Jerusaléa avikhaꞌaha adani Jesus
21
Hari.
Ai vihiꞌaha adani Jesus,
Jerusalém sidaji-ra avanamaakariꞌaha.
Vakaikahiꞌimidiana ibavi Betfagé onikia.
Araboꞌoa namahiki monte das Oliveiras onikia kanapajahikhamarihi ida ibavi Betfagé oniki.
Hari.
Avamaakarina kabaꞌi vaꞌora honariaꞌaha adani ipohina viꞌbamiki:
2 —Avikhananavaꞌa bana,
ibavi banininia avakaikahihi,
avakaragaki bana ida jumenta ahosagaki,
jumento paꞌitxi hojaki jaboni kidiamia ahona.
Vaꞌora vakokhari adani viꞌbamiki,
hida kodiania vavikha bana.
3 Ijaꞌari aꞌonira vahabini bana vananaꞌdohivini hiki ida avakadibadani.
Vaꞌora vanavaꞌisohi bana:
“Jesua birihavini binofiꞌimidiaki hada.”
Oniania,
ijaꞌari vaꞌora vavaꞌahaki bana adani jumenta kodiania vaꞌora avavikhavini — vaꞌora niꞌaha ada Jesus.
4 Namithaꞌiki ida Deus athi namoniva abono kohana vara bivaniꞌajoraꞌiki:
5 “Jerusalém sidaji kaijaꞌarini-ra vara vaniꞌa:
Hidakabaꞌi kaikahiki ada avakadikaꞌdaꞌdi.
Ni-abono-ra vaboraborahariha ada.
Jumento paꞌitxi vania bivaadahara ada.”
6 Oniaroa,
vaꞌajihiꞌaha adani Jesus ipohina viꞌbamiki,
avikhananavaꞌaha vanaabaja kaimoni ida Jesus athi.
7 Jesus kania vajoiꞌaha,
vaꞌora avavikhaꞌaha adani jumenta,
kidisai paꞌitxi khama.
Jumento namana avarakasiꞌihi ida vakadikarahobi.
Okasiꞌaha ada Jesus.
8 Hagihi bodi pania jumento viaha ijaꞌari vaipohikia vanahojahi ida vakadikarahobi.
Nini vani ijaꞌari vakadikaꞌdaꞌdi kaikahina-ra khai vaniꞌara.
9 Avikhananavaki vabodiꞌbarahaꞌiki,
avikasiagaki jaboni vabodiꞌbarahaꞌiki vakhanibakhiaha:
—Kaꞌdaꞌdi o Jesus.
Khai aniꞌava o Davi kohana kaisai namitharonisiagaki.
Deua bikajoamoraki hiꞌo khaꞌiki akadiania!
Deua bikaronaꞌiki ada khaꞌiki.
Jahaki vagaki ada Deus!
10 Hari.
Jerusalém sidajia oꞌoiꞌaha ada Jesus.
Ijaꞌari vaipohikia vanajoraꞌaha vavaꞌi kidakidaꞌaha,
vaabono vakananaꞌdohikhamaꞌaha:
—Hana hina ada khaꞌara?
11 Ijaꞌari vâipohiki Jesu-ra vavaipohihaki vaꞌora vaniꞌaha:
—Deus athi namoniva abono o Jesus.
Nazaré sidaji kaijaꞌarini o,
Galiléia kaaraboni kaijaꞌarini o.
Deu-ra khai vaniꞌavini kagorania avikhaꞌaha adani Jesus
12 Hari.
Deu-ra khai vaniꞌavini kagorani kavasiribanini bodinia okhajakosiꞌaha ada Jesus.
Vaꞌora nokiꞌaha adani ijaꞌari igitha-ra pavakari vanihaki.
Ijaꞌaria vakapavakarivini hiki ida igitha Deu-ra vakanavaꞌigavini kaimoni hini.
Jesus vaꞌora aakojaꞌaha adani pavakarihi abono hahavi.
Vaꞌora aakojaha jaboni adani igitha-ra vakapavakarihaki.
Jiniro-ra avanaabosiki vakadimesa-ra akanaadarioniꞌaha.
Hoꞌdoko-ra pavakari vakanihaki vakadivithi ibavini-ra akanaadarioniꞌaha.
