Pohimajaki bana ida Deu-ra khai vaniꞌavini kagorani
24
Hari.
Deu-ra khai vaniꞌavini kagorani kavasiribanini bodinia okhaonaniꞌaha ada Jesus.
Ajihina kabaꞌi kidipohia vanamaakariꞌaha ada Jesus,
vaniꞌaha:
—Jesus,
vada iniꞌa oni Deu-ra khai aniꞌavini kagorani,
jahaki ida nokiani — vaniꞌaha.
2 Oniaroa,
Jesus vaꞌora niꞌaha:
—Avanokiki ida gora karaho jahaki.
Aꞌonira onavaꞌisohiki bana ho.
Deu-ra vanofiriki vania bana vanihimakaꞌoaja ida Deu-ra khai aniꞌavini kagorani.
Jaꞌdi naꞌbahaki-ra vanathararavini kamahini,
ni-hojajanaki ida jaꞌdi hoarani,
jaꞌdi hoariha namania — niha ada Jesus.
Ijaꞌari pohimajani varani hini hida
3 Hari.
Monte das Oliveiras arabo namahikia avigaimoriꞌaha.
Vithiꞌaha ada Jesus.
Vahoariha vahojarina kabaꞌi Jesu-ra vanamaakariꞌaha adani ipohina,
vananaꞌdohiꞌaha:
—Jesus,
mahi nihaforija vani vanihimaki ida Deu-ra khai aniꞌavini kagorani?
Nihanikia bana aogaja ida ijoini kamahini amaakarini?
Nihanikia bana aogaja jaboni ida nama,
arabo hahavi hiki ihimini kamahini amaakarini?
— Jesu-ra vaniꞌaha.
4 Oniaroa,
Jesua bigathanihi ida vaathi:
—Avaabononi avakavaꞌigairiꞌa bana!
Vahoariha aꞌonira vakorijanahavini-ra bana vanofiki aꞌoni.
Vakajariꞌda bana ida vaathi.
5 Vikhaki bana adani korijanahi abono,
vakhaniki bana adani afohanana:
“Hovani Cristo ho.
Deus hora karonaꞌiki avakadikaꞌdaꞌdi ohina kaimoni.”
Vakhaninanaki bana adani afoꞌbadara.
Ijaꞌari vaipohikia vakajariꞌdarihi bana ida vakadikorijanahi.
6 Avakamithaki bana ida ijaꞌari vaabono vakodakhamavini kavaranihi.
Ibavi maakariki,
napaja hikia,
ijaꞌari vaabono vakodakhamaki bana.
Varani vihina avakamithavini kamahini,
hariꞌa vaofini!
Vaabono vakodakhamaꞌimidiaki adani ijaꞌari,
ni-vaihimiꞌiaki kaho adani arabo hahavi kaijaꞌarini.
7 Arabo kahijava vaꞌora vidaki bana adani arabo hoariha kahijava.
Arabo kakaꞌdaꞌdini kidisorara khama vaꞌora vidaki adani arabo hoariha kakaꞌdaꞌdini kaijaꞌarini.
Ibavi ipohikia hoꞌdohoꞌdoki bana ida arabo afobakhia.
Mahi ipohikia ijaꞌaria vakainamoki bana ida vakadiꞌbai.
8 Namithani kamahini ida aꞌonira onavaꞌisohivini hiki,
avarigaki bana ida mahi jaharikaꞌoani kamaꞌdani.
Paꞌitxi ida gamo kaꞌbanarahi kamaꞌdani,
naothinia karahoki ida gamo imani ꞌbanani.
Onivani fori hija bana ida ijaꞌari vapohimajaꞌina kamahini vara aꞌonira oniꞌavini hiki.
9 Hari.
Naothinia hora vavajahariki aꞌonira vagathiki bana jaboni aꞌoni avahoarahanana,
aꞌonira avarakhaki bana adani vahoariha vakadiania,
aꞌonira vanaimaꞌbanara kaimoni.
Aꞌonira vanaabiniki bana adani.
Oipohina avihini mani ida hora vavajahariki arabo hahavi vahojaki aꞌonira vavajaharivini hija jaboni bana.
10 Kodivarani namithani kamahini kodijaꞌari vaipohiki hora vakavaꞌipahiniki bana.
Kodijaꞌari vihijanariki vaꞌora avarakhaki bana adani hora vanofijahakiki,
vahoariha vaꞌora vanaabinira kaimoni.
