Jesus ꞌbaia vaꞌora noꞌaki adani ijaꞌari vaipohiki
6
Hari.
Oniaroa,
Galiléia kaꞌdakonia avakakafianiꞌaha adani Jesus.
Galiléia kaꞌdakoni onini hoariha Tiberíades kaꞌdakoni.
2 Ijaꞌari vaipohikia vavaipohihaꞌaha ada Jesus.
Ijaꞌari vakavamoniki-ra vaꞌora anaihotavini vanokibakhiavini mani ida vavaipohihavini hija.
Jesus alimenta uma multidão (João 6:1-15)
3 Arabo namahikia avigaimoriꞌaha adani Jesus,
kidipohi khama.
Vaꞌoaniaro miroꞌa avakhanomoriꞌaha,
vavithionahaꞌaha.
Vigaimorisiagaꞌaha adani ijaꞌari vaipohiki.
4 Amaakariki ida Páscoa kaihinikani amonahani kamahini.
5 Jesus vada niribaniꞌaha,
vaꞌora nokiꞌaha adani ijaꞌari vaipohiki vigaimorisiagaki vamaakariꞌina,
oniania binanaꞌdohiꞌaha ada Filipe:
—Filipe,
hanaja vania koda bana ꞌbai-ra akapavakarija hihadani ijaꞌari hahavi-ra vaꞌora anoꞌavini kaimoni?
6 Jesua biogaki ida niha ninini vaꞌora noꞌavini adani ijaꞌari ꞌbaia.
Binofiki ida Filipe-ra kaijoꞌavini,
oniani ida binanaꞌdohivini hija.
7 Filipea bigathaniꞌihi ida kidinaꞌdohi:
—Ni-hanaja pão-ra aakapavakarihaki vakadimoni.
Ni-arajomaki ida 200 hiki jiniro ꞌbaꞌdani pão-ra akanaabosivini kaimoni hini,
vagahinara kaimoni pão kabobini kapaꞌitxia afohanana — Jesu-ra niꞌaꞌaha.
Mahi hoarani kavabadanini abosini fori hiki ida jiniro ꞌbaꞌdani prata amonahaki hoarani.
8 Hari.
Vara niha ada Jesus ipohina André oniki.
Simão kakajoꞌo ada André.
Biniꞌaha:
9 —Jesus,
hada hojaha isai ahararana,
pão saꞌai kahoarani kihiki-ra kavahojaki.
Pão kakaidivariki hida cevada kaoniki.
Abaisana ꞌbamiki-ra vahojaki hada.
Ni-ijaꞌari hahavi hida vahojaki-ra vaꞌora anarajomaki hada abaisana isai vahiꞌana.
10 —Vaꞌora vahonariaꞌa hadani ijaꞌari vaipohiki vavithionahana — Jesus vaꞌora niꞌaha adani ipohina.
Hojaki ida arabo namani kahogoini itxani vavithionahara kaimoni.
Ijaꞌari vahararana vahojaki adani makhira 5 mil vihiki vaipohina.
11 Jesua biagathiꞌihi ida pão,
Deu-ra niꞌaha:
—Deus,
ivani ijahaki i,
pãoa haria inoꞌaꞌiki i — niha ada Jesus.
Naothinia biakarakhaꞌihi ida pão kidipohia vakaravinaja kaimoni.
Ijaꞌari vavithionahaki-ra vaꞌora vanoꞌafiahaꞌaha.
Onivani fori hiꞌianaha ada abaisana.
Deu-ra khai niꞌavini naothinia biarakhaꞌaha ada abaisana,
kidipohia vakavagahinaifiahaꞌaha.
12 Viꞌbaihahaviꞌaha vavaꞌi naꞌbihahavimaniꞌaha.
Vaakharahaꞌina naothinia ipohina-ra niꞌaꞌaha ada Jesus:
—Vakanajoroni ida pão akahabarini kabobihani,
abaisana ahabarina hiki.
Ni-onofiki ida ꞌbai ahabarini kavithimani — vaꞌora niꞌaha ada Jesus.
