—Jesus,

aogaki ida ijaꞌari kaꞌojomoꞌiva abono ihini.

Deus ira karonaꞌiki i.

Deus ira kakodiarija vaha;

ni-ikaabokaki ida badani danokia ikabadanibakhiani.

3 Jesua bigathanihi ida Nicodemos athi:

—Deus vaꞌora nofiki adani ijaꞌari hahavi Deu-ra avigavini vakadikaꞌdaꞌdi hina.

Kaꞌoa hiꞌoamanija hida varani ira onavaꞌisohivini hiki.

Namithaꞌianarini oadani ida ijaꞌari,

ni-bikaabokaki ida Deu-ra ogavini kidikaꞌdaꞌdi hina.

4 Nicodemoa ni-biogaki ida Jesus kavarani nahina hini,

oniani ida binanaꞌdohiꞌianavini hija:

—Bikaabokamanija koda ida makhira kidiamia jahani bodinia okhajakosiꞌianana ꞌbanaꞌianara kaimoni?

Nihaniki vania namithaꞌianara ada makhira,

naꞌarihavi hiꞌina kabaꞌi?

5 Jesua biniꞌaꞌaha:

—Kaꞌoa hiꞌoamanija hida varani.

Namithaꞌiarini oadani ida ijaꞌari,

ni-bikaabokaki ida Deu-ra ogavini kidikaꞌdaꞌdi hina.

ꞌBanaꞌianahi ida ijaꞌari,

paha kanaꞌihi,

oꞌoiꞌaha ada Maꞌonahai Jahaki kidiania,

oniani ida Deua bivakaꞌdaꞌdivini hiꞌia.

6 Ijaꞌari kaisai vani ida gamo jahani bodinia namithaja.

Maꞌonahai Jahaki ijaꞌari kahojai-ra anaabosivini mani ida Deus kaisai nihani hija.

7 Hariꞌa ijaꞌari ꞌbanaꞌianaki kavaranihi ira kaꞌbarava.

Vavaꞌaha bana ada Maꞌonahai Jahaki avakadimahi-ra najahavini hidiaja mahija Deus aꞌonira vakaꞌdaꞌdivini.

8 Rajomi kavaranihia okavaraniki bana ho.

Sirisiriki voovooni roiroiki.

Ijaꞌaria bikamithahi ida sirisiriki ithoni,

ni-biogaki ida sirisiriki hanajaja khani,

ni-biogaki jaboni hanajaja okhaꞌini.

Okavarajomiki ada Maꞌonahai Jahaki sirisiriki fori hina.

Ni-ijaꞌaria binokiki khana.

Ni-ijaꞌaria biogaki ada Maꞌonahai Jahaki ijaꞌari kavaꞌibodivarani-ra anaabosivini niha biniꞌaꞌavini — Jesua biniꞌaꞌaha ada Nicodemos.

9 Nicodemoa binanaꞌdohiꞌianaha:

—Nihaniki vania namithaki ida hora inavaꞌisohivini hiki ijaꞌari kavaꞌibodivarani aabosini?

10 Jesua biniꞌaha:

—Iogaꞌiaria koda hida ira onavaꞌisohivini hiꞌiki,

Israel kaijaꞌari kaꞌojomoꞌiva abono ihini kabaꞌi?

11 Kaꞌoa hiꞌoamanija hida varani.

Vara avaniꞌaki ida nahina aogaki,

aꞌonira ananamithavini hiꞌiki ida anokiꞌiki,

kabaꞌi avanofihi ida ariathi-ra avakajariꞌdavini farisio vahoariha khama.

12 Aꞌonira onavaꞌisohivini hiꞌiki ida nahina namithaki hidiaja,

araboja;

oathi-ra avakajariꞌdahaꞌoadahaki aꞌoni.

Aꞌonira onavaꞌisohiki bana ho nahina namithaki Deus kania nama;

avakamithavini kabaꞌi hida oathi kaꞌoa hini,

avakajariꞌdamanihi.

13 Ni-ijaꞌari okasiꞌiaki kaho Deus kania nama.

Ijaꞌari hahavi vakadiꞌaajo vani ada okasiꞌara.

