Zaqueua binokivini binofiki ada Jesus
19
Hari.
Jericó sidajia akhanoꞌaha ada Jesus,
okafianiribaniꞌaha.
2 Jericóa hojaki ada makhira Zaqueu oniki.
Imposto gathaniva abono vakadikaꞌdaꞌdi ada.
Kanahinaꞌahapikiki ada.
3 Hari.
Zaqueua bikamithahi ida varani,
Jesus radahana.
Binokivini binofiki ada Jesus.
Pasapasaki ada.
Ijaꞌari vaipohiki Zaqueu viaha vahojaki.
Ni-nihanikia Jesu-ra nokiki.
4 Oniaroa,
kiꞌdarahahaha ada Zaqueu Jesu-ra anaviahanokhaꞌavini.
Hagihi vadinia figira avani kania okasiꞌaha,
Jesus radahaki-ra nokivini-ra nofivini.
Vikhaꞌaha adani Jesus,
ijaꞌari vaipohiki vahararana adahana.
5 Figira avani kania avakhanoꞌaha,
figira miini-ra vada niꞌamananiꞌaha ada Jesus,
Zaqueu-ra niꞌaꞌaha:
—Zaqueu,
jorakia ogariꞌa bana mahija igorania aokhavini.
Kadania ohojaki bana ho hidakabaꞌi.
6 Hari.
Ogarijorakiꞌaha ada Zaqueu,
khai biniꞌaꞌihi ida Jesus kidiania hojana-ra kahivini.
7 Vahoariha khai vaniꞌapaꞌitxiriha ada okhana.
—Makhira hojai asohirikia kahojaiki gorana okhaki ada Jesus — vakhaniꞌaha.
8 Oniaroa,
gorana vahojaꞌaha,
gaaꞌaha ada Zaqueu,
Jesu-ra niꞌaꞌaha:
—Jesus,
mitha iniꞌa hida kodivarani.
Ni-asohiki ida kodibadani bada oniꞌaki afobakhia,
oniani ida kodijiniro-ra onapitavini hija bana.
Ijaꞌari vakanahinariki-ra vaꞌora onoꞌavini hiki bana ida pitani hoarani hoarahanana.
Onajoiki bana ida nahina oboꞌdiaꞌiki vahoariha vakadiania.
Ijaꞌari kanahina hoarani-ra oboꞌdiaꞌiki ho,
onajoiki bana ida akoꞌbamahakhamaki afohanana — niha ada Zaqueu.
9 Oniaroa,
Jesus biniꞌaha:
—Deus vaꞌora akavaꞌijoaꞌiki hadani Zaqueu,
kidijaꞌari gorana vahojaki.
Hihada makhira Abraão kahanodi kharonisiagaki jaboni hada.
10 Hovani ijaꞌari hahavi vakadiꞌaajo ho.
Hora rakhaki hida vaꞌora onakoꞌdihavini adani ijaꞌari Deus kahagihi-ra varagariki vaꞌora oakavaꞌijoara kaimoni — niha ada Jesus.
Honai abono avahoarabakosiki varani vihina
11 Hari.
Ijaꞌari vaipohikia vakamithaꞌihi ida Jesus Zaqueu khama vara vakhanina,
vaabono vakaniꞌakhamaꞌaha:
—Jerusalém sidaji-ra anamaakarihi.
Jesus kaikahina vani kamaꞌdaki koda bana ida Deus ijaꞌari hahavi-ra vakaꞌdaꞌdivini kamahini — vaabono vakaniꞌakhamaꞌaha.
Oniaroa,
Jesus vara vaꞌora niꞌaꞌaha adani ijaꞌari vaipohihana vihiꞌiki.
Vara bivaniꞌahi ida rajomi kavaranihi,
avigaja kaimoni ida Jerusaléa kaikahina kamaꞌdajorakiriki Deus ijaꞌari hahavi-ra vakaꞌdaꞌdivini kamahini.
12 Niha ada Jesus:
—Oabono okavarajomivini hiki bana ada makhira kanahinaki arabo hoariha napaja hiki-ra anikhahaꞌavini.
Hari.
Ajihiꞌaha ada kaꞌdaꞌdi.
Kidiabiꞌia bihonariavini hiki ada kidisai arabo hoariha kaijaꞌarini-ra vakaꞌdaꞌdihavinia.
Araboa gahinana naothinia joira kaimoni ada kaꞌdaꞌdi.
13 Hari.
Ajihina viahania ada kaꞌdaꞌdi,
vaꞌora baranahaꞌaha adani kidihonai abono 10 vihiki vaipohina kidiania vikhana.
