Imaꞌinavi saꞌai koꞌbamihani vihiki vaipohina varani vihina hida
25
Hari.
Vara niꞌianaha ada Jesus:
—Deus ijaꞌari-ra vakaꞌdaꞌdivini kamahini fori hiki ida namithaki bana imaꞌinavi saꞌai koꞌbamihani vihiki vakadiania.
Kodijaꞌari fori vihiki adani imaꞌinavi.
Hovani maisa fori ohiki ho.
Imaꞌinavia avikhahi ida vakadilamparina;
maisa-ra vakaragararihara kaimoni.
2 Saꞌai kahoarani vihiki avigahariki adani.
Vahoariha saꞌai kahoarani vihiki avigahaki.
3 Imaꞌinavi avigahariki avavikhaki ida vakadilamparina,
ni-avavikhaki ida basina vakadilamparina-ra vanadaiꞌianavini kaimoni.
4 Vahoariha vani adani basina-ra avakavikhaha.
Aforahi ida vakadilamparina vanadaiꞌianaja kaimoni.
5 Hari.
Ni-khajorakiki ada maisa.
Vanaviahanokhavini oadani vanokoꞌisihahaviꞌaha adani imaꞌinavi,
vavadiꞌaha.
6 Joma jararini vani kaikahiꞌaha ada maisa,
vakamithaꞌihi ida bodiꞌbarahi:
“Maisa hada kaikahiꞌara.
Avikhaꞌa kidiania mahija avakaragararivini.”
7 Oniaroa,
vanokhoꞌaforaꞌaha adani imaꞌinavi hahavi,
vakadilamparina-ra avanahaꞌdiꞌaha.
8 Hari.
Imaꞌinavi vavaꞌihariki fori vihiki vaꞌora vaniꞌaha adani vahoariha:
“Haria vanoꞌa avakadibasina kapaꞌitxia,
daijanarinia binamokhihaꞌiki
hida akadilamparina.”
9 Vahoariha vakabasinakia vagathaniꞌihi ida vaathi:
“Iniani,
basina kapaꞌitxi
oavani hida akavahojaja,
ni-arajomaki avakadimoni bana.
Basina-ra avanofihi,
vakapavakariha.”
10 Oniaroa,
imaꞌinavi vavaꞌihariki fori vihiki ai vihiꞌaha,
basina-ra vakapavakarihaꞌavini.
Vakapavakarihana kabaꞌi vani,
kaikahiꞌaha ada maisa.
Hiꞌadani imaꞌinavi vakabasinaki vanaviahanokhaki ada maisa,
aviꞌoiꞌaha kidiania akarai kaihinikani kania.
Oniaroa,
akarai kaihinikani kakaꞌdaꞌdinia bivahonariahihi ida bakatha kaꞌboni aviꞌoijanarara kaimoni adani ijaꞌari vakaikahiꞌiariki.
11 Hari.
Mitihini vani vakaikahiꞌaha adani imaꞌinavi vavaꞌihariki fori vihiki vabodiꞌbarahaꞌaha:
“Akadikaꞌdaꞌdi,
avakarabikhai bana hida bakatha,
aoꞌoina-ra anofiki hari
jaboni.”
12 Maisa bigathaniꞌihi ida vaathi:
“Ni-aꞌonira oogaki.”
13 Hari hiꞌihi ida Jesus rajomi kavaranina vaꞌora niꞌaꞌaha:
—Avaabononi avakavaꞌigairi bana!
Ni-avarigaki ida mahi hana hini ojoina kamahini,
oniaroa aꞌonira ohonariavini hora avanokhavini — vaꞌora niꞌaha ada Jesus.
Honai abono avahoarabakosiki varani vihina
14 Hari.
Asia vara niꞌaha ada Jesus:
—Vara aꞌonira oniꞌavini hiki bana ida niha ninini vaꞌora onaabosiki adani vaꞌora ovakaꞌdaꞌdiki vakadibadani.
Oabono okavarajomivini bana ada kaꞌdaꞌdi.
Napaja adahaki ada kaꞌdaꞌdi.
Ajihina viahania vaꞌora baranahaꞌaha adani kidihonai abono,
vaꞌora honariavini hiki ida kidijiniro,
kidiarabo,
gorana hiki-ra avakadavaꞌavini.
15 Kaꞌdaꞌdia binofiki ida kidijiniro avanaꞌbaꞌdivini,
oniani ida jiniroa vaꞌora noꞌavini hija.
