Jesua vara bivaniꞌaki ida farisio vakadihojai
—Judeus kaijaꞌari vakaꞌojomoꞌiva abono,
farisio khama,
avigaki ida Deus kavaꞌisohihi Moisés kohana binajiriꞌboꞌdaꞌiki.
Aꞌonira vakaꞌojomoꞌivini hiki ida Moisés kohana athi niha ninini avanaabaja kaimoni ida vaꞌisohihi.
3 Vanaaba bana hihida Deus kavaꞌisohihi jiriki aꞌonira vakaꞌojomoꞌivini hiki.
Jahaki ida vakadivarani,
ni-jahaki ida vakadihojai.
Hariꞌa vakabanafo ida vakadihojai;
ni-vanaabaki ida Deus athi aꞌonira vakaꞌojomoꞌivini hiki.
4 Vaꞌora okavarajomiki adani farisio,
makhira daji khanaki-ra dabovini ijaꞌari hoariha amaꞌadosia biarakasivini fori vihina.
Daji khanaki fori hiki ida kaaji ipohiki.
Vaꞌoaniaroa vanaipohiki ida kaaji avavakaajija kaimoni.
Aꞌonira vahonariavini hiki ida vaꞌisohihi-ra avanaabavini,
vaꞌoaniaroa ni-vanaabaki.
5 Vaabono vavaboraborahaki adani farisio,
oniani ida vakadibadani ijaꞌaria vada biniꞌavini vanofivini hija.
Avarakakosiꞌihi ida athii pitani oadaki Deus athi kapapirani hojaki.
Papira hoariha avarakakosivini naothinia papira bavini-ra avibaiha,
vidabomisija kaimoni ida papira bavini vaatha.
Vavadi-ra vidabovini hiꞌihi jaboni,
ijaꞌari hoariha vaꞌora nokira kaimoni.
Makhira hahavia vakaimahaki ida papira bavini paꞌitxi Deu-ra vara vaniꞌavini oadani.
Farisio vania vanakarahoja ida vakadipapira bavini,
Deu-ra vanofikarahoki vahoariha vaꞌora vavanihara kaimoni.
Vada vaniꞌa jaboni ida farisio vakadimakari ihini vadini sirasirahani oadaki.
Makhira hahavia vavahojaki ida makari ihini sirasirahani oadaki.
Akaahohaninikhamaki ida vakadikarahobi vakaimahaki nokhoni.
Farisio vani adani makari ihini sirasirahani-ra vanaꞌoadahara vahoariha vanokija kaimoni,
Deus athi-ra vanaabajahakiki vahoariha vaꞌora vavanihara kaimoni.
6 Ijaꞌari vakadihinika koꞌbaini amonahani kamahini farisio vihikia vanofiki ida vithi ibavini jahakia vavithina,
kanori abono vahoariha vajoroniki vaꞌora vanokira kaimoni.
Judeus kaijaꞌari Deu-ra vara vaniꞌavini kagorania vahojana kamahini,
vanofiki jaboni ida vavithina kaꞌdaꞌdi kavithi ibavini jahakia.
7 Ijaꞌari vajoroniki vaibavia vavajahaki ida ijaꞌari vaꞌora vakaꞌivanitivini,
ijaꞌari ogahai abono-ra kaꞌivanitivini fori hini.
Vavajahaki ida ijaꞌari vaꞌora naonivini “ogahai abono aꞌoni”.
8 Ni-vakadihojaia avakahojaini-ra onofiki.
Ni-onofiki ida ijaꞌari aꞌonira vanaonivini “ogahai abono”.
Avaigamini aꞌoni.
Avavahojaki ada ogahai abono hoarana kaꞌoa aꞌonira kaꞌojomoꞌiki kaimoni.
9 Hihida araboa avahojani oadani hariꞌa avakadiabiꞌia vanaoni ada hoariha.
Hoarana ada avakadiabiꞌi nama hojaki.
10 Hariꞌa bana vaꞌora khai vaniꞌa adani ijaꞌari vahoariha “haria vasohiva” aꞌonira vanaonivini.
Hojaki ada aꞌonira vasohiki hoarana Cristo oniki kaꞌoa.
11 Deua bihonariaki ada avakadiania kaꞌdaꞌdi hina-ra nofiki,
ipohina kahonai abono hina.
12 Ijaꞌari abononi vaboraborahaki vahoariha vaviaha:
“Hovani ojahakaꞌoaki ho.”
Deua biniꞌaki bana ida ijaꞌari:
“Ni-nahina ihipaꞌitxirihi.”
Vaꞌini aipahihiki bana ida.
Ijaꞌari hoariha bikavaꞌibodivaraniki ida nahina hirini,
Deua biniꞌaki bana ida ijaꞌari:
“Ivani ijahaꞌoamanija.”
Jesua bivajahariki ida ijaꞌari Deu-ra nofivini-ra kahiꞌbadaraki
13 Hari.
Asia vara niꞌaha ada Jesus:
—Judeus kaijaꞌari vakaꞌojomoꞌiva abono,
mitha vaniꞌa hida aꞌonira vara oniꞌavini.
