Pohimajaki bana ida Deu-ra khai vaniꞌavini kagorani
13
Hari.
Deu-ra khai vaniꞌavini kagorani kavasiribanini bodinia vikhaonaniki adani Jesus,
ipohina khama.
Hoarana biniꞌaha:
—Jesus,
vada iniꞌa oni jaꞌdi naꞌbahaki.
Naꞌbahaꞌoamanija ida jaꞌdi gora katokinia hojaki.
Jahaki ida Deu-ra khai aniꞌavini kagorani.
2 Oniaroa,
Jesua biniꞌaha:
—Inokihi ida gora karaho jahaki.
Aꞌonira onavaꞌisohiki bana ho.
Deu-ra vanofiriki vania bana vanihimakaꞌoaja ida Deu-ra khai aniꞌavini kagorani.
Jaꞌdi naꞌbahaki-ra vanathararavini kamahini ni-hojajanaki ida jaꞌdi hoarani,
jaꞌdi hoariha namania — niha ada Jesus.
Ijaꞌari pohimajani varani hini hida
3 Hari.
Monte das Oliveiras arabo namahikia avigaimoriꞌaha.
Vithiꞌaha ada Jesus.
Vahojakosoana,
Jesu-ra vaniꞌaha adani Pedro,
Tiago,
João,
André vihiki:
4 —Jesus,
mahi nihaforija vani vanihimaki ida Deu-ra khai aniꞌavini kagorani?
Nihanikia bana aogaja ida ijoini kamahini amaakarini?
Nihanikia bana aogaja jaboni ida nama,
arabo hahavi hiki ihimini kamahini amaakarini?
— Jesu-ra vaniꞌaha.
5 Hari.
Jesus vaꞌora kaꞌojomoꞌiꞌaha:
—Avaabononi avakavaꞌigairiꞌa bana.
Vahoariha aꞌonira vakorijanahavini-ra bana vanofiki aꞌoni.
Vakajariꞌda bana ida vaathi.
6 Vikhaki bana adani korijanahi abono,
vakhaniki bana adani afohanana:
“Hovani Cristo ho.
Deus hora karonaꞌiki
avakadikaꞌdaꞌdi ohija kaimoni.”
Vakhaninanaki bana adani afoꞌbadara.
Ijaꞌari vaipohikia vakajariꞌdarihi bana ida vakadikorijanahi.
7 Avakamithaki bana ida ijaꞌari vaabono vakodakhamavini kavaranihi.
Ibavi maakariki,
napaja hikia ijaꞌari vaabono vakodakhamaki bana.
Varani vihina avakamithavini kamahini,
hariꞌa vaofini!
Vaabono vakodakhamaꞌimidiaki adani ijaꞌari,
ni-ihimiꞌiaki kaho ida arabo hahavi kaijaꞌarini vakadimahi.
8 Arabo kahijava vaꞌora vidaki bana adani arabo hoariha kahijava.
Arabo kakaꞌdaꞌdini kidisorara khama vaꞌora vidaki adani arabo hoariha kakaꞌdaꞌdini kaijaꞌarini.
Ibavi ipohikia hoꞌdohoꞌdoki bana ida arabo afobakhia.
Mahi ipohikia ijaꞌaria vakainamoki ida vakadiꞌbai.
Gamo ꞌbanarahani kamaꞌdani vani fori hija ida oniꞌaki.
Ijaꞌari pohimajaki varani hini hida
9 Hari.
Jesus vaꞌora navaꞌisohijoraki adani kidipohi:
—Avaabononi avakavaꞌigairiꞌa bana!
Aꞌonira vavajahariki aꞌonira avarakhaki aꞌoni bana ijaꞌari vanasohiva abono vasaꞌa kabodinia.
Cadeia aꞌonira avibaiki bana adani.
Aꞌonira vanajahariharibakhiaki bana adani.
Judeus kaijaꞌari Deu-ra vara vaniꞌavini kagorania aꞌonira avarakhaki bana adani,
dafi avihiki bana jaboni aꞌoni xikotxia.
Oipohina avihini mani ida aꞌonira avisavini hija bana arabo kakaꞌdaꞌdini vakadiania.
Arabo kakaꞌdaꞌdini vaviaha avahojani kamahini vara vavaniꞌa bana ida omonina jahaki.
10 Ijaꞌari hahavi vakadimahi anokhomini viahania,
arabo hahavi kaijaꞌarinia vakamithaki bana ida omonina jahaki.
11 Aꞌonira vavajaharavini mani ida aꞌonira vagathivini hija bana.
Arabo kakaꞌdaꞌdini vakadiania aꞌonira avarakhavini kamahini,
hariꞌa avakavaꞌisokonijora ida varani vara vaꞌora avaniꞌavini hiki kaimoni.
