2 Kaꞌafokajomani mahi avagani kamaꞌdani vani joifoniꞌianaha ada Jesus Deu-ra khai vaniꞌavini kagorani kavasiribanini bodinia.

Vajoroniꞌaha adani ijaꞌari vaipohiki kidiania.

Vithirariha,

vaꞌora kaꞌojomoꞌihahaviꞌaha.

3 Vaꞌora kaꞌojomoꞌivini kabaꞌi,

vakaikahiꞌaha adani judeus kaijaꞌari vakaꞌojomoꞌiva abono,

farisio khama.

Jesus kania vavikhaꞌihi ida gamo,

vahonariahi gaani vaviaha.

Hoariha kamakhira-ra viꞌomavini vani farisioa vagathija ida gamo.

Oniaroa,

Jesus kania vavikhaꞌihi.

4 Jesu-ra vaniꞌaꞌaha:

—Ivani ijaꞌari kaꞌojomoꞌiva abono i.

Haria navaꞌisohi bana:

Kamakhiraki hida gamo.

Hoariha kamakhira-ra viꞌomavini kabaꞌi,

agathiꞌiki hida.

5 Deus kavaꞌisohihi jiriki Moisés kohana akadijaꞌari avikhananavaki-ra noꞌavini hiꞌiki haria honariavini gamo nikia kabadaniki jaꞌdia anagahavini abinija kaimoni.

Ivani,

nahina haria iniꞌaja koda bana?

— Jesu-ra vananaꞌdohiꞌaha.

6 Avigavini kaimoni hirihi ida vananaꞌdohivini hija.

Vanofiki ida Jesu-ra vakaijoꞌavini nahina nini vakamithaja kaimoni ida athi.

Moisés kohana kahonari-ra kajoniha;

avanaathidanoarariha.

Hari.

Hasi nirariꞌaha ada Jesus,

jirihaꞌaha nami khomakhomani namania saꞌa.

7 Asia avananaꞌdohiꞌdohibakhiaha.

Gaamananiꞌaha,

vaꞌora niꞌaꞌaha:

—Ba ovari miroꞌa gamo-ra aviniva jaꞌdia ada Jahari kabadania kabadaniꞌiariki.

8 Hasi nirariꞌianaha,

jirihaꞌianaha nami khomakhomani namania.

9 Jesus athi-ra mitha vaniꞌavini vani ai vihinanaꞌaha adani gamo-ra avanaathidanoarariki hahavi.

Makhira naꞌarihavi vihiki miroꞌa adani ai vihiꞌaha.

Vahojaroniꞌaha adani Jesus,

gamo khama.

Asia gaaki ida gamo Jesus viaha.

10 Oniaroa gaamananiꞌianaha ada Jesus,

biniꞌaꞌihi:

—Gamo,

adani hanaja ijaꞌari avikhaꞌaha?

Vahojaronirara adani ira vanagahavini-ra vanofiki?

Vanofijanaria koda ida kadabadani asohiriki abosini-ra vavahonariahivini?

11 —Iniani — nihi ida gamo.

—Ni-kadabadani asohiriki abosini-ra ovahonariahiki jaboni.

Ba ajihiꞌa.

Hariꞌa Jahari kabadania kabadanijana — gamo-ra niꞌaꞌaha ada Jesus.

12 Hari.

Oniaroa,

Jesus vara vaꞌora niꞌaꞌianaha adani farisio:

—Hovani oa onavagaja ida ijaꞌari hahavi vakadivaꞌibodivarani.

Ijaꞌari hora vaipohihakia bivahojaki ida mahi jaꞌdini anokhomiriki.

Kidivaꞌibodivarani onavagavini mani ida bakibakiki fori hikia naadahajanarini hija — vaꞌora niꞌaꞌaha ada Jesus.

13 Farisioa vaniꞌaha:

—Ivani oa iabono vara ivaniꞌaꞌia.

Ni-hojaki ida ijaꞌari hoariha kadavarani kaꞌoa hinia haria kanamoniki kaimoni.

Hojarini mani ida kaꞌoa hini kaꞌoa hirini aogaravini hija.

14 Jesus vaꞌora niꞌaha:

—Hovani ohoarana oabono vara ovaniꞌavini kabaꞌi,

kaꞌoa hiki hida kodivarani.

Oogaki ida ibavi ovikhaki.

Oogaki jaboni ida ibavi oanikhaki kaimoni.

Aꞌonivani ni-avarigaki ida ibavi ovikhaki,

ni-avarigaki jaboni ida ibavi oanikhaki.

15 Avarigaravini kabaꞌi ida hoariha kahojai,

kidivaꞌibodivarani hiki,

avarakaraganahaki ida kidihojai,

kidibadani,

kidivarani hiki,

asohirini avakahivini.

Ni-nikia Deus ijaꞌari-ra nasohiki.

Ni-hovani oa ijaꞌari-ra onasohirihi.

16 Ijaꞌari-ra onasohija vaha;

asohihi vaha ida kodivarani.

Ni-ohoarana ohojaki,

kodiabiꞌi hora karonaꞌiki ho,

ovari kodiania hojaki.

Hora kakodiavini mani ida ijaꞌari-ra onasohivini kavaranihi-ra nasohikaꞌoaja.

17 Akadivaꞌisohihi jiriki kapapirania hojaki hida honari:

18 Hovani kodiabiꞌi khama ijaꞌari hojani nokiva abono viꞌbamiki fori arihiki hari.

Oabono vara ovaniꞌaki ho.

Kodiabiꞌi jaboni vara hora vaniꞌaꞌiki ho,

oathi kaꞌoa hini-ra kahiki ada.

Onivani fori hiꞌianaja hida akadivarani afoꞌbamakhama,

oniani ida kaꞌoa hini avarigavini hija kodiabiꞌi hora karonaꞌavini — Jesus vaꞌora niꞌaha.

19 —Ada hana hojaha kadabiꞌi?

— Jesu-ra vananaꞌdohiꞌaha.

Jesus vaꞌora niꞌaꞌaha:

—Ni-hora avarigaki hana ohina.

Ni-kodiabiꞌi-ra avarigaki jaboni hana hina.

Hora avarigaja vaha;

kodiabiꞌi-ra avarigahi jaboni vaha.

20 Hari.

Deu-ra khai vaniꞌavini kagorani kavasiribanini bodinia vara niha ada Jesus.

Ijaꞌari Deu-ra vakanavaꞌigavini kajinironi bavini kania hojaha ada Jesus,

ijaꞌari-ra vaꞌora kaꞌojomoꞌivini.

Ni-nahina bigathiki ada Jesus,

ni-khaꞌiaki kaho ida mahi Deus Jesu-ra vagathivini-ra vaꞌahavini.

21 Hari.

Oniaroa,

Jesus vaꞌora niꞌaꞌianaha:

—Ai ohiki bana ho.

Hora avanakoꞌdiꞌimariniki aꞌoni.

Jahari kahojaia avakahojaini oadani vani avaabinija bana.

Ni-avakaabokaki ida avarikhani ibavi oanikhahaki kania — vaꞌora niꞌaha ada Jesus.

22 Oniania vaabono vakaniꞌakhamaꞌaha adani judeus kaijaꞌari:

—Jesus haria niꞌavini ibavi bianikhahakia aokhana-ra akaabokaravini.

Abono-ra naabinimaniki koda hada?

23 Jesus vaꞌora niꞌaha:

—Aꞌonivani araboja avaꞌbanaki aꞌoni.

Hovani oibavi namajaja.

Arabo kaijaꞌarini avihiki aꞌoni.

Hovani arabo kaijaꞌarini ohirihi,

24 oniani ida aꞌonira onavaꞌisohijoravini hiꞌia:

Jahari kahojaia avakahojaini oadani vani avaabiniki aꞌoni bana.

Oonina Hovani oa ho.

Avakajariꞌdahi ida oonina Hovani oa hini,

avaabinini kamahini,

asia avakadihojai asohiriki-ra avavahojaki aꞌoni bana.

25 Jesu-ra vananaꞌdohiꞌaha:

—Hana ihini mani i?

—Kodivarani kamaꞌdani vani aꞌonira onavaꞌisohija oonina Hovani oa ho.

26 Hojaki ida varani karaho avihinia okavaranina kaimoni.

Avakadihojai asohiriki-ra onasohivini kavaranihi hojaki jaboni,

kabaꞌi ni-varani avihinia okavaraniki.

Kaꞌoa hiki ada hora karonaꞌiki.

Kidivarani okamithaha;

vara ovaniꞌaꞌihi ijaꞌari araboa vahojakia vakamithaja kaimoni.

Hora navaꞌisohiravini oadani,

ni-nahina oniki — vaꞌora niꞌaꞌaha ada Jesus.

27 Jesus kavarani-ra vakamithavini kabaꞌi,

ni-nahina hini avigaki,

ni-avigaki ida kidiabiꞌi nama hojaki-ra vara vaniꞌavini.

28 Avigaravini mani ida Jesus vaꞌora niꞌavini hija:

—Ijaꞌari hahavi vakadiꞌaajo ho.

Ava akasanakhamaki kania hora avaragaamananivini kamahini,

avarigaki ida Hovani oa ohina.

Avarigaki jaboni ida kodiabiꞌi hora honariaravini oadani vara onirina.

Hora navaꞌisohiha varania bona vara ovaniꞌahi ida kidivarani.

29 Kodiania hojahahaꞌoadahaki ada hora karonaꞌiki.

Khai biniꞌaki ida badani bivajahakia okabadanihaꞌoadahana,

oniani ida hora nahojaharavini hija — niha ada Jesus.

30 Jesus kavarani-ra vakamithavini vani ijaꞌari vaipohiki kidivarani vakajariꞌdariha ada.

31 Hari.

Oniaroa,

Jesus vaꞌora niꞌaha adani judeus kaijaꞌari vajariꞌdariki:

—Oathi-ra avanaababakhiahi;

kodipohi kaꞌoa avihihi.

32 Avarigaki bana ada Deus kaꞌoa hina.

Kaꞌoa hina avarigaha;

ni-ijaꞌari kapavakarivahaki fori avihijanaki.

33 Vagathaniꞌihi ida Jesus athi:

—Abraão kahanodi avijavaronisiagaki arihiki hari.

Ovari kapavakarivahariki ada.

Ovari fori arihiki hari jaboni.

Ni-nahina haria kapavakariꞌiaki vakadihonai abono gathaki arihija kaimoni.

Ni-aogaki ida kadavarani nahina hini vara haria iniꞌavini hiki:

ni-ijaꞌari kapavakarivahaki fori arihijanarihi — Jesu-ra vaniꞌaꞌaha.

34 Jesus vaꞌora niꞌaha:

—Kaꞌoa hiki hida varani aꞌonira onavaꞌisohivini hiki.

Honai abono kapavakarivahakia ni-bikaabokaki ida abono-ra saarivini kidikaꞌdaꞌdi saꞌa kabodinia.

Jahari kahojaia kahojaihi ida ijaꞌari,

ni-bikaabokaki ida abononi saarivini Jahari saꞌa kabodinia.

35 Kaꞌdaꞌdi kidihonai abono gathaki-ra pavakari nihavini-ra nofiha;

pavakari binihaha.

Ni-hojahahaꞌoadahaki ada honai abono gathaki kidikaꞌdaꞌdi gorana.

Kaꞌdaꞌdi kaisai hiriha ada honai abono kapavakarivahaki.

Kaꞌdaꞌdi ni-pavakari binihaki ada kidisai.

Hojahahaꞌoadahaki ada kidiabiꞌi gorana.

36 Deus kaisai ho.

Jahari saꞌa kabodinia aꞌonira oakavaꞌijoahi;

ni-avagathajanaki fori avihiki,

avakaabokaki ida hojai asohiriki-ra avakavaꞌipahinivini.

37 Aꞌonira oogaki ho.

Abraão kohana kahanodi vavijavaronisiagaki aꞌoni.

Kodiꞌojomoꞌihi kavaranihi-ra avakajonivini mani ida hora avanaabinivini-ra avanofivini hija.

38 Vara ovaniꞌaki ida varani kodiabiꞌi hora navaꞌisohivini hiꞌiki.

Aꞌonivani bada avaniꞌaki ida badani avakadiabiꞌi aꞌonira kaꞌojomoꞌivini hiꞌiki.

Jahari kaisaia aꞌonira onaonivini hiki avanamonahavini hida Jahari kahojai.

39 Vagathaniꞌihi ida Jesus athi:

—Akadiꞌarahoda okhananavaki ada Abraão kohana.

Anaonivini ada Abraão akadiabiꞌi.

Oniania Jesus vaꞌora niꞌaꞌaha:

—Abraão kohana kaisai avihija vaha;

kidibadani fori hikia avakabadanimanihi vaha.

40 Hovani vara ovaniꞌaja hida athi kaꞌoa hini Deus hora navaꞌisohivini hiꞌiki.

Athi kaꞌoa hini-ra vara ovaniꞌavini kabaꞌi,

asia hora avanaabinivini-ra avanofihi.

Abraão kahojai fori hirihi ida avakadihojai.

41 Jahari kahojaia avakahojaiki aꞌoni.

Avakadiabiꞌi kahojai fori hiki ida avakadihojai — vaꞌora niꞌaha ada Jesus.

Vagathanihi ida Jesus athi:

—Akadiabiꞌi hoarana hina aogaki Deus.

Deus kaisai kaꞌoa arihiki hari.

Isai kaabiꞌiriki fori arihirihi.

42 Oniania,

Jesus vaꞌora niꞌaꞌaha:

—Deus avakaabiꞌija vaha;

hora avanofijahakimanihi vaha.

Deus kani vania okhaja,

hidavania ohojaꞌia.

Ni-hovani kaꞌoa oabono ovikharihi.

Deus vani hora karonaja.