Athii khanakia vaꞌora niꞌaha,
ai vihiꞌara kaimoni.
13 Vaꞌora niꞌaha:
—Deus athi kapapirania hojaki hida athi:
“Deu-ra khai vaniꞌavini
kagorani hida Deu-ra vara vaniꞌara kaimoni.”
Niki ida papira athini.
Boꞌdi ibavini avavanihamanija hida gora.
Igitha kaidivani-ra avanakarahovini mani ida ijaꞌari-ra avaboꞌdiabakhiavini hija — niha ada Jesus.
14 Oniaroa,
Deu-ra khai vaniꞌavini kagorani kavasiribanini bodinia hojana kabaꞌi ada Jesus,
vikhaꞌaha adani ijaꞌari vakamaodorohaki,
vakabaha katonorohaki vihiki,
Jesus vaꞌora anaihotaꞌaha.
15 Hari.
Sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama vanokiꞌihi ida Jesus kabadani danoki ipohiki,
vaꞌora vakamithaꞌaha adani jaboni isai vabodiꞌbarahaki:
—Khai aniꞌava ada Jesus.
Davi kohana kaisai namitharonisiagaki ada — vakhaniha adani isai Deu-ra khai vaniꞌavini kagorani kavasiribanini bodinia vahojaki.
Oniani ida Jesu-ra vakaihamahikarahovini hija sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama.
16 Jesu-ra vaniꞌaha:
—Ikamitharia koda ida isai vara ira vavaniꞌavini?
Ni-jahaki.
Jesus vaꞌora niꞌaha:
—Haꞌa,
okamithaki ida isai vakadivarani.
Avanokiria koda ida Deus athi kapapirani athini:
“Deus vaꞌora kaꞌojomoꞌiki adani isai vadorohana,
isai vaitxanava
Deu-ra khai vaniꞌajahakira kaimoni.”
17 Hari.
Jesus vaꞌora nahojahaꞌaha,
sidajia ajihiꞌaha,
ibavi Betânia onikia okhaꞌaha.
Joma hojaꞌaha.
Jesua vara biniꞌaki ida figira avani
18 Hari.
Kaꞌafokajomani vagavagani Jerusaléa avajoiꞌaha adani Jesus kidipohi khama.
Vaiꞌamiꞌaha ada Jesus.
19 Bianokiꞌihi ida figira avani hagihi vadinia.
Binavanavanahaꞌihi,
akhanoꞌaha,
binakoꞌdihi ida ihiꞌai,
ni-bikaragaꞌiki,
bikaragaꞌihi ida afani kaꞌoa.
Oniaroa,
Jesua biniꞌaꞌihi ida figira avani:
—Hariꞌa bonojana!
Jorakia araꞌokhohahaviꞌihi ida figira avani.
20 Ipohina vanokiꞌihi,
vakavaꞌibodivaranikarahoꞌihi,
vaniꞌaha:
—Jorakia araꞌokhohahaviꞌiki ida figira avani.
21 Oniaroa,
Jesus vaꞌora niꞌaha adani ipohina:
—Aꞌonira onavaꞌisohiki bana ho:
Avavaꞌini kakhakhamarini vani Deu-ra avakajariꞌdarihi;
avakaabokahi jaboni ida figira avani-ra avaranaraꞌokhovini,
oanaraꞌokhovini vani fori hini.
Badani danoki ipohiki-ra avakaabokaki bana aꞌoni.
Avakaabokaki jaboni ida arabo namahiki-ra avahonariavini:
“Arabo nama hiki,
akaraꞌoꞌa,
iabono nahokahiꞌa paha bihiaki bodinia.”
Deu-ra avakajariꞌdarihi;
namithaki bana ida.
22 Deu-ra avakajariꞌdarihi;
avagathanihi ida kidiania avakanikhariaki.
Nahina bihonariara ada Jesus bada nina
23 Hari.
Deu-ra khai vaniꞌavini kagorani kavasiribanini bodinia joiꞌianaha ada Jesus.
Vaꞌora kaꞌojomoꞌivini kabaꞌi adani ijaꞌari,
Jesu-ra vanamaakariꞌaha adani sasidotxi vavakaꞌdaꞌdiva,
judeus kaijaꞌari vanavaꞌisohiva abono khama.
