Nahina bihonariara ada Jesus bada nina
20
Hari.
Deu-ra khai vaniꞌavini kagorani kavasiribanini bodinia hojaꞌianaha ada Jesus.
Vaꞌora kaꞌojomoꞌiꞌianaha adani ijaꞌari.
Kidivarani hiki ida Deus monina jahaki.
Jesus kania avikhamiꞌaha adani sasidotxi vavakaꞌdaꞌdiva,
judeus kaijaꞌari vanavaꞌisohiva abono,
judeus kaijaꞌari vakaꞌojomoꞌiva abono vihiki.
2 Jesu-ra vananaꞌdohiꞌaha:
—Nahina vani ira honariavini hija ida kadabadani-ra bada iniꞌavini?
Lucas 20:1-47
3 Vaꞌora niꞌaha ada Jesus:
—Aꞌonira onanaꞌdohiꞌimidiaki bana ho.
Hora vananamithaꞌa bana,
João Batista kohana vaꞌora kanaꞌiki adani ijaꞌari vakadihojai asohiriki-ra vakavaꞌipahiniꞌiki.
4 Hana hina vani João Batista kohana-ra honariaja ijaꞌari-ra vaꞌora kanara kaimoni?
Deus vania koda bihonariara ada João Batista ijaꞌari-ra kanavini.
Ijaꞌari vania koda bihonariara ada João Batista ijaꞌari-ra kanavini?
— vaꞌora nanaꞌdohiha ada Jesus.
5-6 Oniaroa,
vaabono vakaniꞌakhamaꞌaha adani sasidotxi vavakaꞌdaꞌdiva:
—Anofirihi ida João Batista Deua bihonariavini-ra akahivini.
Ni-anofiki jaboni ida João Batista Deua bihonariaravini-ra akahivini.
Deus João Batista-ra karonavini-ra akahihi;
jaharihi ida João Batista athi-ra akajariꞌdavini Jesua bikahivini.
Deus João Batista-ra karonaravini-ra akahihi;
ijaꞌari haria vakaihamahihi.
Haria vakaihamahivini hiki João Batista Deus athi namoniva abono hina-ra vakajariꞌdaravini.
Ijaꞌari vaipohiki vajoronikia vakajariꞌdarihi ida Deus João Batista kohana-ra honariavini ijaꞌari-ra kanavinia.
Afiniki ida ijaꞌari haria vanagahavini jaꞌdia — vaabono vakaniꞌakhamaꞌaha adani sasidotxi vavakaꞌdaꞌdiva.
7 Oniaroa,
Jesu-ra vaniꞌaꞌaha:
—Ni-aogaki ida João Batista ijaꞌari-ra kanavini,
Deua bihonariavini bihonariaravini.
8 Oniaroa,
vaꞌora niꞌaha ada Jesus:
—Hora avananamitharihi;
ni-aꞌonira onanamithaki jaboni hora honariakia — vaꞌora niꞌaha ada Jesus.
Uva avakadavaꞌava abono karajomihi hida
9 Hari.
Oniaroa,
rajomi kavaranihia Jesus vaꞌora vara niꞌaha adani ijaꞌari vajoroniki:
—Kaꞌdaꞌdia bivahonariahihi ida siroi uva rakhajahani ibavini kaimoni.
Bivahonariahihi ida uva avani rakhajahani.
Bonoꞌihi havahaki kaimoni ida ihiꞌai uva oniki.
Varakhaivini naothinia,
vaꞌora honariaha adani badani abono avakadavaꞌaja kaimoni ida kidiuva avani.
Avakadavaꞌahi ida uva avani,
bonoꞌini kamahini aꞌbani pitani vakadimoni,
pitani vakadikaꞌdaꞌdi kaimoni.
Bivahonariahivini naothinia ajihiꞌaha.
Ibavi hoariha napaja hikia okhaꞌaha.
Mahi ipohiki hojaꞌaha,
ni-joijorakiki ada kaꞌdaꞌdi.
