3 Hari.

Jesua bikamithaꞌihi ida varani hina joiribanini kidiania.

Oniania Judéia kaarabonia ajihiꞌianaha,

Galiléia kaaraboni-ra anajoihaꞌianavini.

4 Judéia kaaraboni,

Galiléia kaaraboni hiki kahararakhamania hojaki ida Samaria kaaraboni.

Hari.

Jesua binofiki ida hagihi Samaria kaarabonia radahaki okhana.

5 Samaria kaarabonia vaadahaꞌina kabaꞌi adani Jesus,

Sicar sidaji ꞌdihania avakhanoꞌaha.

Sicar sidaji maakarinia hojaki ida arabo pitani Jacó kohana kidisai José kohana-ra noꞌaꞌboꞌdavini hiꞌiki.

6 Arabo pitania hojaki ida paha aniani ibavini Jacó kohana bikhoriꞌiki.

Hari.

Safini sohirarina vani avakhanoꞌaha adani Jesus paha aniani ibavinia.

Napaja vaadahana mani ida Jesu-ra vaꞌora nafajafajahaꞌia.

Vithirariꞌaha ada Jesus nami khorahaki kajaꞌdiribaniki ihini vadinia.

7-8 Vithina kabaꞌi,

ai vihiꞌaha adani ipohina ꞌbai-ra vakapavakarihaꞌavini sidajia.

Jesus hojaroniꞌina,

akhanoꞌihi ida Samaria anani kapahahaki.

Jesua biniꞌaꞌihi:

—Hora bana paha oꞌaviki kaimoni.

9 Gamoa biniꞌaꞌaha:

—Ivani judeus kaijaꞌari i.

Hovani samaria anani ho.

Avakadijaꞌari akadijaꞌari khama ni-vaabono vakaimajahakhamaki.

Ni-kadaijaꞌaria vakaimajahaki ida akadipaha bavini,

oniani ida paha hora ikanikhariavini-ra okavaꞌibodivaranikarahovini hija.

10 Jesua biniꞌaꞌihi:

—Ni-hora iogaki.

Ni-iogaki jaboni ida Deus ijaꞌari-ra noꞌavini hiki.

Paha ijaꞌari-ra nahokikia Deua binoꞌaki ida ijaꞌari.

Hora iogaja vaha;

kodiania ikanikhariahi vaha ida paha vara ovaniꞌaꞌiki;

ira onoꞌamanihi vaha.

11 Gamoa bigathanihi ida Jesus athi:

—Bihiaki hida hodi.

Ni-ivahojaki hida bavi ahoki paha-ra ikhinimafarivini kaimoni.

Hanajaroha paha ijaꞌari-ra nahokiki-ra ikaragaki koda i?

12 Asia vara nihi ida gamo:

—ꞌBoꞌdakari akadiꞌarahoda okhananavaki Jacó kohana bikhoriki hida paha aniani ibavini hodi.

Biꞌaviꞌiki ida kidikhorahi kapahani,

kidisai kohana viꞌaviki jaboni ida,

vakadigitha viꞌaviki hida hodi kapahani jaboni.

Hojaroniki ida nami khorahaki kapahani akadimoni hiꞌini.

Kidijaꞌari vanamitharonisiagaki hari.

Kaꞌdaꞌdi hiꞌiki ada Jacó kohana.

Ivani kaꞌdaꞌdi mani koda i?

Jacó kohana kaꞌdaꞌdi hina-ra iaradamanija?

13 Jesua biniꞌaꞌihi:

—Hihida hodi kapahani ijaꞌaria biꞌavibakhiavini kabaꞌi,

mitihini kanabidini akaaforaꞌianaki.

14 Ni-niki ida paha okavagahinaivini onofiki.

Hoaranija ijaꞌaria biꞌavihi;

ni-akaaforajanaki ida kanabidini mahi anokhomirikia.

Vaini kaꞌdaꞌdini kapahani kamaꞌdani vani fori hija ida paha ijaꞌari vaꞌini bodinia khaonanini.

Ijaꞌari-ra nahokiki fori hiki ida paha,

oniani ida kidimahi ananokhomijanarini hiꞌia.

15 Gamoa biniꞌaha ada Jesus:

—Hora bana hida paha iniꞌakia mahija okanabidi akaaforajanaravini,

hihida paha khinimahafarini ibavinia okapahahajanaria kaimoni.

—Kaꞌoa hiꞌoamanija hida iathini,

ikamakhirarini-ra ikahivini.

18 Makhira saꞌai kahoarani vihiki vania ikamakhiraꞌia.

Ni-kadamakhira kaꞌoa hiki ada kadamakhira hiki.

Kadani hiriha ada.

Kaꞌoa hiki ida ikamakhirarini-ra ikahivini.

19 Hari.

Gamoa bikavaꞌibodivaraniꞌihi ida Jesus kavarani kidihojai niha nininia ogani hina.

Biniꞌaha:

—Deus athi namoniva abono oamani i — nihaꞌihi ida gamo.

20 Ni-binofiki ida abononi vara vaniꞌavini,

oniaroa gamoa binanaꞌdohiha ada Jesus vakadijaꞌari kahojaia:

—Hihida arabo namahiki Samaria kaarabonia akadijaꞌari avikhananavaki kohana Deu-ra vakanamasiviꞌiki.

Judeus kaijaꞌari vani adani haria vaniꞌabakhiara:

21 Jesua biniꞌaꞌihi ida gamo:

—Onofiki hida oathi-ra ikajariꞌdaravini.

Khaki bana ida mahi ijaꞌari Deu-ra vakanamasivijahakivini kamahini.

Ni-hihida arabo namahiki kaꞌoa Samaria kaarabonia vakanamasiviki ada Deus.

Ni-Deu-ra khai vaniꞌavini kagorani kaꞌoa Jerusaléa hojakia ijaꞌaria vakanamasiviki ada Deus jaboni.

Ibavi hahavi vania ijaꞌari Deu-ra vakanamasivivini jahaja.

22 Aꞌonivani Samaria kaaraboni kaijaꞌarini Deu-ra avakanamasivibakhiavini kabaꞌi,

ni-Deu-ra avarigaki.

Harivani judeus kaijaꞌari hari.

Deu-ra aogaki hari.

Akanamasivibakhiaki ada.

Judeus kaijaꞌari hiki ada ovari ijaꞌari-ra akavaꞌijoaki kaimoni Deua bikaronaki.

23 Khaki bana ida mahi ijaꞌari Deu-ra vakanamasivijahakivini kamahini.

Kamaꞌdaꞌiki ida mahi.

Maꞌonahai Jahaki ijaꞌari-ra vaꞌora kakodiavini,

vakaabokaja kaimoni ida Deu-ra vakanamasivikaꞌoavini niha ninini Deua binofivini.

Deu-ra vanofikaꞌoavini mani ida vakanamasivijahakivini hija bana.

Vakanamasivivini hiki vakadiabiꞌi ada Deus.

Vakadiabiꞌi vaꞌora nakoꞌdiki adani kanamasivina vihiki kaimoni.

24 Maꞌonahai ada Deus.

Nokiariha ada.

Maꞌonahai Jahakia biakodiaki ida ijaꞌari vaꞌini bodinia Deu-ra vakanamasivira kaimoni.

Nimania ida Deua binofiki ijaꞌari kanamasivina hiki vaꞌini bodinia — gamo-ra niꞌaha ada Jesus.

25 Gamoa biniꞌaha:

—Aogaki bana ada aihotahi abono khana Deua bikaronaki,

Cristo oniki.

Khana kamahini haria navaꞌisohivini hiki Deus athi hahavi nahina hini.

26 Jesua bigathanihi ida athini:

—Hovani Cristo ho,

vara ira oniꞌaja.

27 Hari.

Oniaroa,

vakhanoꞌaha adani Jesus ipohina ꞌbai-ra vakapavakarihavini vajoiꞌina.

Vakavaꞌibodivaranikarahoꞌihi ida Jesus gamo-ra vara niꞌavini.