Vananaꞌdohiꞌaha:
—Nahina vani ira honariavini hija ida kadabadani-ra bada iniꞌavini?
24 Vaꞌora niꞌaha ada Jesus:
—Aꞌonira onanaꞌdohiꞌimidiaki bana ho.
Kodinaꞌdohi-ra avagathanihi;
aꞌonira onavaꞌisohivini hiki bana ada hana hina hora honariaki.
25-26 Hora vananamithaꞌa bana,
João Batista kohana vaꞌora kanaꞌiki adani ijaꞌari vakadihojai asohiriki-ra vakavaꞌipahiniꞌiki.
Hana hina vani João Batista kohana-ra honariaja ijaꞌari-ra vaꞌora kanara kaimoni?
Deus vania koda bihonariara ada João Batista ijaꞌari-ra kanavini?
Ijaꞌari vania koda bihonariara ada João Batista ijaꞌari-ra kanavini?
— vaꞌora nanaꞌdohiꞌaha ada Jesus.
Oniaroa,
vaabono vakaniꞌakhamaꞌaha adani sasidotxi vavakaꞌdaꞌdiva:
—Anofirihi ida João Batista Deua bihonariavini-ra akahivini.
Ni-anofiki jaboni ida Deus João Batista-ra honariaravini-ra akahivini.
Deus João Batista-ra karonavini-ra akahihi;
jaharihi ida João Batista athi-ra akajariꞌdavini Jesua bikahivini.
Deus João Batista-ra karonaravini-ra akahihi;
ijaꞌari haria vakaihamahihi.
Haria vakaihamahivini hiki João Batista Deus athi namoniva abono hina-ra vakajariꞌdaravini — vaabono vakaniꞌakhamaꞌaha adani sasidotxi vavakaꞌdaꞌdiva.
27 Oniaroa,
Jesu-ra vaniꞌaꞌaha:
—Ni-aogaki ida João Batista ijaꞌari-ra kanavini,
Deua bihonariavini bihonariaravini.
Vaꞌora niꞌaha ada Jesus:
—Hora avananamitharihi;
ni-aꞌonira onanamithaki jaboni hora honariakia — vaꞌora niꞌaha ada Jesus.
Deus athi naabani varani hini.
28 Hari.
Jesua vara bivaniꞌahi ida rajomi kavaranihi:
—Vakavaꞌibodivarani bana hida kodivarani.
Hojaki ada makhira.
Viꞌbamiki adani kidisai.
Imakhinava adani.
Aajojahiki-ra niꞌaha ada vakadiabiꞌi:
“Kodisai,
kodiuva kasiroinia okhaꞌa bana hidakabaꞌi mahija bada inini.”
29 “Iniani,
ookhana-ra onofirihi.”
Niha ada aajojahiki.
Mitihini bikavaꞌibodivaranirariꞌihi ida athi,
abono-ra kaꞌdaꞌdigariaꞌaha,
siroia okhaꞌaha.
30 Oniaroa,
kajoꞌojahiki-ra niꞌaꞌaha ada vakadiabiꞌi:
“Kodisai,
kodisiroia okhaꞌa bana hidakabaꞌi mahija bada inini.”
“Hai,
jakaho ba ookhava.”
Niha,
kidiabiꞌi athi-ra gathanivini.
Kabaꞌi,
ni-okhaki — vaꞌora niꞌaha ada Jesus.
31 Oniaroa,
Jesus vaꞌora nanaꞌdohiha adani kidivarani kamithani vihiki:
—Hana hina vania bada biniꞌaꞌia ida vakadiabiꞌia binofiki?
—Aajojahiki vania bada biniꞌaꞌia ida — Jesus kanaꞌdohi-ra vagathaniꞌaha.
Hari.
Jesus vaꞌora niꞌaha adani sasidotxi vavakaꞌdaꞌdiva,
judeus kaijaꞌari vanavaꞌisohiva abono khama:
—Ijaꞌari Jahari kabadania vakabadaniki vakadihojai-ra vakavaꞌipahiniꞌavini mani ida Deus ijaꞌari-ra vakaꞌdaꞌdivini kania vaꞌora aniꞌoija vaꞌoaniaro imidia.