Vaꞌora noꞌavini hiki afohanana jiniro ꞌbaꞌdani hoarahanana.
Ouro ida jiniro ꞌbaꞌdani,
kaidivaki ida.
Vaꞌora niꞌaꞌaha:
“Ojoirina oadani bada
vakhaniꞌa mahija
kodijiniro ꞌbaꞌdani-ra avaranaꞌbaꞌdivini.”
14 Kidiarabo kaijaꞌarinia ni-vavajahapaꞌitxiki ada kaꞌdaꞌdi.
Ni-vanofiki ida vakadikaꞌdaꞌdi hina.
Oniaroa,
ajihina naothinia vaꞌora vakaronaꞌaha adani vaathi avikhava abono arabo-ra avanikhahaꞌavinia vakhanira kaimoni:
“Ni-anofipaꞌitxiki ada
makhira akadikaꞌdaꞌdi
kaimoni hina.”
Vakhaniha.
15 Oniaroa,
arabo napaja hiki hojana ada makhira,
binakamaꞌdaꞌihi ida ijaꞌari-ra vaꞌora vakaꞌdaꞌdivini kabadanihi.
Oniaroa,
joiꞌaha kidiaraboa.
Kaikahiꞌaha,
vaꞌora baranahaꞌianaha adani kidihonai abono kidijiniro gathanina vihiꞌiki.
Binofiki ida kidijiniro vagathaniꞌiki ipohini-ra ogavini.
16 Hari.
Kidiania khaꞌaha ada kidihonai abono hoarana,
biniꞌaha ada kidikaꞌdaꞌdi:
“Hora inoꞌavini hiꞌiki ida
jiniro ꞌbaꞌdani kaidivaki hoarani.
Bada onina vani oanaꞌbaꞌdiꞌia ida jiniro,
10 hiki hida ipohini ovahojaꞌiki.”
17 Kidikaꞌdaꞌdia biniꞌaha:
“Jahaꞌoamanija ida kadabadani.
Ivani honai abono jahaki i.
Kodinahina paꞌitxi-ra iakadavaꞌajahakivini mani ida
kaꞌdaꞌdi ira onihavini hija.
Onofiki ida sidaji 10 ipohini kaijaꞌarini-ra vaꞌora
ivakaꞌdaꞌdivini.”
18 Oniaroa,
kidiania khaꞌaha ada kidihonai abono hoariha,
biniꞌaha ada kaꞌdaꞌdi:
“Hora inoꞌavini hiꞌiki ida
jiniro ꞌbaꞌdani kaidivaki hoarani.
Bada onina vani oanaꞌbaꞌdija ida jiniro 5 hiꞌiki ipohini hida ovahojaꞌiki.”
19 Kaꞌdaꞌdia biniꞌaha:
“Ira ohonariavini 5 sidaji hiki ipohini kaijaꞌarini maina-ra ivakaꞌdaꞌdivini.”
20 Oniaroa,
kaikahiꞌaha ada honai abono hoariha,
biniꞌaha ada kidikaꞌdaꞌdi:
“Hida vani kadajiniro
ꞌbaꞌdani.
Okarafoaꞌiki ida kadajiniro makaria,
oanahojaꞌihi.
21 Ira oogaki ho.
Kaꞌdaꞌdi ihini mani ida
ijaꞌari iathini-ra naabaravini-ra ivaꞌaharavini hija.
Kaꞌdaꞌdi ihini mani ida
hoariha kania kidinahina isaarivini hija,
kidirakhajahi jaboni ianivini hija.”
22 Hari.
Kaꞌdaꞌdia bigathanihi ida honai abono athi:
“Honai abono jahariki
oamani i.
Hora ikavaꞌibodivaraniki i:
Arabo kakaꞌdaꞌdini hiki ada kodikaꞌdaꞌdi,
oniani ida athi onaabaravini-ra vaꞌaharavini hija.
Bisaariki ida jaboni hoariha kanahina,
bianiki ida rakhajahi
bononi birakhaiki.
Nini vani ikahija ida
ohojana.
Ni-asohipaꞌitxiki ida bada inirini kodijiniro-ra
ianaꞌbaꞌdiravini,
oniani ida ira onaimaꞌbanavini hija bana.
23 Sidaji kajinironi-ra avakadavaꞌaki vakadiania kodijiniro-ra iarakhaja vaha;
okaikahina kodijiniro-ra
vanajoiki adani,
hora vanoꞌavini hiki vaha jaboni ida vakadirihai abosini.
Nahina mani ida vaꞌora ikanarihairavini hija?”