13 Oniaroa,
vanajoroniꞌihi ida ꞌbai ahabarini.
Vanajiꞌbijiꞌbihaꞌihi ida 12 soꞌoro pão akahabarinia.
14 Ijaꞌari vajoronikia vanokiꞌihi ida badani danoki karajomini Jesua bada biniꞌaꞌiki,
oniani ida vaabono vakaniꞌakhamavini hija:
—Hada vani hihada Deus athi namoniva abono anokhaki.
Moisés kohana vara bivaniꞌajoraꞌiki ada ovari ijaꞌari vakadiania khaꞌiki — vakhaniha.
15 Vanofiki ada Jesus vakadiarabo kakaꞌdaꞌdini hina,
oniani ida Jesu-ra avavadadamivini-ra vanofivini hija.
Ni-Jesua binofipaꞌitxiki.
Biogaki ida vagathivini vanofivini,
oniani ida arabo namahiki kania Jesus hoarana-ra aragaimoriꞌianaja.
Jesus adahaki paha namania
16 Hari.
Oniaroa,
mithani vaivaini vani avikharafoniha adani Jesus ipohina.
Jesus anda na água (João 6:16-22)
17 Vakiꞌdamaha,
avakajoifianiꞌaha,
Cafarnaum sidaji-ra avakanikhahavini.
Vakavanamina kabaꞌi,
vakajominiꞌaha.
Ni-vakadiania khaꞌiaki kaho ada Jesus.
18 Oniaroa,
jorakia kaikahihi ida sirisiriki danoki,
kanaꞌbahaki ida komini.
19 Arabo-ra vakananapajahivini vani avakanokiꞌaha ada Jesus paha namania adahana,
vaꞌora kanamaakariꞌaha.
Vakanokiꞌaha,
vaꞌora kanaimahidaꞌaha.
20 — Hariꞌa vaimahida.
Hovani Jesus ho — niha ada Jesus.
21 Oniaroa,
khai vaniꞌahi ida Jesus kiꞌdamaꞌina vakadiania.
Jorakia avakakhanomisiꞌaha avakanikhaki kania.
Avakoꞌomisiha,
vigaimorahaꞌaha.
Ijaꞌaria ni-avigaki ada Jesus hanaja okhaꞌina
22-23 Hari.
Oniaroa,
nobanija asia vahojaroniha adani ijaꞌari vaipohiki Jesus vaꞌora ꞌbaia noꞌaꞌiki.
Avakogaki ida kanava kahoarani kaꞌoa adamia kahojani viꞌbaina kabaꞌi.
Ijaꞌari vaipohikia avigaki ida Jesus ipohina vakaꞌajihiꞌina kanava kahoarania,
ni-kiꞌdamana vanokiki ada Jesus vakadiania.
Arabo vania vanahojahavini avigaha.
Kaꞌafokajomani vani ni-ijaꞌaria avigaki ada Jesus hanaja okhaꞌina.
Ijaꞌari vaipohikia asia vakadiania hojaki vavanihaha ada Jesus.
Kidipohi vakadiani vania okhaꞌara ada.
Vahojaronikia vanakoꞌdiꞌaha,
ni-vakaragaꞌiki.
Vanakoꞌdivini kabaꞌi vakaikahiꞌaha adani ijaꞌari vahoariha Tiberíades sidajia vikhaki.
Kaipohiki ida vakadikanava.
Aviꞌomisiꞌaha adani ijaꞌari vaipohiki,
Jesus Deu-ra khai niꞌavini kania ijaꞌari-ra vaꞌora ꞌbaia noꞌavini ibavini maakarinia.
O pão da vida (João 6:22-71)
24 Ijaꞌari vaipohiki vavaꞌi-ra kadi hiki ida Jesus hojajanarina.
Jorakia vakiꞌdamaꞌaha kanava afohanana avikafianisiagara kaimoni,
Jesu-ra vanakoꞌdihaꞌavini nobanija Cafarnaum sidajia.