Aꞌonivani avajahakaꞌoaki avavanihavini mani ida jorakia aꞌonira aniꞌoirija Deus kania.
Aꞌonivani Deus athi-ra avanaabavini-ra avakahivini kabaꞌi,
ni-avanaabaꞌiaki kaho.
Ijaꞌari hojai jaharikia kahojaiki Deus kania vaabono gahinai vanihaki.
Aꞌonivani ni-Deu-ra avanofiꞌiaki kaho aꞌonira vakaꞌdaꞌdivini.
32 João Batista kohana vania vara bivaniꞌaꞌimidiaja ida badani Deua binofiki,
ijaꞌaria avigaja kaimoni ida hagihi Deus kania okhaki.
João Batista athi-ra avakamithavini kabaꞌi,
avakajariꞌdahi.
Imposto gathaniva abono vani adani vajariꞌdariha.
Gamo makhira-ra avidoraonibakhiaki vani adani jaboni vajariꞌdariha.
Avanokiꞌavini kabaꞌi ida Jahari kabadani-ra vakavaꞌipahinivini,
aꞌonivani ni-avakavaꞌipahiniꞌiaki ida Jahari kabadania avakabadanibakhiani,
avaabononi gahinai avanihaja kaimoni Deus kania — vaꞌora niꞌaha ada Jesus.
Uva akadavaꞌava abono rajomi hida
33 Hari.
Oniaroa,
rajomi kavaranihia Jesus vaꞌora vara niꞌaha adani ijaꞌari vajoroniki.
—Mitha vaniꞌa!
Kaꞌdaꞌdia bivahonariahihi ida siroi uva rakhajahani ibavini kaimoni.
Bivahonariahihi ida uva avani rakhajahani.
Bonoꞌihi havahaki kaimoni ida ihiꞌai uva oniki.
Varakhaivini naothinia bivahonariahihi kavasiribanini ida uva kasiroini.
Binamonahaki ida jaꞌdi kabavihi karaho bihiaki uva bavini kaimoni,
uva-ra vakadaꞌahaꞌahavini hiki aꞌbani aniaja kaimoni.
Aꞌdiahiꞌihi ida uva bavini,
bivahonariahihi ida gora namahiki amonahani,
kidisiroi-ra akadavaꞌavini ibavini kaimoni ida gora.
Hari hiꞌihi ida kidibadani,
vaꞌora honariaha adani badani abono avakadavaꞌaja kaimoni ida kidiuva avani.
Avakadavaꞌahi ida uva avani,
bonoꞌini kamahini aꞌbani pitani vakadimoni,
pitani vakadikaꞌdaꞌdi kaimoni.
Bivahonariahivini naothinia ajihiꞌaha.
Ibavi hoariha napaja hikia okhaꞌaha.
34 Oniaroa,
uva aꞌdihani kamasikoni vani kaꞌdaꞌdi vaꞌora karonaꞌaha adani kidihonai abono vaipohiriki.
Vaꞌora niꞌaha:
“Avikhaꞌa uva avakadavaꞌava abono vakadiania
mahija kodiuva aꞌbani pitani-ra avagathanivini kodimoni.”
Hari.
Vaꞌajihiꞌaha,
uva kasiroini kania vakaikahiꞌaha.
35 Uva avakadavaꞌava abono vaꞌora vagathiha,
vidafiahaꞌaha ada hoariha,
vanaabiniꞌaha ada hoariha,
vanagahaꞌaha ada hoariha jaꞌdia.
36 Hari,
kaꞌdaꞌdi vaꞌora karonaꞌianaha adani kidihonai abono vahoariha vaipohiki uva avakadavaꞌava abono vakadiania avikhana.
Avikhaꞌaha,
vakaikahiꞌaha.
Vakaikahina vani vaꞌora vanajahariharivini jaboni,
vahoariha vani fori vihiꞌaha.
37 Hari.
Naothinia kaꞌdaꞌdia bikaronaꞌaha ada kidisai hoarana,
uva avakadavaꞌava abono vakadiania okhana.
