Vanofiki ida Jesu-ra vanaabinivini
22
Hari.
Oniaroa,
amaakarihi ida ihinika Páscoa oniki kamahini.
Ihinika-ra vanamonahavini oadani,
pão kathoramananiriki-ra vakahaha.
2 Oniaroa,
sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama,
vanofiki ida Jesus abinina.
Ijaꞌari vaipohiki Jesu-ra vavajahavini mani ida vaꞌora vifinivini hija.
Vaabono vara vakaniꞌakhamaꞌaha:
—Ijaꞌari Jesu-ra vavajahakia vanokiravini kabaꞌi,
agathihava ada Jesus anaabinira kaimoni.
Niha aniꞌaꞌavini agathiki koda ada?
— vaabono vakaniꞌakhamaꞌaha.
Lucas 22:1-71
Judas Iscariotes varani hina hida
3 Hari.
12 vihiki vaipohina adani Jesus ipohina.
Hoarana Judas Iscariotes oniki.
Jaharia biaviꞌonaniꞌaha ada Judas.
4 Oniaroa,
sasidotxi vavakaꞌdaꞌdiva vakadiania okhaꞌaha.
Vahojaki vakadiania adani Deu-ra khai vaniꞌavini kagorani avakadavaꞌava abono vakadikaꞌdaꞌdi.
Vakadiania akhanoꞌaha ada Judas.
Vaꞌora niꞌaha;
—Jesu-ra oarakhavini-ra avanofihi;
oarakhaha avakadiania.
5 Oniaroa,
Judas kavarani-ra mitha vaniꞌaha,
khai vakhaniꞌaha,
vaniꞌaha:
—Jiniroa ira anoꞌaki bana hari,
Jesu-ra iarakhavini-ra anaabosivini — vaniꞌaha.
6 Juda bivajahamanihi ida vakadivarani.
Ajihiꞌaha,
abono-ra niꞌaha:
—Niha oniꞌaꞌaki koda hada Jesus oarakhavini vakadiania.
Ni-onofiki ida ijaꞌari vaipohiki Jesu-ra oarakhavini-ra vanokivini.
Jesua bihonariaki ida ihinika koꞌbaini amonahani
7 Hari.
Ihinika kamaꞌdani kamahini vani ovilia vadorohana vaipohiki-ra vanaabiniꞌaha adani judeus kaijaꞌari,
Páscoa kaihinikani koꞌbaini kaimoni.
Vakahaki jaboni ida pão kathoramananiriki,
ovilia imana hiki,
avakavaꞌiꞌbiriniria kaimoni ida mahi ꞌboꞌdakari Deus vakadiꞌarahoda avikhananavaki-ra vaꞌora vaꞌadiꞌavini.
8 Oniaroa,
ihinika kamaꞌdani kamahini,
Jesus vaꞌora honariaha adani Pedro,
João vihiki:
—Avikhananava bana mahija Páscoa ihinika koꞌbaini-ra avanamonahavini akadimoni.
9 Oniaroa,
Jesu-ra vananaꞌdohiꞌaha:
—Ida hanaja vania ihinika koꞌbaini-ra anamonahavini ibavini kaimoni?
10 Jesus vaꞌora niꞌaha:
—Mitha vaniꞌa;
sidaji kaathania avarikhajakosihi;
avanokiki bana ada makhira paha bavini-ra kaibaꞌiki.
Avikha bana kidiania.
Gora bodinia okhajakosiha,
avikhajakosi jaboni bana.
11 Gora kakaꞌdaꞌdini-ra vaniꞌa bana:
“Jesus vani haria honariavini hida ira ananaꞌdohivini hija:
Ida hanajaja vania hojahi Páscoa kaihinikani koꞌbaini-ra anamonahavini ibavini kaimoni?”
12 Aꞌonira bana nanokiahivini hiki ida bana ibavi,
gora kaꞌobani kakanamajakhamaki.
Nahinaro avanofiki hojaꞌiki afohahavi.
Hiꞌoni ibavia ꞌbai-ra vanamonahaꞌa akadimoni — Jesus vaꞌora niꞌaha.
13 Hari.
Sidajia avikhaꞌaha,
vakaragaꞌihi ida ibavi Jesus vaꞌora navaꞌisohijoravini hiꞌiki.
Oniaroa,
vakoꞌbaihaꞌaha.
