Ovilia akadavaꞌava abono varani hina hida
10
Hari.
Jesus vara vaꞌora niꞌavini hiki ida rajomi kavaranihi hoariha.
—Kaꞌoa hiki hida kodivarani.
Ovilia vakavasiribanina kania kahojaki ida bakatha kahoarani kaꞌoa.
Ovilia vakavasiribanina kaathania okhajakosiha ada ovilia akadavaꞌava abono.
Kidiani adani ovilia.
Boꞌdi abono,
ovilia naabiniva abono hiki ni-ovilia vakavasiribanina kaathania okhajakosiki.
Okasiribaniꞌoamaniha.
2 Ovilia akadavaꞌava abono vani ada bakatha kania okhajakosira.
Jesus o bom pastor (João 10:1-21)
3 Bakatha kania hojaki ada makhira hoariha bakatha-ra akadavaꞌaki,
boꞌdi abono oꞌoirara kaimoni.
Bakatha akadavaꞌava abonoa biakarabikhaihi ida ovilia vakavasiribanina kaathani,
oꞌoira kaimoni ada ovilia akadavaꞌava abono.
Ovilia avigaki ida vaꞌora akadavaꞌaki athi vaꞌora baranahavini afohanana vaonina,
vaꞌora obananionaniki ada.
4 Vaꞌora obananionanivini naothinia okhananavaꞌiki ada ovilia akadavaꞌava abono,
vikasiagaki adani ovilia.
Vaꞌora rakasiagaki athi avigavini.
5 Vaꞌora akadavaꞌariki naothia ni-avikasiagaki.
Kidiania avakaraꞌoꞌiki adani.
Athi avigaravini mani ida vaꞌora ragaafanahaja.
6 Jesua biananokhomiꞌihi ida kidirajomi,
ni-avigaki ida kidivarani vaꞌora kaꞌojomoꞌivini hiꞌiki nahina hini.
Ovilia akadavaꞌava abono jahaki fori hiki ada Jesus
7 Jesus vaꞌora vara niꞌaꞌianaha:
—Kaꞌoa hiki hida kodivarani.
Hovani oa ovilia vakavasiribanina kaathani fori ohiki ho.
Kodiania aviꞌoiki fori vihiki adani ovilia vaꞌora oakadavaꞌara kaimoni.
Kodiania avikhaonaniki fori vihiki adani,
vaꞌora okahinanikara kaimoni.
Ovilia fori vihiki adani kodijaꞌari.
8 Ovilia boꞌdiava abono fori vihiki adani vahoariha vaꞌoaniaro miroꞌa vikhaki.
Ovilia naabiniva abono fori vihiki adani.
Vajahariki adani.
Kodijaꞌari-ra vaꞌora vakorijanahavini Deu-ra vakavaꞌipahinira kaimoni.
Ni-kodijaꞌaria vanaabaki ida vaathi.
9 Hovani oa ovilia vakavasiribanina kaathani fori ohiki ho.
Vakavasiribanina bodinia vahojana oadani adani ovilia,
ni-nahina vaꞌora namakhaniki.
Vakavasiribanina kaathania vaꞌora arakhaonaniki hogoi-ra vahahara kaimoni.
Kodiania khajakosiki fori hiki ida ijaꞌari kodiania abononi gahinai nihaki.
Onivani fori hija ida ijaꞌari hora kajariꞌdariki-ra oakavaꞌijoavini,
oakadavaꞌavini jaboni,
makhaniria kaimoni.
10 Boꞌdi abono-ra rakhaki ovilia vakadiania,
binofiki ida ovilia-ra boꞌdiavini,
vaꞌora naabinivini,
vaꞌora nihimavini.
Hora rakhaki ijaꞌari vakadiania vaꞌora onoꞌavini mahi jaꞌdini jahaki anokhomirikia.
Jahaꞌoamanija ida mahi jaꞌdini vavahojaki kaimoni hidiaja,
Deus kania jaboni — vaꞌora niꞌaꞌaha ada Jesus.
11 Rajomi hoariha Jesus abono-ra kavarajomiꞌaha.
Vaꞌora niꞌaꞌaha:
—Hovani oa ovilia akadavaꞌava abono jahaki fori ohiki ho.
Vaꞌora oakadavaꞌajahakiki adani kodijaꞌari.
Oabono ovaꞌahaki ho oabinina kodijaꞌari-ra vaꞌora oakavaꞌijoaja kaimoni.
12 Hari.
Hojaki ada honai abono ovilia-ra akadavaꞌaki.
Kidiani vihiriha adani ovilia.
