—Jesus,

niha nimanira ada makhira ꞌbanana kamaodorohana namithaki?

Asohirini mani ida kidihojai kanamaodorohana hija?

Kidiabiꞌi,

kidiamia vihiki vakadihojai asohirini mani ida kanamaodorohana hija?

3 Jesua bigathaniꞌihi ida vakadinaꞌdohi:

—Iniani,

ni-hojai asohirikia bikanamaodorohariha ada.

Ni-kidiabiꞌi,

kidiamia khama vakadihojai asohirikia bikanamaodorohaki.

Kamaodorohana mani ida Deua bianaihotavini ijaꞌaria vanokivini hija bana.

Deus kaꞌoa bikaabokaki hida makhira nokho ꞌbaꞌdani-ra anavagahavini.

4 Mahi oadani bada akhaniva hora karonaki kabadani-ra bada aniꞌavini.

Joma bakibakini khani vani ni-ijaꞌaria bikaabokajanaki ida kidibadani.

5 Ijaꞌari vakadiania ohojana oadani onavagaki fori hiki ida ijaꞌari kavaꞌibodivarani.

6 Vara nina naothinia,

Jesua bikathorariꞌihi ida arabo namani,

binakabodihadihahi ida iꞌbana namia.

Biravisoꞌihi ida kaꞌbakaꞌbani makhira nokho ꞌbaꞌdani asafini namania.

7 Biniꞌaha:

—Okhaꞌa jaꞌdi khorahaki kapahani kania Siloé onikia mahija inokhoni-ra isokovini — biniꞌaha.

Ariathia Siloé onini ida ‘Karonahi hina’.

Hari.

Okhaꞌaha ada makhira,

bisokoꞌihi ida nokho.

Nokho avagahaꞌini vani joiꞌaha.

8 Bivahojaki gora maakarini kaijaꞌarinia vanokiꞌaha ada makhira kamaodorohajanarina.

Hiꞌada jiniro-ra kanikhariabakhiavini vanokiki ni-kamaodorohajanaki.

Vaabono vakananaꞌdohikhamaꞌaha:

—Ada vani mani jiniro kanikhariabakhiava abono ada?

9 Vahoariha vaniꞌaha:

—Haꞌa,

ovani oa ada.

—Iniani.

Ovari hiriha ada.

Ovari nokiana fori hiki ada.

Makhira kamaodorohajanariki vaꞌora niꞌaha:

—Haꞌa,

hovani jiniro kanikhariava abono niavaha ho.

10 Vananaꞌdohiꞌaha:

—Nihaniki vania inokhoni avagahaꞌia?

—Hiꞌada makhira Jesus onikia binakabodihadihahi ida iꞌbana namia,

biravisoꞌihi ida kaꞌbakaꞌbani onokho ꞌbaꞌdani asafini namania.

Hora honariavini hiꞌiki Siloé ibavi onikia ookhana,

onokho-ra osokohavini.

Hari.

Ookhaꞌihi,

onokho-ra osokovini naothinia jorakia avagahaꞌihi hida onokho ꞌbaꞌdani.

12 Vananaꞌdohiha:

—Ada hanaja vania hojaha?

—Ni-oogajanaki — vaꞌora niꞌaꞌaha.

13 Hari.

Oniaroa,

avavikhaꞌaha ada makhira kamaodorohajanariki farisio vakadiania.

14 Hari.

Judeus kaijaꞌari vakadiꞌakoiri kamahini vani Jesua binakabodija ida iꞌbana namia,

bianaihotaꞌiki jaboni ada makhira kamaodorohaki.

15 Farisio maina vananaꞌdohiha ada makhira:

—Nihaniki vania bianavagahaja ida inokhoni ꞌbaꞌdani?

Vaꞌora niꞌaꞌaha:

—Biravisoꞌiki ida kaꞌbakaꞌbani onokho ꞌbaꞌdani asafini namania.

Osokovini naothinia avagahaꞌihi hida onokho ꞌbaꞌdani.