Farisio,
mitha vaniꞌa jaboni hida aꞌonira vara oniꞌavini.
Deus athi-ra avanofivini-ra avakahiꞌbadaraki aꞌoni!
Jahariki bana ida avakadimoni.
Ijaꞌari gora jahaki oꞌoini vani fori hija ida Deu-ra gathanivini kidikaꞌdaꞌdi kaimoni hina.
Avakakaꞌoahaꞌihi ida bakatha ijaꞌari aviꞌoirara kaimoni.
Ni-avanofiki ida avariꞌoini.
Ni-vaꞌora avavaꞌahaki jaboni adani Deu-ra vanofiki aviꞌoina.
14 —Judeus kaijaꞌari vakaꞌojomoꞌiva abono,
mitha vaniꞌa hida aꞌonira vara oniꞌavini.
Farisio,
mitha vaniꞌa jaboni hida aꞌonira vara oniꞌavini.
Deus athi-ra avanofivini-ra avakahiꞌbadaraki aꞌoni!
Jahariki bana ida avakadimoni.
Vaꞌora avakajoamoraꞌbadarabakhiaki adani kaariha afohanana.
Kaariha kanahina,
gorani hiki-ra avisaarivini kabaꞌi,
Deu-ra vara avaniꞌaꞌbadaravini athini oadaki,
vahoariha avajahakaꞌoani-ra vakahira kaimoni.
Deus vaꞌora arakhaki jaharikaꞌoani arafiaki bana nikia vakabadaniki.
15 —Judeus kaijaꞌari vakaꞌojomoꞌiva abono,
mitha vaniꞌa hida aꞌonira vara oniꞌavini.
Farisio,
mitha vaniꞌa jaboni hida aꞌonira vara oniꞌavini.
Deus athi-ra avanofivini-ra avakahiꞌbadaraki aꞌoni.
Jahariki bana ida avakadimoni.
Avanofiki ida ijaꞌari Deu-ra khai niꞌaꞌbadaravini,
Deu-ra khai avaniꞌaꞌbadaravini vani fori hiki,
oniani ida arabo hahavia aꞌonira anaadahaonija,
avanakoꞌdihahi ida ijaꞌari Deu-ra ogariki,
Deu-ra kanamasivivini-ra nofiki kaimoni.
Avakaragahi,
avakaꞌojomoꞌiki avakadihojai ꞌbadara.
Avakaꞌojomoꞌivini naothinia arafiaki ida kidihojai ꞌbadara.
Deus ijaꞌari-ra nasohivini kamahini,
Deus aꞌonira niꞌaki bana ada:
“Onaabosiki bana ida avakadihojai ꞌbadara nahina jaharikia Ibavi Jaharikaꞌoakia.
Arafiaki ida avakadijaꞌari-ra vaꞌora avakaꞌojomoꞌivini vakadihojai jaharini.
Ibavi Jaharikaꞌoakia nahina jahariki-ra vagathanivini oanaꞌbaꞌdiki bana.”
Niki bana ida Deus aꞌonira vara niꞌavini hiki bana.
16 Vajorami kamaodorohaki fori avihiki aꞌoni!
Avakadivaꞌibodivarani hiki ida jiniro kaꞌoa.
Avakadiꞌojomoꞌihi athini hida:
“Deu-ra khai vaniꞌavini
kagorani onini ijaꞌaria bidionivini hoariha biogaja kaimoni ida kidivarani kaꞌoa hini,
ni-makhaniki ida hoariha-ra navaꞌiponiꞌimarinivini.
Deu-ra khai vaniꞌavini kagorani bodinia hojaki ida jiniro.
Deua binakaidivaki ida jiniro ijaꞌaria vakanavaꞌigavini hiki.
Ijaꞌaria bidionihi ida jiniro onini,
hoariha biogaja kaimoni ida kidivarani kaꞌoa hini,
ni-jahaki ida hoariha-ra navaꞌiponiꞌimarinivini.”
Avakhaniꞌbadaraki aꞌoni.
17 Avavaꞌihariki fori avihiki aꞌoni.
Avakamaodorohaki fori avihiki aꞌoni jaboni.
Asohirihi ida avakadiꞌojomoꞌihi kavaranihi.
Nahina ida Deua binakaidivaja?
Deua binakaidivavini arafiaki ida gora ijaꞌari Deu-ra khai vaniꞌavini.
Deua binakaidivaꞌbamakhamaki ida khai aniꞌavini kagorani,
jiniro gora bodinia hojaki jaboni.
Ni-nahina kaimoni ijaꞌaria bidioniki ida jiniro onini,
gora onini hiki.
Ni-Deua binofiki ida hoariha-ra anavaꞌiponiꞌimarinivini.
18 Avakadiꞌojomoꞌihi athini hoariha hida:
“Ijaꞌaria bidionihi ida Deu-ra kanavaꞌigavini
igitha abononi ahaꞌdini ibavini onini
ijaꞌari hoariha biogaja kaimoni ida kidivarani kaꞌoa hini,
ni-makhaniki ida hoariha-ra navaