Igamina kaꞌoa vihikia vakajariꞌdaki ada Jesus
7
Hari.
Oniaroa,
vakadivarani naothinia Galiléia kaarabonia aadahaoniꞌaha ada Jesus.
Judéia kaarabonia Jesu-ra naadahajanariki judeus kaijaꞌari vanavaꞌisohiva abonoa vanaabinivini vanofivini.
2 Ni-ipohijanaki ida mahi judeus kaijaꞌari ihinika hoariha-ra vanamonahavini Deu-ra khai vaniꞌara kaimoni.
8 mahi ipohini vakaihinikana oadani vavadina baniniaja,
vakavaꞌihokija kaimoni ida vakadijaꞌari avikhananavaki vavadina amokhinia amasia avaadahaonina oadani.
Ihinika onini Amokhini Kaihinikani.
Líderes judeus querem matar Jesus (João 7:1-24)
3 Oniaroa,
Jesus igamina kaꞌoa vaniꞌaha:
—Aajo,
hihida ibavia ajihiꞌa.
Judéia kaarabonia okhaꞌa mahija kadaipohi vahoariha kadabadani danoki-ra vanokivini.
4 Ijaꞌaria binofihi ida vahoariha vaipohikia kidibadani avigavini,
ni-bianahojaki ida badani vanokiria kaimoni.
Badani danokia ikabadanibakhiaki i,
vanokiva ida bada iniꞌaki — vakhaniha.
—Ni-khaꞌiaki kaho ida mahi asohiki ookhana kamahini ihinika kania.
Mahi hana hini avanofihi,
asohiki ida avarikhani.
7 Aꞌonira vavajahaki adani ijaꞌari Deu-ra vanofiriki.
Hovani hora vavajahariki.
Vaꞌora onavaꞌisohibakhiavini hiki ida vakadihojai jahariki,
oniani ida hora vavajaharavini hija.
8 Aꞌonimiroꞌa avigaimoriꞌa ihinika amonahani ibavini kania.
Ni-oogaimorina-ra onofiki kaho.
Ni-kaikahiꞌiaki kaho ida mahi ookhana kaimoni.
9 Vara vaꞌora niꞌavini naothinia hojaroniꞌaha ada Jesus Galiléia kaarabonia.
Amokhini Kaihinikani kania ogaimorisiagaki ada Jesus
10 Hari.
Oniaroa,
Jerusaléa avikhaꞌaha adani Jesus kakajoꞌo Amokhini Kaihinikani-ra avanikhahavini.
Ai vihina naothinia okasiagaꞌaha ada Jesus.
Ni-ijaꞌaria vanokiꞌiki.
Ahojai vania okhaꞌaha.
11 Judeus kaijaꞌari vanavaꞌisohiva abonoa avanakoꞌdioniha ada Jesus ihinika amonahani ibavinia.
Vananaꞌdohibakhiaha:
—Ada hana hojaha Jesus?
12 Ijaꞌari vaipohiki vajoroniki vaabono vara vakaniꞌakhamaki:
—Jahaki ada makhira.
Vahoariha vani adani vakhaniha:
—Iniani.
Vaꞌora korijanahabakhiaki adani ijaꞌari.
13 Ni-vanaꞌbaraꞌiki ida vaathi.
Vaꞌora vifiniki adani vakadijaꞌari vanavaꞌisohiva abono,
oniani ida athii ꞌbararikia Jesu-ra vakanavaranihavini hija.
14 Hari.
Ihinika ajararini vani kaikahiꞌaha ada Jesus.
Ijaꞌari Deu-ra khai vaniꞌavini kagorani kavasiribanini bodinia oꞌoiꞌaha,
vaꞌora kaꞌojomoꞌiꞌaha adani ijaꞌari vajoroniki.
15 Jesus athi-ra vakavaꞌibodivaranikarahoꞌaha adani judeus kaijaꞌari vavakaꞌdaꞌdiva,
vakhaniha:
—Ni-akadiꞌojomoꞌihi abonoa vakaꞌojomoꞌiꞌiki hada makhira Deus athi kapapirania.
Nihaniki vania biogaja ida?
Karahoki ida kidiꞌogahai.
16 Jesus vaꞌora niꞌaha:
—Ni-okavaꞌibodivaraniꞌimidiaki hida ojomoꞌihi athini.
Deus hora karonaki ho.
Ovari hora navaꞌisohivini hiꞌiki hida aꞌonira okaꞌojomoꞌivini hiꞌiki.