Kaꞌoviliakia binaabosiki ada honai abono jiniroa,
vaꞌora akadavaꞌara kaimoni adani kidiꞌovilia.
Vaꞌora akadavaꞌavini vani binokihi ida jomahi hiihiha khani,
ovilia-ra vaꞌora arihavini.
Oniaroa,
ogaꞌaha ada honai abono.
Jomahia biariꞌiki ida ovilia,
vahoariha vaofinina avakaganakhamaꞌiki.
Ovilia akadavaꞌava abono jahaki ni-ogaki.
Ni-bivaꞌahaki ida jomahi kidiꞌovilia arini vihina.
13 Honai abono ni-ovilia-ra vaꞌora nakaidivaki,
oniani ida jomahi-ra nokivini aragana hija,
ovilia-ra vaꞌora nahojahaꞌiki ada.
Vaꞌora akadavaꞌavini hiki jiniroa gahinara kaimoni.
Kidiani vihiriha adani ovilia,
oniani ida vaꞌora nakaidivaravini hija.
Ovari fori ohirihi.
14-15 Hari.
Hovani oa ovilia akadavaꞌava abono jahaki fori ohiki ho.
Kodiabiꞌi hora nakaidivajahakihi,
onakaidivajahakiha jaboni ada kodiabiꞌi.
Onivani fori ohija vaꞌora onakaidivahananavini adani kodijaꞌari,
hora vanakaidivajahakiki adani jaboni.
Oabono ovaꞌahaki bana ho oabinina vaꞌora oakavaꞌijoara kaimoni.
16 Hari.
Ovilia vakavasiribanina bodinia vahojaꞌiariha kaho adani kodiꞌovilia hahavi.
Onofiki ida vaꞌora oanikhavini jaboni.
Vakamithaki bana hida oathi,
kodiania vaabono gahinai vanihaki bana adani.
Vaꞌora onajoroniki bana adani kodiꞌovilia hahavi ibavi hoarania,
vaꞌora oakadavaꞌahahavira kaimoni.
Onina vani hovani oa ohoarana kodijaꞌari hahavi-ra vaꞌora oakadavaꞌajahakija bana.
17 Oabono ovaꞌahaki bana ho oabinina vaꞌora oakavaꞌijoara kaimoni adani kodiania vaabono gahinai vanihaꞌiki.
Oabiniki bana ho,
oahokiki jaboni bana ho.
Deus hora nofijahakivini hiki ida oabinina-ra ovaꞌahavini.
18 Oabinina-ra onofiravini oadani,
ni-nahina bikaabokaki ida oabinina.
Hora vanaabinivini kamahini hovani oa bana oabono ovaꞌahaja oabinina.
Okhaꞌina viahania kodiabiꞌi hora niꞌaꞌiki ho:
“Onofiki ida iabinini,
onofiki jaboni ida
iahokini.”
Hora niꞌaꞌboꞌdaꞌiki ada kodiabiꞌi.
Onofiki jaboni ida oabinina,
oahokina,
oniani ida oabinina-ra oabono ovaꞌahavini hija bana,
naothinia oahokiki bana ho — vaꞌora niꞌaha ada Jesus.
19 Hari.
Jesus athi-ra vakamithaha adani judeus kaijaꞌari.
Vahoariha vajariꞌdaki,
vahoariha ni-vajariꞌdaki.
20 Vajariꞌdakia vaniꞌaha:
—Vaꞌihariha ada!
Bajadia vaꞌi binahonariahihiki ada.
Hariꞌa mitha vaniꞌa hida kidivarani — vakhaniha.
21 Vajariꞌdarikia vaniꞌaha:
—Ni-niki ida kabajadiki kavarani.
Ijaꞌari kabajadikia bikaabokamanija koda ida ijaꞌari kamaodorohaki nokhoni ꞌbaꞌdani-ra anavagahavini?
Iniani!
— vakhaniha.
Ijaꞌaria vakajoniki ida Jesus athi
22 Hari.
Oniaroa,
pahisiriki kamasikoni vani hojaꞌianaha ada Jesus Jerusaléa.
Judeus kaijaꞌaria vanamonahaꞌianaki ida ihinika hoariha vakavaꞌihokiꞌianaja kaimoni ida mahi ꞌboꞌdakari vakadijaꞌari avikhananavaki Deu-ra khai vaniꞌavini kagorani-ra avanajaꞌdivini.
Jesus acusado de blasfêmia (João 10:22-42)
23 Hari.
Deu-ra khai vaniꞌavini kagorani kavasiribanini bodinia adahaꞌaha ada Jesus.