10 Oniaroa,
uva aꞌdihani kamasikoni vani kaꞌdaꞌdi vaꞌora karonaꞌaha ada kidihonai abono.
Biniꞌaha:
“Okhaꞌa uva avakadavaꞌava abono vakadiania
mahija kodiuva aꞌbani pitani-ra igathanivini kodimoni.”
Hari.
Ajihiꞌaha,
uva kasiroini kania kaikahiꞌaha.
Uva avakadavaꞌava abonoa vidafiahaꞌaha ada makhira.
Dairina vani vahonariaꞌaha ajihiꞌina.
11 Hari.
Kaꞌdaꞌdia bikaronaꞌianaha ada honai abono hoariha,
uva avakadavaꞌava abono vakadiania okhana.
Kaikahina vani,
vidafiahaꞌaha ada hoariha,
vanajahariharivini jaboni.
Dairina vani ajoiꞌaha.
12 Hari.
Kaꞌdaꞌdia bikaronaꞌianaha ada honai abono hoariha.
Okhaꞌaha,
kaikahiꞌaha,
vanajahariharivini,
siiꞌaha jaboni akaraꞌoꞌina vahonariaꞌaha.
13 Oniaroa,
abono-ra niꞌaha ada kaꞌdaꞌdi:
“Nahina-ra koda onamonahaki ho?
Hai,
oogaki ida.
Okaronaki ada kodisai
hoarana.
Onofijahakiki ada.
Kodisai-ra vagathanijahakiki bana adani uva avakadavaꞌava abono.”
14 Oniaroa,
okhaꞌaha ada kaꞌdaꞌdi kaisai.
Uva avakadavaꞌava abonoa vanokiꞌaha khana.
Vaabono vakaniꞌakhamaꞌaha:
“Hada vani akadikaꞌdaꞌdi kaisai.
Kaꞌdaꞌdi abinina kamahini kidisaia bigathanija ida kidiabiꞌi kaarabo afohahavi.
Anaabiniva mahija kidiarabo avahojavini.”
Vaabono vakanavaꞌisohikhamaꞌaha.
15 Hari.
Kaikahiꞌaha ada kaꞌdaꞌdi kaisai,
vagathiꞌaha,
uva kasiroini banininia avarahokaonaniꞌaha,
vanaabiniꞌaha.
Hari.
Jesus vaꞌora vara niꞌaꞌaha adani kidirajomi kavaranihi kamithani vihiki:
—Aꞌonira onavaꞌisohivini hiki bana ida kaꞌdaꞌdi bada biniꞌaki kaimoni.
16 Okhaki bana ada kaꞌdaꞌdi,
vaꞌora naabinihaki adani uva avakadavaꞌava abono bana.
Vahoariha maina-ra vaꞌora honariaki bana ada,
kidiuva kasiroini akadavaꞌani vihira kaimoni.
Hari.
Vakamithava avigaki ida Jesus uva avakadavaꞌava abono fori vihina vaꞌora kahivini,
oniani ida vaniꞌavini hija:
—Jokoa vahabini Deua bivaꞌaharihi ida vapohimajana.
17 Jesus vada vaꞌora niꞌavini,
vaꞌora niꞌaha:
—Deus athi kapapirania bivavaꞌisohihijoraꞌiki hida athii:
“Hojaki ida jaꞌdi jahaki gora avani dadani kaimoni.
Gora vanamonahava abonoa ni-vanofiki hida jaꞌdi.
Jahani kabaꞌi,
ni-vanofiki.
Vanofiravini kabaꞌi,
Deua binagathogathoꞌiki ida jaꞌdi karaho.
18 Ijaꞌari hana hini
voronirarihi jaꞌdi karaho namania;
ꞌboroꞌborohi ida ijaꞌari.
Ijaꞌari hoariha namania voronirarihi ida jaꞌdi karaho;
akhomahi ida ijaꞌari.”
Jesus abono-ra kavarajomivini jaꞌdi karahoa.