43 Niha avaniꞌamania hida oathi avakamithavini kabaꞌi avakamithariki fori avanihaki?

Ni-avanofipaꞌitxiki ida kodivarani-ra avarigavini nahina hini.

44 Jahari kaisai oamani aꞌoni,

oniani ida nahina Jaharia bikavaꞌinofinofiki-ra avanofivini hija.

Hahavi amonahani vani kaabinira ada Jahari.

Nahina kaꞌoa hini-ra vajaharavini mani ida kidiania nahina sohiki-ra nofiravini hija.

Jahari kahojai oamani ida korijanahia kavaranina.

Korijanahi abono ada.

Korijanahi abono hahavi kaabiꞌi fori hiki ada.

45 Varani kaꞌoa hinia okavaranina mani ida kodivarani-ra avakajariꞌdavini hija.

46 Hana hina biogaja ida badani Deua bivajahariki onamonahaꞌiki?

Ni-bada oniꞌarihi ida Jahari kabadani.

Hora bana nanamithava ada kodibadani asohirini-ra kahiki.

Varani kaꞌoa-ra vara ovaniꞌaꞌiki ho.

Niha avaniꞌamania hida kodivarani avakajariꞌdaki?

47 Deus kaijaꞌaria vanaabaki ida Deus kavarani.

Kidijaꞌari avihirini mani ida kidivarani avanaabaravini hija — niha ada Jesus.

48 Hari.

Oniaroa,

vaniꞌaha ada Jesus:

—Asohiꞌoamaniꞌia ida akadivarani ira vara avaniꞌavini,

Samaria kaaraboni kaijaꞌarini fori ihiki i.

Bajadi ivaꞌini-ra nahonariahihiꞌiki i jaboni.

—Iniani,

ni-bajadi ovaꞌi-ra nahonariahihirihi.

Ovavaꞌihaki ada kodiabiꞌi.

Aꞌonivani ni-hora avavavaꞌihaki.

50 Ni-ojahana kavaranihi-ra onakoꞌdirihi kodimoni hini.

Kodiabiꞌi vani hora vara vaniꞌaja varani jahakia.

Ovari akadivarani-ra nasohiki bana.

Oasohina-ra kahiki bana ada kodiabiꞌi.

51 Kaꞌoa hiki hida kodivarani.

Ni-abiniki bana ida ijaꞌari oathi-ra naabaki.

—Kadavarani-ra akamithahi;

aogajahakihi ida bajadi ivaꞌini-ra nahonariahihivini.

Abiniꞌboꞌdaꞌiki ada Abraão kohana.

Vaabinihananaki adani Deus athi vanamoniva abono.

Ijaꞌari iathini-ra naabaki,

ni-abinini ikahiki.

53 Abiniꞌiki ada Abraão.

Ovari miroꞌa akadijaꞌari avikhananavaki vakadiabiꞌi ada.

Kaꞌdaꞌdi ada.

Abraão kaꞌdaꞌdi hina-ra iaradamanija?

Vaabiniki jaboni adani Deus athi vanamoniva abono.

Hana ihini mani i,

iabono vara ivaniꞌaja?

— vaniꞌaha ada Jesus.

54 —Ojahana kavaranihia vara oabono oniꞌaja vaha;

ni-avarigaki vaha ida kodivarani kaꞌoa hini kaꞌoa hirini.

Kodiabiꞌi vani ada ojahana kavaranihi-ra vara vaniꞌara.

Ovari ada avakadiDeus hina avakahira.

55 Ni-avarigaꞌiariha ada.

Hovani oogara ada.

Deu-ra ogaravini-ra okahija vaha;

korijanahi abono ohihi vaha,

aꞌonifori ohihi vaha.

Oogaki ada,

athi onaabahahaꞌoadahaki ada.

56 Avakadiabiꞌi Abraãoa khai biniꞌakarahoꞌiki ida kidiania okhana-ra nokivini araboa.

Hora nokijoraꞌavini mani ida khai niꞌana hija — Jesus vaꞌora niꞌaha.

57 Vaniꞌaha ada Jesus:

—Ni-ivahojaꞌiaki ida badara 50 hiki ipohini.

Nihaniki vania inokira ada Abraão?

58 Jesua bigathaniꞌihi ida vakadinaꞌdohi:

—Hovani oa ho.

Abraão namithana viahania homiroꞌa ohojaja — vaꞌora niꞌaꞌaha.

59 Hari.

Oniaroa,

vanabiiniꞌihi ida jaꞌdi Jesu-ra vanagahara kaimoni,

oniania,

Jesus abono-ra anahojaꞌaha.

Deu-ra khai vaniꞌavini kagorani kavasiribanini bodinia okhaonaniꞌaha,

ajihiꞌaha.