Kaariha varani hini hida
21
Hari.
Deu-ra khai vaniꞌavini kagorani kavasiribanini bodinia hojaha ada Jesus.
Vada vaꞌora niꞌaha adani ijaꞌari,
niha vaniꞌaꞌavini ida vakadijiniro-ra avibaivini bavinia.
Deus kaimoni ida jiniro avibaiki.
Oniaroa,
Jesus vaꞌora nokiꞌaha adani ijaꞌari vakajiniroꞌahapikiki jiniro-ra avibaivini bavinia.
2 Binokiki jaboni ida kaariha kajiniroriki.
Biobaiꞌihi ida jiniro ꞌbaꞌdani ꞌbamiki kaidivariki.
Kaidivariꞌoamanija ida jiniro ꞌbaꞌdani ꞌbamiki.
Lucas 21:1-38
—Kaꞌoa hida oathi.
Jiniro karaho oamani oni kaariha biobaija.
Jiniro paꞌitxi mani ida vahoariha avibaija.
4 Avibaivini naothinia,
vakajiniroꞌahapikiki asia vavahojaki hida jiniro karaho,
vakadinahina abosini kaimoni.
Kaariha biobaihi ida jiniro ꞌbamiki bivahojaki.
Ni-nahina-ra vahojajanaki ida kaariha kidinahina abosini kaimoni.
Jiniro kaidivaki oamani ida Deu-ra noꞌavini hija.
Pohimajaki bana ida Deu-ra khai vaniꞌavini kagorani
5 Hari.
Oniaroa,
ijaꞌari vaipohirikia vara vavaniꞌavini ida Deu-ra khai vaniꞌavini kagorani.
Vakhaniha:
—Jahaki ida nokiani Deu-ra khai aniꞌavini kagorani.
Naꞌbahaꞌoamanija ida jaꞌdi gora katokinia hojaki.
Kaidivaꞌoamanija ida nahina ijaꞌari Deu-ra vakanavaꞌigavini.
Oniania,
Jesus vaꞌora niꞌaha:
6 — Kaikahiki ida mahi,
ihimiki kaimoni ida hahavi avanokiki.
Deu-ra vanofiriki vania bana vanihimakaꞌoaja ida Deu-ra khai aniꞌavini kagorani.
Jaꞌdi naꞌbahaki-ra vanathararavini kamahini,
ni-hojajanaki ida jaꞌdi hoarani,
jaꞌdi hoariha namania — niha ada Jesus.
Ijaꞌari pohimajaki varani hini hida
7 Hari.
Jesu-ra vananaꞌdohiꞌaha:
—Jesus,
mahi nihaforija vani vanihimaki ida Deu-ra khai aniꞌavini kagorani?
Nihanikia bana aogaja ida thararani kamahini amaakarini?
8 Oniaroa,
Jesua bigathanihi ida vaathi:
—Avaabononi avakavaꞌigairi bana!
Vahoariha aꞌonira vakorijanahavini-ra bana vanofiki aꞌoni.
Vakajariꞌda bana ida vaathi.
Vikhaki bana adani korijanahi abono,
vakhaniki bana afohanana adani:
“Hovani Cristo ho,
Deua hora karonaki
avakadikaꞌdaꞌdi ohina
kaimoni.”
Vakhaninanaki bana jaboni adani:
“Kaikahiꞌiki ida mahi Deua bivavaꞌisohihijoraꞌiki.”
Hariꞌa vaꞌora vavaipohiha bana adani nikia vakavaraniꞌbadaraki.
9 Avakamithabakhiaki bana ida varani vihina,
arabo hoariha kaijaꞌarini ijaꞌari vahoariha-ra vaꞌora vidavini vakadiarabo avanahoroaja kaimoni.
Arabo hoariha kaijaꞌarini vaabono vakodakhamaki bana varani vihina-ra avakamithahi;
hariꞌa vaofini!
Namithaꞌimidiaki bana ida vara aꞌonira oniꞌavini hiki.
Namithaꞌini kabaꞌi,
ni-amaakariki kaho ida ijaꞌari hahavi vakadimahi anokhomini.
10 Hari.
Asia vara niha ada Jesus:
—Arabo kahijava vaꞌora vidaki bana adani arabo hoariha kahijava.
Arabo kakaꞌdaꞌdini kidisorara khama vaꞌora vidaki adani arabo hoariha kakaꞌdaꞌdini kaijaꞌarini.
11 Oniaroa,
ibavi ipohikia hoꞌdohoꞌdobakhiaki ida arabo afobakhia.
Mahi ipohikia ijaꞌaria vakainamoki bana ida vakadiꞌbai.
Kavamoni karaho ipohiki ijaꞌari vaipohikia vagathiki bana.
