Gathaꞌiki ada Jesus
18
Hari.
Oniaroa,
Deu-ra vara niꞌavini naothinia ai vihiꞌaha adani Jesus,
kidipohi khama.
Ni-hojajanaki ada Judas Iscariotes vakadiania.
Cedrom vaha paꞌitxia avikafianiha,
avigaimoripaꞌitxiꞌaha,
ihiꞌai avani amokhinini kania avikhaꞌaha,
oniaroa,
vahojaꞌaha.
2 Judas Iscariotea biogaki ida ihiꞌai avani amokhinini kani Jesus kidipohi khama vajoronibakhiana ibavinia.
Judas Iscariotes Jesu-ra arakhaki bana vahoariha vagathira kaimoni.
Jesus traiu e preso (João 18:1-14)
3 Hari.
Judas Iscariotes vaꞌora avikhaꞌaha adani sorara kidiania ihiꞌai avani amokhinini kania.
Judeus kaijaꞌari vihiriha adani sorara Pilatos vaꞌora karonaꞌiki.
Judas Iscariotes vaꞌora avikhaha adani jaboni Deu-ra khai vaniꞌavini kagorani avakadavaꞌava abono.
Sasidotxi vavakaꞌdaꞌdiva,
farisio khama vaꞌora vakaronaki adani gora avakadavaꞌava abono Judas Iscariote-ra vavaipohihavini.
Vakasaꞌaiki adani Juda-ra vavaipohihaꞌiki,
vakalamparinaki adani vahoariha,
vahoariha avavikhaki ida nahina haꞌdiki ajava fori hiki.
4 Jesua biogajoraki ida hahavi namithaki kaimoni kidiania.
Oniania Jesus vaꞌora namaakariꞌaha adani vikhaki,
vaꞌora nanaꞌdohiꞌaha:
—Hana hina mani hada avanakoꞌdihara?
5 — Jesus mani hada anakoꞌdira,
Nazaré sidajia avijavaꞌiki.
—Hovani oa ho — niha ada Jesus.
Hojamaniha ada arakhana hiꞌiki sorara vahararana.
6 Jesus vaꞌora niꞌaha:
“Hovani oa ho”,
oniaroa,
avajoꞌohamiꞌaha,
avaadarimaꞌoꞌaha.
7 Jesus vaꞌora nanaꞌdohiꞌianaha:
—Hana hina mani hada avanakoꞌdihara?
—Jesus mani hada anakoꞌdira — vaniꞌaꞌianaha.
8 — Aꞌonira onavaꞌisohivini ohiꞌiki ho hovani oa ho.
Hora avanakoꞌdihahi;
vaꞌora vavaꞌaha bana hadani oipohina ai vihina — sorara-ra vaꞌora niꞌaha.
9 Hari.
Jesua biniꞌajoraꞌiki ada Deus:
—Kodiabiꞌi,
hora inoꞌavini vihiꞌiki adani oipohina,
vaꞌora oakadavaꞌara kaimoni.
Ni-hoarana kodiania akamadaki — niha ada Jesus afojora.
Jesus ipohina ai vihina-ra kanikhariavini hiki namithaja kaimoni ida Deu-ra navaꞌisohijoravini hiꞌiki.
Oniaroa,
vaꞌora vavaꞌahaꞌaha adani Jesus ipohina ai vihina.
10 Oniaroa,
kasaꞌaiki ada Simão Pedro.
Bianiꞌihi ida tarasara fori hiki bavinia,
binobaꞌaha ada sasidotxi vakadikaꞌdaꞌdi kahonai abono.
Biavaꞌboarabakosiꞌihi ida morobo kaꞌaniajani.
Malco oniki ada honai abono.
11 Jesua biniꞌaꞌaha ada Pedro:
—Hariꞌa nikia kabadani.
Inaibavi oni kadasaꞌai bavinia.
Kodiabiꞌia vara bivaniꞌajoraꞌiki ida oimana-ra vanaꞌbanakarahovini niha hora vaniꞌaꞌavini.
Onofiki ida kodiabiꞌi athi namithaꞌini kodiania.
