
avigaꞌaha.
51 Kasiagaꞌaha ada imakhinava.
Bikaimahaꞌihi ida kidikarahobi kaꞌoa,
abono-ra karafoavini hini.
Hari.
Vahoariha vagathiꞌaha.
52 Binahojahaꞌihi ida kidikarahobi,
rajorajona ogaꞌaha,
gathana-ra finivini.
Judeus kaijaꞌari vanasohiva abono vavakaꞌdaꞌdiva vakadiania hojaki ada Jesus
53 Hari.
Oniaroa,
sasidotxi vakadikaꞌdaꞌdi gorana avisaha ada Jesus.
Sasidotxi vakaꞌdaꞌdiva gorana bodinia vajoroniha adani judeus kaijaꞌari vakaꞌojomoꞌiva abono,
judeus kaijaꞌari vanavaꞌisohiva abono vihiki.
54 Hari.
Napaja kasiagaꞌaha ada Pedro.
Sasidotxi vakadikaꞌdaꞌdi gorana khanona,
gora iꞌoarini kavasiribanini bodinia oꞌoiꞌaha ada Pedro.
Vithimaꞌoꞌaha siho kaꞌdihania gora avakadavaꞌava abono vakadiania,
vaꞌoaniaro sorara fori vihiki adani.
Vithiꞌaha vakadiania abono-ra naragiꞌaha ada Pedro.
55 Sasidotxi vavakaꞌdaꞌdiva,
judeus kaijaꞌari vanasohiva abono vavakaꞌdaꞌdiva khama vaabono vara vakaniꞌakhamaꞌaha.
Vanofiki Jesus abinina-ra vavahonariahivini.
Vanakoꞌdiki ida badani asohiriki Jesus kania,
ni-vakaragaki.
56 Jesus athi kamithava abono-ra vaꞌora vakaboaꞌiha,
Jesu-ra avakaraganahara kaimoni afohanana.
Jesu-ra vakanavaranihavini adani ijaꞌari vaipohiki afohanana.
Korijanahia vakavaranina mani ida vakadivarani-ra avakanasohikhamaravini hija.
57 Hari.
Judeus kaijaꞌari vanasohiva abono vavakaꞌdaꞌdiva vahararana vigaamananiꞌaha adani Jesus athi kamithava abono vahoariha,
Jesu-ra avakaraganahara kaimoni.
Jesus athi vakamithava vaꞌora vaniꞌaha:
58 —Akamithaki ida Jesus athi.
Biniꞌaki:
“Onathararaki bana ida
Deu-ra khai aniꞌavini
kagorani ijaꞌaria vanamonahaꞌiki.
Mahi ahoarabakosikia
onamonahaꞌianaki bana ida gora hoariha
ijaꞌaria vanamonahariki.”
Nimania ida Jesus athi akamithaꞌiki — vakhaniha.
59 Vanahoarihabakhiaki ida vakadivarani,
oniani ida vakadivarani anasohijanarini hija.
60 Oniaroa,
gaaꞌaha ada sasidotxi vakadikaꞌdaꞌdi maina vahararana bodi pania.
Jesu-ra nanaꞌdohiꞌaha:
—Igathanivini inofiria ida ira vakanavaranihavini?
61 Jesua viso biniꞌahi ida athi,
ni-bigathaniki.
Oniaroa,
sasidotxi vakadikaꞌdaꞌdia binanaꞌdohiꞌianaha:
—Ivani Cristo,
Deus ira nagathogathoꞌiki i?
Deus jahaki kaisai mani i?
62 —Haꞌa.
Hovani Deus kaisai Cristo ho.
Hovani ijaꞌari hahavi vakadiꞌaajo ho.
Deus danoki pitana aniaja ovithiki bana ho kaꞌdaꞌdi ohina.
Ovithina-ra avanokiki bana aꞌoni.
Bahi vaforiki hararana vani nama ogarina-ra avanokija bana — niha ada Jesus.
63 Oniaroa,
sasidotxi vakadikaꞌdaꞌdia binaꞌbiraꞌihi ida kidikarahobi bikaimahaki,
bikavarajomija kaimoni ida Jesus Deus hina kavaranihi-ra vajaharavini.
Vaꞌora niꞌaha:
—Jesus Deus kaisai hina-ra kahiꞌbadaraki.
Nahina kaimoni vaꞌora anihajanariha adani Jesus vara vavaniꞌava abono.
64 Akamithaꞌiki hida Jesus Deus kaisai hina-ra kahivini.
Jahariꞌoamanija ida kidivarani.
Niha aniꞌaꞌaki koda hada Jesus?
Vagathaniꞌihi ida athi:
—Jahariki hida kidivarani.
Jahaki ida abinina — vakhanihahaviꞌaha.
65 Oniaroa,
ijaꞌari vaipohiriki Jesu-ra vakaiꞌbaiꞌaha.
Vahoariha nokho makaria vakarahobavini vakajoiriꞌaha,
Jesu-ra vakahomaravini:
—Hana hina vani ira kajoirija?
— vaniꞌaha.
Sorara jabonia vagathiꞌaha ada Jesus,
vidaꞌaha.
Pedro Jesu-ra ogaravini-ra kahiki
66 Hari,
gora banininia asia hojaha ada Pedro.
Khaꞌihi ida sasidotxi vakadikaꞌdaꞌdi kabadani abono.
67 Binokiꞌaha ada Pedro abono-ra naragivini siho kaꞌdihania.
Vada biniꞌaha,
niꞌihi:
—Ivani ivaipohihara ada Nazareno,
Jesus oniki.
68 Pedroa biniꞌahi:
—Iniani.
Ovaipohihariha ada.
Ni-oogajahakiki ida kadavarani nahina nini.
Hari.
Ajihiꞌaha,
gora kavasiribanini kaathania okhamina.
Ahiaꞌaha ada arakava.
69 Badani abonoa binokiꞌaha ada Pedro,
vahoariha maakarinia vahojaki-ra niꞌaꞌianahi:
—Ovani hiꞌo Jesus ipohina.
70 Oniaroa,
Pedroa biniꞌaꞌianahi:
—Iniani.
Ipohina ohirihi.
Viso vakhanina afoꞌimidia,
naothinia vahojakia vaniꞌaꞌianaha ada Pedro:
—Hai oamani,
kidipohi oamani i,
kadarabo Galiléia jaboni.
71 Oniaroa,
Pedro vaꞌora niꞌaha:
—Deua bikamithahi ida kodivarani.
Ni-oogaki ada makhira,
ipohina ohirihi.
Korijanahia okavaranihi;
Deus hora naimaꞌbanakarahovini-ra onofihi.
72 Oniaroa,
ahiaꞌianaha ada arakava,
ahiana akoꞌbamini.
Pedroa bikavaꞌihokiꞌihi ida Jesus athi:
“Hihida joma arakava
ahiana akoꞌbamini viahania,
ivani inihaꞌiki i:
‘Jesus ipohina ohirihi.’
Ahoarabakosikia inihi.”
Jesus athi-ra kavaꞌihokiha,
asaraꞌahapikiꞌaha ada Pedro.