Viꞌbaijabanaki adani Jesus
14 Hari.
Mithani vaivaini vani vakaikahiꞌaha adani Jesus,
athi avavaadahaoniva abono khama,
Páscoa ihinika koꞌbaini ibavinia.
Mesa kaiꞌoarinia dosi vakhaniriahaꞌaha.
15 Jesus vaꞌora niꞌaha:
—Onofiꞌoamanija ida Páscoa koꞌbaini-ra ohavini avakadiania,
oimana ꞌbanani kamaꞌdani viahania.
16 Kaꞌoa hiki ida varani aꞌonira onavaꞌisohijoravini hiki.
Deus ijaꞌari hahavi-ra vakaꞌdaꞌdiravini oadani,
ni-ohaꞌianaki ida Páscoa koꞌbaini.
17 Oniaroa,
Jesua binabiiniꞌihi ida vinho kacoponi,
Deu-ra niꞌaꞌaha:
—Deus,
ivani ijahaki i,
vinho haria inoꞌaꞌiki i.
Deu-ra vara niꞌavini naothinia vaꞌora niꞌaha adani ipohina:
—Vagathaniꞌa hida vinho mahija aviꞌavihahaviꞌavini.
18 Kaꞌoa hiki hida varani aꞌonira onavaꞌisohijoravini hiꞌiki.
Deus ijaꞌari hahavi-ra vakaꞌdaꞌdiravini oadani,
ni-oꞌavijanaki kaho hida vinho.
19 Hari.
Vara nina naothinia,
Jesua bikanabiiniꞌihi ida pão,
Deu-ra niꞌaꞌaha:
—Deus,
ivani ijahaki i.
Pãoa haria inoꞌaꞌiki i.
Deu-ra vara niꞌavini naothinia,
bikanapitahatahahi vaꞌora noꞌavini kihiꞌihi,
vaꞌora niꞌaha:
—Oimana hida pão.
Avakadimoni ida oimana ꞌbanani oabono ovaꞌahavini.
Vakaha hida pão.
Vakavaꞌihoki bana ida oimana ꞌbanani karaho avakadimoni.
20 Hari.
Viꞌbaina naothinia Jesus vinho kacoponia vaꞌora noꞌaꞌianaha,
vaꞌora niꞌaha:
—Hihida vinho oamana hida.
Deua bivavaꞌisohihiꞌiki hida kidivaꞌiponahi aꞌboꞌdaki jaꞌdini kidijaꞌari vakadimoni hini.
Deus kavaꞌisohihi jaꞌdini karajomini hida oamana ahovariki avakadimoni.
21 Vakavaꞌibodivaraniꞌa bana.
Mesa kaiꞌoarinia dosi vakhaniriahaꞌaha,
hojaki ada kodivaꞌahi hina-ra kahiꞌbadaraki,
hora arakhaki bana vahoariha vakadiania.
22 Hovani ijaꞌari hahavi vakadiꞌaajo ho.
Oabiniki bana ho.
Nimania ida Deua binofiki kodimoni hini.
Deua binapohimajaki bana ada hora arakhaki — vaꞌora niꞌaha ada Jesus.
23 Oniaroa,
Jesus athi avavaadahaoniva abono vaabono vakananaꞌdohikhamavini hiꞌaha ada hana hina Jesu-ra arakhaki kaimoni.
Kaꞌdaꞌdi varani hina hida
24 Hari.
Jesus ipohina vaabono vara vakaniꞌakhamadanokiꞌaha:
—Hana hina ada akadiania hojana jahara akadikaꞌdaꞌdi kaimoni hina?
Vaabono vakananaꞌdohikhamavini,
kaꞌdaꞌdi vihina-ra vanofinanaꞌaha.
25 Oniaroa,
Jesus vaꞌora niꞌaha:
—Arabo vakaꞌdaꞌdiva vasaꞌa kabodinia vahojaki adani vakadiarabo kaijaꞌarini vaꞌora vahonariaki kaimoni.
Ijaꞌari vakadivaꞌahia vaꞌora vanaoniki adani ijaꞌari vakadikaꞌdaꞌdi.
26 Ni-onofiki ida vakadihojaia avakahojaini.
Onofiki ida kaꞌdaꞌdi hina-ra nofiki vahoariha-ra kakodiavini.
Onofiki ida ijaꞌari-ra honariaki honai abono fori hina hojana.
27 Hari.
Mesa kania hojaki ada makhira ꞌbaiki.
Hoariha ꞌbaia bikavikhaki ada.
