Maria biahoariki ida misai kaidivaki Jesus ꞌdama kanamania
12
Hari.
Oniaroa,
6 mahi ipohini Páscoa kaihinikani amonahani viahania okhaꞌianaha ada Jesus Betânia ibavia.
Betânia ibaviki ada Lázaro.
Hiꞌada Lázaro Jesua bianahokiꞌiki ada.
2 Jesu-ra vanakaidivavini mani ida sidaji kaijaꞌarini ꞌbai-ra vanamonahavini hiꞌia Jesus,
kidivaꞌahi khama vakadimithaꞌa kaimoni.
Marta biakodiaki ida ꞌbai ravinani.
Lázaro,
vahoariha vihiki vavithiꞌiki ꞌbai-ra vanaibavivini ibavinia Jesus khama.
Maria unge Jesus (João 12:1-11)
3 Hari.
Viꞌbaina kabaꞌi Maria bianikhamiꞌihi ida misai bavini jiꞌbiniki.
Litro-ra dava niꞌaki ida.
Ni-paꞌitxirihi ida misai.
Amonahaki ida misai naado ꞌdamani abohani basinania.
Kaidivani arafiaki ida naado basinani mitxaki.
Hari.
Maria binabiiniꞌihi ida naado,
Jesu-ra namaakariꞌihi,
biakamisaiꞌihi ida Jesus ꞌdama kaidani.
Karaho ida misai biahoariki.
Kaꞌdaꞌdini kaafani vania bikanajohaꞌia ida.
Misaia binamitxahahaviꞌihi ida gora bodini.
4 Jesus ipohina vahararana hojaha ada Judas Iscariotes.
Ovaria biarakhaki bana ada Jesus vahoariha vanaabinira kaimoni.
Hari.
Maria kabadani-ra vajaharavini mani ida vahoariha-ra vaꞌora vara niꞌavini hija:
5 —Kaidivani arafiaki ida misai.
Maria binakavithimaki ida.
Misai kaidivani ida 300 mahi ipohini badani abosini jiniro.
Haria noꞌaja vaha;
pavakari anihahi vaha.
Vaꞌora anoꞌaha vaha adani ijaꞌari vakanahinariki misai abosini kajinironia — niha ada Judas Iscariotes.
6 Ni-Judas Iscariotes vaꞌora nakaidivaki adani vakanahinariki.
Judas kavarani hirihi ida vakanahinariki-ra kajoamoravini.
Kidivarani hiki ida jiniro-ra nofivini.
Kaboꞌdinofina mani ida vakanahinariki-ra vaꞌora kanavaranisohinihavini hija.
Judas Iscariotea biakadavaꞌaki ida Jesus,
kidipohi khama vakadijiniro bavini.
Judas Iscariotes abono-ra vaaniabakhiavini hiki ida jiniro itxani.
7 Hari.
Jesus vaꞌora niꞌaꞌaha:
—Jakaho hojava oni Maria.
Maria binaibavijahaꞌiki hida misai hora kamisaihavini kaimoni hini.
Hora vakaꞌdamavini viahani mani hida hora kamisaihavini hija.
8 Vakanahinariki vahojahahaꞌoadahaki,
ni-ohojahahaꞌoadaharihi avakadiania.
Lázaro-ra vanaabinivini-ra vanofivini varani hini hida
9 Hari.
Oniaroa,
ijaꞌari vaipohikia vakamithaki ida Jesus varani hina,
Betânia ibavia hojana,
oniani ida kidiania vaꞌora arakhaja.
Vanavanavanahaha ada Jesus.
Vanavanavanahaha jaboni ada Lázaro Jesua bianahokiꞌiki.
10 Oniania,
sasidotxi vavakaꞌdaꞌdiva vaabono vakaniꞌakhamaꞌaha:
—Jahaki ida Lázaro abinina-ra avahonariahivini jaboni.
11 Ijaꞌaria vanokiꞌiki ada Lázaro ahokiꞌina,
oniani ida Jesu-ra vakajariꞌdaravini hija.