Ni-vaabono vakaimajahakhamapaꞌitxiki adani hora vakavaꞌipahiniꞌiki.
11 Oniaroa,
ibavi ipohikia ijaꞌari Deus athi namoniva abono vihina-ra vakahiꞌbadaraki bana adani.
Vahoariha vaipohikia vakajariꞌdarihi bana ida vakadikorijanahi athini.
12 Aipohiki bana ida Jahari kabadania ijaꞌari vakabadanibakhiana ibavi hahavia,
oniani ida kodijaꞌari ipohiki vaabono vakanofikhamajahakijanaravini hija bana.
13 Avaabinirini oadani oipohina avihini-ra avakajonirihi;
Deus aꞌonira vaꞌadiki bana aꞌoni,
kidiania avarikhaja kaimoni.
14 Hari.
Arabo hahavi kaijaꞌarinia vakamithaki bana ida omonina jahaki,
avarigaja kaimoni ida kaꞌoa hini vakadikaꞌdaꞌdi ohina.
Oniaro,
naothinia khaki bana ida mahi nama,
arabo hahavi hiki ihimini kamahini.
Mahi jahariki varani hini hida
15 Hari.
Asia vara niꞌaha ada Jesus:
—Avanokiki bana ida nahina jaharikaꞌoaki ijaꞌaria vakaimajahapaꞌitxiriki Deu-ra khai vaniꞌavini kagorani bodinia.
Aꞌonivani vada avaniꞌaꞌiki hida papira,
vakavaꞌihoki bana ida Daniel kohana kavaꞌisohihi.
Deus athi kapapirania hojaki ida Daniel kohana kavaꞌisohihi.
Ovaria vara bivaniꞌaja hida hihida pohimajahi ijaꞌari-ra naimahidaki kaimoni.
16 Nokiani kamahini ida pohimajahi,
avigajoraki bana!
Judéia kaarabonia avahojahi;
arabo namahikia avigajoraki bana!
17 Gora ꞌdaꞌdini aꞌani kavasiribaninia avarakoirihi;
avigarijoraki bana!
Hariꞌa aviꞌoi avagorania,
avakadinahina-ra avaranikhavini.
18 Siroia bada avakhanihi;
avigajoraki bana!
Hariꞌa avakadimakari-ra avanikha avagorania.
19 Ijaꞌari avigana kamahini jahariki ida vakajahavidoki vakadimoni.
Jahariki jaboni ida vaisapaꞌitxiki vakadimoni.
Ni-vakaabokaki ida vaꞌora vavakiꞌdarahavini.
20 Deu-ra vara vaniꞌa mahija pahisiriki kamasikoni namitharavini hida avigana kamahini.
Deu-ra vara vaniꞌa mahija aakoirina kamahini namitharavini jaboni.
21 Ojoina kamahini maakarini viahania,
ijaꞌari hahavia vaimahidakarahoki,
vavaꞌi soko iniꞌahapikini arafiaki.
Jahariꞌoamanija ida mahi jaharini arafiaki.
Deus hahavi-ra namonahavini naothinia ni-ijaꞌaria vakamithaꞌiaki kaho ida vavaꞌi soko iniꞌahapikini arafiaki ibavi hahavia vahojaki.
Ojoina kamahini naothinia ijaꞌaria ni-vakamithaꞌianaki ida vavaꞌi soko iniꞌahapikini arafiaki afojana ojoina kamahini viahani fori hiki.
22 Deua binaipohirihi bana ida mahi vaimana ꞌbanani arafiani-ra vakamithavini kaimoni,
vaihimihahavirara kaimoni adani ijaꞌari.
Deus vaꞌora kakodiaki adani kidijaꞌari vaꞌora nagathogathoꞌiki.
Vaꞌora vaꞌadivini mani ida imai ꞌbanani arafiani kamahini Deua binaipohiravini hija bana.
23 Ijaꞌari vahabini aꞌonira niꞌaki bana aꞌoni:
“Vada vaniꞌa hada vani Cristo.”
Nihi ida ijaꞌari.
Athini vakajariꞌda bana.
Hoariha vahabini aꞌonira niꞌaki bana aꞌoni:
“Vada vaniꞌa Cristo ada.”
Vakhaniha.
Athini vakajariꞌda bana jaboni.
24 Vikhaki bana adani ijaꞌari aꞌonira vakorijanahaki kaimoni.
Vahoarahanana vaabono vaniꞌaꞌbadaravini:
“Hovani Cristo ho.
Deus hora karonaki ho.”
