Jerusaléa avikhaha adani Jesus
11
Hari.
Ai vihiꞌaha adani Jesus,
Jerusalém sidaji-ra avanamaakariꞌaha.
Vakaikahiꞌimidiana araboꞌoa namahiki kania,
monte das Oliveiras onikia.
Ibavi ꞌbamiki kahararakhamania hojahi ida araboꞌoa namahiki.
Ibavi hoariha Betfagé oniki.
Ibavi hoariha Betânia oniki.
2 Hari.
Avamaakarina kabaꞌi Jesus vaꞌora honariaꞌaha adani ipohina viꞌbamiki:
—Avikhananavaꞌa bana.
Ibavi kahararakhamania avakaikahihi,
avakaragaki bana o jumento paꞌitxi ahosagaki.
Jumento paꞌitxi ni-nahina okasiki kaho namana.
Avakokhariha,
hida kodiania vavikha bana.
3 Ijaꞌari aꞌonira vahabini bana vananaꞌdohivini hiki avakadibadani.
Vaꞌora vanavaꞌisohi bana:
“Jesua birihavini binofiꞌimidiaki hada.
Naothinia asaꞌianaha
ibavia.”
Vaꞌora vaniꞌa bana — niha ada Jesus.
4 Oniaroa,
avikhaꞌaha adani viꞌbamiki.
Vakaragaꞌaha ada jumento paꞌitxi hagihia ahosagaki gora banininia.
Vakaragaha,
vakokhariꞌaha.
5 Vakokharivini kabaꞌi,
kajumentoki vaꞌora nanaꞌdohiꞌaha:
—Nahina mani oni avakadibadani hija?
Nahina kaimoni mani o jumento-ra avakokharivini hija?
6 —Jesua birihaꞌimidiavini binofivini mani ida akokharivini hija.
Birihavini naothinia asaꞌianaha ibavia — vaꞌora vaniꞌaꞌaha.
—Ba avavikha — vaꞌora vaniꞌaꞌaha.
7 Oniaroa,
Jesus kania vavikhaꞌaha.
Jumento paꞌitxi namana avarakasiꞌihi ida vakadikarahobi.
Okasiꞌaha ada Jesus.
8 Jesus radahana kabaꞌi,
ijaꞌaria vanahojahi ida vakadikarahobi jumento viaha hagihia.
Vahoariha avavaꞌboaꞌahapikihi ida avaafani.
Vanahojaꞌaha jumento viaha hagihia.
Vakadihojai oamani ida vakadibadani hija.
Kaꞌdaꞌdi jahaki viaha vanahojavini ida vakadikarahobi,
avaafani hiki.
9 Hari.
Avikhananavaki vabodiꞌbaraꞌiki,
avikasiagaki jaboni vabodiꞌbaraꞌiki.
Khai vakhanina mani ida athii ꞌbarakia Deus jahana-ra vara vavaniꞌavini hija:
—Jahaki vagaki ada Deus!
Deua bikaronaꞌiki ada Jesus khaꞌina,
ijaꞌari vakadikaꞌdaꞌdi hira kaimoni.
Deus,
ikajoamora bana ada ikaronaꞌiki akadiania!
10 Davi kohana kaisai namitharonisiagaki ada.
Ovari fori hiki ada Jesus.
Akadijaꞌari-ra vaꞌora vakaꞌdaꞌdiki bana ada.
Khai aniꞌava ada Deus.
Vabodiꞌbarabakhiaha adani ijaꞌari vâipohiki.
Khai vaniꞌaꞌihi ida Jesus khaꞌina.
11 Hari.
Jerusalém sidajia vakaikahiꞌaha adani Jesus.
Deu-ra khai vaniꞌavini kagorania avikhaꞌaha.
Jesua vada biniꞌaꞌihi ida gora kavasiribanini bodini.
Mithani vani avajoiꞌaha.
Betânia avikhaꞌaha adani Jesus 12 vihiki vaipohina khama.
Jesua vara biniꞌaki ida figira avani
12 Hari.
Kaꞌafokajomani Betânia ai vihiꞌianaha.
