Pilatos kania Jesu-ra avisaki adani
23
Hari.
Oniaroa,
vigaaꞌaha adani judeus kaijaꞌari vanasohiva abono hahavi,
Jesu-ra avisaꞌaha Pilatos kania.
2 Vakaikahiha,
Pilato-ra vaniꞌaha Jesu-ra avakaraganahavini:
—Agathiꞌiki hada hihada makhira Jesus oniki.
Ovari vaꞌora niꞌabakhiaki adani ijaꞌari vaipohiki:
“Hariꞌa vanaabajana ida arabo ipohiki kakaꞌdaꞌdini César oniki athi.
Hariꞌa Césa-ra vanoꞌajana
avakadiꞌimposto
kajinironia.
Hovani Cristo ho,
Deus hora nagathogathoꞌiki
ho,
avakadikaꞌdaꞌdi ohija
kaimoni.”
Niha ada Jesus — Pilato-ra vaniꞌaha vakorijanahavini.
Lucas 23:1-31
3 Oniaroa,
Pilatoa binanaꞌdohiꞌaha ada Jesus:
—Ivani,
judeus kaijaꞌari vakadikaꞌdaꞌdi mani i?
Jesua bigathanihi ida kidinaꞌdohi:
—Ivani,
judeus kaijaꞌari vakadikaꞌdaꞌdi ohina-ra ikahiki i.
4 Hari.
Pilatos vaꞌora niꞌaha adani sasidotxi vavakaꞌdaꞌdiva,
ijaꞌari vaipohiki vajoroniki khama:
—Ni-nahina jaharikia kabadaniki hada makhira.
Badani jahariki-ra bada niꞌaravini mani ida abinina ovahonariahiravini hija.
5 Vaniꞌadanokiꞌaha afobakhia:
—Pilatos,
Judéia kaaraboni kaijaꞌarini hahavi-ra vaꞌora narifirafiraki ada kidivarani,
kidibadani hikia.
Kamaꞌdaꞌiki ida vaꞌora narifirafiravini Galiléia kaarabonia.
Akadiani maina khaki ada — vaniꞌaha ada Pilatos.
Iroji kania maina Jesu-ra avisaki adani
6 Hari.
Pilatoa bikamithaꞌihi ida vakadivarani,
vaꞌora nanaꞌdohiꞌaha:
—Hihada makhira Galiléia kaaraboni kaijaꞌarini mani koda hada?
— Haꞌa,
Galiléia kaaraboni kaijaꞌarini o — vaniꞌaha.
7 Hari.
Galiléia kaaraboni kakaꞌdaꞌdini Iroji oniki hojaki jaboni Jerusaléa.
Khaꞌiki ada ovari jaboni Páscoa kaihinikani kamaꞌdani viahania.
Pilatoa bikamithaꞌihi ida Jesus varani hina Galiléia kaarabonia khaꞌina,
vaꞌora honariaꞌaha adani sasidotxi vavakaꞌdaꞌdiva:
—Galiléia kaaraboni kaijaꞌarini mani hada Jesus.
Galiléia kaaraboni kakaꞌdaꞌdini ada Iroji.
Iroji kania avisaꞌa hada Jesus mahija ovari avakadiꞌaathidanoarari-ra nasohivini.
8 Oniaroa,
Irojia khai biniꞌaꞌiki ida Pilatos Jesu-ra karonavini kidiania.
Bikamithabakhiaꞌiki ida Jesus varani hina,
mahi ipohikia binokivini binofiki ada Jesus.
Irojia binofiki ida Jesus kidibadani danoki-ra bada niꞌavini binokija kaimoni.
9 Oniaroa,
Irojia binanaꞌdohivini hiꞌihi ida naꞌdohi ipohiki.
Ni-Jesua bigathaniki ida kidinaꞌdohi.
Viso niꞌoamaniꞌaha.
10 Vakadiania vahojaki adani sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama.
Jesu-ra avanaathidanoararibakhiaꞌaha kidibadani jahariki ipohini vakahiꞌbadaraꞌaha.
11 Oniaroa,
Iroji,
kidisorara vihiki khama avigarahaꞌaha ada Jesus,
vakaihiponiriha ada,
oniani ida kaꞌdaꞌdi kamakari jahaki kaidivakia Jesu-ra avanaragarahivini hija.
Avanaragarahivini naothinia,
Iroji vaꞌora honariaꞌaha Jesu-ra vanajoivini Pilatos kania.
12 Hari.
Iroji kania Jesu-ra karonavini viahania ada Pilatos,
ni-Iroji khama vaabono vaakariakakhamaki.
Bikaronavini kamahini vaabono vakanofikhamajahakiꞌaha.
