Caná sidajia vanamonahaki ida akarai kaihinikani
2
Hari.
Oniaroa,
mahi ꞌbamiki radahani Caná sidajia amonahaꞌihi ida akarai kaihinikani.
Galiléia kaarabonia hojaki ida Caná sidaji oniki.
Hojamanihi ida Jesus kaamia akarai kaihinikani kania.
2 Jesus kidipohi khama kaboaꞌahi vihiki jaboni avikhaꞌaha.
3 Hari.
Ihimiꞌihi ida vinho.
Kidiamia biniꞌaꞌaha ada Jesus:
—Kodisai,
ida ihimiꞌihi vinho.
4 Jesua bigathaniꞌihi ida kidiamia athini:
—Mamai,
ni-onofiki ida kodibadania hora inavaꞌisohivini.
Ni-khaꞌiaki kaho ida kodibadani kaꞌoa kamaꞌdani kaimoni.
O milagre em Cana (João 2:1-12)
5 Oniaroa,
Jesus kaamia vaꞌora niꞌaha adani vinho-ra varavinaꞌiki:
—Bada vaniꞌa bana hida kodisai aꞌonira navaꞌisohivini hiki kaimoni.
6 Hari.
Gora vavahojaki bodinia hojaki ida paha bavini naꞌbahaki 6 hiki ipohini.
Jaꞌdi kabavihi ida.
Paha bavini hoarani 80 litro-ra gathiki jiꞌbinija kaimoni,
hoariha 100 litro-ra gathiki.
Onivani fori hija jaboni ida paha bavini hoariha afohanana.
Jaꞌdi kabavihia baviki ida paha Deus kavaꞌisohihi jiriki-ra vanaabara kaimoni.
Judeus kaijaꞌaria vanaababakhiaꞌiki ida vaꞌisohihi jiriki athini vaꞌora navaꞌisohivini hiki,
niha vakhanikhanina vaabono visokovini vajahara kaimoni Deus viaha,
vaꞌora kapoarira kaimoni.
Vakadihojai hiki ida vasaꞌa,
vaꞌdama vaabono hiki-ra visokobakhiavini kaihinikani.
Vaꞌisohihi jiriki-ra vanaabavini kaimoni ida paha jaꞌdi kabavihia hojaki.
7 Hari.
Jesus vaꞌora niꞌaha adani vinho-ra varavinaꞌiki:
—Vanajiꞌbini bana hida paha bavini hahavi.
—Vaani bana oni paha paꞌitxi paha bavinia hojaki.
Avisami akarai kaihinikani vakaꞌdaꞌdiva kania — vaꞌora niꞌaha ada Jesus.
Vanaabaꞌihi ida Jesus athi.
9 Avisamiꞌihi ida paha vinho ihiꞌiki akarai kaihinikani-ra vakaꞌdaꞌdiki kania.
Bikaijoꞌaꞌihi ida paha vinho ihiꞌiki.
Ihinika-ra vakaꞌdaꞌdikia ni-biogaki ida vinho ibavi hana hinia khani.
Vinho-ra varavinakia avigaki ida paha hahavi jaꞌdi kabavihia hojaki vinho ihiꞌini.
Oniaroa,
ihinika vakaꞌdaꞌdiva bibaranahaꞌaha ada maisa,
10 biniꞌaha:
—Maisa hahavi kahojai oamani ida vinho kaidivaki-ra ravinaꞌimidiavini,
kanori abono viꞌavija kaimoni.
Viꞌavibakhiavini naothinia vaꞌora noꞌaꞌianaki adani vinho kaidivariki maina.
Ivani inaibavijahaꞌimidiaki ida vinho kaidivaki jahaki.
Vinho hoariha ihimini naothinia haria inoꞌavini hiki hida vinho jahani arafiaki — maisa-ra niꞌaꞌaha ada akarai kaihinikani vakaꞌdaꞌdiva abono.
Vaabono vara vakaniꞌakhamavini kabaꞌi,
ni-avigaꞌiaki ida paha vinho ihiꞌiki.
11 Nimania ida Jesus kidibadani danoki-ra nakamaꞌdaꞌavini.
Caná sidajia kamaꞌdaꞌiki ida kidibadani danoki.
Galiléia kaarabonia hojaki ida sidaji.
Rajomi ida Jesus kabadani danoki.
Jesua binanokiabiininiki ida jahana danona arafiaki vakadiania,
oniani ida ipohina vakajariꞌdaravini hija.
12 Oniaroa,
Cafarnaum sidajia avikharafoniꞌaha adani Jesus,
kidiamia,
kidikajoꞌo,
ipohina vihiki,
oniaroa vahojaꞌaha mahi ipohirikia.