Hana hina ada hoariha-ra vakaꞌdaꞌdira?
Avarigaki ida mesa kania vithiki,
ovani ada kaꞌdaꞌdi hira.
Avakadikaꞌdaꞌdi ohina kabaꞌi,
avahararania honai abono fori ohina ohojaki ho.
28-29 Vahoariha hora vanajahariharivini oadani,
kodiania avahojahaꞌoadahahi,
ni-hora avakavaꞌipahiniki,
oniani ida kaꞌdaꞌdi avihini-ra ovahonariahivini hija.
Kodiabiꞌi kaꞌdaꞌdi ohina-ra honariavini vani fori hiki ida aꞌonira ohonariavini kaꞌdaꞌdi avihini.
30 Kodijaꞌari hahavi-ra vaꞌora ovakaꞌdaꞌdivini kamahini,
aꞌonivani kodimesa kaiꞌoarinia avavithiki bana aꞌoni,
aviꞌbaiki bana aꞌoni kodiania.
12 vihiki vaipohina adani Israel kaisai.
Ijaꞌari-ra onasohivini kamahini,
aꞌonivani avavithiki bana aꞌoni kaꞌdaꞌdi kavithi kania,
vaꞌora avanasohira kaimoni adani Israel kaijaꞌari hahavi.
Kaꞌdaꞌdi avihini mani ida vakadihojai hahavi avarigavini hija,
hana hini asohiki asohiriki,
avahonariaja kaimoni ida vakadihojai abosini.
Jesua binavaꞌisohijoraki ada Pedro
31 Hari.
Jesua biniꞌaha ada Simão Pedro:
—Simão,
Simão,
mitha nijahakiꞌa bana.
Jaharia binofiki ida aꞌonira kaijoꞌavini.
Kodiabiꞌia bivaꞌahaki bana ada.
Makhira biakaꞌdiririhi ida trigo ꞌbaꞌdani aniaja kaimoni ida baꞌbaꞌda asafini.
Onivani fori hira bana ada Jahari aꞌonira kaijoꞌavini.
32 Simão,
Deu-ra vara oniꞌaꞌiki ho ira kakodiara kaimoni hora ivakaijokahaꞌoadahaja kaimoni.
Kodiania ijoiribanini kamahini,
vara vaꞌora niꞌa bana adani iigamini mahija khai hora vaniꞌaꞌianavini.
33 Oniaroa,
Pedroa bigathanihi ida Jesus athi:
—Ira vagathiki vahabini bana adani vahoariha,
cadeia ira avibaiki vahabini bana adani,
ira vanaabiniki vahabini bana adani jaboni.
Onofiki ida kadania ohojana cadeia,
onofiki ida oabinina kadania jaboni.
34 Jesua biniꞌaha:
—Ira onavaꞌisohijoravini hiki hida joma arakava ahiana viahania,
ahoarabakosikia hora iogaravini-ra ikahiki bana i.
Jesus vaꞌora navaꞌisohiki adani ipohina
35 Hari.
Oniaroa,
Jesus vaꞌora nanaꞌdohiꞌaha:
—Vahoariha vakadiania aꞌonira okaronaꞌavini kari varani ohina-ra avananamithaꞌiki aꞌoni,
ni-ovaꞌahaꞌiki ida jiniro bavini,
sandália kihiki-ra avarakavikhavini.
Nahina mani ida avakainamoja?
—Iniani.
Ni-nahina-ra akainamorihi — vagathaniꞌihi ida Jesus kanaꞌdohi.
36 — Aꞌonira onavaꞌisohiꞌianaki ho.
Jiniro bavini,
ꞌbai bavini hiki-ra avavahojahi;
avavikhaꞌa bana.
Tarasara fori hiki-ra avavahojarihi avakadisaꞌai kaimoni,
pavakari vanihaꞌa bana ida avakadimakari odoki mahija tarasara fori hiki-ra avakapavakarihavini.
37 Hari.
Deus athi kapapirania hojaki ida varani ohina:
“Ijaꞌaria vanajaharihariki ada Jahari kabadania kabadaniki.
Onivani fori hira ada ovari jahariharina.”
Namithaki bana kodiania hida Deus athia biniꞌaki.
Deus athi kapapirani hora vara vaniꞌajoravini mani ida Deua binanamithavini hija bana.
38 Oniaroa,
Jesus ipohina vaniꞌaha:
—Hidavani hihida tarasara fori hiki ꞌbamiki.
