2 Jerusalém kavasiribanini bodinia hojaki ida jaꞌdi khorahaki kapahaki karaho.

Ibavi onini judeus kaijaꞌari vaathia Betezata.

Betezata kamaakarikhamaki ida bakatha ijaꞌari ovilia-ra avaviꞌoivini ibavini.

Hari.

Paha iꞌoarinia hojaribanaoniki ida amokhini.

Saꞌai kahoarani hiki ida amokhini ipohini.

3 Amokhini kania viꞌomaonahaki adani ijaꞌari vaipohiki vakavamoniki.

Vahojaki adani vakamaodorohaki,

vatonorohaki,

vajoꞌo abaꞌoronisiagaki vihiki.

Vanokhaki ida paha kitxokitxoni.

4 Ni-mahi hahavi kitxokitxoki ida paha.

Deus ibavi kaijaꞌarini vania binakitxokitxoja ida paha.

Paha kitxokitxoni kamahini akiꞌdafafoniꞌimidiaki ida ijaꞌari kavamoniki hoarani,

aihotaꞌihi.

5 Hari.

Amokhini kania hojaha ada makhira joꞌo abaꞌoronisiagaki.

38 badara ipohini ni-adahaki ada makhira.

6 Oniaroa,

amokhini kania akhanoꞌaha ada Jesus,

binokiha ada omaki,

biogamanihi ida badara ipohini bivakavamoniꞌiki.

Binanaꞌdohiꞌaha:

—Iaꞌaihotani-ra inofimanija?

7 Bigathanihi ida Jesus kanaꞌdohi:

—Haꞌa,

onofiki ida oaꞌaihotana.

Paha kitxokitxoni kamahini ni-nahina hora kajoamoraki.

Oviaha-ra avavasokovini,

ni-nihanikia oabono oarahokafoniki paha kitxokitxoki kania.

Ookharafonina kabaꞌi,

hoariha miroꞌa akiꞌdafafoniki oviaha.

8 Jesua biniꞌaha:

—Gamaꞌa,

inabiiniꞌa o ijorani,

adahaꞌa.

9 Jorakia aihotaꞌaha ada makhira.

Gamaha,

jorana-ra nabiiniha,

adahaꞌaha.

Hari.

Judeus kaijaꞌari vakadiꞌakoiri kamahini vani Jesus makhira-ra anaihotaꞌaha.

10 Oniania judeus kaijaꞌari vanavaꞌisohiva abonoa vanokiha ada makhira jorana-ra kaibaꞌivini,

vaniꞌaꞌaha:

—Hidakabaꞌi akadiꞌakoiri kamahini hida.

Akadijaꞌari avikhananavaki vakadivaꞌisohihi jirikia bivaꞌaharihi ida ijaꞌari jorai-ra kaibaꞌivini akadiꞌakoiri kamahini.

Inaabarihi ida vaꞌisohihi jiriki papira hojaki.

11 Vaꞌora niꞌaha:

—Hiꞌada hora anaihotaꞌiki hora honariavini ojorana-ra okaibaꞌivini.

12 Vananaꞌdohiꞌaha:

—Hana hina makhira ira honariaja ijorani-ra ikaibaꞌivini?

13 Hari.

Ni-biogaꞌiki ada makhira anaihotana hiꞌiki.

Makhira-ra anaihotavini naothinia ajihijorakiꞌaha ada Jesus,

ijaꞌari vaipohiki vahararana okhamiꞌaha,

oniani ida makhira aihotaꞌikia biogaravini hiꞌia.

14 Oniaroa,

Deu-ra khai vaniꞌavini kagorani kavasiribanini bodinia okhajakosiꞌaha ada Jesus,

biakaragajakosiꞌaha ada makhira bianaihotaꞌiki,

biniꞌaha:

—Iabono akavaꞌigairi bana.

Iaꞌaihotaꞌiki i.

Hariꞌa hojai asohirikia kahojaijana.

Hojai nikia ikahojaiꞌianahi;

ipohimajani arafiaki bana i — Jesus biniꞌaꞌaha.

15 Oniaroa,

ajihiꞌaha ada makhira.