Jesu-ra vakaboroki adani ijaꞌari
19 Hari.
Rajomi kavaranihi-ra mitha vaniꞌaha adani judeus kaijaꞌari vakaꞌojomoꞌiva abono,
sasidotxi vakadikaꞌdaꞌdi khama.
Vaabono vakaniꞌakhamaha:
—Jesu-ra agathanijahakiravini mani ida Jesus varani arihina-ra vara vaniꞌavini hija.
Uva avakadavaꞌava abonoa haria kavarajomivini ada Jesus — vaabono vakaniꞌakhamaꞌaha.
Oniani ida Jesu-ra vagathivini-ra vanofivini hija cadeia avibaira kaimoni.
Ijaꞌari vaipohiki-ra vifinivini mani ida Jesu-ra vagathiravini hija.
20 Oniaroa,
Jesu-ra avanaathidanoararivini-ra vanofiha,
oniani ida makhira vahoariha-ra vara vaꞌora vaniꞌavini hija:
—Aꞌonira anoꞌaki bana hari jiniroa,
Jesu-ra avakaboroborovini abosini kaimoni.
Jesus kania avikhaꞌa mahija avananaꞌdohibakhiavini.
Hariꞌa avakaborovini-ra ogava ada Jesus.
Avakadinaꞌdohia vakaboroha mahija arabo vakaꞌdaꞌdiva athi-ra kajonivini.
Arabo vakaꞌdaꞌdiva athi-ra anaabavini jaharini-ra kahiha;
Jesu-ra anaathidanoararihi varani jaharikia kavaranina,
oniania,
arabo vakaꞌdaꞌdiva kania arakhaki bana ada Jesus — sasidotxi vakaꞌdaꞌdiva vaꞌora niꞌaha adani makhira.
21 Hari.
Jesus kania avikhaꞌaha adani makhira,
vaniꞌaha:
—Jesus,
aogaki ida kadaꞌojomoꞌihi athini asohini ijaꞌari-ra vara iniꞌabakhiavini hiꞌiki.
Ijaꞌaria vavajaharavini kabaꞌi ida kadavarani,
ni-ianahoarihaki oni iathini khai vaꞌora niꞌaki kaimoni.
Vara ivaniꞌakaꞌoaki ida varani kaꞌoa hini.
Ijaꞌari hahavi-ra vaꞌora ikaꞌojomoꞌivini hiki ida hojai Deua binofikia vakahojaina.
22 Haria nanamitha bana Deus kavaꞌisohihia.
Deus haria honariamanija imposto kajinironia arabo kakaꞌdaꞌdini-ra anoꞌavini?
Jahamania koda ida arabo ipohiki kakaꞌdaꞌdini athi-ra anaabavini?
— Jesu-ra vaniꞌaha.
César oniki ada arabo ipohiki kakaꞌdaꞌdini.
23 Vakaborovini-ra ogaki ada Jesus.
Oniania,
vaꞌora niꞌaha:
24 — Hora vakavikha jiniro ꞌbaꞌdania mahija imposto kajinironi-ra vada oniꞌavini — vaꞌora niꞌaha.
Hari.
Vavikhaꞌihi.
Jesus vaꞌora nanaꞌdohivini hiꞌihi jiniro ꞌbaꞌdani:
—Hana hina onina mani hida?
Hana hina kaꞌdaꞌdi akamoani mani hida?
Vaniꞌavini:
—César kaꞌdaꞌdi akamoani mani oni.
Onina mani oni jaboni.
25 Oniaroa,
Jesus vaꞌora niꞌaha:
—Césa-ra vanoꞌa bana kidinahina binofikia.
Deu-ra bana vanoꞌa jaboni kidinahina binofikia — vaꞌora niꞌaha.
26 Ijaꞌari vaipohikia vakamithaꞌiki ida Jesus vakadinaꞌdohi bigathanivini.
Vakaijoꞌabakhiavini kabaꞌi ida Jesu-ra vakaboroborovini vakadinaꞌdohia,
ni-nahina asohirikia kavaraniki.