Jesua abinina-ra vahonariahiꞌiki ada Pilatos
13 Hari.
Pilatos kania Jesu-ra avisaꞌianaha adani sasidotxi vavakaꞌdaꞌdiva,
judeus kaijaꞌari vanavaꞌisohiva abono khama.
Vajoroniꞌianaha,
vahoariha khama.
14 Pilatos vaꞌora niꞌaha:
—Hora avakavikhavini hiki hada makhira.
Avakadiꞌaathidanoarari athini hiki ada Jesus,
ijaꞌari vaipohiki-ra vaꞌora narifirafirabakhiavini.
Avaviahania Jesu-ra onanaꞌdohivini hiꞌiki ida kidivarani,
badani hiki.
Ni-nahina jaharikia kabadanina okaragaki.
Kaꞌoa hiriki ida Jesus varani hina hora vara avaniꞌavini hiꞌiki.
15 Irojia vara biniꞌaꞌiki jaboni ada Jesus.
Ni-nahina jahariki-ra karagaki jaboni.
Bikaragaravini mani ida akadiania Jesu-ra najoivini hija.
Kaꞌoa hirini ida Jesu-ra avakaraganahavini athini,
oniani ida Jesu-ra ovahonariahiravini hija abinina.
16 Vaꞌora ohonariaki bana adani kodisorara Jesu-ra vidafiahavini xikotxia,
naothinia ajihina ovaꞌahaki bana ada — vaꞌora niꞌaha ada Pilatos.
17 Hari.
Páscoa ihinika kamahini Pilatoa bivaꞌahaki ada makhira hoarana cadeia kabodinia hojaki ajihina.
Ihinika-ra vanamonahakia vanagathogathoki ada makhira hana hina cadeia okhaonanina vanofiki.
Pilatos hojana hiki ida makhira-ra arakhaonanivini.
18 Hari.
Kamaꞌdaꞌihi ida ijaꞌari vaipohiki vabodiꞌbarahana:
—Hihada vani abinina-ra anofija.
Iarakhaꞌa bana ada Barrabás akadiania,
ajihira kaimoni.
19 Hari.
Cadeia hojaki ada Barrabás.
Barrabás kidipohi khama vakajoniki ada Pilatos vaꞌora vakaꞌdaꞌdivini,
oniani ida Pilatos kasorara vaꞌora vidavini hija.
Pilatos kasorara hoarana-ra vanaabiniꞌaha.
Oniaroa,
sorara vagathiꞌboꞌdaꞌiki ada Barrabás,
cadeia hojaroniꞌaha.
20 Hari.
Pilatoa binofiki ida Jesu-ra arakhavini ajihira kaimoni,
oniania,
vaꞌora vara niꞌaꞌianaha adani ijaꞌari vaipohiki.
21 Vabodiꞌbaraꞌianaha:
—Ivahonariahiꞌa akaꞌitapoamisahanana o Jesus ava akasanakhamakia,
abinira kaimoni — Pilato-ra vaniꞌaha.
22 Oniaroa,
Pilatos vaꞌora nanaꞌdohiꞌianaha:
—Nahina mani ida kidibadani jahariki hija?
Badani jaharikia kabadanirina mani ida nahina jahariki-ra okaragaravini hija,
oniani ida abinina ovahonariahiravini hija.
Vaꞌora ohonariaki bana adani kodisorara Jesu-ra vidafiavini xikotxia,
naothinia ajihina ovaꞌahaki bana ada — vaꞌora niꞌaha ada Pilatos.
23 Bodiꞌbarahi kaꞌoa vahojaꞌaha:
—Ivahonariahivini ava akasanakhamakia akaꞌitapoamisahanaꞌina.
Ni-Pilatoa bikaabokajanaki ida vakadibodiꞌbarai.
Vaꞌora noꞌavini hiki ida vanofiki.
24 Oniaroa,
Pilatoa bivahonariahiha ada Jesus abinina.
Nimania ida vakanikhariabakhiaki.
25 Hari.
Pilatoa bivahonariahiꞌaha ada Barrabás arakhana,
aihotara kaimoni.
Ovari-ra cadeia nahojana hiki sorara-ra dafiavini,
kaabiniki ada jaboni.
Pilatoa biarakhaꞌaha ada Jesus ava akasanakhamakia avakaꞌitapoamisahanakia abinira kaimoni.
Ava akasanakhamakia avakaꞌitapoamisahanaꞌiki ada Jesus
26 Hari.
Oniaroa,
Jesu-ra ai vavanihaꞌaha adani Pilatos kasorara.
Avikhana kabaꞌi,
vakaragarariꞌaha ada Simão.
Cirene sidaji kaijaꞌarini ada.