Vara vaꞌora avaniꞌavini kamahini,
Maꞌonahai Jahaki vani bana aꞌonira navaꞌisohija bana varania vara avavaniꞌaja kaimoni.
Vara vavaniꞌa bana ida kidivaꞌisohihi.
12 Hora vanofiriki vaꞌora vaniꞌaha adani arabo kakaꞌdaꞌdini:
“Jahaki ada oigamina
abinina.
Jesus ipohina hina mani ida
abinina onofivini hija.”
Vakhaniha.
Hora vanofiriki vahoariha vaꞌora vaniꞌaki bana adani arabo kakaꞌdaꞌdini:
“Jahaki ida kodisai
vaabinina.
Jesus ipohina vihina
mani ida vaabinina
vaꞌora onofivini hija.”
Vakhaniha.
Hora vanofiriki vahoariha vaꞌora vaniꞌaki bana adani arabo kakaꞌdaꞌdini:
“Jahaki ida kodiamia,
kodiabiꞌi vihiki vaabinina.
Jesus ipohina vihina
mani ida vaabinina
vaꞌora onofivini hija”.
Vakhaniha.
13 Oipohina avihini mani ida ijaꞌari vaipohiki aꞌonira vavajaharavini hija bana.
Avaabinirini oadani oipohina avihini-ra avakajonirihi;
hora avakavaꞌipahinirihi;
Deus aꞌonira akadavaꞌaki bana aꞌoni,
ni-akamadaki bana ida avamaꞌonahani,
Deus kania avarikhaki bana aꞌoni — vaꞌora niꞌaha ada Jesus.
Mahi jahariki varani hini hida
14 Hari.
Asia vara niꞌaha ada Jesus:
—Avanokiki bana ida nahina jaharikaꞌoaki ijaꞌaria vakaimajahapaꞌitxiriki Deu-ra khai aniꞌavini kagorani bodinia.
Aꞌonivani vada avaniꞌaꞌiki hihida papira,
vakavaꞌihoki bana ida Daniel kohana kavaꞌisohihi Deus athi kapapirania hojaki.
Ovaria vara bivaniꞌaja hida hihida pohimajahi ijaꞌari-ra naimahidaki kaimoni.
Nokiani kamahini ida pohimajahi,
avigajoraki bana!
Judéia kaarabonia avahojahi;
arabo namahikia avigajoraki bana!
15 Gora ꞌdihania avarakoirihi;
avigajoraki bana!
Hariꞌa aviꞌoi avagorania,
avakadinahina-ra avaranikhavini.
16 Siroia bada avakhanihi;
avigajoraki bana!
Hariꞌa avakadimakari-ra avanikha avagorania.
17 Ijaꞌari avigana kamahini jahariki bana ida gamo vakajahavidoki vakadimoni.
Jahariki jaboni ida vaisapaꞌitxiki vakadimoni,
ni-vakaabokaki ida vaꞌora vavakiꞌdarahavini.
18 Deu-ra vara vaniꞌa mahija pahisiriki kamasikoni namitharavini hida avigana kamahini.
19 Ojoina kamahini maakarini viahania ijaꞌari hahavia vaimahidakarahoki,
vavaꞌi soko inini arafiaki.
Jahariꞌoamanija ida mahi jaharini arafiaki.
Deus hahavi-ra namonahavini naothinia ni-ijaꞌaria vakamithaꞌiaki kaho ida vavaꞌi soko inini arafiaki ibavi hahavia vahojaki.
Ojoina kamahini naothinia ijaꞌaria ni-vakamithaꞌianaki ida vavaꞌi soko iniꞌahapikini arafiaki afojana,
ojoina kamahini viahani fori hiki.
20 Deua binaipohirihi bana ida mahi vaimana ꞌbanani arafiani-ra vakamithavini kaimoni,
vaihimihahavirara kaimoni adani ijaꞌari.
Deus vaꞌora akavaꞌijoaki bana adani kidijaꞌari vaꞌora nagathogathoꞌiki.
Vaꞌora vaꞌadivini mani ida imai ꞌbanani arafiani kamahini Deua binaipohiravini hija bana.
21 Hari.
Ijaꞌari vahabini aꞌonira niꞌaki bana aꞌoni:
“Vada vaniꞌa hada vani Cristo.”
Nihi ida ijaꞌari.
Vaathi vakajariꞌda bana.
Hoariha vahabini aꞌonira niꞌaki bana aꞌoni:
“Vada vaniꞌa Cristo ada.”
Vakhaniha.
Vaathi vakajariꞌda bana jaboni.
22 Vikhaki bana adani ijaꞌari aꞌonira vakorijanahaki kaimoni.
Vahoarahanana vaabono vaniꞌaꞌbadaravini:
“Hovani Cristo ho.