Anás gorana avavikhaꞌiki ada Jesus
12 Hari.
Oniaroa,
sorara Jesu-ra vagathiꞌaha,
vakadikaꞌdaꞌdi khama.
Deu-ra khai vaniꞌavini kagorani avakadavaꞌava abono vihikia vaakodiaꞌihi ida Jesus saꞌa-ra vakodabovini.
13 Anás gorana avavikhaꞌimidiaha ada Jesus.
Caifás kahadi ada Anás.
Oniaro kari sasidotxi vakadikaꞌdaꞌdi ada Caifás.
14 Ovari vaꞌora navaꞌisohijoraꞌiki adani judeus kaijaꞌari vanavaꞌisohiva abono:
“Jahaki bana ida avakadimoni Jesus
hoarana abinina,
vapohimajahahavirara
kaimoni adani akadijaꞌari.”
Niꞌiki ada Caifás mahi ꞌboꞌdakari afojora.
Pedro Jesu-ra ogaravini-ra kahiꞌiki
15 Hari.
Oniaroa,
sorara Jesu-ra vagathiꞌavini vanaothia vikasiagaꞌaha adani Simão Pedro,
Jesus ipohina hoariha khama.
Sasidotxi vakadikaꞌdaꞌdi gorana kavasiribanini bodinia Jesu-ra avavikhajakosiꞌaha adani sorara.
Gorana bodinia avaviꞌoiꞌaha.
Sasidotxi vakadikaꞌdaꞌdia biogaki ada Jesus ipohina Jesua binofijahakiki,
oniani ida gorana kavasiribanini bodinia oꞌoina vavaꞌahavini hija vakadiania.
Pedro nega saber que Jesus e Anás questionam Jesus (João 18:15-27)
16 Pedro vani ada baniniaja hojaroniꞌaha.
Hari.
Joionaniꞌaha ada Pedro ꞌbamina,
bikanikhariaꞌihi ida imaꞌinavi gora kavasiribanini kaathani-ra akadavaꞌaki Pedro okhajakosira kaimoni.
Bivaꞌahaꞌaha ada Pedro oꞌoina.
17 Pedro-ra nanaꞌdohiꞌihi ida imaꞌinavi bakatha kania hojaki:
—Ivani hiꞌada makhira ipohina mani i jaboni?
—Iniani,
ipohina ohirihi — niha ada Pedro korijanahia.
18 Hari.
Pahisiriki ida joma.
Gora avakadavaꞌava abono,
honai abono vihiki khama avakanahaꞌdiꞌihi ida siho gora kavasiribanini bodinia.
Siho kaꞌdihani kania vaabono vanaragivini vakavaroiribaniꞌihi.
Okhamiha ada Pedro vakadiania abono-ra naragihavini jaboni.
Sasidotxi vakadikaꞌdaꞌdia binanaꞌdohiki ada Jesus
19 Hari.
Oniaroa,
sasidotxi vakadikaꞌdaꞌdi kania sorara Jesu-ra avavikhaꞌaha.
Sasidotxi vakadikaꞌdaꞌdi,
Anás onikia binanaꞌdohiꞌaha ada Jesus:
—Hana vihina mani adani ira vavaipohihabakhiara?
Nahina nimania ida kadaꞌojomoꞌihi athini vara vaꞌora iniꞌabakhiavini hiꞌiki adani ijaꞌari kadania vajoroniki?
20 Jesua bigathaniꞌihi ida kidinaꞌdohi:
—Ni-ijaꞌari-ra ahojaia vara oniꞌarihi.
Ijaꞌari hahavia vakamithavini vanofihi;
vakamithamanihi.
Ijaꞌaria vavajoroniki ibavinia vaꞌora okaꞌojomoꞌiki adani.
Deu-ra vara aniꞌavini kagorani bodinia,
Deu-ra khai aniꞌavini kagorani kavasiribanini bodinia jaboni vaꞌora oakaꞌojomoꞌionibakhiaki adani.
Ni-ahojaia vara ovaniꞌaki.
21 Ni-asohiki ida gathaꞌiki-ra inanaꞌdohivini kidibadani,
athi hikia.