—Akajariꞌdaki ida kamaodorohaki-ra anaihotaki Deua bikaronavini.

Ni-bivakaajiki hida akadiꞌakoiri kamahini.

Bikajoniki ida Deus kahonari jiriki.

Farisio vahoariha vani adani vakhaniha:

—Makhira hojai asohirikia kabadanibakhiaki hira vaha;

ni-bikaabokaki vaha hida badani danoki afobakhia — vakhaniha.

Vahoariha vajariꞌdaki,

vahoariha vani adani ni-vajariꞌdaha.

17 Farisioa vananaꞌdohiꞌianaha ada makhira:

—Kadavarani hiki ada inokhoni ꞌbaꞌdani-ra anavagahaꞌiki.

Nahina mani ida Jesu-ra ikavaꞌibodivaranivini hija?

—Deus athi namoniva abono mani ada okavaꞌibodivaranira — vaꞌora niꞌaꞌaha ada makhira.

18 Judeus kaijaꞌari vanavaꞌisohiva abonoa vakajariꞌdaꞌihi ida makhira kamaodorohana.

Kidiabiꞌi,

kidiamia vaathi-ra vakamitharavini oadani vakajariꞌdaki ida vara abono-ra vaniꞌavini,

oniani ida vaꞌora vakaboaꞌivini hija.

19 Avakhanoha adani kidiabiꞌi,

farisio vaꞌora vananaꞌdohiꞌaha:

—Avakadisai mani hada?

Tanana vani kamaodorohara hada avakadisai?

Nihaniki vania hidakabaꞌi avagahaꞌia hida nokho ꞌbaꞌdani?

20 Kidiabiꞌi vaꞌora niꞌaꞌaha:

—Aogaki hada akadisai hina.

Aogaki jaboni ida banini hiꞌina tanana nokho ꞌbaꞌdani vagaharini.

21 Ni-aogaki hida niha ninini nokho ꞌbaꞌdani avagahaꞌini.

Ni-aogaki jaboni ada nokho ꞌbaꞌdani anavagahani hiꞌiki.

Ni-isai hijanaki.

Vananaꞌdohi bana mahija aꞌonira nanamithavini hana hina bianavagahavini ida nokho ꞌbaꞌdani.

22 Makhira kaabiꞌi,

kaamia vaꞌora vifiniki adani vakadijaꞌari vanavaꞌisohiva abono,

oniani ida avigaravini vakahivini hija.

Mahi ꞌboꞌdakari judeus kaijaꞌari vanavaꞌisohiva abono vaabono vara vakaniꞌakhamajoravini:

—Deu-ra vara aniꞌavini kagorania aakakojava ida ijaꞌari Jesu-ra kajariꞌdariki,

Cristo hina-ra kahiki — vakhaniha,

oniani ida kamaodorohajanariki kaabiꞌi akojahi vihina-ra vifinivini hija,

23 oniani ida vakadinaꞌdohi vagathaniravini hija.

Vaꞌora vaniꞌaha:

—Isai hijanariha ada akadisai.

Vananaꞌdohi bana ida namithaꞌiki kidiania.

24 Oniaroa,

vahonariaha ada kamaodorohajanariki oꞌoiꞌianana vakadiania,

vaniꞌaꞌaha:

—Deua mitha biniꞌaki hida kadavarani.

Varani kaꞌoa hinia kavarani bana akadiania.

Aogaki ada makhira ira anaihotaki hojai asohirikia kabadanibakhiana — vaniꞌaha.

25 Vaꞌora niꞌaꞌaha ada makhira:

—Oogariha ada hojai asohirikia kabadanina kabadanirina.

Oogaki ida okamaodorohaꞌina.

Oogaki hida onokho ꞌbaꞌdani-ra anavagahaꞌavini — vaꞌora niꞌaꞌaha ada makhira.

26 Vaniꞌaꞌaha:

—Nahina mani ida binamonahaꞌia kadania?

Nihaniki vania inokhoni ꞌbaꞌdani-ra anavagahara ada?

— vananaꞌdohiꞌianaha.