Deus hora karonaki ho.”
Vahoariha vaabono vaniꞌaꞌbadaravini:
“Hovani Deus athi namoniva abono ho.”
Vakhaninanaha.
Vakaabokaki bana ida badani danoki,
kodibadani danoki fori hiki.
Vanofiki ida ijaꞌari hahavi-ra vakorijanahavini.
Vakaabokaravini kabaꞌi,
vakaijoꞌaki ida ijaꞌari Deua binagathogathoꞌiki-ra vakorijanahavini,
Deu-ra vanofijanarara kaimoni.
23 Aꞌonira onavaꞌisohijoravini hiki,
vaꞌora avakajariꞌdara kaimoni.
Jesus joina varani hini hida
24 Hari.
Asia vara niꞌaha ada Jesus:
—Imai ꞌbanani arafiaki kamahini naothinia,
mokhiki bana ada safini.
Ni-vagaki ada masiko jaboni.
25 Vorovorohananaki bana ada boviri.
Deua binahoꞌdohoꞌdoki ida nama vaaniara kaimoni adani kaꞌdaꞌdi danoki nama vahojaki.
26 Oniaroa,
ijaꞌari hahavia vanokiki bana ida ojoina karajomini nama nokiani.
Vanokiki bana ida ojoirarina bahi vaforiki hararana.
Vanokiki jaboni ida bana ojahana,
odanona,
ovagana,
ijaꞌari hahavi vakadiꞌaajo ohina.
27 Oniaroa,
Deus vaꞌora karonaki bana adani ibavi kaijaꞌarini ibavi hahavia,
arabo hahavia avikhana,
vaꞌora najoronihahavira kaimoni adani ijaꞌari Deus vaꞌora nagathogathoꞌiki kidiania.
Figira avani karajomihi hida
28 Hari.
Asia vara niꞌaha ada Jesus:
—Okavarajomiki ida ojoina kamahini figira avani afani ajaꞌdini fori hini.
Avanokihi ida afani ajaꞌdinani,
avarigahi ida amoroki amaakarini.
29 Onivani fori hija ida ojoina viahani karajomini.
Namithaꞌihi ida vara aꞌonira oniꞌavini hiꞌiki,
ojoina amaakarini-ra avarigahi.
30 Kaꞌoa oamani ida oniꞌaki.
Vaabinirina oadani adani ijaꞌari rajomi-ra vanokiki,
onanamithahahaviki bana ida aꞌonira oniꞌavini hiꞌiki.
31 Ihimiki bana ida arabo hahavi,
nama hiki jaboni.
Namithaki hida oathi aꞌonira oniꞌavini hiꞌiki.
Mahi hahavi anokhomiriki hida oathi — vaꞌora niꞌaha ada Jesus.
Ijaꞌaria ni-avigaki ida Jesus joina kamahini
32 Hari.
Asia vara niꞌaha ada Jesus:
—Ijaꞌaria ni-avigaki ida ojoina kamahini.
Deus ibavi kaijaꞌarinia avigarihi jaboni ida ojoina kamahini.
Hovani Deus kaisai ohina kabaꞌi,
ni-oogaki ida ojoina kamahini.
Kodiabiꞌi kaꞌoa vania biogaja ida.
33 Ojoina kamahini-ra avarigaravini kabaꞌi,
rajomi namithaki-ra vanokha bana,
mahi,
joma hahavia hora avanokhavini aꞌonira ohonariaki bana ho.
34 Aꞌonira onavaꞌisohivini hiki ida ojoina kamahini fori hiki.
Kaꞌdaꞌdia binofiki ida ibavi napaja adahana.
Ajihina viahania kidihonai abono-ra vaꞌora noꞌavini badania.
Bihonariavini jaboni ada bakatha kakadavaꞌava abono vaꞌi ogairini.
35 Kaꞌdaꞌdi fori ohimanija bana.
Hora vanokha bana!
Kidihonai abono,
bakatha kakadavaꞌava abono vihiki fori avihiki aꞌoni.
Kidihonai abonoa avarigariki ida kaꞌdaꞌdi joina.
Aꞌonivani ni-avarigaki jaboni ida ojoina kamahini.
Mithani vahabini bana ojoiki ho.
Mahia vahabini bana ojoiki ho.
Joma ꞌboꞌdahini vahabini bana ojoiki ho.
Vagavagani vahabini bana ojoiki ho.
36 Vaviahanokha bana mahija avavadirini-ra okaragavini.
Aꞌonira ohonariavini hiki ojoina-ra avanokhavini.
37 Vaꞌora onavaꞌisohivini hiki hora vanokhavini adani ijaꞌari hahavi jaboni — vaꞌora niꞌaha ada Jesus.