Vahoariha vaabono vaniꞌaꞌbadaravini:
“Hovani Deus athi namoniva abono ho.”
Vakhaninanaha.
Vakaabokaki bana ida badani danoki,
kodibadani danoki fori hiki.
Vanofiki ida ijaꞌari hahavi-ra vakorijanahavini.
Vakaabokaravini kabaꞌi,
vakaijoꞌaki ida ijaꞌari Deua binagathogathoꞌiki-ra vakorijanahavini,
Deu-ra vanofijanarara kaimoni.
25 Mitha vaniꞌa hida aꞌonira onavaꞌisohijoravini hiki.
26 Ijaꞌari vahabini aꞌonira niꞌaki bana aꞌoni:
“Vavanavanaha amasia hojaki ada Cristo.”
Hariꞌa bana avikhaꞌa amasia.
Ijaꞌari vahabini aꞌonira niꞌaki bana aꞌoni:
“Vada vaniꞌa hada ahojaha Cristo.”
Nihi ida ijaꞌari.
Vaathi vakajariꞌda bana.
27 Hovani ijaꞌari hahavi vakadiꞌaajo ho.
Bahi korikorihana nama hahavi-ra navagajorakivini vani fori hiki ida ojoina.
28 Ijaꞌari hahavi ojoina-ra vanokivini kamahini avigaki ida hana ohojana.
Ijaꞌari majori vajoronina-ra vanokivini vani,
avigaki ida abaꞌoi ꞌbathaki hana hojani — vaꞌora niꞌaha ada Jesus.
Jesus joina varani hini hida
29 Hari.
Asia vara niꞌaha ada Jesus:
—Imai ꞌbanani arafiaki kamahini naothinia,
mokhiniki bana ada safini.
Ni-vagaki ada masiko jaboni,
vorovorohananaki bana ada boviri.
Deua binahoꞌdohoꞌdoki ida nama vaaniara kaimoni adani kaꞌdaꞌdi danoki nama vahojaki.
30 Oniaroa,
ijaꞌari hahavia vanokiki bana ida ojoina karajomini nama nokiani.
Vabarariariaki bana adani arabo hahavi kaijaꞌarini.
Vanokiki bana ida ojoirarina bahi vaforiki hararana.
Vanokiki jaboni ida bana ojahana odanona ovagana ijaꞌari hahavi vakadiꞌaajo ohina.
31 Ojoina kamahini ijaꞌaria vakamithaki bana ida trombeta ithoni,
rabojahavahaki ida trombeta.
Oniaroa,
Deus vaꞌora karonaki bana adani ibavi kaijaꞌarini ibavi hahavia,
arabo hahavia avikhana,
vaꞌora vanajoronihahavira kaimoni adani ijaꞌari Deus vaꞌora nagathogathoꞌiki kidiania.
Figira avani karajomihi hida
32 Hari.
Asia vara niꞌaha ada Jesus:
—Okavarajomiki ida ojoina kamahini figira avani afani ajaꞌdini fori hini.
Avanokihi ida afani ajaꞌdinani,
avarigahi ida amoroki amaakarini.
33 Onivani fori hija ida ojoina viahani karajomini.
Namithaꞌihi ida vara aꞌonira oniꞌavini hiꞌiki,
ojoina amaakarini-ra avarigahi.
34 Kaꞌoa oamani ida oniꞌaki.
Vaabinirina oadani adani ijaꞌari rajomi-ra vanokiki,
namithahahaviki bana ida aꞌonira oniꞌavini hiki.
35 Ihimiki bana ida arabo hahavi,
nama hiki jaboni.
Namithaki hida oathi aꞌonira oniꞌavini hiki.
Mahi hahavi anokhomiriki hida oathi — vaꞌora niꞌaha ada Jesus.
Ijaꞌaria ni-avigaki ida Jesus joina kamahini
36 Hari.
Asia vara niꞌaha ada Jesus:
—Ijaꞌaria ni-avigaki ida ojoina kamahini.
Deus ibavi kaijaꞌarinia avigarihi jaboni ida ojoina kamahini.
Hovani,
Deus kaisai ohina kabaꞌi,
ni-oogaki ida ojoina kamahini.
Kodiabiꞌi kaꞌoa vania biogaja ida.
37 Ojoina kamahini fori hiki ida namithaꞌiki Noé kohana hokina kari.
38 Arabo hahavi kapahani viahania,
Noé avaꞌdoroa aviꞌoirina oadani,
ni-ijaꞌaria vakavaꞌibodivaranipaꞌitxiki ada Deus.