—Arajomaki ida — vaꞌora niꞌaha.
Monte das Oliveiras avikhaki adani Jesus
39 Hari.
Oniaroa vaꞌajihiꞌaha adani Jesus kidipohi khama.
Monte das Oliveiras avikhaꞌaha.
Vakadihojai hiki ida monte das Oliveiras avikhana.
40 Ibavi bianikhaki kania avakhanoꞌaha,
Jesus vaꞌora niꞌaha:
—Deu-ra vara vaniꞌa bana mahija Jahari athi aꞌonira kaborovini-ra avakamitharavini.
41 Hari.
Ajihiꞌaha,
okhamipaꞌitxiꞌaha,
kajoꞌatharariꞌaha,
Deu-ra vara niꞌaꞌaha.
42 Biniꞌaha:
—Kodiabiꞌi,
hora vanaimaꞌbanavini inofirihi;
hora ivaꞌadivini-ra ikaabokahi.
Hora vanaimaꞌbanavini inofihi;
onofihi jaboni.
Nahina-ra inofihi;
onofiki jaboni — Deu-ra niꞌaha ada Jesus.
43 Oniaroa,
khaꞌaha ada Deus ibavi kaijaꞌarini Jesus vaꞌi-ra vajahaki kaimoni,
bikaabokaja kaimoni ida imana ꞌbanani arafiaki.
44 Jesua biakavaꞌisokonikarahoki ida namithaki kaimoni,
oniani ida Deu-ra vara niꞌadanokiꞌianavini hija.
Anikhoakarahoꞌaha ada Jesus.
Arabo namania kabo kaborariꞌihi ida Jesus amana anikhoana hiki.
45 Hari.
Deu-ra vara niꞌavini naothinia,
gaamananiꞌaha,
kidipohi vakadiania joimiꞌaha,
vavadina vani vaꞌora karagaꞌaha.
Vavaꞌi mokara nikarahoni vaꞌora navadiꞌaha.
46 Vaꞌora niꞌaha:
—Niha avakhanimanija avavadiki?
Vigaaꞌa.
Deu-ra vara vaniꞌa mahija Jahari athi aꞌonira kaborovini-ra avakamitharavini.
Vagathiki ada Jesus
47 Oniaroa,
vara nina kabaꞌi vakaikahiꞌaha adani ijaꞌari vaipohiki.
Vahararana hojaha ada Judas Iscariotes.
Jesus ipohina ada.
Judas vaꞌora bananiha adani ijaꞌari vaipohiki.
Jesus kania maakariꞌaha,
biramosira kaimoni.
48 Oniaroa,
Jesua biniꞌaha:
—Judas,
hora ikavarajomivini mani ida hora iramosivini,
avigaja kaimoni ida hana hina-ra vagathivini?
49 Hari.
Jesus ipohina vahoariha vaꞌora vanokiꞌaha adani ijaꞌari,
avigaki ida namithaki kaimoni.
Jesu-ra vaniꞌaha:
50 —Jesus,
inofimanija koda ida akadisaꞌai-ra adionivini,
vaꞌora adara kaimoni?
Oniaroa,
Jesus ipohina hoarana bidioniꞌiki ida tarasara fori hiki,
binobaꞌaha ada sasidotxi vakaꞌdaꞌdiva kahonai abono,
biavaꞌboarabakosiꞌihi ida morobo aniaja.
51 Jesus vaꞌora kaabaniꞌaha:
—Hariꞌa bana vaꞌora vida!
Oniaroa,
bikadasaꞌihi ida makhira morobo,
aihotaꞌihi.
52 Hari.
Ijaꞌari vaipohiki vahararana vahojaki adani sasidotxi vavakaꞌdaꞌdiva,
Deu-ra khai vaniꞌavini kagorani avakadavaꞌava abono vakadikaꞌdaꞌdi,
judeus kaijaꞌari vanavaꞌisohiva abono vihiki.
Jesus vaꞌora niꞌaha:
—Ijaꞌaria vavikhaki ida ava,
tarasara hiki vagathira kaimoni ada kaabiniki.
Onivani fori hini avavikhaja ida avakadisaꞌai hora avagathija kaimoni.
Okaabiniki hora avavanihamania koda?
53 Mahi hahavi aꞌonira okaꞌojomoꞌihi Deu-ra khai aniꞌavini kagorani kavasiribanini bodinia,
ni-hora avagathiꞌiki.