ꞌBai havahaki ijaꞌari kamahi anokhomiriki ada Jesus
25 Hari.
Oniaroa,
avakhanofianisiagaha adani ijaꞌari vaipohiki.
Vakaragaꞌaha ada Jesus nobanija,
vananaꞌdohiꞌaha:
—Jesus,
nihaforija ikaikahija hida?
26 Jesus vaꞌora niꞌaha:
—Kaꞌoa hiki hida varani.
Hora avanakoꞌdivini hiki ida pão-ra avakahaꞌavini,
avavaꞌini naꞌbiꞌini.
Ni-kodibadani danoki-ra avarigavini-ra avanofivini hirihi hida hora avanakoꞌdihavini hija.
Pão-ra oakanaipohivini kabaꞌi,
ni-avarigaki ida Deus hora karonavini okhana avakadiania.
27 Ni-hovani kaꞌoa hora avanakoꞌdiharihi.
ꞌBai vani ida avanakoꞌdihaja kodiania.
Ni-aꞌboꞌdaki ida ijaꞌari vakadiꞌbai vahaki.
Hojaki ida ꞌbai hoariha ijaꞌari kamahi-ra ananokhomiriki.
Bada vaniꞌa mahija ꞌbai vara ovaniꞌaki-ra avagathanivini,
avakadimahi-ra ananokhomiriki kaimoni.
Hovani ijaꞌari hahavi vakadiꞌaajo ho.
Kodiabiꞌi ada Deus.
Hora niꞌaꞌaha:
“Kodisai,
ira okaronavini hiki ijaꞌari vakadiania
vaꞌora inoꞌara kaimoni
mahi jaꞌdini
anokhomirikia”
Hora niꞌaꞌiki ada.
Hora karonavini mani ida aꞌonira onoꞌavini hija bana ꞌbai ijaꞌari kamahi-ra ananokhomirikia.
28 Hari.
Jesu-ra vananaꞌdohiꞌaha:
—Nahina mani ida Deua binofija bada aniꞌavini,
agahinaja kaimoni ꞌbai vara ivaniꞌakia?
29 Jesus vaꞌora niꞌaꞌaha:
—Iniani,
ni-nahina-ra bada avaniꞌarihi.
Deua binofiki ida hora karonaꞌavini avakajariꞌdaravini.
Binofiki ida hora avavakaijokavini.
Nimania ida Deua binofiki.
30-31 Vaniꞌaha:
—Amasia vaadahana kari adani akadijaꞌari avikhananavaki,
vahabakhiaki ida maná.
Vakadikiivi ida maná.
Deus athi kapapirania hojaki hida athi:
“Ovari vaꞌora noꞌavini hiki
ida ꞌbai nama gariki
vahaki kaimoni.”
Hari.
Moisés kohana vaꞌora noꞌavini hiꞌiki ida maná nama gariꞌiki,
akadijaꞌari avikhananavakia vahaki kaimoni.
Anokivini anofiki ida badani danokia ikabadanini kidibadani danoki fori hiki,
aogaja kaimoni ida Deus ira karonaꞌavini,
Moisé-ra karonaꞌavini vani fori ihini.
Hana hini badani danokia haria inanokiahihi?
Ni-ira akajariꞌdajanaki.
32 Jesua bigathanihi ida vaathi:
—Kaꞌoa hiki hida kodivarani.
Moisés kohana hiriha ada maná vaꞌora noꞌara.
Deus vani ada vaꞌora noꞌaꞌara.
Maná hirihi ida ꞌbai kaꞌoa hini nama gariki.
Kodiabiꞌi vani ijaꞌari-ra vaꞌora noꞌavini hija ida ꞌbai kaꞌoa hini kidiania gariki.
33 ꞌBai kaꞌoa Deua bikavagahinaiꞌiki ada ovari nama gariꞌiki.
Ovaria bianajaꞌdiki ida ijaꞌari kamahi anokhomiria kaimoni — vaꞌora niꞌaha ada Jesus.