Abono-ra niꞌaha ada kaꞌdaꞌdi:
“Kodisai-ra vagathanijahakiki bana adani uva
avakadavaꞌava abono.”
Oniaroa,
okhaꞌaha ada kaꞌdaꞌdi kaisai.
38 Uva avakadavaꞌava abonoa avanokiꞌaha khana.
Vaabono vakaniꞌakhamaꞌaha:
“Hada vani akadikaꞌdaꞌdi kaisai.
Kaꞌdaꞌdi abinina kamahini kidisai vania bigathanija ida kidiabiꞌi kaarabo afohahavi.
Anaabiniva mahija kidiarabo avahojavini.”
Vaabono vakanavaꞌisohikhamavini.
39 Hari.
Kaikahiꞌaha ada kaꞌdaꞌdi kaisai,
vagathiha,
uva kasiroini banininia avarahokaonaniꞌaha,
vanaabiniꞌaha.
40 Hari.
Jesus vaꞌora nanaꞌdohiꞌaha adani ijaꞌari vajoroniki:
—Kaꞌdaꞌdi joina kamahini niha vaꞌora niꞌaꞌaki koda bana adani uva avakadavaꞌava abono?
41 Vaniꞌaha:
—Vaꞌora vahonariahiki bana vaabinina adani uva avakadavaꞌava abono.
Vahoariha maina-ra vaꞌora honariaki bana ada,
kidiuva kasiroini akadavaꞌani vihira kaimoni.
Uva aꞌdini kamasikoni vaꞌoaniaroa vanoꞌaki bana ada kaꞌdaꞌdi kidiuva aꞌbani pitania.
42 Hari.
Jesus vaꞌora niꞌaꞌaha:
—Avanokiꞌiki ida Deus athi kapapirani pitani athini:
“Hojaki ida jaꞌdi jahaki,
jaꞌdi kagorahi dadani kaimoni.
Gora namonahava abonoa ni-vanofiki ida jaꞌdi karaho.
Jahani kabaꞌi ni-vanofiki ida jaꞌdi.
Vanofiravini kabaꞌi,
Deua binagathogathoꞌiki ida jaꞌdi karaho.
Akavaꞌibodivaraniꞌiki ida jaꞌdi Deua binagathogathoꞌiki.
Jahani arafiaki ida jaꞌdi karaho.”
43 Oniaroa,
Jesus vaꞌora niꞌaha:
—Kaꞌoa oamani hida oathi.
Deus vani vaꞌora nagathogathoꞌara adani judeus kaijaꞌari,
kidijaꞌari vihira kaimoni.
Aꞌonivani judeus kaijaꞌari avihini kabaꞌi,
ni-avanofiki ada Deus avakadikaꞌdaꞌdi hina,
oniani ida aꞌonira nofijanaravini hija.
Vaꞌora nagathogathoki bana adani ijaꞌari vahoariha hojai Deua binofikia vakahojaina — vaꞌora niꞌaha ada Jesus.
44 Jesus abono-ra kavarajomivini jaꞌdi karahoa.
Vaꞌora niꞌaha:
—Ijaꞌari hana hini voronirarihi jaꞌdi karaho namania;
ꞌboroꞌborohi ida ijaꞌari.
Ijaꞌari hoariha namania voronirarihi ida jaꞌdi karaho,
akhomahi ida ijaꞌari — vaꞌora niꞌaha ada Jesus.
45 Rajomi kavaranihi-ra mitha vaniꞌaha adani sasidotxi vavakaꞌdaꞌdiva,
farisio khama.
Vaabono vakaniꞌakhamaꞌaha:
—Jesu-ra agathanijahakiravini mani ida Jesus varani arihina-ra vara vaniꞌavini hija.
Jesus haria kavarajomivini vihiki adani uva avakadavaꞌava abono uva aꞌbania vakadikaꞌdaꞌdi-ra vakaathiriki — vaabono vakaniꞌakhamaha.
46 Oniania,
Jesu-ra vagathivini-ra vanofiꞌaha.
Ijaꞌari vaipohiki-ra vifinivini mani ida Jesu-ra vagathiravini hija.
Ijaꞌari vaipohiki vaabono vaniꞌaha:
—Deus athi namoniva abono ada Jesus.