Ni-haria vanofijanaki vakadikaꞌdaꞌdi arihina.
Niha aniꞌaꞌaki koda ada Lázaro abinina avahonariahivini?
— vaabono vakananaꞌdohikhamaꞌaha adani judeus kaijaꞌari vanavaꞌisohiva abono.
Oꞌoiꞌianaki ada Jesus Jerusalém sidajia
12 Hari.
Oniaroa,
kaꞌafokajomani Jesus monina-ra vakamithaha adani ijaꞌari vaipohiki Jerusaléa vahojaki,
hivaꞌoani Páscoa kaihinikani amonahani viahania vakaikahiꞌiki.
Vakamithaꞌihi ida varani Jesus amaakariꞌina Jerusaléa.
Entrada triunfal de Jesus em Jerusalém (João 12:12-19)
13 Oniaroa.
Jesus amaakarina vaꞌora khai niꞌaha.
Varadihadihaꞌaha ada kahami afa fori hiki,
Jesus radahana kabaꞌi khai vakhaniꞌaha.
Vabodiꞌbaraꞌaha:
—Jahaki ada Deus.
Deus,
ikajoamora bana ada ikaronaꞌiki.
Ikajoamora bana ada akadijaꞌari-ra vakaꞌdaꞌdiki kaimoni — vakhaniha afohaꞌoadaha adani ijaꞌari.
14 Jesua bigathaniꞌaha ada jumento paꞌitxi,
namana okasiꞌaha,
jumentoa bivaadahaꞌaha.
Nimania ida athi,
Deus athi kapapirania hojaki afojora:
15 “Jerusalém sidaji kaijaꞌarini,
hariꞌa vaofini bana.
Vada vaniꞌa.
Khaki hada avakadikaꞌdaꞌdi
jumento paꞌitxia
bivaadahavini”.
Nimania ida Deus Jesus kaikahina-ra vavaꞌisohihijoraꞌavini.
16 Hari.
Ni-Jesus ipohina vakavaꞌibodivaranijoraki ida nahina nini Deua vara bivaniꞌajoraki namithaꞌini.
Jesus abinina,
ahokina,
Deus Ibavi Jahakaꞌoaki kania ajoisina naothinia Jesus ipohina vakavaꞌihokiꞌiki ida Deus athi namithaꞌini vakadiania.
Vakavaꞌihokiꞌiki ida Jerusaléa Jesus kaikahina jumento namana.
17-18 Hari.
Ijaꞌari vaipohikia vakaragararihaꞌaha ada Jesus Jerusaléa akhanona.
Akhanona viahania vakamithaꞌiki ida Jesus Lázaro-ra anahokivini kavaranihi,
oniani ida Jesus akhanona-ra vanaviahanokhavini hija.
Ijaꞌari Lázaro kaꞌdamahana kania vahojaki vaꞌora avananamithaonivini hiki afobakhia ida Jesus kabadani danoki arafiaki vanokiꞌiki.
19 Hari.
Oniaroa,
farisio vaabono vakaniꞌakhamaꞌaha:
—Vada vaniꞌa.
Ijaꞌari hahavia vakajariꞌdariha ada Jesus.
Vajariꞌdana vaꞌora ahonariabakhiavini kabaꞌi,
ni-ariathi-ra vanaabapaꞌitxiriha adani ijaꞌari.
Jesu-ra vavaipohihahahavimanira adani — vakhaniꞌaha adani farisio.
Judeus kaijaꞌari vihirikia vanakoꞌdihaki ada Jesus
20 Hari.
Oniaroa,
judeus kaijaꞌari vaipohiki avikhaꞌaha Jerusaléa,
vanamonahaja kaimoni ida Páscoa kaihinikani.
Vahararana vahojaki adani judeus kaijaꞌari vihiriki.
Judeus kaijaꞌari vihirina kabaꞌi,
Deu-ra vakanamasiviꞌaha Jerusaléa.