Deu-ra khai vaniꞌavini kagorania okhaki ada Jesus
13 Oniaroa,
amaakarihi ida Páscoa kaihinikani amonahani kamahini.
Gaimoriꞌaha ada Jesus Jerusalém sidajia ihinika amonahani kamahini viahania.
Jesus no pátio do templo (João 2:13-25)
14 Akhanoꞌaha,
Deu-ra khai vaniꞌavini kagorani kavasiribanini bodinia okhajakosiꞌaha.
Vaꞌora nokiꞌaha adani makhira ꞌdaama kahidari,
ovilia,
hoꞌdoko kihiki-ra pavakari vakanihaꞌiki.
Ijaꞌaria vakapavakarivini hiki ida igitha Deu-ra vakanavaꞌigavini kaimoni hini.
Jesus vaꞌora nokiꞌaha adani jaboni jiniro anaabosiva abono bada vakhanina vakadimesa kaiꞌoarinia.
Arabo hoariha kajinironi-ra avakanaabosikhamavini hiki,
Jerusalém kajinironia vakajinirora kaimoni adani napaja vikhaki ijaꞌari.
15 Oniaroa,
Jesua binamonahaꞌihi ida vaꞌa kaxikotxihi,
vaꞌora aakojaonanira kaimoni adani ijaꞌari,
ꞌdaama kahidari,
ovilia vihiki Deu-ra khai vaniꞌavini kagorani kavasiribanini bodinia vahojaki.
Biakanadariꞌihi ida jiniro anaabosiva abono vakadimesa.
Biakanavararakhamaꞌihi ida vakadijiniro.
16 Vaꞌora honariaha adani makhira hoꞌdoko-ra pavakari vakanihaki:
—Vaani hida avakadipavakari hiki hahavi.
Hariꞌa vakanapavakarihiꞌibaviniha hida kodiabiꞌi gorana.
Nahina pavakari nihani ibavini hirihi hida gora — vaꞌora niꞌaha ada Jesus.
17 Kidipohia vakavaꞌihokiꞌihi ida athii Deus athi kapapirania hojaki:
“Deus,
ijaꞌari ira khai
vaniꞌavini kagorani-ra
onakaidivakarahoki ho.
Siho akahaꞌdiki fori kihiki
hida gora-ra onakaidivavini ovaꞌi bodinia.”
Nihi hida athii pitani papira hojaki.
18 Judeus kaijaꞌari vanavaꞌisohiva abonoa ni-vavajahaki ida pavakarihi abono-ra vaꞌora aakojaonanivini,
oniania Jesus kania avikhaꞌaha,
vananaꞌdohiꞌaha:
—Aogavini anofiki ida Deus ira honariavini ira honariaravini vaꞌora iakakojaonanivini.
Anokivini anofiki ida badani danokia ikabadanini,
aogaja kaimoni ida kaꞌoa hini Deus ira honariavini.
19 Jesua bigathaniꞌihi ida vakadinaꞌdohi:
—Vanatharara bana hida Deu-ra khai aniꞌavini kagorani.
Mahi ahoarabakosikia hovani oanajaꞌdija bana hida.
20 Jesu-ra vaniꞌaꞌaha:
—46 badara ipohini vani gora vanamonahava abonoa vanamonahaꞌia hida gora.
Ivani koda ianajaꞌdiki hida gora mahi ahoarabakosikia?
— Jesu-ra vaniꞌaha.
21 Deu-ra khai vaniꞌavini kagorania kavaranina kabaꞌi ada Jesus,
ovani oa abono-ra vara vaniꞌara ada.
Kidivarani hiki ida abinina mahi ahoarabakosikia ahokiꞌina.
22 Hari.
Jesus abinina naothinia ahokiꞌina,
kidipohia vakavaꞌihokiꞌiki ida Jesus athi vara abono-ra vaniꞌavini hiꞌiki,
oniani ida Deus athi kapapirani-ra vakajariꞌdaravini hija,
Jesus athi ni-vakajariꞌdaki jaboni.
Jesua biogaki ida ijaꞌari hahavi vakadivaꞌibodivarani
23 Oniaroa,
Páscoa kaihinikani amonahani oadani hojaꞌaha ada Jesus Jerusalém sidajia.
Ijaꞌari vaipohikia vanokiꞌihi ida badani danoki ipohiki-ra bada niꞌaꞌavini,
oniani ida Jesu-ra vavakaijokavini hija.
24-25 Jesus ni-vaꞌora vakaijokaki.
Ovari vaꞌora ogaki adani ijaꞌari hahavi,
biogaki ida ijaꞌari hahavi vakadivaꞌibodivarani.
Ni-ijaꞌaria vakaabokaki ida Jesu-ra navaꞌisohivini hiki biogarikia.
Biogahahavimaniꞌia ida ijaꞌari kavaꞌibodivarani afohanana.