Kaꞌdaꞌdi vaꞌora kavaꞌibodivaraniꞌimidiaha adani kidihonai abono,
hana hina biogavini ida jiniro karaho akadavaꞌania kabadanina,
hana hina biogavini ida jiniro doroniki akadavaꞌania kabadanina,
hana hina biogavini ida jiniro paꞌitxi akadavaꞌania kabadanina.
5 mil jiniro ꞌbaꞌdania binoꞌaki ada honai abono hoariha.
2 mil jiniro ꞌbaꞌdani binoꞌaki ada honai abono hoariha.
1 mil jiniro ꞌbaꞌdani binoꞌaki ada honai abono hoariha.
Jiniroa vaꞌora noꞌavini naothinia ajihiꞌaha ada kaꞌdaꞌdi.
16 Ajihiꞌaha ada honai abono 5 mil jiniro ꞌbaꞌdani-ra gathaniꞌiki.
Bada nina vani bianaꞌbaꞌdija ida jiniro,
bigathaniki ida 5 mil jiniro ꞌbaꞌdani hoariha.
17 Onivani fori hiki ada honai abono 2 mil jiniro ꞌbaꞌdani-ra gathaniki.
Bada nina vani bigathaniki ida 2 mil jiniro ꞌbaꞌdani hoariha.
18 Honai abono hoariha bigathaniki ida 1 mil jiniro ꞌbaꞌdani,
okhaonaniꞌaha,
bikhoriꞌihi ida nami,
bianahojaꞌihi ida kidikaꞌdaꞌdi kajiniro.
19 Hari.
Radahaꞌaha ada masiko ipohiki,
oniania joiꞌaha ada vakadikaꞌdaꞌdi.
Vaꞌora baranahaꞌianaha adani kidihonai abono,
biogaja kaimoni ida kidijiniro avakadavaꞌaki.
20 Ovari miroꞌa oꞌoiꞌaha ada honai abono 5 mil jiniro ꞌbaꞌdani-ra gathaniꞌiki.
Biarakhaꞌihi ida jiniro ꞌbaꞌdani kidikaꞌdaꞌdi kania biniꞌaꞌaha:
“Hora inoꞌavini hiꞌiki hida 5 mil jiniro ꞌbaꞌdani.
Bada onina vani oanaꞌbaꞌdiꞌia hida jiniro.
10 mil hiki hida ipohini ovahojaꞌiki.”
21 Oniaroa,
kidikaꞌdaꞌdia biniꞌaha:
“Ivani honai abono jahaki i.
Iakadavaꞌajahakiki hida ira onoꞌavini hiꞌiki.
Jiniro paꞌitxi-ra iakadavaꞌajahakivini mani ida kodinahina karaho-ra iakadavaꞌavini maina-ra ovahonariahivini hija bana.
Khai iniꞌa kodiania!
Kodibadania ikabadanijahakini mani ida
kodinahina-ra akavapitavini hija.”
22 Hari.
Ovari maina oꞌoiꞌaha ada honai abono 2 mil jiniro ꞌbaꞌdani-ra gathaniꞌiki.
Biarakhaꞌihi ida jiniro ꞌbaꞌdani kidikaꞌdaꞌdi kania,
biniꞌaꞌaha:
“Hora inoꞌavini hiꞌiki hida 2 mil jiniro ꞌbaꞌdani.
Bada onina vani oanaꞌbaꞌdiꞌia hida jiniro.
4 mil hiki hida ipohini ovahojaꞌiki.”
23 Oniaroa,
kidikaꞌdaꞌdia biniꞌaha:
“Ivani honai abono jahaki i.
Iakadavaꞌajahakiki hida ira onoꞌavini hiꞌiki.
Jiniro paꞌitxi-ra iakadavaꞌajahakivini mani ida
kodinahina karaho-ra iakadavaꞌavini maina-ra
ovahonariahivini hija bana.
Khai iniꞌa kodiania!
Kodibadania ikabadanijahakini mani ida
kodinahina-ra akavapitavini hija.”
24 Hari.
Ovari maina oꞌoiꞌaha ada honai abono 1 mil jiniro ꞌbaꞌdani-ra gathaniꞌiki,
biniꞌaha ada kidikaꞌdaꞌdi:
“Ira oogaki ho.
Kaꞌdaꞌdi ihini mani ida ijaꞌari iathini-ra naabaravini-ra ivaꞌaharavini hija.