Ni-vanofiki ida Deus athi-ra vanaabavini.
Vakavaꞌibodivaranihaꞌoadahaki ida vakadimahi,
vakadiꞌbai,
makhira gamo khama avaakarana.
39 Ijaꞌaria ni-avigaki kaho ida nahina namithaki kaimoni.
Noé avaꞌdoroa aviꞌoina naothinia,
Deua bikaronaꞌiki ida paha karaho,
avahidahahaviꞌiki adani ijaꞌari.
Onivani fori hija bana ida ojoina kamahini,
vavaꞌi kadihini hini.
40 Onokiana kamahini,
makhira viꞌbamiki bada vakhaniki bana vakadisiroia.
Deua bianiha bana ada hoarana.
Hojaroniki bana ada hoariha.
41 Gamo viꞌbamiki vakoꞌbaihaki adani.
Deua bianihi ida hoarani.
Hojaroniki bana ida hoariha.
42 Avakadikaꞌdaꞌdi ohiki ho.
Ni-avarigaki ida ojoina kamahini,
oniani ida mahi,
joma hahavia hora avanokhavini-ra ohonariavini hija.
43 Aꞌonira onavaꞌisohivini hiki.
Kaboꞌdinofiki kaikahina-ra ogajorara vaha ada goraki;
binaviahanokhamaniha vaha;
ni-bivaꞌahaki ida boꞌdi abonoa gorana bianahoroavini.
44 Avakhanini vani aꞌonira ohonariaja hora avanokhahahaꞌoadahavini.
Ijaꞌari hora vanaviahanokharavini kamahini vani ojoija bana.
Kaꞌdaꞌdi kahonai abono varani hina
45 Hari.
Asia vara niꞌaha ada Jesus:
—Aꞌonivani honai abono jahaki fori vihiꞌa bana.
Hovani honai abono kakaꞌdaꞌdi fori ohiki ho.
Vara aꞌonira oniꞌavini hiki bana ada honai abono ogahaki,
kidikaꞌdaꞌdi athi-ra naabaki ada.
Kidikaꞌdaꞌdia bihonariaha:
“Iakadavaꞌa bana hida
ogorana.
Vaꞌora noꞌa bana adani kodihonai abono vahoariha vakadiꞌbaia mahi hahavi.”
Niha ada kaꞌdaꞌdi.
Ajihiꞌaha.
46 Hari.
Kaꞌdaꞌdi athi-ra naabahahaꞌoadahaha;
kaꞌdaꞌdi joina kamahini,
jahaki ada honai abono kidimoni hina.
47 Kaꞌoa hiki hida kodivarani.
Kaꞌdaꞌdia biniꞌaki bana ada kidihonai abono:
“Inaabajahakiꞌiki ida ira
ohonariavini hiꞌiki,
oniani ida kodinahina hahavi,
ogorana,
arabo hiki-ra iakadavaꞌavini maina ira ohonariavini hija.”
Niha ada kaꞌdaꞌdi.
Onivani fori hija bana hida vara aꞌonira oniꞌavini hiki jaboni.
48 Hariꞌa bana honai abono jahariki fori vihiꞌa!
Ni-kidikaꞌdaꞌdi athi-ra naabaki.
Abono-ra niꞌaha ada honai abono:
“Agathinahaki ada
kodikaꞌdaꞌdi.”
Niha ada honai abono.
49 Oniani ida honai abono vahoariha-ra vaꞌora dafiabakhiavini hija.
Honai abono koꞌbainofiki,
kakavinofiki jaboni afobakhia,
makhira vahoariha vakahanobakhiaki vakadiania.
50 Oniaroa,
joiꞌaha ada kaꞌdaꞌdi.
Ni-kidihonai abonoa binokhajanaki ida joina,
ni-biogaki ida joina kamahini.
51 Hari.
Jaharikia kaꞌdaꞌdia biarakhaꞌaha ada honai abono,
binaimaꞌbanakarahoki bana ada.
Nimania ida honai abono kidikaꞌdaꞌdi kabadania kabadaniꞌbadarana abosini.
Kidihojai jahariki abosini fori hiki ida vahoariha vajahana-ra vakahiꞌbadaravini abosini Ibavi Jaharikaꞌoakia.
Abarariariaki bana ada,
kanada kakiroromisiki jaboni bana ada — vaꞌora niꞌaha ada Jesus.