Ni-vaꞌora navaꞌisohivini hiki ida arabo vakaꞌdaꞌdiva athi-ra vakajonivini.
Jesus kavarani asohikaꞌoani mani ida vaꞌora viso niꞌaja.
Vakavaꞌibodivaranikarahoꞌihi ida vakadinaꞌdohi bigathanivini.
Ijaꞌari kohana ajaꞌdini varani hini hida
27 Hari.
Oniaroa,
vikhaꞌaha adani sadosio.
Sadosio vakadivarani hiki ida ijaꞌari abinini naothinia abononi ahokirini.
Hari.
Jesus kania vikhaꞌaha adani sadosio.
28 Vaniꞌaha:
—Jesus,
Moisés kohana ijaꞌari-ra vaꞌora kaꞌojomoꞌivini hida:
“Isarina oadani abiniꞌaha ada aajojahiki,
kaariha hiꞌihi ida kidigamo,
kajoꞌojahikia bianakaraꞌihi ida kaariha,
bivaisaja kaimoni ida gamo,
kidiꞌaajo kaisai hija kaimoni ida kidisai.”
Nimania ida Moisés athi Deus kavaꞌisohihi jirikia hojaki.
29 Hari.
Ahararana vahojaꞌiki adani 7 vihiki imakhinava kohana,
vaigamina adani.
Aajojahikia bianakaraꞌihi ida kidigamo.
Kidigamo-ra vaisaravini oadani abiniꞌaha.
30 Oniaroa,
kidikajoꞌoa bianakaraꞌihi ida kidigamo kaariha binihaꞌiki.
Bivaisaravini vani abiniꞌaha ovari maina.
31 Kidikajoꞌo hoariha bianakaraꞌianahi ida vakadigamo kaariha vanihaki.
Bivaisaravini vani abiniꞌianaha jaboni.
Kidikajoꞌo hoariha bianakaraꞌianahi ida vakadigamo kaariha vanihaki.
Onivani fori vihira adani kajoꞌojahiki vahoariha avanakarahananavini ida kaariha afohanana,
vavaisaravini vani vaabiniꞌaha afohanana.
32 Vaabinihahavina naothinia oniaro maina abiniꞌihi ida gamo jaboni.
33 Haria nanamitha bana Deus kavaꞌisohihia.
7 vaigamina vaabinina viahania avanakarahananaꞌiki ida gamo.
Ijaꞌari kohana ahokina kamahini,
hana hina vani bana kagamo hija ida gamo?
34 Hari.
Jesus vaꞌora niꞌaha:
—Avakaraki adani makhira,
kidigamo khama hidiaja,
vahokina oadani.
35 Vaabinina naothinia,
Deus vaꞌora anahokiki bana adani ijaꞌari hidiaja athi naabani vihiꞌiki.
Deus ibavi kania ijaꞌari vakaikahiha,
ni-avakarajanaki.
36 Deus ibavi kaijaꞌarini avakararina vani fori hija ida ijaꞌari ahokiꞌiki.
Ni-vaabinijanaki.
Deus vaꞌora anahokivini mani ida kidisai vaꞌora nihaja.
37 Deus athi kapapirania hojaki ida Moisés haria navaꞌisohijoravini hiki athi,
ijaꞌari abiniꞌiki Deua bianahokivini varani hini.
ꞌBoꞌdakari Moisés kohana binokiki ida ava patxaniki haꞌdiki.
Haꞌdini kabaꞌi ni-ihimiki.
Vada biniꞌavini oadani,
Deua biniꞌaha:
“Moisés,
hovani Abraão kaDeus,
Isaque kaDeus,
Jacó kaDeus,
vakadiDeus ho.”
Niha ada Deus.
38 Deus Moisé-ra vara niꞌavini kari,
vaabiniꞌboꞌdaꞌiki adani Abraão,
Isaque,
Jacó vihiki.
Deus kaimoni vihina asia vahokiki adani,
ni-ihimiki ida vakadimahi.