Jerusaléa avajoiꞌaha adani Jesus kidipohi khama.
Vaiꞌamiꞌaha ada Jesus.
13 Bianokiꞌihi ida figira avani napaja.
Afani hogoki ida figira avani.
Binavanavanahaꞌihi,
binakoꞌdihi ida ihiꞌai.
Figira avani kania akhanoha,
bikaragaꞌihi ida avaafani kaꞌoa.
Ni-kidibonoi kamasikoni hiki kaho.
14 Jesua biniꞌaꞌihi ida figira avani:
—Ni-nahina bihajanaki ida ibononi.
Kidivarani kamithamahani vihiha adani Jesus ipohina.
Deu-ra khai vaniꞌavini kagorania avikhaꞌaha adani Jesus
15 Hari.
Jerusalém sidajia vakaikahiꞌianaha adani Jesus kidipohi khama.
Deu-ra khai vaniꞌavini kagorani kavasiribanini bodinia avikhajakosiꞌianaha.
Jesus vaꞌora nokiꞌaha adani ijaꞌari vaipohiki igitha-ra pavakari vaꞌora vanihaki.
Ijaꞌari vakapavakarivini hiki ida igitha Deu-ra vakanavaꞌigavini kaimoni hini.
Jesus vaꞌora aakojaꞌaha adani pavakarihi abono.
Vaꞌora aakojaha jaboni adani igitha-ra vakapavakarihaki.
Jiniro anabosiva vakadimesa-ra akanaadarioniꞌaha.
Hoꞌdoko-ra pavakari vakanihaki vakadivithi ibavini-ra akanaadarioniꞌaha.
16 Athi khanakia vaꞌora niꞌaha ai vihira kaimoni.
Vaꞌora niꞌaha:
—Hariꞌa avakadinahina-ra vakaibaꞌi Deu-ra khai aniꞌavini kagorani kavasiribanini bodinia.
17 Oniaroa,
vaꞌora kaꞌojomoꞌiꞌaha,
vaꞌora niꞌaꞌaha:
—Deus athi kapapirania hojaki hida athi:
“Deu-ra khai vaniꞌavini kagorani vania vakaikahiha adani arabo hahavi
kaijaꞌarini,
Deu-ra vara vaniꞌara kaimoni.”
Niki ida papira athini.
Boꞌdi abono ibavini avavanihamanija hida gora?
Igitha kaidivani-ra avanakarahovini mani ida ijaꞌari-ra avaboꞌdiabakhiavini hija — niha ada Jesus.
18 Hari.
Jesus vaꞌora aakojavini kavaranihi-ra vakamithavini adani sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama.
Vaabono vakaniꞌakhamaꞌaha:
—Jahaki ada abinina Jesus.
Nihanikia kodavaha anaabinira ada?
Jesus kaꞌojomoꞌihi athini-ra vavajahaki adani ijaꞌari vaipohiki.
Vaꞌora afiniki adani Jesu-ra vavajahaki.
Jesu-ra anaabinihi;
haria vakaihamahikarahoki bana adani — vaabono vakaniꞌakhamaꞌaha.
19 Mithani vaivaini ai vihiꞌianaha adani Jesus Jerusaléa.
Figira avani varani hini hida
20 Hari.
Oniaroa,
kaꞌafokajomani Jerusaléa avajoiꞌianaha.
Vanokiꞌianahi ida figira avani araꞌokhohahaviki,
ꞌdamania araꞌokhoꞌiki jaboni.
21 Pedroa bikavaꞌihokihi ida Jesus kavarani.
Oniaroa,
biniꞌaꞌaha:
—Aajo,
vada iniꞌa ida figira ꞌdamania araꞌokhoꞌiki.
Inajahariꞌiki oni hidanija aradahana,
abonobakhiajanarini ikahiꞌiki oni,
oniani ida figira-ra anaraꞌokhoꞌia.
22 Oniaroa,
Jesus vaꞌora niꞌaha adani ipohina:
—Aꞌonira onavaꞌisohiki bana ho.