Amokhini kani ida ibavi bivaadahaki ijaꞌaria vanaonivini Salomão kohana ibavi.
24 Jesus adahana kabaꞌi,
vajoroniꞌaha adani judeus kaijaꞌari kidiania,
vananaꞌdohiꞌaha:
—Avaꞌi-ra karakhakhamaki ida Cristo ihini Cristo ihirini.
Haria nanamithajahaki bana.
Cristo mani i?
Deus ira karonaꞌiki mani i?
— vananaꞌdohiha ada Jesus.
25 Jesus vaꞌora niꞌaꞌaha:
—Aꞌonira onanamithaꞌiki ho,
kabaꞌi hora avakajariꞌdavini-ra avanofihi.
Bada oniꞌabakhiaki ida badani danoki kodiabiꞌi hora honariavini hiꞌiki.
Kidibadani danokia aꞌonira onanokiahivini mani ida hora karonavini avarigavini hija.
26 Kodiꞌovilia fori avihirini mani ida hora avakajariꞌdavini hija.
27 Kodiꞌovilia vakamithaki hida oathi.
Vaꞌora oogaki adani,
onaothia vikasiagaki adani.
28 Vaꞌora onoꞌaki adani ijaꞌari hora vavaipohihaki mahi jaꞌdini anokhomirikia Deus kania.
Ni-ihimiki bana ida vakadimahi.
Ni-nahina bikaabokaki ida vaꞌora saarivini osaꞌa kabodinia.
29 Kodiabiꞌi danona biaradaki ida hoariha danona.
Kodiabiꞌi hora noꞌavini vihiki adani hora vakajariꞌdariki kodipohi vihira kaimoni.
Ni-nahina bikaabokaki ida vaꞌora saarivini kodiabiꞌi saꞌa kabodinia.
30 Hovani,
kodiabiꞌi khama hoarani fori arihiki hari — Jesus vaꞌora niꞌaꞌaha.
31 Oniaroa,
jaꞌdi-ra vanabiinimananiꞌaha adani ijaꞌari vajoroniki afoꞌiana,
vanofiki ida Jesu-ra vanagahavini jaꞌdia abinira kaimoni.
32 Jesus vaꞌora niꞌaꞌaha:
—Aꞌonira onanokiahibakhiavini hiꞌiki ida kodibadani danoki jahaki kodiabiꞌi hora honariavini hiꞌiki.
Hana hini badani danokia okabadanina hida hora avanagahavini hija?
33 Vagathanihi ida Jesus athi:
—Kadabadani danokia ira anaabosivini hirihi ida ira anagahavini-ra anofivini.
Jahariki ida kadavarani Deus viaha,
oniani ida bana ira anagahavini-ra anofivini hija bana.
Ivani makhira oamani i,
kabaꞌi Deus ihini-ra ikahiki i.
34 Jesus vaꞌora niꞌaꞌianaha:
—Akadijaꞌari kavaꞌisohihi jiriki kapapirania hojaki hida athii:
“Aꞌonivani deuses avihiki aꞌoni.”
Niha ada Deus.
35 Aogaki ida Deus athi kaꞌoa hihahaꞌoadahani Deus athi kapapirania hojaki.
Deus vaꞌora naonivini adani ijaꞌari deuses,
hivaꞌoani Deus vaꞌora navaꞌisohiꞌiki adani athia.
36 Hovani Deus hora nagathogathoꞌiki ho,
hora karonaꞌiki ada ijaꞌari vakadiania.
Deus kaisai ohina-ra okahivini mani ida kodivarani Deua bivajahapaꞌitxiravini-ra avakahivini hija.
Ni-asohipaꞌitxiki hida kodivarani jaharini-ra avakahivini.
37 Badani Deua binofiki-ra bada oniꞌarija vaha;
ni-onofiki vaha ida hora avavakaijokavini.
38 Badani Deua binofiki-ra bada oniꞌahi;
hora avavakaijokavini-ra onofihi,
kodibadani danoki-ra avakajariꞌdaria kaimoni.
Kodivarani-ra avakajariꞌdavini kabaꞌi,
hariꞌa kodibadani danoki-ra vakajariꞌda bana mahija kodiabiꞌi kodiania akaramisina,
kidiania oakaramisina jaboni-ra avarigajahakivini.
Ijaꞌari hoarani fori arihiki hari — Jesus vaꞌora niꞌaha.
39 Vanofiꞌianaki ida Jesu-ra vagathivini,
abono-ra anaihotaꞌianamaniha.