24 Oniaroa,
kaꞌdaꞌdi vaꞌora niꞌaha adani ijaꞌari vahoariha vahararana vahojaki:
“Visaari oni jiniro ꞌbaꞌdani hoarani bivahojaꞌiki.
Kodihonai abono hoariha-ra
vanoꞌavinihi bana oni
jiniro.
Hiꞌo jiniro ꞌbaꞌdani 10 hiki ipohini-ra vahojaki vani-ra vanoꞌavinihi bana.”
25 Honai abono vahoariha vaniꞌaha ada vakadikaꞌdaꞌdi:
“Bivahojaꞌiki ida jiniro ꞌbaꞌdani 10 hiki ipohini.
Inofimanija koda ida jiniro ꞌbaꞌdani hoariha anoꞌaꞌianavini?”
26 Hari.
Kaꞌdaꞌdia bigathaniꞌihi ida vaathi:
“Kaꞌoa hida kodivarani aꞌonira oniꞌavini hiki.
Deua binoꞌaki ida ijaꞌari kidinahina biakadavaꞌaja kaimoni.
Biakadavaꞌajahakihi;
Deua bianaipohihi ida nahina biakadavaꞌaꞌiki.
Ijaꞌaria biakadavaꞌajahakirihi ida nahina paꞌitxi Deua binoꞌavini hiki;
Deua bianiki bana ida
nahina paꞌitxi bivahojaki.”
27 Asia vara niki ada kaꞌdaꞌdi:
“Vaꞌora vavikha adani
ijaꞌari hora vavajahariki,
vakadikaꞌdaꞌdi ohina-ra
vanofiriki.
Vaꞌora vavikha kodiania
mahija vaꞌora avanaabinivini.”
Niha ada kaꞌdaꞌdi — vaꞌora niꞌaha ada Jesus.
Jesus abono-ra kavarajomivini hiki ada kaꞌdaꞌdi.
Vara vaꞌora niꞌavini hiki ida niha ninini vaꞌora naabosivini adani vaꞌora vakaꞌdaꞌdiki vakadibadani.
Jerusaléa avikhaha adani Jesus.
28 Hari hini ida Jesus kavarani,
vaadahaꞌianaha adani Jesus,
Jerusalém sidaji-ra avanikhahavini.
Okhananavaki ada Jesus.
29 Araboꞌoa namahiki monte das Oliveiras onikia vakaikahiꞌaha.
Ibavi ꞌbamiki kahararakhamania hojaki ida araboꞌoa namahiki.
Ibavi hoarani Betfagé oniki.
Ibavi hoariha Betânia oniki.
30 Hari.
Avamaakarina kabaꞌi vaꞌora honariaꞌaha adani ipohina viꞌbamiki:
—Avikhananavaꞌa bana.
Ibavi banininia avakaikahihi,
avakaragaha ada jumento paꞌitxi ahosagaki.
Jumento paꞌitxi ni-nahina okasiki kaho namana.
Avakokhariha,
hida kodiania vavikha bana.
31 Ijaꞌari aꞌonira vahabini bana vananaꞌdohivini hiki avakadibadani.
Vaꞌora navaꞌisohi bana:
“Jesua birihavini binofiꞌimidiaki hada.”
32 Oniaroa,
avikhaꞌaha adani viꞌbamiki.
Vakaragaꞌaha ada jumento paꞌitxi Jesua bivavaꞌisohihijoraꞌiki.
33 Vakaragaha,
vakokhariꞌaha.
Vakokharivini kabaꞌi,
kajumentoki vaꞌora nanaꞌdohihaꞌaha:
—Nahina kaimoni mani oni jumento-ra avakokharivini hija?
34 —Jesua birihavini binofiꞌimidiaki hada — vaꞌora niꞌaha.
35 Oniaroa,
Jesus kania vavikhaꞌaha,
jumento paꞌitxi namana avarakasiꞌihi ida vakadikarahobi.
Okasina vaakodiaꞌaha ada Jesus.
36 Jesus radahana kabaꞌi,
ijaꞌaria vanahojahi ida vakadikarahobi jumento viaha hagihia.
Vakadihojai oamani ida vakadibadani hija.
Kaꞌdaꞌdi jahaki viaha vanahojavini ida vakadikarahobi.
37 Hari.
Jerusalém maakarinia avakhanoꞌaha adani Jesus.
Monte das Oliveiras vikharafonina kabaꞌi,
ijaꞌari vaipohikia vavaipohihaꞌaha.
Khai vakhanina mani ida athii ꞌbarakia Deus jahana-ra vara vavaniꞌavini hija:
—Jahaki ida Deus kabadani danoki anokiꞌiki.