Hidakabaꞌi kaikahini ida mahi hora avakaabokaꞌavini kamahini.
Hora kaabokaꞌiki jaboni ada Jahari.
Pedro Jesu-ra ogaravini-ra kahiki
54 Hari.
Oniaroa,
vagathiꞌaha ada Jesus,
avisaꞌaha sasidotxi vakadikaꞌdaꞌdi gorana.
Napaja kasiagaꞌaha ada Pedro.
55 Gora kavasiribanini kaathania oꞌoiꞌaha.
Asia gora baninija hojaki ada.
Vahoariha avakanahaꞌdiꞌihi ida siho,
vakadiragi ibavini kaimoni.
Okhamiꞌaha ada Pedro vahoariha vahararana,
vithiꞌaha siho kaꞌdihania.
56 Oniaroa,
khaꞌihi ida badani abono.
Binokiꞌaha ada Pedro abono-ra naragivini siho kaꞌdihania.
Vada biniꞌaha,
nihi:
—Hihada makhira Jesus kania adahaki hada jaboni.
57 Pedro biniꞌahi ida gamo:
—Iniani,
ni-oogaki ada ovari.
58 Oniaroa,
mitihini makhira maina binokiꞌaha ada Pedro,
biniꞌaha:
—Ivani jaboni Jesus ipohina i.
Pedroa bigathaniꞌihi hida makhira athi:
—Iniani,
ovaipohihariha ada.
59 Oniaroa,
mitihitihini hoariha biniꞌadanokiꞌianaha:
—Kaꞌoa oamani ida Jesus ipohina ihini.
Galiléia kaaraboni kaijaꞌarini jaboni i.
60 — Iniani,
oogariha ada vara hora iniꞌavini hiki — niha ada Pedro.
Vara nina kabaꞌi,
ahiaꞌaha ada arakava.
61 Hari.
Gora bodinia roiribaniꞌaha ada Jesus,
vada biniꞌaonaniꞌaha ada Pedro.
Oniaroa,
Pedroa bianokijakosiꞌaha ada Jesus,
bikavaꞌihokiꞌihi ida Jesus athi:
—Hihida joma arakava ahiana viahania,
ivani inihaki i:
“Oogariha o Jesus.”
Ahoarabakosikia iniꞌiki i.
62 Jesus athi-ra kavaꞌihokiha,
ajihiꞌaha ada Pedro,
asaraꞌahapikiꞌaha.
Sorara vidafiaki ada Jesus
63 Oniaroa,
Jesu-ra avakadavaꞌaki Jesu-ra avigarahaki,
vakajoiriꞌaha jaboni.
64 Nokho makaria vakarahobavini vakajoiriꞌaha,
Jesu-ra vakahomaravini vananaꞌdohiꞌaha:
Judeus kaijaꞌari vanasohiva abono vavakaꞌdaꞌdiva vakadiania hojaha ada Jesus
66 Hari.
Oniaroa,
vakajoronikosoakajomaꞌaha adani judeus kaijaꞌari vanavaꞌisohiva abono,
sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono vihiki khama.
Judeus kaijaꞌari vanasohiva abono vavakaꞌdaꞌdiva vajoroniki.
Vajoronina naothinia vavahonariahivini ada Jesus avakadavaꞌava vavikhavini.
67 Vakadiania Jesu-ra vavikhaꞌaha,
sasidotxi vavakaꞌdaꞌdiva vananaꞌdohiꞌaha:
—Jesus,
haria nanamithaꞌa.
Ivani Cristo i?
Deus ira nagathogathoꞌiki i?
Jesus vaꞌora niꞌaha:
—Cristo ohina-ra okahihi;
hora avakajariꞌdahi.
68 Aꞌonira onanaꞌdohiꞌimidiahi;
ni-kodinaꞌdohi-ra avagathaniki.
69 Hovani ijaꞌari hahavi vakadiꞌaajo ho.
Deus danoki pitana aniaja ovithiki bana ho.
Kaꞌdaꞌdi ohina.
70 Oniaroa,
vananaꞌdohihahaviꞌaha:
—Deus kaisai mani i?
—Jahariki ida Jesus kavarani.
Deus kaisai hina-ra kahiꞌbadaraki ada.
Nahina kaimoni vaꞌora anihajanariha adani Jesus vara vaniꞌava abono.
Akamithaꞌiki hida Jesus Deus kaisai hina-ra kahivini.