Jahariꞌoamanija bana ida ijaꞌari pohimajaki.
Nokiabakhiaki bana ida Deus karajomi ipohiki nama jararinia.
12 Nokiabakhiani viahania hora vavajahariki aꞌonira vanajahariharibakhiaki bana aꞌoni.
Aꞌonira avibaibakhiaki jaboni bana adani cadeia.
Akadijaꞌari Deu-ra vara aniꞌavini kagorania hora vavajahariki aꞌonira avarakhaki aꞌoni bana akadijaꞌari vanavaꞌisohiva abono vasaꞌa kabodinia.
Vakamithaki ida aꞌonira vakanavaranihavini,
oniani ida cadeia aꞌonira avibaivini hija bana.
Oipohina avihini mani ida ijaꞌari kakaꞌdaꞌdini vakadiania vahoariha aꞌonira avisavini hija,
aꞌonira avanaathidanoararivini kaimoni.
13 Arabo kakaꞌdaꞌdini vaviaha avahojani kamahini,
vara vavaniꞌa bana ida omonina jahaki.
14 Avaabononi vakavaꞌibodivaranijora bana:
“Jokoa oakavaꞌisokonirihi ida hora avakaraganahavini kamahini varani vara vaꞌora oniꞌavini hiki kaimoni.”
Avaabononi vaniꞌajora bana.
15 Aꞌonira avanaathidanoararivini kamahini,
aꞌonira onavaꞌisohiki bana ho varani vakadiꞌaathidanoarari avagathanija kaimoni.
Aꞌonira onoꞌaki jaboni bana ho kodiꞌogahaia.
Aꞌonira vavajahariki avaathini-ra vakamithahi;
kaꞌoa hini avigahi.
Avakadivarani viso vaꞌora niꞌaki bana adani.
16 Hari.
Avahoarahananani aꞌonira avarakhaki bana adani avakadiamia,
avakadiabiꞌi,
avaigamini,
avakadijaꞌari vahoariha,
avakadivaꞌahi vihiki vahoariha,
aꞌonira avibaira kaimoni cadeia kabodinia.
Hora vanofiravini mani ida aꞌonira cadeia avibaivini hija.
Avahoarahananani aꞌonira vanaabiniki bana adani.
17 Oipohina avihini mani ida ijaꞌari vaipohiki aꞌonira vavajaharavini hija bana.
18 Aꞌonira vanajahariharivini kabaꞌi,
Deus aꞌonira akadavaꞌaki bana aꞌoni.
Ni-akamadaki bana ida avamaꞌonahani,
Deus ibavia avarikhaki bana aꞌoni.
19 Hariꞌa bana oipohina avihini-ra vakavaꞌipahiniꞌa.
Avakavaꞌipahinirihi;
Deus aꞌonira akavaꞌijoahi.
Mahi jahariki varani hini hida
20 Hari.
Asia vara niꞌaha ada Jesus:
—Jerusalém kavasiribanini banininija vahojaribanaonina kamahini adani sorara vaipohiki,
avarigaki bana ida mahi ipohirikia vanihimavini bana hida sidaji.
21 Sorara vahojaribanaonina-ra avanokivini kamahini avigava adani ijaꞌari Judéia kaarabonia vahojaki arabo namahiki-ra avanikhavini.
Sidaji bodinija vahojaha;
khaonanijorakiva bana.
Vakadisiroi bada vakhanina;
hariꞌa sidajia aviꞌoiva bana.
22 Hari.
Imai ꞌbanani karaho kamahini bana ida aꞌonira onavaꞌisohijoravini hija.
Deus athi kapapirania bivavaꞌisohihijoraki ida mahi ijaꞌari-ra napohimajavini kaimoni.
23 Jaharini arafiaki bana ida ijaꞌari vapohimajana kamahini gamo vakajahavidoki,
gamo vaisapaꞌitxiki vihiki vakadimoni hini.
Khaki bana ida imai ꞌbanani karaho arabo hahavi kaijaꞌarini vakadimoni.
Jahariki Deus vaꞌora arakhaki bana adani ijaꞌari vakadihojai asohiriki abosini kaimoni.
24 Oniaroa,
Jerusalém sidaji ahoroani kamahini ijaꞌari vakadisaꞌaia vaꞌora visakaꞌaha adani Jerusalém sidaji kaijaꞌarini vaipohiki,
vaꞌora vanaabiniꞌaha.
Vahoariha gathai vihiꞌina osahi vihina arabo hoariha ipohikia,
vakadiaraboa vahojajanarara kaimoni.
Deu-ra avigarikia visaariki ida Jerusalém sidaji avakadiania.
Deus vaꞌora vaꞌahavini oadani,
Deu-ra avigarikia vavahojaki hida sidaji.