17 Ijaꞌari nahina Deua binofiki-ra naabahi,
biogaki bana ida kodiꞌojomoꞌihi athini Deus kania khani.
Biogaki jaboni ida kodiꞌojomoꞌihi athini-ra onakamaꞌdaravini.
Deus vania binakamaꞌdaja ida.
18 Hari.
Ijaꞌari kidivaꞌibodivarania vaꞌora nanamithavini hiki adani vahoariha;
binofiki ida kidiꞌogahai karaho avigavini,
abononi vaboraborahaja kaimoni.
Ni-niki ida kodihojai.
Hovani athi vikhava abono ho.
Athi vikhava abonoa ni-vara bivaniꞌaki ida kidivaꞌibodivarani.
Vara bivaniꞌaki ida karonana hiki athi.
Binofiki ida athi-ra karonaki kaꞌogahai karaho-ra vakamithavini,
khai vaniꞌara kaimoni ada karonana hiꞌiki.
Kaꞌoa hiki ida athi vikhava abono athi.
Ni-ijaꞌari-ra korijanahaki.
Hovani athi vikhava abono ho.
19 Deus kavaꞌisohihi jirikia Moisés kohana vaꞌora navaꞌisohiꞌiki adani akadijaꞌari avikhananavaki.
Ni-ijaꞌari hoarani avakadiania hojakia binaabaki afojahaki ida Deus kavaꞌisohihi jiriki.
Nahina mani ida hora avanaabinivini-ra avarakaimasikivini hija?
20 Vakamithava vagathanihi ida kidinaꞌdohi:
—Ikabajadiꞌoamanija!
Nahina ira akaimasikirihi ira naabinivini.
21 Jesus vaꞌora niꞌaha:
—Bada oniꞌaꞌiki ida badani danoki hoarani akadiꞌakoiri kamahini,
oniani ida avakavaꞌibodivaranikarahovini hiꞌia.
Ni-avavajahaki ida akadiꞌakoiri kamahini ijaꞌari-ra oanaihotavini.
22 Akadiꞌakoiri kamahini hini kabaꞌi,
avakarajomiki ada isai tanaki,
avanaabaja kaimoni ida Deus kavaꞌisohihi Moisés kohana binajiriꞌiki.
Ni-Moiséa bihonariabiininiki ida siikosida karajomihi.
Moisés namithana viahania kidijaꞌari miroꞌa vanakamaꞌdaja ida siikosida karajomihi.
23 Vakadihonari avanaabavini isai-ra avakarajomivini akadiꞌakoiri kamahini hini kabaꞌi.
Akadiꞌakoiri kamahini ijaꞌari-ra oanaihotahi;
hora avakaihamahiꞌihi.
Hora avaranaathidanoararivini,
hora avaniꞌaꞌiki aꞌoni:
“Inaabarihi ida Moisés
kohana kahonari.
Ni-jahaki ida bada inini
akadiꞌakoiri kamahini,
makhira-ra ianaihotavini.”
Avakhaniki aꞌoni.
24 Avanokihi ida hoariha kahojai,
hariꞌa jorakia asohirini vakahi bana.
Avarigahi ida kidihojai Deua bivajahaki bivajahariki,
oniania kidihojai asohini asohirini avakahivini jahaja.
Cristo mani koda ada Jesus?
25 Hari.
Oniaroa,
ijaꞌari vahoarahanana Jerusaléa vahojakia vaniꞌaꞌaha:
—Hiꞌo makhira,
akadijaꞌari vanavaꞌisohiva abonoa vanofimanira koda o vanaabinivini?
Líderes tentam prender Jesus (João 7:25-53)
26 Vada vaniꞌa.
Ijaꞌari vaipohiki vahararana vara niki ada,
ni-nahina bianaathidanoaraririha ada.
Akadikaꞌdaꞌdia avigamanira koda ada Jesus,
Cristo hina,
Deua bikaronaki hina?
— vaabono vakaniꞌakhamaꞌaha.
27 —Cristo khana kamahini ni-ijaꞌaria avigaki bana ida ibavi bivikhaki kani.
Aogaki ida makhira bivavijavaki ibavini — vakhaniha.
28 Ijaꞌari Deu-ra khai vaniꞌavini kagorani kavasiribanini bodinia Jesus vaꞌora kaꞌojomoꞌivini kabaꞌi,
athi ꞌbarakia vaꞌora niꞌaha:
—Hora avarigaki hora avavanihamania koda?