Judeus kaijaꞌari vanavaꞌisohiva abono vakadiania okhaha,

vaꞌora navaꞌisohiꞌaha:

—Jesus vani ada hora anaihotaꞌara — vaꞌora niꞌaha.

16 Hari.

Vaihamahiꞌaha.

Vakadiꞌakoiri kamahini Jesua bivakaajiravini mani ida vanajahariharivini vanofivini hija.

17 Jesus kania vikhamiꞌaha.

Jesua bigathaniꞌihi ida vaathi:

—Kodiabiꞌi vani vaꞌora kajoamorahaꞌoadahara adani ijaꞌari.

Hovani jaboni vaꞌora okajoamorahaꞌoadahaki adani.

Kodiabiꞌi ada Deus.

18 Jesus kavarani vaꞌora naihamahiꞌianaha adani judeus kaijaꞌari vanavaꞌisohiva abono.

Vaꞌora naihamahibiininiki ida vakadiꞌakoiri kamahini Jesua bivakaajiravini.

Vaꞌora naihamahiꞌianaki ida Deua kaabiꞌina-ra kahivini.

Deus hina-ra kahivini vaꞌora naihamahiꞌahapikiꞌaha,

oniani ida Jesu-ra vanaabinivini-ra vanofivini hija.

19 Hari.

Oniaroa,

Jesua bigathaniꞌihi ida judeus kaijaꞌari vanavaꞌisohiva abono vakadiꞌaathidanoarari:

—Kaꞌoa hiki hida kodivarani vara aꞌonira oniꞌavini hiki bana.

Deus kaisai ohina kabaꞌi,

ni-hovani oa okaabokaki ida badani Deua bihonariaki.

Bada oniꞌaki ida badani kodiabiꞌia bada biniꞌavini onokiki.

Badani hoariha ni-bada oniꞌaki.

Onivani fori hija hida kodibadani.

Badani hahavi kodiabiꞌia bada biniꞌaki,

kidisai ohina mani ida bada oniꞌavini hija jaboni.

20 Kodiabiꞌi hora nakaidivavini mani ida kidibadani bada biniꞌakia hora nanokiahihahavivini hija.

Hora nanokiahivini hiki bana ida badani jahani arafiaki bada oniꞌaki kaimoni.

Kodibadani aꞌonira kaꞌbaraki bana aꞌoni.

21 Kodiabiꞌi kabadani hiki ida ijaꞌari abiniꞌiki-ra anahokivini,

vaꞌora noꞌavini hiki mahi jaꞌdini anokhomiriki kidiania.

Kodibadani jaboni kodiabiꞌi kabadani fori hiki.

Ijaꞌari hana hini-ra mahi jaꞌdinia onoꞌavini-ra onofihi;

onoꞌahi.

22 Ni-kodiabiꞌia bivahonariahiki bana ida ijaꞌari hahavi vakadihojai abosinia.

Kodiabiꞌi hora noꞌavini hiki ida ogahai danoki okaabokaja kaimoni ida vakadihojai onasohivini,

vaꞌora ohonariafiahavini afohanana Ibavi Jahakaꞌoaki Ibavi Jaharikaꞌoaki hikia avikhana.

23 Deua binofiki ida ijaꞌari hora vavavaꞌihavini,

oniani ida vakadihojai onaabosivinia hora honariavini hija bana.

Binofiki ida hora vavavaꞌihavini,

Deu-ra vavavaꞌihavini vani fori hini.

Ijaꞌari hora kaipahirihi;

ni-Deu-ra kaipahiki jaboni.

Ijaꞌari hora kaipahirihi;

ni-bikaipahiki jaboni ada kodiabiꞌi hora karonaꞌiki.

24 Kaꞌoa hiki hida kodivarani.

Ijaꞌaria bikamithahi ida oathi,

binaabahi,

bikajariꞌdariha ada Deus hora karonaꞌiki,

oniani ida mahi jaꞌdini anokhomiriki-ra vahojavini hija.

Ijaꞌari vakadihojai asohiriki abosini kamahini ni-vahararana hojajanaki ida ijaꞌari hora vakaijokaki.