Vaꞌora ihonariaki adani kadahonai abono varakhajahana kadaimoni,
aꞌbaꞌdija kaimoni ida kadanahina.
Vaꞌora ihonariaki adani jaboni rakhajahi bononi-ra vanajoroniki,
vanajiꞌbinija kaimoni ida kadatrigo kagorani.
Kadaimoni ida vakadibadani,
ni-aꞌbaꞌdipaꞌitxiki ida kadahonai abono vakadinahina.
25 Ira ofiniꞌavini mani ida
nami bodinia kadajiniro-ra oanahojahavini hiꞌia.
Vada iniꞌa,
hida vani kadajiniro.”
26 Hari.
Kaꞌdaꞌdia bigathanihi ida honai abono athi:
“Honai abono jahariki oamani i!
Ikajoniahaꞌoamanija!
Ikavaꞌibodivaraniki ida avakadibadani abani kodimoni hini,
aꞌbaꞌdija kaimoni ida kodinahina.
27 Nimania ida hora ikavaꞌibodivaranivini,
jahaja vaha ida kodijiniro-ra ianaꞌbaꞌdivini-ra ikaijoꞌavini.
Jahaja vaha ida kodijiniro-ra iarakhavini sidaji kajinironi-ra avakadavaꞌaki vakadiania;
okaikahina kodijiniro-ra vanajoiha;
hora vanoꞌavini hiki vaha jaboni ida vakadirihai abosini.
Nahina mani ida vaꞌora ikanarihairavini hija?”
Niha ada kaꞌdaꞌdi.
28-30 Roiribaniꞌaha,
vaꞌora niꞌaha adani kidihonai abono vahoariha:
“Visaari oni 1 mil jiniro ꞌbaꞌdani bivahojaꞌiki!
Kodihonai abono 10 mil
jiniro ꞌbaꞌdani-ra vahojaki-ra vanoꞌa bana jiniro avisaariꞌikia.
Vanahokahiꞌa bana ada honai abono bakibakini kania.
Bakibakinia abarariariaki bana ada,
kanada kakiroromisiki bana ada.
Ni-nahina jahaki kabadaniriha ada.”
Niha ada kaꞌdaꞌdi.
Deua binoꞌaki ida kidinahina ijaꞌaria biakadavaꞌaja kaimoni.
Biakadavaꞌajahakihi;
Deua bianaipohihi ida nahina biakadavaꞌaki.
Ijaꞌaria biakadavaꞌajahakirihi ida nahina paꞌitxi Deua binoꞌavini hiki,
Deua bianiki bana ida nahina paꞌitxi bivahojaki — vaꞌora niꞌaꞌaha ada Jesus.
Jesus ijaꞌari-ra nasohivini kamahini varani hini.
31 Hari.
Jesus vaꞌora niꞌaha:
—Hovani ijaꞌari hahavi vakadiꞌaajo ho.
Okhaꞌianana kamahini kaꞌdaꞌdi ohiki bana ho,
ijaꞌari hahavi-ra ohonariaja kaimoni.
Okhana kamahini Deus ibavi kaijaꞌarini hora vavaipohihaki bana.
Kaꞌdaꞌdi kavithi ibavinia ovithiki bana ho.
32-33 Oviaha vajoroniki bana adani arabo hahavi kaijaꞌarini.
Ovilia akadavaꞌava abono fori ohiki ho.
Ovilia akadavaꞌava abono vaꞌora kanapitakhamavini adani ovilia,
boji vihiki.
Vaꞌora nahojaki adani ovilia pitana aniaja,
vaꞌora nahojaki adani boji pitana jasoja.
Onivani fori vaꞌora onihara bana adani ijaꞌari vaꞌora onasohivini.
Ijaꞌari vahoariha opitana aniaja vahojaki.
Ijaꞌari vahoariha opitana jasoja vahojaki.
34 Oniaroa,
vakadikaꞌdaꞌdi ohiꞌina vani,
vaꞌora oniꞌaki bana adani opitana aniaja vahojaki:
“Hojai jahakia avakahojaiki aꞌoni.
Kodiabiꞌi aꞌonira kajoamoraki aꞌoni.
Vikhaꞌa mahija avagathanivini ida kodiabiꞌi aꞌonira kaibavijahahivini hiꞌiki,
kaꞌdaꞌdi avihiki bana aꞌoni.
Arabo amonahani viahania binaibavijahaꞌiki ida.