Ibavi hana hini kaijaꞌarini ohina-ra avarigamania koda jaboni?
Hovani kaꞌoa oabono ovikharihi hida.
Ni-ijaꞌari-ra navaꞌiponiꞌimariniki ada hora karonaꞌiki.
Ni-avarigariha ada hora karonaꞌiki.
29 Hovani oa oogara ada.
Kidiani oavania okhaja.
Hora karonaꞌiki ada — vaꞌora niꞌaha ada Jesus.
30 Vanofivini kabaꞌi ida Jesu-ra vagathivini,
ni-nahina bigathiki.
Ni-kaikahiꞌiaki kaho ida mahi Deus Jesu-ra vagathivini-ra vaꞌahavini.
31 Ijaꞌari vajoroniki vahararana vahojaki adani ijaꞌari vaipohiki Jesu-ra vakajariꞌdariki.
Vaniꞌaha:
—Ipohiki ida makhira kabadani danoki.
Cristo oamani ada Jesus.
Ijaꞌari hoariha hira vaha ada Cristo;
bikaabokamanija koda ida badani danoki arafiaki,
Jesus kabadani-ra aradaki?
Akajariꞌdariha ada Jesus,
Cristo hina Deua bikaronaꞌiki — vakhaniꞌaha.
Sasidotxi vavakaꞌdaꞌdiva vaꞌora vakaronaki adani sorara
32 Hari.
Farisioa vakamithaꞌihi ida ijaꞌari vajoroniki athii ꞌbararikia Jesus varani hina vaabono vara vakaniꞌakhamaki.
Farisioa vanofiki ida Jesus gathana.
Oniaroa,
sasidotxi vavakaꞌdaꞌdiva,
farisio khama vaꞌora vahonariaha adani sorara:
—Jesus kania avikhaꞌa mahija avagathivini.
Vavikha hida akadiania — vaꞌora vaniꞌaha.
33 Hari.
Jesus vaꞌora niꞌaha adani ijaꞌari vajoroniki:
—Mahi ipohirikia ohojaki ho avakadiania.
Naothinia oajoiki bana ho hora karonaki kania.
34 Hora avanakoꞌdihaki bana aꞌoni,
ni-hora avakaragaki bana.
Ni-avakaabokaki bana ida ovahojaki kania avarikhani.
35 Judeus kaijaꞌari vaabono vakananaꞌdohikhamaꞌaha:
—Hana vania koda okhaki ada akaragarara kaimoni?
Arabo hoariha kasidajinia okhamaniki koda ada,
vaꞌora kaꞌojomoꞌira kaimoni adani akadijaꞌari vihiriki?
36 Vaabono vakaniꞌakhamaꞌaha:
—Haria niꞌajoraꞌiki ada:
Anakoꞌdihavini,
ni-akaragaki bana.
Ni-akaabokaki ida aokhana bivahojaki kania.
Ni-aogaki ida kidivarani nahina nini — vakhaniꞌaha.
Paha aavahaki ijaꞌari-ra anahokiki fori hiki ada Jesus
37 Hari.
Oniaroa,
anokhomini amaakariꞌiki ida Amokhini Kaihinikani amonahani.
Hari.
Ahoaraniꞌiki hida mahi karaho ihinika aꞌdiahini kamahini.
Oniaroa,
vahararana gaaꞌaha ada Jesus,
athi ꞌbarakia vaꞌora niꞌaꞌaha:
—Jahaki ida ijaꞌari kanabidini akaaforaki kodiania khani,
biꞌavija kaimoni ida onoꞌavini hiki kaimoni.
38 Deus athi kapapirania hojaki hida varani ohina:
“Hora vakaijokajahakikia
vaꞌini bodinia
sororonaniki fori hiki ida paha ijaꞌari-ra nahokiki.
Vaini kapahani sororonaniki fori hiki ida.”
Niha ada Jesus.
39 Jesua bikavarajomiki ada Maꞌonahai Jahaki paha sororonanikia fori hina.
Jesus kavarani-ra kajariꞌdarikia bigathaniki bana ada Maꞌonahai Jahaki.
Oniaro kari ni-Deua bikaronaꞌiaki kaho ada Maꞌonahai Jahaki vajariꞌdariki vakadiania.
Ni-abiniꞌiaki kaho ada Jesus.
