3 Oniaroa,

Lázaro igamina vakaronaꞌihi ida Lázaro monina Jesus bivahojaki ibavi napaja hikia.

Maria vaathi-ra avikhaki Jesu-ra vaniꞌaꞌaha:

—Jesus,

ada kavamoniꞌaha kadavaꞌahi ivajahaki,

Lázaro oniki.

—Kavamonina kabaꞌi,

ni-abinihaꞌoadahaki bana ada Lázaro.

Namithaki ida kavamoni kidiania,

ijaꞌaria vanokija kaimoni ida Deus danona.

Deua binanokiaja kaimoni ida kidisai danona jahana,

oniani ida ijaꞌaria khai vaniꞌavini hija bana.

5 Jesus vaꞌora nakaidivaki adani igamina Marta,

Maria,

Lázaro vihiki.

6 Lázaro monina-ra kamithavini vani mahi ꞌbamiki asia hojaha ada Jesus bivahojaki kania.

7 Oniaroa,

vaꞌora niꞌaꞌaha adani ipohina:

—Aajoiva Judéia kaarabonia.

8 —Aajo,

— Jesu-ra vaniꞌaꞌaha adani ipohina — ni-mahi ipohiki radahaꞌiaki kaho Judéia kaaraboni kaijaꞌarini ira vanagahavini-ra vanofivini jaꞌdia.

Nahina mani ida iajoini-ra inofivini hija?

—Mahi hoarani 12 oras ipohini nokiaki ida mahi vagani.

Mahi vagaki ijaꞌari adahahi;

ni-aꞌdiraki.

Mahi vagani fori ohiki ho ijaꞌari hahavi vakadimoni.

Joma bakibakinia ijaꞌari adahahi;

aꞌdirahi.

Joma bakibakinia ijaꞌari adahani,

ni-nahina-ra nokiki,

oniani ida anaꞌdirani hija.

—Vadiꞌiki ada akadivaꞌahi Lázaro.

Ookhaki ho kidiania onanokiahara kaimoni.

—Aajo,

vadiha;

ni-makhanijanaki ada Lázaro.

—Ada abiniꞌaha Lázaro.

15 Khai hora niꞌaki ida ohojarina bivaabiniki kania.

Jahaki ida avakadimoni Lázaro kohana kania ohojarina.

Ohojarina mani ida hora avavakaijokavini hija bana.

Aokhava kidiania.

—Avaipohihava ada haria kaꞌojomoꞌiki mahija ariabinihahavivini Jesus kania.

Haria vanagahaki vahabini bana adani jaꞌdia!

— niha ada Tomé.

Tomé onina hoariha Soi.

17 Hari.

Oniaroa,

Betânia ibavi maakarinia vakaikahiꞌaha adani Jesus.

Vakamithaꞌihi ida Lázaro kohana abaꞌona kaꞌdamahaꞌini monini.

Mahi akoꞌbamahakhamakia hojaꞌini ida Lázaro abaꞌona jaꞌdi hodijamaꞌoki bodinia.

18 Ni-kanapajahikhamaki ida Betânia ibavi Jerusalém sidajia.

Judéia kaarabonia hojaki ida ibavi ꞌbamiki.

19 Oniania,

Judéia kaaraboni kaijaꞌarini vaipohikia vakamithahi ida Marta,

Maria vakadiꞌaajo abinina monini,

oniani ida vaꞌora vanavanavanahavini hija.

Vanofiki ida Maria,

Marta vavaꞌi-ra vavajahavini.

20 Marta bikamithahi ida Jesus maakarina varani hini,

oniania gaamananiꞌihi,

okhaonaniꞌihi,

okhaꞌihi Jesus kania.

Maria vani ida vagorana hojahi.

21 Akhanoꞌihi ida Marta Jesus kania,

biniꞌaꞌaha:

—Jesus,

hida ihojaja vaha;

ni-kodiꞌaajo abiniꞌiki vaha.

22 Kodiꞌaajo abinina kabaꞌi,

oogaki ida Deu-ra ikanikhariavini hikia ira noꞌavini bana — nihi ida Marta.

23 Jesua biniꞌaꞌihi:

—Ahokiki bana ada kadaꞌaajo.

—Oogaki ida ijaꞌari kahojai abosini kamahini ahokiki bana ada.

—Hovani oa ijaꞌari anahokiva abono ho.