Vakadihojai hirihi ida,

kabaꞌi ni-vananaꞌdohiki ida gamoa binofiki.

Ni-vananaꞌdohiki jaboni ada Jesus:

—Nahina mani ida gamo-ra vara iniꞌavini hija?

— ni-vaniꞌaꞌiki.

Vavaꞌi bodini oavania vara vakhaniha.

28 Oniaroa,

ajihiꞌihi ida gamo.

Binahojahahi ida kidipaha bavini,

ajoiꞌihi.

Sidaji hiꞌini vani vaꞌora vara niꞌaha adani sidaji kaijaꞌarini:

31 Hari.

Avakhanorina oadani Jesus ipohina vaniꞌaha:

—Jesus,

ꞌbaiꞌa bana.

—Iniani.

Ovahojaki ida ꞌbai avarigariki.

33 Hari.

Vaabono vakananaꞌdohikhamaꞌaha:

—Ijaꞌaria koda bivikhamaniꞌia ida ꞌbai kidimoni?

34 Jesus vaꞌora niꞌaꞌaha:

—Iniani.

Ni-nahina bivikhaki ida ꞌbai.

Hora karonakia bihonariaꞌiki ida badani bada oniꞌavini binofiki.

ꞌBai ohaki kaimoni fori hiki ida kidibadania okabadanina.

Onofiki ida badani hora honariavini hiki-ra onaꞌdiahivini.

35 Nimania ida ijaꞌari vakadivarani afobakhia:

36 Honai abonoa biavaꞌboaki ida kidikaꞌdaꞌdi karakhajahi bononi,

oniani ida kidibadani abosini-ra gathanivini hija.

Deus karakhajahi bononi aꞌdiki fori vihiki adani hora vakajariꞌdariki.

Aꞌboahi kabadanihi abosini ida mahi jaꞌdini anokhomiriki Deus kania gahinana hija.

Khai vakhanijabanaki adani ijaꞌari varakhajahaki,

ijaꞌari avaꞌboahaki khama.

Khai vaniꞌaki ida rakhajahi aꞌdiki aꞌboani abosini.

37 Kaꞌoa hiki ida varani ijaꞌaria vaniꞌabakhiaki:

38 Nimania bana hida varani namithaꞌiki avakadiania.

Vahoariha vanatxiotxioꞌimidiaki fori hiki ida Deus athi,

naothinia avanaꞌdiahiꞌihi ida vakadibadani.

Vahoariha vananamithaꞌimidiahi ida varani ohina.

Aꞌonimaina omonina-ra vara avavaniꞌavini vani avaathini-ra vakajariꞌdariha adani.

Aꞌonira okaronavini hiki ijaꞌari hora avigariki vakadiania.

Rakhajahi aꞌdiki avani aꞌboaki kabadanihi fori hiki ida omonina vaꞌora avakanamonivini — vaꞌora niꞌaha ada Jesus.

39 Oniaroa,

Samaria kaaraboni kaijaꞌarini vaipohiki Sicar sidajia vahojakia vakamithaꞌiki ida gamo athini,

vaꞌora nanamithavini hiꞌiki ida kidibadani hahavi Jesua binavaꞌisohivini hiꞌiki,

oniani ida Jesu-ra vakajariꞌdaravini hija.

40 Oniaroa,

Jesus kania avakhanoꞌaha,

vakaboaꞌidanokiha vakadiania hojara kaimoni.

Oniaroa,

mahi ꞌbamiki hojaꞌaha ada Jesus vakadiania.

41 Hojaha.

Vakamithahi ida athi,

oniani ida ijaꞌari Jesu-ra vakajariꞌdariki-ra vaꞌora anaꞌbaꞌdija.

42 Gamo-ra vaniꞌaha:

—Ni-akajariꞌdaꞌimidiaki ida Jesu-ra vara ivaniꞌavini.

Hidakabaꞌi ni-akajariꞌdaki ida kidivarani akamithaꞌiki.

Aogaki ada ijaꞌari hahavi akavaꞌijoava abono hina.