38 Deua bikaronaꞌiki ada Jesus khaꞌina,
ijaꞌari vakadikaꞌdaꞌdi hira kaimoni.
Deus,
ikajoamora bana ada ikaronaꞌiki i akadiania.
Anofiki ida Deus ibavia nama vahojaki vavaꞌi jahajahani-ra vavahojavini.
Anofiki ida Deus jahana vagana-ra khai vaniꞌavini!
39 Hari.
Ijaꞌari vaipohiki vahararana vahojaki adani farisio vaipohiriki,
Jesu-ra vaniꞌaha:
40 —Jesus,
vaꞌora honaria bana adani kadaipohi viso vakhanina!
Oniaroa,
Jesus vaꞌora niꞌaha:
—Kaꞌoa ida kodivarani.
Ijaꞌari khai hora vaniꞌakia ni-vakaabokaki ida viso vakhanina.
Viso vakhanira vaha;
hagihia jaꞌdi hojaki bodiꞌbaraki vaha — niha ada Jesus.
Vaꞌi mokara nikarahoki ada Jesus
41 Hari.
Jerusalém sidajia amaakariꞌaha ada Jesus,
binokiꞌihi,
asaraꞌaha.
Jerusalém sidaji kaijaꞌarini vapohimajana mani bana ida Jesu-ra naasaraja.
42 Nihaha:
—Avapohimajaki bana aꞌoni.
Hidakabaꞌi avarigaja vaha ida avapohimajajanarini vaha;
ni-avamakhaniki vaha.
Ni-avarigavini avanofiki.
43 Khaki bana ida mahi ijaꞌari vaipohiki aꞌonira vavajahariki avakadisidaji-ra avanahoroavini.
Mahi ipohikia ni-sidaji kaijaꞌarinia vakaabokaki ida avikhaonanina,
ni-ijaꞌari vaꞌora kavikhajakosiki bana ꞌbaia.
Vikhoriribanaoniki ida nami sidaji kavasiribanini iꞌoarini banininija,
ijaꞌari vikhaonanijanarara kaimoni.
Bihiaki ida nami khoraharibanaoniki.
44 Vaꞌora vanaabiniki bana adani sidaji kaijaꞌarini hahavi,
vanihimahahaviki bana ida vagorana.
Thararaꞌoamanija bana ida gora hahavi,
sidaji kavasiribanini hiki.
Ni-hojajanaki bana ida jaꞌdi gora amonahani kaimoni,
jaꞌdi hoariha namania.
Deua binofiꞌiki ida Jerusalém sidaji kaijaꞌarini-ra vaꞌora akavaꞌijoavini.
Avanofiravini mani ida aꞌonira napohimajaja bana.
Deu-ra khai vaniꞌavini kagorania avikhaꞌaha adani Jesus
45 Hari.
Oniaroa,
Deu-ra khai vaniꞌavini kagorani kavasiribanini bodinia okhajakosiꞌaha ada Jesus.
Vaꞌora nokiꞌaha adani ijaꞌari vaipohiki igitha-ra pavakari vanihaki.
Ijaꞌaria vakapavakarivini hiki ida igitha Deu-ra vakanavaꞌigavini kaimoni hini.
Jesus vaꞌora aakojaꞌaha adani pavakarihi abono.
Athii khanakia vaꞌora niꞌaha ai vihira kaimoni.
46 Oniaroa,
vaꞌora navaꞌisohiꞌaha:
—Deus athi kapapirania hojaki ida athi:
“Ijaꞌari Deu-ra vara vaniꞌara kaimoni hihida gora.”
Niki ida papira athini.
Boꞌdi ibavini avavanihamanija koda hida gora.
Igitha kaidivani-ra avanakarahovini mani ida ijaꞌari-ra avaboꞌdiabakhiavini hija — niha ada Jesus.
47 Hari.
Mahi hahavi Jesus ijaꞌari-ra vaꞌora kaꞌojomoꞌiꞌaha Deu-ra khai vaniꞌavini kagorani kavasiribanini bodinia.
Jesu-ra vanaabinivini-ra vanofiki adani sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono,
judeus kaijaꞌari vanavaꞌisohiva abono vihiki.
48 Vanofivini kabaꞌi ida Jesu-ra vanaabinivini,
ni-vakaabokaki.
Vaꞌora vifiniki adani ijaꞌari vaipohiki vahararana Jesus bivahojaki kania,
oniani ida Jesu-ra vagathiravini hija.
Ijaꞌari vaipohikia mitha vaniꞌabakhiaki ida Jesus athi.
Lucas 19:1-48