Ni-ajoisiꞌiaki kaho ada Jesus Deus Ibavi Jahakaꞌoaki vagaki kania,
oniani ida Maꞌonahai Jahaki-ra arakhaꞌiarija ijaꞌari vajariꞌdariki vakadiania.
Vavaꞌi kosakhamani hiki ida Jesus athi
40 Jesus kavarani-ra vakamithaki adani ijaꞌari vajoroniki,
vakhaniha vahoarahanana:
—Hiꞌo makhira,
Deus athi namoniva abono anokhaki o — vakhaniha.
41 Vakhaniha adani vahoariha:
—Cristo mani o.
Vahoariha vani adani vakhaniha:
—Iniani,
ni-Galiléia kaarabonia khaki ada Cristo oniki.
42 Deua bivavaꞌisohihijoraki ada Cristo:
Akadijaꞌari okhananavaki Davi kohana oniki kahanodi namitharonisiagaki ada Cristo.
Bivaꞌbanaki Belém sidaji.
Davi kohana bivavijavaki ida sidaji Belém.
Nimania ida haria navaꞌisohijoraꞌiki athii Deus athi kapapirania hojaki — vakhaniha adani ijaꞌari Jesu-ra vakajariꞌdaki,
avigaravini kabaꞌi ida Jesua bivaꞌbanaki ibavini.
43 Oniaroa,
vahoariha vakajariꞌdaki ida Jesus athi.
Vahoariha vani adani Jesus athi-ra vakajariꞌdariha.
44 Vakadiania vahojaki adani ijaꞌari Jesu-ra vagathivini-ra vanofiki.
Ni-nahina bigathiꞌiki kaho.
Judeus kaijaꞌari vanavaꞌisohiva abonoa vakajariꞌdaki ada Jesus
45 Hari.
Oniaroa,
avajoiꞌaha adani sorara sasidotxi vavakaꞌdaꞌdiva,
farisio vihiki vakadiania.
Sorara-ra vaꞌora vananaꞌdohiꞌaha:
—Nahina mani ida Jesu-ra avavikharavini hija?
46 Sorara vaꞌora vaniꞌaha:
—Ni-ijaꞌari hoariha vara bivaniꞌaki ida varani Jesus kavarani fori hiki — vakhaniha,
Jesus athi-ra vakajariꞌdaravini.
47 Farisio vaꞌora avakaihamahiꞌaha adani sorara,
vaꞌora vaniꞌaha:
—Aꞌonira korijanahamanira koda ada jaboni Jesus?
48 Judeus kaijaꞌari vanavaꞌisohiva abonoa vakajariꞌdahahaviki ada Jesus.
Harivani,
Farisio jaboni akajariꞌdaki ada.
Akajariꞌdahahaviki ada.
49 Ijaꞌari vahoariha Deus kavaꞌisohihi jiriki-ra avigariki.
Deus vaꞌora nihimaki bana adani — vakhaniha adani farisio Jesu-ra vakajariꞌdaki.
50 Hari.
Vakadiania hojaha ada farisio Nicodemos oniki.
Mahi ipohiki viahania joma kabaꞌi,
binavanavanahaꞌiki ada Jesus.
Hari.
Nicodemos vaꞌora niꞌaha adani ipohina:
51 —Ni-akamithaꞌiaki kaho ida Jesus abono-ra vajariꞌdavini.
Moisés kohana vaꞌora navaꞌisohiꞌiki adani akadijaꞌari avikhananavaki:
“Hariꞌa ijaꞌari kabadani asohirini-ra vakahiva
adani ijaꞌari vanasohiva abono,
vakamitharavini oadani ida abononi vajariꞌdavini.
Avigaravini oadani ida
kidihojai,
hariꞌa jaharikia avarakhava ida ijaꞌari.”
Niki ida Moisés athi papira hojaki.
Ni-akamithaꞌiaki kaho ida Jesus abono-ra vajariꞌdavini.
Ni-asohiki ida kidihojai asohirini akahivini,
ananaꞌdohiravini oadani — vaꞌora niꞌaꞌaha ada Nicodemos.
52-53 Vagathaniꞌihi ida athi:
—Ivani jaboni Galiléia kaaraboni kaijaꞌarini mani koda i?
Vada iniꞌa bana ida Deus athi kapapirani jiriki mahija Galiléia kaarabonia Deus athi namoniva abono kharina-ra iogavini — Nicodemo-ra vaniꞌaha.
Galiléia kaarabonia ꞌbanaki vavanihaki ada Jesus.