Jesus anuncia sua morte (João 12:20-36)
21 Hari.
Jesus ipohina Filipe oniki kania avikhaꞌaha adani judeus kaijaꞌari vihiriki.
Betsaida sidaji kaijaꞌarini ada Filipe.
Galiléia kaarabonia hojaki ida Betsaida sidaji.
Judeus kaijaꞌari vihiriki vaipohiki vaibavi ida Galiléia kaaraboni.
Hari.
Filipe-ra vaniꞌaꞌaha:
—Anofiki ida Jesus khama vara akhanina.
22 André kania okhaꞌimidiaha ada Filipe,
binanamithaꞌihi ida vakadivarani.
Hari.
Avikhaꞌaha adani André,
Filipe khama Jesus kania.
Vaniꞌaꞌaha:
—Jesus,
adani vakaikahiꞌaha akadijaꞌari vihiriki.
Vanofiki ida ira vara vaniꞌavini — vaniꞌaꞌaha ada Jesus.
23 Jesua bigathaniꞌihi ida vaathi:
—Hovani ijaꞌari hahavi vakadiꞌaajo ho.
Jahaki ida akadijaꞌari vihiriki vikhana kodiania.
Amaakariꞌiki hida mahi Deus ojahana,
odanona-ra nanokiavini kamahini.
24 Kaꞌoa hiki hida rajomi kavaranihi aꞌonira onavaꞌisohivini hiki bana.
Rakhajaharini oadani ida trigo ꞌbaꞌdani nami imani bodinia,
ni-aipohiki ida baꞌbaꞌda.
Nami imani bodinia rakhajahahi,
abiniki fori hiki ida.
Abiniki fori hini naothinia movahi,
avijavahi,
karahohi,
bonoꞌihi,
aipohiꞌihi ida trigo ꞌbaꞌdani — niha ada Jesus.
Jesus vaꞌora kavarajomiki adani,
abinina ahokiꞌina naothinia kidipohi avaꞌbaꞌdina.
25 Asia vara niha ada Jesus:
—Ijaꞌaria bada biniꞌahahaꞌoadahahi ida binofiki kidimoni hini,
kavithimaki fori hiki ida kidimahi.
Baꞌbaꞌda rakhajahariki fori hiki ida.
Akamadaki fori hiki ida kidimahi.
Ni-bivahojaki ida mahi jaꞌdini anokhomiriki Deus kania.
Hari.
Oipohina bada biniꞌahahaꞌoadahahi ida Deua binofiki,
oniani ida baꞌbaꞌda rakhajahaki fori nihani hija.
Hokini oadani hidiaja bivaꞌahaha ada Deus kidimahi honariana hina,
oniani ida kidimahi jaꞌdini anokhomiriki-ra vahojavini hija Deus kania.
26 Ohonariaki ida ijaꞌari kidikaꞌdaꞌdi ohina-ra nofiki;
kodihonari-ra naabavini.
Kodiania okhaki bana ida ijaꞌari oathi-ra naabaki oavikhaki kania.
Ijaꞌari vaipohiki vaviaha kodiabiꞌia bigathanijahakiki bana ida oathi-ra naabaki — vaꞌora niꞌaha ada Jesus.
Jesua vara bivaniꞌajoraki ida abinina
27 Hari.
Jesus vaꞌora niꞌaꞌaha adani ijaꞌari vajoroniki:
—Ovaꞌi rogo inikarahoki ho.
Nahina mani ida bana kodiabiꞌi-ra vara oniꞌavini hija?
Ni-okanikhariavini hiki ida oimana ꞌbanani aniani kodiania.
Ijaꞌari vakadiania hora rakhaꞌiki oimana ꞌbanani-ra okamithaja kaimoni.
28 Kodiabiꞌi-ra vara oniꞌaki bana ho:
Kodiabiꞌi,
inanokia bana ida ijahani danoki mahija ijaꞌari khai ira vaniꞌavini — oniki bana ho.