Ovari gariꞌiki jaboni.

Hovani ijaꞌari hahavi vakadiꞌaajo ho — Jesua biniꞌaꞌaha ada Nicodemos.

14 Hari.

Mahi ꞌboꞌdakari amasia vaadahana kari Moisés kohana biakaꞌitapoamisiꞌihi ida makha amovana ava nokhonia,

biragaamananiꞌihi ida ava.

Onivani fori hija bana ida ijaꞌari hahavi vakadiꞌaajo-ra ava kania avakaꞌitapoamisahanavini,

varagaamananiki bana ida ava.

15 Ijaꞌari abononi gahinai nihahi ijaꞌari hahavi vakadiꞌaajo kania;

bivakaijokaha;

mahi jaꞌdini anokhomiriki-ra vahojahi.

16 Deus vaꞌora nakaidivavini arafiaki adani ijaꞌari hahavi,

oniani ida kidisai-ra karonavini hija vakadiania.

Hoarana ada Deus kaisai.

Ijaꞌari Deus kaisai kania abononi gahinai nihahi;

mahi jaꞌdini anokhomiriki-ra vahojahi Deus kania.

Ni-Deus kahagihi-ra anakamadaki ida ijaꞌari,

ni-Ibavi Jaharikaꞌoakia okhaki.

17 Deua bikaronaki ada kidisai ijaꞌari hahavi-ra akavaꞌijoara kaimoni.

Vakadihojai asohiriki abosini-ra vagathanivini kaimoni hirihi ida kidisai-ra karonavini hija.

18 Ni-Deua bihonariaki ida ijaꞌari kidisai vakaijokana hiki Ibavi Jaharikaꞌoakia okhani.

Deua biniꞌaꞌboꞌdaꞌiki ida kidisai hoarana vakaijokana hiriki Ibavi Jaharikaꞌoakia okhani.

Jesu-ra vakaijokaravini mani ida Ibavi Jaharikaꞌoakia arakhani hija bana.

19 Khaꞌaha ada Deus kaisai ijaꞌari vakadiania.

Mahi vagani fori hiki ada.

Ijaꞌari Jahari kahojaia vakahojaibakhiana mani ida Deus kaisai-ra vanofiravini hija.

Hojai asohiriki-ra vanofivini mani ida vakadivaꞌibodivarani vagani-ra vanofiravini hija,

oniani ida bakibakinia adahai fori hiki-ra vavajahavini hija,

oniani ida ijaꞌari-ra nasohivini kamahini Ibavi Jaharikaꞌoakia vaꞌora arakhaja bana.

20 Ijaꞌaria bivajahaki ida Jahari kahojaia kahojaini,

oniani ida vagaki fori hiki-ra karamonavini hija,

oniani ida Cristo-ra aakaraꞌovini hija.

Vagaki kania maakarija vaha;

nokiahi vaha ida kidihojai jaharini.

Binofirihi ida kidihojai asohiriki-ra kavaꞌipahinivini,

oniani ida bianahojavini hija,

vahoariha avigaria kaimoni ida kidihojai jahariki.

21 Ijaꞌari hoariha vani ida Deus kahojai jahakia kahojaija.

Ni-Cristo-ra aakaraꞌoki,

bikaimajahaki ida vagaki.

Binofiki ida vahoariha Deus kahojai jahaki-ra vanokivini kidiania,

avigaja kaimoni ida Deus athi niha ninini ijaꞌaria binaabavini.

22 Hari.

Oniaroa,

Jesus kidipohi khama ai vihiꞌaha,

Judéia kaarabonia avikhaꞌaha.

Mahi ipohiriki vahojaꞌaha.

Vahoarahanana vaꞌora kanaꞌaha adani ijaꞌari athi naabani vihiki.

Rajomi kaimoni ida kanai.

23 Hari.

Enom ibavi oniki Salim maakarinia hojaha ada João Batista.

Ovari jaboni ijaꞌari-ra vaꞌora kanaronahaꞌiki.

Vaini vadinia hojaki ida Enom ibavi oniki.