Ni-hagihi Ibavi Jaharikaꞌoakia okhakia adahajanaki ida ijaꞌari hora vakaijokaki.

Kamaꞌdaꞌiki ida kidimahi anokhomiriki Deus kania.

25 Kaꞌoa hiki hida kodivarani.

Khaki ida mahi,

kamaꞌdaꞌiki ida mahi hovani Deus kaisai ho,

vaꞌora vara oniꞌara kaimoni adani ijaꞌari vaabiniki fori vihiki.

Deu-ra avigaravini mani ida vaabiniki fori vaꞌora nihaja.

Oathi-ra vanaabaha;

vaꞌora oanahokiha,

kamaꞌdaja kaimoni ida vakadimahi jaꞌdini anokhomiriki.

26 Kodiabiꞌia binakamaꞌdaki ida ijaꞌari kamahi jaꞌdini anokhomiriki.

Kodiabiꞌi kabadani fori hiki jaboni hida kodibadani.

Kodiabiꞌi hora honariabakhiavini hiki ida ijaꞌari kamahi jaꞌdini anokhomiriki-ra onakamaꞌdavini.

27 Kodiabiꞌi hora navaꞌisohiꞌboꞌdavini:

— Kodisai,

ijaꞌari hahavi vakadiꞌaajo ihini mani ida vakadihojai inasohivini ira ohonariavini hija.

Kadabadani hiki ida ijaꞌari hahavi vakadihojai jahaki jahariki abosini nahina hinia vaꞌora inavaꞌisohivini — hora niꞌaꞌaha ada kodiabiꞌi.

28 Hariꞌa aꞌonira kaꞌbarava hida kodivarani.

Khaki bana ida mahi ijaꞌari kohana hahavi oathi-ra vakamithavini kamahini.

29 Vavakaꞌdamahaki kania vikhaonanihahaviki bana adani ijaꞌari vaabiniꞌiki.

Hiꞌadani ijaꞌari badani jahakia vakabadanibakhiaki avahokiꞌina Deus kania avikasiki bana adani,

kidiania vahojara kaimoni mahi anokhomirikia.

Vahoariha vani adani Jahari kahojaia vakahojaibakhiara avahokiꞌiki bana adani jaboni.

Vaꞌora ohonariavini hiki Ibavi Jaharikaꞌoakia avikhaꞌina.

30 Asia vara niha ada Jesus:

—Ni-hovani kaꞌoa okaabokarihi hida ijaꞌari kahojai-ra onasohivini kabadanihi.

Kodiabiꞌi vani hora navaꞌisohivini hija ida ijaꞌari kamahi jahani jaharini,

oniani ida nahina binofiki-ra onasohivini hija.

Ni-hovani kaꞌoa oabono ohonariaki,

onaabaki ida hora karonaꞌiki athi,

oniani ida ijaꞌari vakadihojai abosini-ra onasohivini hija.

31 Oabono vara ovaniꞌahi Deus hora karonavini,

ni-avarigaki hida kodivarani kaꞌoa hini kaꞌoa hirini.

32 Hojaꞌiki ada hoariha Deus hora karonavinia kavaraniki.

Oogaki ida kidivarani kaꞌoa hini vara hora vaniꞌavini.

33 Aꞌonivani vaꞌora avakaronaꞌiki adani avaathini avikhava abono João Batista kohana kania.

Kaꞌoa hiki ida kidivarani vara hora vaniꞌajoravini.

34 Ijaꞌari hora nanamitharavini kabaꞌi,

hovani oogaki ida varani kaꞌoa hini oabono vara ovaniꞌavini.

Aꞌonivani avanofiki ida ijaꞌari hoariha vara hora vaniꞌavini,

oniani ida João Batista kavarania aꞌonira onavaꞌihokivini hiꞌia.

Aꞌonira oakavaꞌijoavini kaimoni mani ida João Batista kavarani kaꞌoa hini-ra okahivini hija.

35 Lamparina haꞌdini vagani fori hiki ida João Batista kavarani.

Kidivarani avakamithavini oadani lamparina vagani kania avaadahaki fori avihiki aꞌoni.