34 Vaniꞌaha:
—Jesus,
haria noꞌabakhia hihida ꞌbai iniꞌakia.
35 Jesus vaꞌora niꞌaha:
—Hovani oa ꞌbai havahaki ijaꞌari kamahi anokhomiriki ho.
Ijaꞌari kodiania abononi gahinai nihahi;
ni-vaiꞌamijanaki,
vaꞌini naꞌbihahaꞌoadahaki fori hiki ida.
Ijaꞌari hora kajariꞌdariki,
hora vakaijokaki,
ni-kanabidini akaaforajanaki fori hiki.
36 Hari.
Aꞌonira onavaꞌisohivini hiki,
hora avanokivini kabaꞌi,
ni-hora avavakaijokaki.
37 Kodiania vikhahahaviki bana adani ijaꞌari kodiabiꞌi hora noꞌavini vihiꞌiki.
Ni-okajoniki ida ijaꞌari kodiania khaki abononi gahinai nihavini-ra nofiki.
38 Nama Deus kania ohojana ogariꞌihi.
Hora rakhaki badani Deua binofikia okabadanija kaimoni.
Badani onofikia okabadanina hirihi hida hora rakhaja.
39 Kodiabiꞌia binofiki vaꞌora oakadavaꞌajahakivini adani ijaꞌari hora noꞌavini vihiꞌiki.
Hora karonakia ni-binofiki ida ijaꞌari hoarani akamadaki okharini kidiania.
Binofiki ida ijaꞌari kahojai abosini kamahini Deus hora noꞌavini vihiꞌiki-ra vaꞌora oanahokihahavivini,
vavahojaja kaimoni ida mahi jaꞌdini anokhomiriki Deus kania.
40 Kodiabiꞌi vaꞌora nofiki adani Deus kaisai ohina-ra vakajariꞌdariki mahi anokhomiriki-ra vavahojavini,
oniani ida ijaꞌari kahojai abosini kamahini hora vavakaijokaki-ra vaꞌora oanahokivini hija Deus kania — vaꞌora niꞌaha ada Jesus.
41 Oniaroa,
judeus kaijaꞌari vanavaꞌisohiva abonoa vavajahariki ida Jesus abono-ra vara vaniꞌavini:
“Hovani oa ꞌbai havahaki
ijaꞌari kamahi
anokhomiriki ho
nama gariki ijaꞌari
vakadiania ho.”
Nimania ida Jesus kavarani vavajahariki.
42 Oniania vaabono vakaniꞌakhamaꞌaha afohanana:
—Hihada Jesus José kohana kaisai hada.
Vaꞌora aogavini kabaꞌi adani kidiabiꞌi,
kidiamia vihiki,
nama garina-ra kahiꞌaha.
Ni-nama gaririha ada.
43 Jesus vaꞌora niꞌaha:
—Hariꞌa kodivarani asohirini-ra vakahijana.
44 Kodiabiꞌi hora karonaki ijaꞌari-ra baranaharavini oadani,
ni-ijaꞌari kaꞌoa bikaabokaki ida kodiania abononi gahinai nihavini.
Ijaꞌari kahojai abosini kamahini oanahokiki bana ida ijaꞌari abononi gahinai nihaki kodiania,
bivahojaja kaimoni ida mahi jaꞌdini anokhomiriki.
45 Deus athi namoniva abono kohana vaathi kapapirania hojaki hida athii:
“Deus vaꞌora kaꞌojomoꞌiki bana adani ijaꞌari
hahavi.”
Nimania ida papira athini.
Ijaꞌaria bikamithahi ida kodiabiꞌi kaꞌojomoꞌihi athini,
binaabahi jaboni,
oniani ida kodiania ijaꞌari-ra rakhaja,
abononi gahinai nihaja kaimoni.
46 Aꞌonira onavaꞌisohivini hiki:
ni-ijaꞌaria binokiꞌiaki kaho ada kodiabiꞌi.
Hovani ohoarana onokiꞌara ada kodiabiꞌi,
kidiania okhaꞌiki ho.