Oniaroa,
nama kamithavahaki ida athii:
—Onanokiaꞌiki ida ojahana danoki,
onanokiaꞌianaki bana ida.
29 Vajoronikia vakamithaꞌihi ida athii,
vakhaniha:
—Bahi kahiririhi hida — vakhaniha.
Vakhaniha adani vahoariha:
—Deus ibavi kaijaꞌarinia vara biniꞌaꞌiki ada Jesus.
30 Jesus vani ada vaꞌora niꞌaꞌaha:
—Kodimoni hirihi ida athi.
Avakadimoni oamani ida,
aꞌonira navaꞌisohiki kaimoni.
31 Amaakariki ida mahi Deua bivahonariahivini ida hojai asohiriki abosini nahina jaharikia.
Amaakariꞌiki ida mahi Deua biakakojavini ada nofina vihiriki vakadikaꞌdaꞌdi.
Oaniki bana ida Jahari danona kidiania,
bikaabokajanaria kaimoni ida binofiki.
32 Hora varagaamananivini kamahini ava akasanakhamakia,
oaniki bana ida danona.
Vaꞌora okaboaꞌiki bana adani ijaꞌari hahavi kodiania kodijaꞌari vihira kaimoni.
33 Nimania ida Jesus vaꞌora navaꞌisohijoravini niha ninina abinina.
34 Ijaꞌari vajoronikia vaniꞌaꞌaha:
—Akaꞌojomoꞌibakhiaki ida Deus athi namoniva abono kohana vaathi Deus kavaꞌisohihi jiriki kapapirania hojaki.
Vakadivarani hiki ida mahi hahavi Cristo kamahi anokhomirini.
Ni-abiniki bana ada Deua bikaronaki.
Kadavarani hiki ida ijaꞌari hahavi kaꞌaajo ihini,
kabaꞌi iabiniki bana i ava akasanakhamakia ira varagaamananivini.
Cristo mani koda ada ijaꞌari hahavi kaꞌaajo?
Nahina mani ida iabinini-ra ikahivini hija bana?
35 Jesus vaꞌora niꞌaha:
—Mahi ipohiriki hojaki bana ida mahi vagaki avakadiania.
Hojani oadani vaadahaꞌa bana mahija avajominiravini.
Ijaꞌari adahaki bakibakinia ni-biogaki ida hana hini ibavia okhani.
36 Mahi vagani fori hiki hida oathi.
Ohojana oadani avakadiania,
oathi-ra avakajariꞌdarihi;
oathi avakadivaꞌibodivarani-ra navagaki fori hihi,
oniani ida mahi vagania avaadahaki fori aꞌonira nihaja bana.
Ijaꞌaria vakajariꞌdaki ada Jesus
Hari.
Vara nina naothinia,
ajihiꞌaha ada Jesus.
Ahojaia okhaꞌaha,
ibavi ijaꞌaria avigarikia hojaꞌaha.
37 Vanokivini kabaꞌi ida Jesus kabadani danoki ipohiki,
ijaꞌari vaipohikia vakajariꞌdaki ada Jesus.
Crentes e descrentes (João 12:37-50)
38 Vajariꞌdana mani ida Isaías kohana athi-ra nanamithaja vakadiania.
Nimania hida Isaías kohana Deu-ra navaꞌisohivini hiꞌiki vajariꞌdana varani hini:
“Deus,
imoninia aakavaranionina kabaꞌi,
akadivarani-ra vakajariꞌdaki adani.
Vaꞌora inanokiahivini kabaꞌi idanonia,
vajariꞌdaki adani ijaꞌari.
Vanofiki ida iathini-ra
vakajonivini.”
Niki ida Deus athi Isaías kohana vara bivaniꞌaꞌiki.
39 Deu-ra vakajonivini mani ida vajariꞌdarina-ra vakaabokaravini hija.
Nimania bana hida Isaías kohana athi hoariha,
vajariꞌdaki-ra vaꞌora vara vaniꞌajoravini:
40 “Deua bikanamaodorohaki fori hiki ida vanokho
ꞌbaꞌdani,
nahina-ra vanokirara kaimoni.