Avahokiꞌiki adani ijaꞌari vaabiniꞌiki,
asia vakadiDeus hiki ada Deus — vaꞌora niꞌaha ada Jesus.
39 Oniaroa,
judeus kaijaꞌari vakaꞌojomoꞌiva abono Jesu-ra vaniꞌaha:
—Jahaki ida kadavarani.
40 Ni-Jesu-ra vananaꞌdohijanaki.
Vakaipahiꞌiki ida vananaꞌdohivini.
Cristo varani hina hida
41 Hari.
Vara niꞌianaha ada Jesus,
vaꞌora nanaꞌdohiꞌaha adani judeus kaijaꞌari vakaꞌojomoꞌiva abono:
—Nahina mani ida Cristo Davi kohana kahanodi hina-ra avakahivini hija?
Asia vara niꞌaha ada Jesus:
42 — Davi kohana binajiriꞌiki ida Deus athi kapapirani pitani Salmos oniki,
niha:
“Deua biniꞌaha ada kodikaꞌdaꞌdi Cristo oniki:
43 ‘Iꞌdamani kanaboꞌania
vaꞌora oobaiki bana adani ira vavajahariki,
vaꞌora ikadaꞌahaꞌahaki kaimoni.
Vaꞌora onihimahahaviravini oadani,
vithi bana hida opitana aniaja kaꞌdaꞌdi ihini
kodiania.’
Kodikaꞌdaꞌdi-ra niꞌaha ada Deus.”
Niha ada Davi kohana athi afojora.
44 Asia vara niꞌaha ada Jesus:
—Davi kohana kahanodi hina kabaꞌi ada Cristo,
Davia binaoniki ada Cristo ‘kodikaꞌdaꞌdi.’
Kidihanodi hina kabaꞌi,
kidikaꞌdaꞌdi oamani ada — Jesus vaꞌora niꞌaha.
Jesua vara bivaniꞌaki ida judeus kaijaꞌari vakaꞌojomoꞌiva abono vakadihojai
45 Hari.
Ijaꞌari vaipohikia vakamithahi ida Jesus kavarani.
Kidipohi-ra vaꞌora niꞌaha:
46 — Avaabononi avakavaꞌigairivinihi bana ida judeus kaijaꞌari vakaꞌojomoꞌiva abono vakadihojai mahija avakabanaforavini.
Vajahakaꞌoaki vaabono vavanihavini mani ida makari oadaki-ra vakaimahavini hija,
vahoariha vada vaꞌora vaniꞌara kaimoni.
Judeus kaijaꞌari vakaꞌojomoꞌiva abono ijaꞌari vaipohiki vahararana vahojana,
vanofiki ida ijaꞌari vakadikaꞌdaꞌdi-ra vakaꞌivanitivini vani fori vihina vaꞌora vakaꞌivanitivini.
Judeus kaijaꞌari Deu-ra vara vaniꞌavini kagorania avikhajakosiha,
ijaꞌari vakadikaꞌdaꞌdi vaibavi kania vavithina-ra vanofiꞌaha,
vahoariha vaꞌora khai vaniꞌara kaimoni.
Ijaꞌari vaꞌora vakaboaꞌivini kamahini adani ijaꞌari vaipohiki viꞌbaina vakadiania,
judeus kaijaꞌari vakaꞌojomoꞌiva abonoa vanofiki ida ibavi jahakia vavithina,
vahoariha kaꞌdaꞌdi vihiki vaꞌora vavanihara kaimoni.
47 Vaꞌora vakajoamoraꞌbadaraha afobakhia adani kaariha afonana.
Kaariha kanahina,
gorani hiki-ra visaarivini kabaꞌi,
Deu-ra vara vaniꞌaꞌbadaraha athii oadakia,
vahoariha vajahakaꞌoaki vaꞌora vavanihara kaimoni.
Deus vaꞌora arakhaki jaharikaꞌoani arafiaki bana vaꞌoani nikia vakabadaniki — vaꞌora niꞌaha ada Jesus.