Ni-ijaꞌari hoariha binokiki.
47 Kaꞌoa hiki hida varani.
Ijaꞌari kodiania abononi gahinai nihaꞌikia bivahojaki ida mahi jaꞌdini anokhomiriki.
48 Hovani oa ꞌbai havahaki ijaꞌari kamahi anokhomiriki ho.
49 Asia vara niki ada Jesus:
—Amasia akadijaꞌari avikhananavakia vahaꞌiki ida maná.
Maná-ra vahavini kabaꞌi,
vaabiniꞌiki adani.
Anokhomiki ida vakadimahi.
50 Deus kania gariki ida ꞌbai havahaki ijaꞌari kamahi-ra ananokhomiriki.
Ijaꞌaria bihahi;
ni-anokhomiki bana ida kidimahi Deus kania.
51 Hovani oa ꞌbai havahaki ijaꞌari kamahi anokhomiriki.
Deus kania ohojaꞌina,
ogariꞌiki ho ijaꞌari vakadiania.
Ijaꞌaria bihahi;
ni-anokhomiki ida kidimahi Deus kania nama.
Oimana mani hida ꞌbai havahaki ijaꞌari kamahi-ra ananokhomiriki.
Oabono ovaꞌahaki bana ho oabinina,
ijaꞌaria vavahojaja kaimoni ida mahi jaꞌdini anokhomiriki — vaꞌora niꞌaha ada Jesus.
52 Jesus kavarani vaꞌora naihamahiꞌaha,
vaabono vakaniꞌakhamaꞌaha:
—Ni-bikaabokaki ida haria noꞌavini imana arihaki kaimoni — vaabono vakaniꞌakhamaꞌaha.
53 Jesus vaꞌora niꞌaꞌaha:
—Kaꞌoa hiki hida kodivarani.
Hovani ijaꞌari hahavi vakadiꞌaajo ho.
Ijaꞌaria biharihi hida oimana,
biꞌavirihi jaboni hida oamana;
ni-bivahojaki ida mahi jaꞌdini anokhomiriki.
54 Ijaꞌaria bihahi hida oimana,
biꞌavihi jaboni hida oamana,
oniania bivahojahi ida mahi jaꞌdini anokhomiriki,
oniani ida ijaꞌari kahojai abosini kamahini ijaꞌari-ra oanahokivini hija bana Deus kania — vaꞌora niꞌaha ada Jesus.
Vakamithavini kabaꞌi ida Jesus abono-ra kavarajomivini,
ni-avigaki ida kidivarani nahina hini.
Jesua bikavarajomiki ida ijaꞌari abononi gahinai nihaki kidiania,
imana havahani,
amana aavahania,
Jesua bianajaꞌdija kaimoni ida kidimahi.
55 Asia vara niki ada Jesus:
—Kaꞌoa hiki hida oimana ijaꞌari bihaki kaimoni.
Kaꞌoa hiki hida oamana ijaꞌaria biꞌaviki kaimoni.
Ijaꞌari oimana-ra hahi;
oamana-ra avihi;
ni-kidimahi anokhomijanaki.
56 Kodiania akaramisiꞌiki ida ijaꞌari oimana-ra haki,
oamana-ra aviki.
Kidiania oakaramisiꞌiki ho jaboni.
57 Hora karonaꞌiki ada kodiabiꞌi.
Ovani oa abono-ra nahokihahaꞌoadahara ada.
Hokina vani fori ohija jaboni.
Kodiabiꞌi hora noꞌavini hiki hida kodimahi hidiaja ovahojaki.
Onivani fori hija jaboni ida ijaꞌari oimana-ra haki.
Kodiania akaramisini mani ida kidimahi nahokihahaꞌoadahani hija.
58 Nimania hida ꞌbai havahaki ijaꞌari kamahi anokhomiriki Deus kania nama hojaki gariꞌiki.
ꞌBai havahaki ijaꞌari kamahi anokhomiriki fori hiriki ida maná akadijaꞌari avikhananavakia vahaꞌiki.