Vaꞌora onoꞌavini hiki ida mahi anokhomiriki.

Abinini kabaꞌi ida ijaꞌari,

hora kajariꞌdarihi;

asia hokihi.

26 Ijaꞌari hora kajariꞌdarikia bivahojaki ida mahi anokhomiriki,

ni-abiniki bana ida ijaꞌari.

Ikajariꞌdaria hida kodivarani?

27 —Iniani,

okajariꞌdarihi ida iathini.

Okajariꞌdarihi ida Cristo ihini.

Ivani Deus kaisai i.

Deus ira karonaꞌiki i ijaꞌari vakadiania ikhani — Jesu-ra niꞌaꞌihi ida Marta.

28 Hari.

Oniaroa,

vara nini naothinia,

ajoiꞌihi ida Marta kidikajoꞌo-ra baranahahaꞌavini.

Vahoariha vakamitharavini,

kidikajoꞌo-ra niꞌaꞌihi:

—Baꞌai,

ada kaikahiꞌaha Jesus.

Ira kaboaꞌiki ada — Marta biniꞌaꞌihi ida Maria.

29 Maria bikamithahi ida kidiadia kavarani,

gaamananihi,

okhajorakiꞌihi Jesus kania.

30 Ibavi banininia hojaha ada Jesus asia,

Marta khama vara vavaniꞌaki ibavini kania,

ni-oꞌoiki ibavia kaho.

31 Gora bodinia vahojaki adani ijaꞌari Maria vaꞌini-ra vavajahaki.

Vanokiꞌihi ida Maria jorakia gaamananini,

okhaonanini.

ꞌDama kania okhani asarahaki vavanihavini,

oniani ida Maria naothinia vaꞌora arakasiagaja.

32 Jesus kania akhanoꞌihi ida Maria,

viaha aasiarariꞌihi,

biniꞌaꞌaha:

—Jesus,

hida ihojaja vaha;

ni-kodiꞌaajo abiniꞌiki vaha.

—Ida hanaja vania avakaꞌdamaꞌihi Lázaro abaꞌona?

—Inavanavanahaꞌa — vakhaniha.

35 Asaraꞌaha ada Jesus.

36 Vaabono vakaniꞌakhamaꞌaha:

—Jesua binakaidivaꞌoamanira ada Lázaro kohana.

—Bianavagahaꞌiki ida makhira kamaodorohaki nokho ꞌbaꞌdani.

Bikaabokaria koda ida Lázaro abinina-ra vaꞌaharavini?

38 Hari.

Vaꞌi amiꞌamiꞌianaha ada Jesus,

ꞌdama kania okhaꞌaha.

Jaꞌdi kahodijamaꞌoki kani ida Lázaro abaꞌona bivakaꞌdamahaja.

Katapafiaki ida kaathani jaꞌdi karahoa.

39 Hari.

Jesus vaꞌora honariaha:

—Vaani bana oni jaꞌdi karaho.

Jesus athi-ra gathaniꞌihi ida Lázaro kohana kakajoꞌo Marta oniki.

Biniꞌaꞌaha:

—Jesus,

ꞌbathaꞌiki ida abaꞌona.

Mahi akoꞌbamahakhamakia kaꞌdamahaꞌiki hada.

—Ira onavaꞌisohiꞌiki ho:

Hora ivakaijokadorohi;

Deus danona jahana arafiaki-ra inokihi — niha ada Jesus.

41 Oniaroa,

avanaaroaꞌihi ida jaꞌdi hodijamaꞌoki katapani.

Vada nimananiꞌaha ada Jesus.

Nihaꞌaha:

—Kodiabiꞌi,

khai ira oniꞌavini hiki oathi-ra ikamithavini.

42 Oogaki ida oathi-ra ikamithahahaꞌoadahavini.

Ijaꞌari hihida vahojakia vakamithaja kaimoni hida kodivarani ira oniꞌavini hiki,

vakajariꞌdaria kaimoni ida hora ikaronavini.

—Lázaro,

khaonaniꞌa.

—Vaani oni makari karafoana hiki mahija adahavini.

45 Hari.

Oniaroa,

Judeus kaijaꞌari vaipohiki Maria-ra vanavanavanahaki,

vanokiꞌiki ida Jesus kabadani danoki,

oniani ida vakajariꞌdaravini hija.