Jesus joina varani hini hida
25 Hari.
Asia vara niꞌaha ada Jesus:
—Deua bianahoarihaki bana ada safini,
masiko,
boviri hiki vagana rajomi kaimoni nama nokiaki.
Arabo hahavi kaijaꞌarini vavaꞌi soko inikarahoki bana.
Komini kaꞌithoni akarafiani mani ida ijaꞌari-ra vaꞌora naofinija.
26 Arabo hahavi kaijaꞌarinia vakavaꞌibodivaraniki bana ida vaꞌora napohimajaki kaimoni,
oniani ida vaꞌora naimahidakarahoja bana.
Vaimahidakarahona mani ida vaꞌora naraiꞌaja bana.
Deua binahoꞌdohoꞌdoki ida nama vaaniara kaimoni adani kaꞌdaꞌdi danoki nama vahojaki.
27 Oniaroa,
ijaꞌari hahavi hora vanokiki.
Bahi vaforiki hararana ojoirarina.
Hovani ijaꞌari hahavi vakadiꞌaajo ho.
Ijaꞌaria vanokiki bana ida ojahana,
odanona,
ojoirarina kamahini.
28 Hari.
Kamaꞌdani kamahini ida aꞌonira oniꞌavini hiꞌiki,
hariꞌa vajoiribani,
vanokha bana ida ojoina.
Khai vaniꞌa bana ida jorakia aꞌonira oakavaꞌijoavini.
Figira avani karajomihi hida
29 Oniaroa,
Jesua vara bivaniꞌaꞌihi ida rajomi kavaranihi:
—Okavarajomiki ida ojoina kamahini figira avani afani ajaꞌdini fori hini.
Vakavaꞌibodivaraniꞌa bana ida figira avani,
ihiꞌai avani hoariha hiki.
30 Avanokihi ida afani ajaꞌdinani,
avarigahi ida amoroki amaakarini.
31 Avanokiki bana hida aꞌonira okaꞌojomoꞌivini hiki namithaki,
avarigaki ida ojoina kamahini amaakarini.
Onivani fori hija ida ojoina viahani karajomini.
Avanokihi,
avarigaki bana ida Deus ijaꞌari hahavi-ra vaꞌora vakaꞌdaꞌdivini kamahini amaakarini.
32 Vaabinirina oadani adani ijaꞌari rajomi-ra vanokiki,
onanamithahahaviki bana ida aꞌonira oniꞌajoravini hiꞌiki.
33 Ihimiki bana ida arabo hahavi,
nama hiki jaboni.
Namithaki hida oathi aꞌonira oniꞌavini hiki.
Mahi hahavi anokhomiriki hida oathi — vaꞌora niꞌaha ada Jesus.
Ijaꞌari vaꞌini ogairini-ra honariaki ada Jesus
34 Hari.
Jesua biananokhomiꞌihi ida kidivarani,
vaꞌora niꞌaha:
—Avavaꞌini ogairiva bana!
Hariꞌa vakavaꞌibodivaranihaꞌoadaha ida ihinika amonahani,
kavi-ra aviꞌavivini,
avakadinahina-ra avakainamovini jaboni.
Ojoina vaꞌora narapataki bana adani niki-ra vakavaꞌibodivaranihaꞌoadahaki,
oniani ida avavaꞌini ogairini-ra ohonariavini hija.
35-36 Ikoaka fori hiki ida ojoina kamahini.
Abaisana ikoaka-ra nokiravini mani ida anagithina hija.
Ijaꞌari vavaꞌi ogairirini mani ida ojoina vaꞌora narapataja.
Agithiki fori vihiki adani.
Ojoina-ra avarakavaꞌigairihi;
ni-avarapataki.
Ojoina-ra avarakavaꞌigairihi;
Deu-ra avakanikhariabakhiahi,
aꞌonira nadanora kaimoni,
oniani ida aꞌonira napohimajarija,
aꞌonira oakavaꞌijoavini hija bana.
Ojoina kamahini jaboni avaofinirini oviaha avahojaja kaimoni — vaꞌora niꞌaha ada Jesus.
37 Hari.
Oniaroa,
mahi hahavi Jesus vaꞌora kaꞌojomoꞌiki adani ijaꞌari Deu-ra khai vaniꞌavini kagorani kavasiribanini bodinia.
Joma ajihiki ada Jesus sidajia.
Arabo namahiki maakarinia vadiki ada.
Monte das Oliveiras oniki ida arabo namahiki Jesua joma oadani bivahojaki.
38 Vagavagani okhaꞌianaha ada Jesus Deu-ra khai vaniꞌavini kagorania.
Ijaꞌari vaipohiki jaboni avikhaꞌiki,
mitha vaniꞌaja kaimoni ida Jesus kavarani.