Vaꞌora nanaꞌdohi bana adani oathi-ra vakamithabakhiaki.
Vaꞌora nanaꞌdohivinihi bana ida kodivarani nahina nini vaꞌora onavaꞌisohivini hiꞌiki.
Avigaki ida kodivarani.
22 Vara nina naothinia ada Jesus,
gora akadavaꞌava abonoa bikapatahi ida Jesus nokho,
biniꞌaꞌaha:
—Ni-nikia igathanivini asohiki ida sasidotxi vakadikaꞌdaꞌdi athi.
23 Jesua biniꞌaha:
—Asohirihi ida kodivarani;
inanamitha bana ida nahina asohiriki kodivarani hiki.
Asohihi ida kodivarani;
ni-asohipaꞌitxiki ida onokho-ra ikapatavini — niha ada Jesus.
24 Oniaroa,
Anás vaꞌora honariaha adani gora avakadavaꞌava abono:
—Avisa o Jesus sasidotxi vakadikaꞌdaꞌdi hoariha,
Caifás oniki kania — vaꞌora niꞌaha.
Saꞌa kodabohani kabaꞌi Caifá bivahojaki ibavi kania avisaꞌaha.
Pedro Jesu-ra ogaravini-ra kahiꞌianaki
25 Hari.
Asia mani hojaha ada Pedro abono-ra naragikosoavini.
Vahoariha vaniꞌaha:
—Ivani jaboni hiꞌada makhira ipohina mani i?
Pedroa biniꞌaha korijanahia:
—Iniani.
Hiꞌada makhira ipohina ohirihi.
26 Oniaroa,
honai abono hoariha Pedro-ra nanaꞌdohivini hiki Jesus ipohina hina.
Honai abono Pedroa morobo biavaꞌboarabakosiki kaijaꞌari ada Pedro-ra nanaꞌdohira:
—Ira onokiria koda ihiꞌai avani amokhinini kania kidiania?
27 Pedroa biniꞌaꞌianaha:
—Iniani.
Ni-hora inokirihi — niꞌianaha.
Oniaroa,
jorakia ahiaꞌaha ada arakava.
Pilatos kania avisaꞌaha ada Jesus
28 Hari.
Avagarini vani Caifás gorana Jesu-ra vavaꞌajihiꞌaha.
Arabo kakaꞌdaꞌdini gorana karahoa avisaꞌaha ada Jesus.
Judeus kaijaꞌari vanavaꞌisohiva abonoa ni-vanofiki ida avikhajakosina.
Vaabono vakaniꞌakhamaꞌaha:
—Ni-jahaki hida akadijaꞌari hiriki gorania aokhajakosina Páscoa kaihinikani amonahani kamahini.
Aoꞌoihi.
Ni-Deus viaha ajahaki.
Ni-jahaki jaboni ida ihinika koꞌbaini-ra arihavini — vakhaniꞌaha.
Nimania hida vakadikaaji,
oniani ida gora banininija vaꞌora nahojaja.
Pilatos pergunta a Jesus (João 18:28-40)
29 Oniaroa,
gorana khaonaniꞌaha ada Pilatos vakadiania,
vaꞌora nanaꞌdohiꞌaha:
—Nahina mani ida makhira kabadani asohirini-ra avakahivini hija?
30 Vaniꞌaha ada Pilatos:
—Jahari kabadania kabadanirara vaha;
ni-kadania arakhaki vaha ada Jesus.
31 Pilatos ni-vaꞌora nasohivini vaꞌora nofiki adani judeus kaijaꞌari,
oniani ida vaꞌora niꞌavini hija:
—Aꞌonivani avavikhaꞌa o makhira avakadijaꞌari nasohiva abono vakadiania.
Avakadijaꞌari kavaꞌisohihi jiriki-ra naabariha;
aꞌonivani vavahonariahi kidibadani asohiriki abosinia.
Pilato-ra vaniꞌaha adani judeus kaijaꞌari vanavaꞌisohiva abono:
—Anofiki ada Jesus abinina.
Ivani Roma sidaji kaijaꞌarini i.