Amasia khana vanokiꞌaha,
vagathiꞌaha,
vaniꞌaha:
—Ivani,
Jesu-ra kakaibaꞌahi hihida ava akasanakhamaki — sorara vaniꞌaha ada Simão.
Oniaroa,
Jesus naothia ava akasanakhamaki-ra avikasiagaki ada Simão.
27 Hari.
Ijaꞌari vaipohiki jaboni avikasiagaki.
Vahararana vahojaki adani gamo Jesu-ra vakaasaravini vaabarariariaki.
28 Jesus vada vaꞌora niꞌaribaniꞌaha,
vaꞌora niꞌaꞌaha:
—Aꞌonivani gamo Jerusalém sidaji kaijaꞌarini aꞌoni.
Hariꞌa hora vakaasarajana.
Avaabononi vakaasara bana,
avakadisai-ra vaꞌora vakaasara jaboni bana.
29 Khaki bana ida mahi jahariki ijaꞌaria vaniꞌaki:
“Jahaki ida gamo vaisariki vakadimoni hini.
Mahi jaharini oadani
ni-vakamithaki ida isai
ꞌbanani,
ni-isai-ra vakanajohohaki
jaboni bana.”
30 Kaikahiki bana ida mahi ijaꞌaria vaniꞌaki:
“Anofiki ida arabo namahiki aadafanahani anamana ariabinija kaimoni.”
Vaniꞌaki bana jaboni ida arabo namahiki:
“Nami haria kaꞌdamaꞌa
mahija ariabinivini.”
31 Nimania hida hora vanaimaꞌbanavini,
ava amaki fori ohina kabaꞌi.
Niha vaniꞌaꞌaki koda ida aꞌonira vanaimaꞌbanavini arafiani ava araꞌokhoki fori avihiki aꞌoni.
32 Hari.
Sorara vaꞌora vavikhaha adani jaboni makhira viꞌbamiki Jahari kabadani arafiakia vakabadaniki,
vaꞌora avakaꞌitapoamisahanara kaimoni.
33 Oniaroa,
avavikhaꞌaha Gólgota ibavi onikia avavakhanoꞌaha,
Jesu-ra avakaꞌitapoamisahanaꞌaha,
varagaamananiꞌihi ida ava akasanakhamaki nami khorahaki bodinia.
Gólgota ibavi oniki pamoari athini kaꞌdaꞌdi kajaroni kaibavini ida.
Ava akasanakhamakia vaꞌora avakaꞌitapoamisahanaꞌaha adani viꞌbamiki jaboni.
Vanaibaviꞌaha ada hoarana Jesus pitana aniaja,
vanaibaviꞌaha ada hoariha Jesus pitana kajasonija.
34 Oniaroa,
Jesua biniꞌaha:
—Kodiabiꞌi,
inaꞌbira hida bana vakadibadani jahariki kodiania mahija vaꞌora iakariakavini.
Ni-avigaki ida bada vaniꞌaki.
Oniaroa,
sorara vania varavinaꞌihi ida Jesus kamakari.
Vakosonakhamaki ida jaꞌdi pitani jiriki,
avigaja kaimoni hida kidimakari ravinaꞌini.
35 Hari.
Ijaꞌari vaipohiki Jesu-ra vada vaniꞌaꞌaha.
Judeus kaijaꞌari vanavaꞌisohiva abono avigarahaꞌaha ada Jesus.
Vaniꞌabakhiaha:
—Jesus vaꞌora akavaꞌijoaha adani vahoariha.
Cristo hina-ra kahiha.
Deua binagathogathovini-ra kahiha.
Abono-ra akavaꞌijoava,
ava akasanakhamakia abono-ra aniꞌava — vaniꞌaha.
36 Sorara jaboni avigarahaꞌaha ada Jesus.
Vanamaakariꞌaha,
avarakasihi ida vinho kaidivariki viaha.
37 Vaniꞌaha:
—Jesus,
judeus kaijaꞌari vakadikaꞌdaꞌdi i;
iabono akavaꞌijoa bana.
38 Hari.
Jesus kaꞌdaꞌdi kanamania kahojaꞌiki ida tábua kajiriki.
Tábua kajirini athini:
“Judeus kaijaꞌari vakadikaꞌdaꞌdi hada.”
39 Hoarana Jahari kabadani arafiakia kabadaniki ava akasanakhamakia hojaki varani jaharikia Jesu-ra kanavaranihaꞌaha jaboni:
—Cristo ihiꞌbadarani-ra ikahimanija?
Iabono akavaꞌijoaꞌa bana.
Haria akavaꞌijoa jaboni.
40 Jahari kabadani arafiakia kabadaniki hoariha bikaabaniꞌaha ada ꞌbamina:
—Deu-ra ifiniria?