43 Hari.

Oniaroa,

Samaria kaarabonia mahi ꞌbamiki vahojaꞌaha adani Jesus Sicar sidaji kaijaꞌarini vakadiania.

Naothinia vaꞌajihiꞌaha,

Galiléia kaarabonia avajoiꞌaha.

44 Niha ada Jesus:

—Deus athi namoniva abono-ra vagathanijahakiriha adani ibavi bivavijavaki kasidajini kaijaꞌarini — nimania ida Jesus abono-ra vara vaniꞌavini athini.

45 Hari.

Galiléia kaarabonia ajoiꞌaha ada Jesus.

Kaikahina vani Jesu-ra vagathanijahakiꞌaha adani Galiléia kaaraboni kaijaꞌarini.

Vaꞌoaniaro jaboni avikhaꞌiki Jerusalém sidajia vanakanorija kaimoni ida Páscoa kaihinikani.

Jerusaléa vakanorina oadani,

vanokiꞌiki ida Jesus kabadani danoki,

oniani ida joiꞌina vakadiania vagathanijahakivini hija.

46 Hari.

Oniaroa,

Galiléia kaarabonia Caná sidajia joiꞌaha ada Jesus.

Caná sidajia hojana kari ada Jesus,

paha-ra vinho anihaꞌiki ada.

Hari.

Cafarnaum sidajia hojaha ada ijaꞌari-ra vakaꞌdaꞌdiki.

Vaꞌora honariafiahaki adani sidaji kaijaꞌarini arabo kakaꞌdaꞌdini kaimoni.

Arabo kakaꞌdaꞌdini kahonai abono ada ovari.

Kavamonikarahoha ada Cafarnaum sidaji kaijaꞌarini vakadikaꞌdaꞌdi kaisai.

47 Hari.

Ijaꞌari-ra vakaꞌdaꞌdikia bikamithaꞌihi ida Jesus varani hina Judéia kaarabonia ajihiꞌina,

Galiléia kaarabonia khanoꞌina.

Oniaroa,

Jesus kania akhanoꞌaha,

Jesu-ra kanikhariaꞌaha:

—Jesus,

kodisai kania aokhaꞌava bana mahija ianaihotavini.

Abinihana amaakariki ada kodisai.

Ada Cafarnaum sidajia hojaha.

48 Jesua biniꞌaꞌaha:

—Aꞌonivani avanokiravini oadani ida badani danoki ijaꞌari-ra navaꞌibodivaranikarahoki,

hora avakajariꞌdaki aꞌoni.

49 Ijaꞌari vakaꞌdaꞌdiva biniꞌaha:

—Jesus,

aokhajorakiva bana.

Kodisai ada abinihana amaakarira.

50 Jesua biniꞌaꞌaha:

—Ajoiꞌa bana igorania.

Ada aihotaꞌaha kadaisai.

51 Okharimananiꞌina kabaꞌi,

vikhaꞌaha adani kidihonai abono kidiania,

vaabono vaakaragararikhamaꞌaha hagihia,

vakanamoniꞌaha:

—Ada aihotaꞌaha kadaisai.

52 Vaꞌora nanaꞌdohiꞌaha:

—Safini nihafori hikajomana vani akabaravarina kamaꞌdaꞌara ada kodisai?

Vagathaniꞌihi ida kidinaꞌdohi:

—Hidanija safini aadosina vani akabaravariꞌara ada isai.

53 Isai kaabiꞌia bikavaꞌihokiꞌihi ida safini aadosiꞌina hidanija Jesua biniꞌavini:

—Aihotaki bana ada kadaisai — oniani ida makhira,

gorana kaijaꞌarini khama Jesu-ra vakajariꞌdaravini hija.

54 Judéia kaarabonia okhana viahania ada Jesus,

bada biniꞌaroniki ida badani danoki karajomihi hoarani.

Ajoina Galiléia kaarabonia bada biniꞌaꞌiki ida badani danoki karajomihi hoariha,

ijaꞌaria avigara kaimoni ada Jesus Deus kaisai hina.