Mahi ipohiriki kidivarani khai aꞌonira niꞌaꞌiki aꞌoni.

36 Ijaꞌari João Batista kavarani-ra vakamithaꞌikia avigapaꞌitxihi ida Deus hora karonaꞌavini.

Hari.

Vara aꞌonira oniꞌavini hiki bana ida kodibadani danoki,

avarigaja kaimoni ida Deus hora karonaꞌavini.

Kodiabiꞌi hora noꞌavini hiꞌiki ida danona,

okaabokaja kaimoni ida badani danoki hora honariavini hiꞌiki.

Badani danokia ijaꞌari-ra onanokiahivini,

oniani ida kodiabiꞌi hora karonavini-ra avarigavini hija.

Deus hora kakodiarija vaha;

ni-okaabokaki ida badani danoki-ra onamonahavini.

37 Kodiabiꞌia jaboni vara bivaniꞌaki ida hora karonaꞌavini kavaranihi.

Aꞌonivani ni-avakamithaꞌiaki ida vara nina,

ni-avanokiꞌiaki ida nokho.

38 Avakadivaꞌibodivarania hojaja vaha ida kodiabiꞌi athi;

oathi-ra avakapoarimanihi vaha.

Hora avakajariꞌdahi,

avakajonihi jaboni ida kodiabiꞌi hora karonavini varani hini.

39 Deus athi kapapirania hojaki jaboni ida Deus hora karonaꞌavini kavaranihi.

Vada avaniꞌabakhiaki ida Deus athi papira hojaꞌiki.

Avakavaꞌibodivaraniki ida papira athini aꞌonira navaꞌisohivini hiki mahi jahaki jaꞌdini anokhomirikia avagahinaja kaimoni.

Deus athi papira hojaꞌiki hora vara vaniꞌaꞌiki ho.

40 Kabaꞌi,

ni-kodiania avikhani-ra avanofiki,

avagahinaja kaimoni mahi jahaki jaꞌdini anokhomirikia.

41-42 Aꞌonira oogaki ho niha avakhanikhanini.

Deus vaꞌi-ra avavajahavini-ra avanofiki aꞌoni.

Oogaki ida avavaꞌini bodinia Deu-ra avanofiravini,

oniani ida khai hora avaniꞌaꞌimarinivini-ra onofiravini hija.

43 Hora rakhaki avakadiania kodiabiꞌi hora karonaꞌavini.

Ni-hora avagathaniki.

Khaki vahabini ida ijaꞌari hoariha avakadiania Deua bikaronariki,

avagathaniki ada ovari.

44 Hojaki ada Deus hoarana,

ni-hojaki ada hoariha.

Ni-avanofikaꞌoaki afodoro ida hojai Deua bivajahakia avakahojaini,

Deus avakadihojai jahani-ra kahira kaimoni.

Avanofiꞌoamanija ida vahoariha avajahakaꞌoani-ra vakahivini.

Avavajahaꞌoamanija hida varani nikia avaabononi avakaniꞌakhamavini.

Nini oadani ida avakadivaꞌibodivarani,

ni-avakaabokaki ida hora avakajariꞌdaravini.

45 Avakavaꞌibodivaraniꞌimariniki ida Moisés kohana kahonari jiriki-ra avanaabavini.

Ijaꞌari kahojai abosini kamahini ni-hovani Deus viaha aꞌonira oanaathidanoarariki bana honari jiriki-ra avanaabaravini.

Moisé-ra avavakaijokavini kabaꞌi,

ovari aꞌonira anaathidanoararira Deus viaha athi avanaabaravinia.

46 Moisés athi-ra avanaabaki avaabononi avavanihavini.

Ni-avanaabaki.

Moiséa binajirijoraꞌiki ida varani ohina.

Moisés athi-ra avakajariꞌdarija vaha;

ni-oathi-ra avakajariꞌdaki jaboni.

47 Avakajariꞌdaki ida Moisés vara hora vaniꞌaꞌboꞌdavini papira jirikia,

oniani ida kodivarani-ra avakajariꞌdavini hija.