Akadibadani abosini ida ariabinihahavina-ra vavahonariahivini.
41 Asohiki ida haria vanaimaꞌbanavini.
Hojai jaharikia akabadanibakhiana abosini ida aimana ꞌbanani.
Ovaria ni-bada biniꞌaꞌiki ida badani asohiriki.
42 Oniaroa,
biniꞌaha ada Jesus:
—Jesus,
kaꞌdaꞌdi ihini ijoini kamahini,
hora kavaꞌihoki bana mahija hora ivaꞌadivini.
43 Jesua bigathanihi ida athi:
—Kaꞌoa oamani hida kodivarani.
Hidakabaꞌi Deus kania namajaja ihojaki bana i kodiania.
Abiniꞌiki ada Jesus
44 Hari.
Safini sohirarina amaakarina vani,
kamaꞌdaꞌihi ida safini vagajanarina.
Bakibakiꞌiki ida arabo hahavi.
Safini ajoraꞌina avagani kamaꞌdaꞌianahi.
45 Oniaroa,
ꞌbiraꞌihi ida makari katokihi judeus kaijaꞌari Deu-ra khai vaniꞌavini kagorani kaꞌoahafianihiki.
Khiorarini akapitakhamaꞌihi.
46 Oniaroa,
bodiꞌbaraꞌaha ada Jesus:
—Kodiabiꞌi,
isaꞌani kabodinia oarakhaki bana hida omaꞌonahana.
Bodiꞌbarana naothinia abiniꞌaha ada Jesus.
47 Hari.
Roma sidaji kakaꞌdaꞌdini kasorarani maakarina hojakia binokiꞌihi ida namithaꞌiki,
Deu-ra khai niꞌaꞌaha,
biniꞌaha:
—Hojai jahaki kaꞌoa kahojaiki hada makhira.
48 Nokiva abono vahoariha ava akasanakhamaki kania vajoronikia vanokiꞌihi ida namithaꞌiki,
vanokiꞌaha ada Jesus abinina.
Vagorana vajoiꞌaha vajaforia.
Vavaꞌi mokara nini mani ida vaꞌora nabarariariaja,
vaniꞌaha:
—O Jesus maha,
o Jesus maha — vamakhoꞌini-ra vakapatapatahaꞌoadahavini vavaꞌi mokara nini.
49 Oniaroa,
Jesus kavaꞌahi hahavi napaja paꞌitxi vahojaki vada vakhanina.
Gamoa jaboni abinina vanokiꞌaha.
Galiléia kaarabonia Jesus aadahaonina kari,
gamoa vavaipohihaki ada.
Vakaꞌdamaꞌiki ida Jesus abaꞌona
50-51 Hari.
Ava akasanakhamaki maakarini kania hojaki ada José de Arimatéia jaboni.
Judéia kaarabonia hojaki ida sidaji Arimatéia oniki.
Jahana vani vakahiha ada José.
Asohiki ida kidihojai.
Binokhaki ida mahi Deus ijaꞌari hahavi-ra vaꞌora vakaꞌdaꞌdivini.
Jesu-ra kajariꞌdariki ada.
Vahoariha vaipohikia abinina vanofiha ada Jesus,
Joséa ni-abinina binofipaꞌitxiki.
52 Hari.
Pilatos kania okhaꞌaha,
bikanikhariaꞌihi ida Jesus abaꞌona,
bikaꞌdamahaja kaimoni.
53 Oniaroa,
ava akasanakhamaki kania okhaꞌianaha,
bianiꞌihi ida Jesus abaꞌona,
bikarafoaꞌihi makari jahakia.
Kaꞌdamahi ibavinia biavikhaꞌihi.
Jaꞌdi hodijamaꞌoki bodinia biobaihaꞌihi ida Jesus abaꞌona.
Khorahajaꞌdiniki ida jaꞌdi hodijamaꞌoki.
54 Hari.
Safini ajorana vakadiꞌakoiri kamaꞌdani viahania vakaꞌdamaꞌaha ada Jesus.
55 Avikhamaniha adani jaboni gamo Galiléia kaarabonia,
abaꞌoia biaviꞌoiki ibavini-ra vanokiꞌaha.
Vanokiꞌihi ida Jesus abaꞌona niha vaniꞌaꞌavini biobaivini.
56 Naothinia vajoiꞌaha gora vavahojaki kania.
Vanakabodiꞌihi ida basina fori hiki misaia,
Jesus abaꞌona-ra vakavamisaihavini kaimoni.
Misai-ra vanakabodivini naothinia avakoiriꞌaha adani gamo.
Deus kavaꞌisohihi jiriki ida vaꞌora honariaja avakoirina kamahini.
Lucas 23:32-56