35 Ovaiꞌamina,
ꞌbaia hora avanoꞌaꞌiki aꞌoni.
Okanabidi akaaforani,
paha hora avanoꞌaꞌiki aꞌoni.
Avakadijaꞌari ohirina kabaꞌi,
hora avagathanijahakiꞌiki aꞌoni avagorania.
36 Okamakaririna,
hora avanoꞌaꞌiki aꞌoni
makaria okaimahaki kaimoni.
Okavamonina,
hora avakajoamoraki aꞌoni.
Cadeia ohojana,
hora avanavanavanahaꞌiki aꞌoni.”
Oniꞌaki bana ida ijaꞌari opitana aniaja hojaki.
37 Ijaꞌari hojai jahakia vakahojaiki oathi-ra vagathaniki bana:
“Mahi nihaforija koda ira akajoamoraꞌia?
Mahi nihaforija ivaiꞌamini ira anoꞌaja ꞌbaia?
Ni-akavaꞌihokiꞌiki ida ikanabidini akaaforaꞌini paha ira anoꞌavini.
38 Ni-akavaꞌihokiki jaboni ida arabo hoariha kaijaꞌarini ihini ira agathaniꞌavini agorana.
Ni-akavaꞌihokiꞌiki ida ikamakaririni makaria ira anoꞌaꞌavini hiꞌiki.
39 Ni-akavaꞌihokiꞌiki jaboni ida ikavamonini-ra anokivini.
Ni-akavaꞌihokiki ida cadeia kabodinia ihojaꞌini ira anavanavanahaꞌavini.
Mahi nihaforija koda ira akajoamoraꞌia?”
Hora vaniꞌaki bana.
40 Hari.
Vakadikaꞌdaꞌdi ohina vani,
vaꞌora oniꞌaki bana adani:
“Aꞌonira onavaꞌisohivini hiki hora avanokiravini kabaꞌi,
oigamina hoariha kanahinariki-ra avakajoamorahi,
hora avakajoamoraꞌoamanija.”
41 Hari.
Oniaroa,
vaꞌora oniꞌaki bana adani opitana jasoja vahojaki:
“Avakaraꞌoꞌa kodiania!
Hojai jaharikia avakahojaiki aꞌoni.
Deus aꞌonira vajahariki aꞌoni.
Avikhaꞌa Ibavi Jaharikaꞌoaki kania,
siho kaihimiriki kania.
Hojaki ida Ibavi Jaharikaꞌoaki,
Jahari,
kidijaꞌari khama vaibavi ida.
42 Ovaiꞌamina,
ni-ꞌbaia hora avanoꞌaki.
Okanabidi akaaforani,
ni-paha hora avanoꞌaki.
43 Avakadijaꞌari ohirina kabaꞌi,
ni-hora avagathaniki avagorania.
Okamakaririna,
ni-makaria hora
avanoꞌaꞌiki.
Okavamonina,
ni-hora avakajoamoraki.
Cadeia ohojana,
ni-hora
avanavanavanahaꞌiki.”
Vaꞌora oniꞌaki bana adani opitana jasoja vahojaki.
44 Oniaroa,
hora vaniꞌaki bana adani:
“Mahi nihaforija koda ira anokija ivaiꞌamini,
ikanabidini akaaforaꞌini,
akadijaꞌari ihirini,
ikamakaririni,
ikavamonini,
cadeia ihojaꞌini?
Ni-akavaꞌihokiꞌiki ida ira anokivini.
Mahi nihaforija koda ira akajoamorarija?”
45 Vaꞌora oniꞌaki bana adani:
“Aꞌonira onavaꞌisohiki
bana ho,
oigamina vahoariha
vakanahinariki-ra
avakajoamorabakhiarihi;
ni-hora avakajoamoraki.”
Vaꞌora onavaꞌisohiha.
46 Hari hiꞌihi ida Jesus kavarani,
ijaꞌari kaꞌojomoꞌihia kavaranina,
vaꞌora navaꞌisohivini hiki ida namithaꞌiariki.
Jesus vaꞌora niꞌaha:
—Hojai jaharikia vakahojaiki avikhaki bana Ibavi Jaharikaꞌoaki kania,
imai ꞌbanani ibavini kania.
Vakadimahi vavahojaki idiaja ni-ihimijanaki.
Hojai jahakia vakahojaiki vani adani avikhaꞌaha bana Ibavi Jahakaꞌoakia.
Vakadimahi vavahojaki idiaja ni-ihimijanaki.