23 Avavaꞌini kakhakhamarini vani Deu-ra avakajariꞌdarihi;
badani danoki ipohiki-ra avakaabokaki bana aꞌoni.
Avakaabokaki jaboni ida arabo namahiki-ra avahonariavini:
“Arabo namahiki,
akaraꞌoꞌa!
Iabono nahokahiꞌa paha
bihiaki bodinia.”
Deu-ra avakajariꞌdarihi;
namithaki bana ida avaniꞌaki.
24 Aꞌonira onavaꞌisohivini hiki,
Deu-ra avakajariꞌdarihi;
avagathanihi ida kidiania avakanikhariaki.
Avagathanivini avakajariꞌdarihi;
avagathanihi.
25 Deu-ra avakanikhariavini viahania vahoariha-ra vaꞌora avakariakaꞌa bana.
Aꞌonira vanaihamahiꞌiki adani vahoariha,
avakavaꞌiꞌbiriniꞌa bana ida vakadihojai asohiriki mahija avakadiabiꞌi nama hojaki avakadihojai asohiriki-ra naꞌbiravini jaboni.
26 Hoariha kahojai asohiriki-ra avarakavaꞌiꞌbirinirihi;
ni-avakadihojai asohiriki-ra naꞌbiraki ada avakadiabiꞌi nama hojaki — vaꞌora niꞌaha ada Jesus.
Nahina bihonariara ada Jesus bada nina
27 Hari.
Jerusaléa vakaikahiꞌianaha adani Jesus.
Deu-ra khai vaniꞌavini kagorani kavasiribanini bodinia avikhajakosiꞌianaha.
Jesus kania avikhamiꞌaha adani sasidotxi vavakaꞌdaꞌdiva,
judeus kaijaꞌari vanavaꞌisohiva abono,
judeus kaijaꞌari vakaꞌojomoꞌiva abono vihiki.
28 Jesu-ra vananaꞌdohiꞌaha:
—Nahina vani ira honariavini hija ida kadabadani-ra bada iniꞌavini?
29 Vaꞌora niꞌaha ada Jesus:
—Aꞌonira onanaꞌdohiꞌimidiaki bana ho.
Kodinaꞌdohi-ra avagathanihi;
aꞌonira onavaꞌisohivini hiki bana ada hana hina hora honariaki.
30 Hora vananamithaꞌa bana,
João Batista kohana vaꞌora kanaꞌiki adani ijaꞌari vakadihojai asohiriki-ra vakavaꞌipahiniꞌiki.
Hana hina vani João Batista kohana-ra honariaja ijaꞌari-ra vaꞌora kanara kaimoni?
Deus vania koda bihonariara ada João Batista ijaꞌari-ra kanavini?
Ijaꞌari vania koda bihonariara ada João Batista ijaꞌari-ra kanavini?
— vaꞌora nanaꞌdohiꞌaha ada Jesus.
31-32 Oniaroa,
vaabono vakaniꞌakhamaꞌaha adani sasidotxi vavakaꞌdaꞌdiva:
—Anofirihi ida João Batista Deua bihonariavini-ra akahivini.
Ni-anofiki jaboni ida Deus João Batista-ra honariaravini-ra akahivini.
Deus João Batista-ra karonavini-ra akahihi;
jaharihi ida João Batista athi-ra akajariꞌdavini Jesua bikahivini.
Deus João Batista karonaravini-ra akahihi;
ijaꞌari haria vakaihamahihi.
Haria vakaihamahivini hiki João Batista Deus athi namoniva abono hina-ra vakajariꞌdaravini — vaabono vakaniꞌakhamaꞌaha adani sasidotxi vavakaꞌdaꞌdiva.
33 Oniaroa,
Jesu-ra vaniꞌaꞌaha:
— Ni-aogaki ida João Batista Deua bihonariavini
bihonariaravini ijaꞌari-ra kanavini.
Oniaroa,
Jesus vaꞌora niꞌaꞌaha:
—Hora avananamitharihi;
ni-aꞌonira onanamithaki jaboni hora honariakia — vaꞌora niꞌaha ada Jesus.