24 Ni-cadeia hojaꞌiaki kaho ada João Batista.

25 Oniaroa,

João Batista ipohina,

judeus kaijaꞌari vakaꞌdaꞌdiva hoarana khama vaabono avakanaathidanoararikhamaꞌaha.

Vakadivarani hiki ida kanai hana hini asohiki ijaꞌari-ra najahavini Deus viaha.

26 Hari.

João Batista kania avikhaꞌaha,

vaniꞌaha:

—Ikavaꞌihokimanira ada makhira Jesus oniki kadania hojaꞌiki Jordão vaini nobanija?

Vara ivaniꞌaꞌiki ada makhira.

Ovari maina ijaꞌari-ra kanaꞌiki ada.

Ifori hiki ada.

Ijaꞌari vaipohiki avikhaki kidiania.

Ni-vaipohijanaki adani ijaꞌari kadania vikhaki — João Batista-ra vaniꞌaha.

27 João Batista vaꞌora niꞌaha:

—Khai oniꞌaki ida Jesus kania avikhana.

Deua binofiravini oadani,

ni-nahina namithaki akadiania.

Namithaꞌiki ida Deua binofiki,

oniani ida Jesus kania vaꞌora arakhaꞌia.

28 Aꞌonivani avakamithabakhiaki ida kodivarani.

Oabono oniꞌahi:

Cristo ohirihi.

Deus hora honariavini Cristo khana viahania.

29 Okavarajomivini ada ovari maisa fori hina.

Ijaꞌari akarani kamahini maisa vania bivahojaja ida kidigamo kaimoni.

Maisa maakarina hojaki ada kidivaꞌahi.

Maisa kavaꞌahi kaimoni hirihi ida gamo.

Maisa kavaꞌahi fori ohiki ho.

Khai oniꞌaki ida maisa athi-ra mitha oniꞌavini.

Ijaꞌari vaipohiki Jesus vakadikaꞌdaꞌdi hina-ra vanofivini mani ida khai hora niꞌaja.

30 Avaipohiki bana adani ijaꞌari Jesus vaꞌora vakaꞌdaꞌdiki.

Avaꞌbaꞌdina oadani adani kidipohi,

kodipohi vani adani vaihimiki fori vihira.

Nimania ida Deua binofiki — João Batista vaꞌora niꞌaha adani ipohina.

31 Hari.

Deus kania nama gariꞌiki ada Cristo,

ovaria biogahahaviki ida ogavahaki kaimoni.

Ijaꞌari hahavi vakadikaꞌdaꞌdi ada.

Ijaꞌari araboa vanamithaki ni-hahavi-ra avigaki.

Avigaki ida vahararana namithaki,

vara vavaniꞌaki jaboni ida vanokiꞌiki,

vakamithaꞌiki hiki vahararana.

Hahavi-ra vakaꞌdaꞌdiki ada ovari nama Deus kania gariꞌiki.

32 Ovaria bivavaꞌisohihiki ida binokiꞌiki,

bikamithaꞌiki Deus kania nama.

Kabaꞌi,

ijaꞌari vaipohikia vakajariꞌdaki ida moni vaꞌora kanamonivini hiꞌiki.

33 Ijaꞌari Deus monina-ra vakaijokakia binanokiahi ida Deus athi kaꞌoa hini.

34 Cristo Deua bikaronaꞌikia vara bivaniꞌahaꞌoadahaki ida varani Deua binofiki.

Deua bikaronaki ada Maꞌonahai Jahaki Cristo kania okhana vaꞌi nahonariahihihahaꞌoadahana hira kaimoni.

Kidiania hojana arafiaki ada Maꞌonahai Jahaki.

35 Deua binakaidivaki ada kidisai.

Kidiabiꞌia biarakhaꞌihi ida hahavi hojaki Jesus Cristo saꞌa kabodinia bivakaꞌdaꞌdija kaimoni.

36 Ijaꞌari Jesu-ra vakaijokahi;

mahi jaꞌdini anokhomiriki-ra vahojahi.

Ijaꞌari Jesus athi-ra naabarihi;

ni-bivahojaki bana ida mahi jaꞌdini anokhomiriki.

Bigathanihahaꞌoadahaki bana ida kidihojai asohiriki abosini Ibavi Jaharikaꞌoakia.