27 —Aꞌonira onanamithavini hiꞌiki ida.

Ni-avakamithavini avanofiki.

Nahina mani ida avakamithaꞌianavini avanofivini hija?

Avanofimanija koda ida kidipohi avihini?

28 Avakaihamahiꞌaha.

Varani jaharikia vara vaniꞌaꞌaha ada makhira:

—Ivani inaabaki ida hiꞌada makhira athi.

Harivani anaabaki ida Moisés kohana athi.

29 Aogaki ida Deus Moisés kohana-ra vara niꞌaꞌboꞌdavini.

Ni-aogapaꞌitxiki ada Jesus oniki.

Ni-aogaki ada hiꞌada makhira hanajaja khana — vakhaniꞌaha.

—Okavaꞌibodivaranikarahoki ida Deua bikaronavini avarigaravini.

Hora anaihotavini kabaꞌi,

ni-avarigaki ada Jesu-ra karonaꞌiki.

31 Aogaki ida ijaꞌari hojai asohirikia kabadanibakhiaki,

ni-Deua binoꞌaki nahina bikanikhariakia.

Ijaꞌari Deu-ra vavaꞌihahi,

athi naabani hihi jaboni,

oniani ida nahina bikanikhariakia Deua binoꞌavini hija.

32 Hahavi amonahani naothinia ni-nahina bikamithaꞌiaki kaho ida ijaꞌari tanani kamaodorohaki-ra anaihotaki varani hini.

Ijaꞌaria ni-vakaabokaki hida badani.

Hidakabaꞌi Jesus vani ada onokho ꞌbaꞌdani-ra anaihotaꞌara.

33 Deus kania kharara vaha ada makhira hora anaihotaꞌiki;

ni-bikaabokaki vaha ida kidibadani danoki — vaꞌora niꞌaꞌaha ada makhira.

34 Vaniꞌaha:

—Ivani itanani kari hojai asohirikia ikabadanihaꞌoadahaki i.

Ni-jahaki ida haria ikaꞌojomoꞌivini-ra ikaijoꞌavini — vaniꞌaha.

Oniaroa,

avakakojaꞌaha,

Deu-ra vara vaniꞌavini kagorania ajihina vahonariaꞌaha.

35 Hari.

Oniaroa,

Jesua bikamithahi ida makhira akojahi hina varani hini,

binakoꞌdihaha,

bikaragaꞌaha,

binanaꞌdohiꞌaha:

—Ivakaijokamanira ada ijaꞌari hahavi kaꞌaajo?

36 Makhira biniꞌaha ada Jesus:

—Hora nanamithaꞌa bana hana hina mahija ovakaijokavini.

37 Jesua biniꞌaꞌaha:

—Inokiꞌiki ada.

Ovari ada ira vara niꞌara.

38 —Kodikaꞌdaꞌdi,

ira ovakaijokaki ho — niha ada makhira,

Jesus viaha kajoꞌatharariꞌina,

bikanamasiviꞌaha.

39 Niha ada Jesus:

—Hora rakhaki ijaꞌari vakadiania ijaꞌari kahojai jahani jaharini-ra onanokiavini,

vaꞌora onasohira kaimoni.

Oniania oanavagahaja ida ijaꞌari kamaodorohaki nokhoni ꞌbaꞌdani.

Ijaꞌari oathi-ra kajonivini mani ida nokhoni ꞌbaꞌdani vagahariki fori nihani hija.

40 Jesus maakarina vahojaha adani farisio,

vakamithaꞌihi ida kidivarani,

vananaꞌdohiꞌaha:

—Kadavarani hiria koda ida akamaodorohana jaboni?

41 Jesus vaꞌora niꞌaꞌaha:

—Avanokhoni ꞌbaꞌdani vagaharija vaha;

hojai asohirikia avakahojaini kabaꞌi,

Deua binaꞌbiramanihi vaha hida avakadihojai asohiriki.

Avakamaodoroharini-ra avakahivini mani ida avakadihojai asohiriki Deua binaꞌbiraravini hija bana.