Bikarahobaki fori hiki
jaboni ida
vakadivaꞌibodivarani,
avigaria kaimoni ida nahina,
oniani ida Deus kania avikhana-ra varagarivini hija,
vaꞌora akavaꞌijoara kaimoni ada Deus.”
Nimania ida Isaías kohana Deus athi-ra vavaꞌisohihijoravini.
41 Isaías vadami fori hikia Jesus jahana,
danona,
vagana hiki-ra nokivini mani ida Jesu-ra vara vaniꞌajoravini hija.
42 Kaꞌoa hini kabaꞌi ida Isaías kohana athi,
judeus kaijaꞌari vanavaꞌisohiva abono vaipohiki ni-Jesu-ra vakajariꞌdaki.
Vajariꞌdarina kabaꞌi,
ni-vahoariha-ra vaꞌora vananamithavini hiki.
Vaabono vaniꞌavini afohanana:
—Jesu-ra okajariꞌdaravini-ra okahihi;
farisio hora avakakojahi Deu-ra vara aniꞌavini kagorania,
ooꞌoijanaria kaimoni.
Vaꞌora ofinivini mani ida Jesu-ra okajariꞌdaravinia hora kanavaranirija — vakhanihananaha adani judeus kaijaꞌari vanavaꞌisohiva abono vaipohiki.
43 Vanofivini arafiaki ida ijaꞌaria vakadihojai jahani vakahivini,
oniani ida Jesus ipohina vihina-ra vakahiravini hija.
Ni-vakavaꞌibodivaranipaꞌitxiki ida Deua binofiki.
Deua binofiki ida Jesu-ra vakajariꞌdaravini-ra vakahivini.
Ijaꞌari nasohiva abono ada Jesus
44 Hari.
Oniaroa,
Jesus athi ꞌbarakia vaꞌora niꞌaha:
—Ijaꞌari hora kajariꞌdarihi;
bikajariꞌdariha ada jaboni hora karonaꞌiki.
45 Ijaꞌari kodihojai-ra nokihi;
binokihi ida jaboni hora karonaꞌiki kahojai.
46 Mahi vagani fori ohiki ho araboa okhaꞌina ijaꞌari vakadiania,
onavagaja kaimoni ida vakadivaꞌibodivarani.
Ni-bakibakini kania hojajanaki fori hiki ida ijaꞌari hora kajariꞌdariki.
47 Ijaꞌari oathi-ra kamithahi;
binaabarihi,
kodibadani hirihi ida hidakabaꞌi ijaꞌari kahojai asohiriki abosini.
Ijaꞌari vakadiania hora rakhaki ijaꞌari Deu-ra avigariki-ra vaꞌora oakavaꞌijoahavini.
Oathi-ra naabariki-ra Ibavi Jaharikaꞌoakia vaꞌora okaronavini hirihi hida hora rakhaja ijaꞌari vakadiania.
48 Ijaꞌari nasohiva abono fori hiki hida oathi aꞌonira onavaꞌisohivini hiꞌiki.
Oathia binanokiaki bana ida kodivarani-ra kapoaririki kahojai asohiriki,
oniani ida hora kajoniki-ra Ibavi Jaharikaꞌoakia arakhaja bana,
mahi ijaꞌari kahojai asohiriki abosini-ra gathanivini kamahini.
49 Kodivarani hirihi ida varani vara ovaniꞌaꞌiki.
Kodiabiꞌi hora karonaki vani hora noꞌavini hija hida varani vara ovaniꞌaꞌiki.
Vara ovaniꞌaki ida varani binofiki.
50 Deus athia biananokhomirihi ida ijaꞌari vakadimahi,
vavahojaja kaimoni ida mahi jaꞌdini kidiania.
Vara ovaniꞌavini hiki hida varani kodiabiꞌi hora honariavini hini.