Ivani,
kadaijaꞌari khama ni-vaꞌora vavaꞌahaki adani akadijaꞌari vanasohiva abono ijaꞌari abinini-ra vavahonariahivini kidibadani asohiriki abosini hini,
oniani ida Jesus abinina-ra ivahonariahivini anofivini hija — Pilato-ra vaniꞌaꞌaha.
32 Hari.
Jesus abono-ra vara vaniꞌajoravini hiki abinina niha ninini.
Judeus kaijaꞌari vakadihojai hirihi ida ijaꞌari abinini-ra vavahonariahivini ava akasanakhamakia akaꞌitapoamisahanana.
Roma sidaji kaijaꞌarini vakadihojai hiki ida.
Pilatos Jesus abinina-ra vahonariahivini mani ida bana Jesus vara abono-ra vaniꞌavini hiki-ra nanamithaja bana.
33 Ajoijakosiꞌianaha ada Pilatos,
vaꞌora honariaha adani Jesu-ra avakadavaꞌaki Jesu-ra vavikhavini kidiania.
Vavikhaꞌaha ada Jesus,
Pilatoa binanaꞌdohiꞌaha:
—Judeus kaijaꞌari vakadikaꞌdaꞌdi mani i?
34 Jesua bigathanihi ida kidinaꞌdohi:
—Ivaꞌini bodini vania khaja hida kadanaꞌdohi?
Vahoariha vara hora vavaniꞌamaniꞌia kadania?
35 Pilatoa biniꞌaha:
—Iniani.
Ovaꞌi bodinia kharihi ida kodinaꞌdohi.
Judeus kaijaꞌari ohirihi.
Vahoariha vara ira vavaniꞌaꞌiki i.
Kadaijaꞌari,
sasidotxi vavakaꞌdaꞌdiva khama ira avarakhaꞌiki i kodiania.
Nahina mani ida bada iniꞌaꞌia?
36 Jesua biniꞌaꞌaha:
—Kaꞌdaꞌdi ohina kabaꞌi,
arabo kakaꞌdaꞌdini fori ohirihi.
Arabo kakaꞌdaꞌdini fori ohija vaha;
kodipohi vaꞌora vidafiaha vaha adani hora vavajahariki,
judeus kaijaꞌari vanavaꞌisohiva abono vasaꞌa kabodinia hora avarakharara kaimoni.
Iniani.
Arabo hidiaja kakaꞌdaꞌdini fori ohirihi.
37 Pilatoa binanaꞌdohiꞌianaha:
—Arabo kakaꞌdaꞌdini mani i?
Pilato-ra niꞌaha:
—Haꞌa,
ivani kaꞌdaꞌdi ohina-ra ikahija.
Ijaꞌari vakadiania okhaꞌina oꞌbanaꞌiki ho.
Hora rakhaki ijaꞌari vakadiania varani kaꞌoa hinia okavaranija kaimoni.
Athi kaꞌoa-ra vavajahakia vanaabaki jaboni hida oathi.
38 — Nahina nimania ida varani kaꞌoa hini?
— niha ada Pilatos.
Ni-binokhaki Jesua bigathanivini.
Oniaroa,
ajoionaniꞌianaha ada Pilatos ijaꞌari vakadiania,
vaꞌora niꞌaꞌaha:
—Okavaꞌibodivaraniꞌiki ida badani asohiriki-ra bada niꞌaravini,
oniani ida abinina ovahonariahiravini hija.
39 Páscoa kaihinikani kamahini oarakhaki avakadiania ada makhira hoarana gathaki,
aihotara kaimoni.
Nimania hida kodihojai.
Hana hina-ra avanofihi oarakhaonanivini avakadimoni,
ajihira kaimoni?
Avanofimanira ada avakadijaꞌari vakaꞌdaꞌdiva-ra oarakhavini Jesus oniki?
40 Vabodiꞌbarahana Pilatos athi-ra vagathaniꞌaha:
—Iniani.
Anofiriha ada.
Anofiki ada Barrabás aihotana — vakhaniha.
Daji anahoroava abono ada Barrabás.