Vahavini kabaꞌi,
vaabiniꞌiki adani.
Anokhomiꞌiki ida vakadimahi.
Ijaꞌari ꞌbai havahaki ijaꞌari kamahi anokhomiriki-ra hahi;
ni-kidimahi anokhomiki — niha ada Jesus.
59 Hari.
Cafarnaum sidajia hojaha ada Jesus,
vaꞌora kaꞌojomoꞌiꞌiki adani judeus kaijaꞌari Deu-ra vara vaniꞌavini kagorania vahojaki.
Mahi jaꞌdini anokhomiriki varani hini hida
60 Hari.
Oniaroa,
Jesus kavarani-ra vakamithaꞌaha adani ipohina vaipohiki,
vaabono vakaniꞌakhamaꞌaha:
—Ni-aogaki ida kidiꞌojomoꞌihi athini nahina nini.
Ni-jahaki ida kidivarani haria niꞌavini hiꞌiki.
Hariꞌa akapoariva hida athi — vakhaniha.
61 Ni-nahina vaniꞌaki ada Jesus,
kabaꞌi biogaki ida kidivarani vavajaharavini vaabono vara vakaniꞌakhamavini,
oniani ida vaꞌora nanaꞌdohivini hija:
—Avanofimanija ida hora avanahojahavini kodivarania?
62 Hovani ijaꞌari hahavi vakadiꞌaajo ho.
Kodivarani-ra avakajariꞌdaki aꞌoni.
Oibavi nama oajoisina-ra avanokija vaha;
asia mani koda hora avakajariꞌdaja?
63 Maꞌonahai Jahaki vani ada ijaꞌari kamahi-ra anajaꞌdiꞌara.
Ni-ijaꞌaria bikaabokaki ida kidimahi-ra anahokihaꞌoadahavini.
Kodivarani vara aꞌonira oniꞌavini hikia bivikhaki ada Maꞌonahai Jahaki avakadiania,
ovania bianahokihaꞌoadahaja ida avakadimahi.
64 Kabaꞌi,
vahojaki adani hora vakajariꞌdaki avakadiania — vaꞌora niꞌaha ada Jesus.
Jesus vaꞌora ogajoraki adani ijaꞌari vajariꞌdaki.
Biogajoraki ada hana hina arakhana hiki kaimoni.
65 Hari.
Asia vara niki ada Jesus:
—Avakadiania vahojaki adani hora vakajariꞌdaki,
oniani ida aꞌonira oniꞌavini hiꞌia:
Kodiabiꞌi ijaꞌari-ra baranaharavini oadani,
ni-ijaꞌari kaꞌoa bikaabokaki ida kodiania abononi gahinai nihavini — vaꞌora niꞌaha ada Jesus.
66 Hari.
Oniaroa,
Jesus ipohina vaipohiki vajoiribaniꞌaha,
ni-vavaipohihajanaki.
67 Oniania Jesus vaꞌora nanaꞌdohiꞌaha adani 12 vihiki vaipohina:
—Aꞌonivani avanofimanija ida avaꞌajihini jaboni?
68 Simão Pedroa biniꞌaꞌaha:
—Iniani,
Jesus.
Hana hini koda haria vasohiki hari?
Ivani haria inanamithavini hiꞌia ida ijaꞌari kamahi jaꞌdini anokhomiriki varani hini,
agahinana hija kaimoni.
69 Deus kahonai abono jahakaꞌoaki ihini-ra akajariꞌdarihi.
Aogaki ida Deus ira nagathogathovini akadikaꞌdaꞌdi kaꞌoa ihija kaimoni.
70 Jesua bigathanihi ida athi:
—Aꞌonira onagathogathoꞌiki ho,
12 avihiki.
Jahari ada hoarana avakadiania hojaki.
71 Jesua vara bivaniꞌajoraki ada ipohina Simão Iscariotes kaisai Judas oniki.
Ovania bana biarakhara ada Jesus vahoariha vasaꞌa kabodinia.