46 Vanokiva vahoariha vajoiki vaibavia,

vara vavaniꞌaꞌihi ida Jesus kabadani farisio vakadiania.

47 Oniaroa,

vajoroniꞌaha adani farisio,

sasidotxi vavakaꞌdaꞌdiva,

judeus kaijaꞌari vanasohiva abono vavakaꞌdaꞌdiva khama.

Vaabono vakananaꞌdohikhamaꞌaha:

—Niha aniꞌaꞌaki koda ada Jesus?

Vakavaꞌibodivaraniꞌa ida kidibadani danoki bada biniꞌabakhiaꞌiki.

Jahaki ida kidibadani anadabavini.

48 Anadabarihi ida kidibadani danokia kabadanina;

ijaꞌari hahavia vavakaijokaha.

Vanofiki bana ada Jesus akadiarabo kakaꞌdaꞌdini hina,

oniani ida Roma sidaji kakaꞌdaꞌdini athi-ra vanaabajanaravini hija.

Ovari vaꞌora karonaki bana adani kidisorara vakasaꞌaiki vaꞌora vanihimara kaimoni adani akadiarabo kaijaꞌarini.

Ariabinihahaviki bana hari.

Vanihimaki bana jaboni ida Deu-ra khai aniꞌavini kagorani — vaabono vakaniꞌakhamaꞌaha.

49-50 Hari.

Oniaro kari sasidotxi vakadikaꞌdaꞌdi ada Caifás.

Ovari vaꞌora niꞌaꞌaha adani vajoroniki:

—Avarigaria koda ida namithaki kaimoni?

Jesus abiniriha;

apohimajahahavihi.

Abiniha;

Roma sidaji kaijaꞌarini ni-haria vanapohimajaki.

Jahaki ida Jesu-ra anaabinivini,

vaihimirara kaimoni adani akadijaꞌari hahavi — vaꞌora niꞌaꞌaha ada Caifás.

51-52 Sasidotxi vakadikaꞌdaꞌdi hina mani ida Caifás Deus athi-ra vara vaniꞌavini hija bana.

Ni-ovaria bikavaꞌibodivaraniki hida kidivarani.

Biogaravini kabaꞌi vara bivaniꞌaki ida Deua binofiki.

Deua binofiꞌiki ida Jesus abinina judeus kaijaꞌari-ra vaꞌora akavaꞌijoara kaimoni.

Arabo hahavi kaijaꞌarini vakadimoni jaboni ida Jesus abinina,

vaabono vakanakaramisikhamaki fori vihira kaimoni,

ijaꞌari hoarani fori vihira kaimoni adani Deus kaisai.

53 Oniaroa,

Caifás vara vaꞌora niꞌavini naothinia,

judeus kaijaꞌari vanavaꞌisohiva abono vaabono vakanaaminakhamabakhiavini hiki niha vaniꞌaꞌavini vanaabinivini ada Jesus.

54 Hari.

Ni-aadahaonibakhiajanaki ada Jesus Judéia kaarabonia.

Ajihiꞌaha,

kidipohi khama Efraim sidajia avikhaꞌaha,

vahojaꞌaha.

Kanapajahikhamarihi ida amasi Efraim sidajia.

55 Oniaroa,

ni-ipohijanaki ida mahi judeus kaijaꞌari vakadihinika Páscoa oniki amonahani kamahini.

Jerusaléa avikharimananiꞌaha adani sidaji ipohiki kaijaꞌarini.

Páscoa kaihinikani amonahani viahania vanamonahaꞌimidiaki ida ihinika hoariha ijaꞌari vaabono visokovini vajahara kaimoni Deus viaha.

56 Ijaꞌari Jerusaléa avikhakia vanakoꞌdihaha ada Jesus.

Deu-ra khai vaniꞌavini kagorani kavasiribanini bodinia vajoronina vaabono vakananaꞌdohikhamaꞌaha:

—Nahina mani ida ikavaꞌibodivaranija?

Khamanira koda ada Jesus hidiaja ihinika kania?

Jokoa khariha vahabini ada — vakhaniꞌaha.

57 Sasidotxi vavakaꞌdaꞌdiva,

farisio khama vanofiki ida Jesu-ra vagathivini.

Vaꞌora vahonariajoraha adani kanori abono:

—Ijaꞌaria biogahi ida Jesua bivahojaki ibavini,

haria nanamithava bana.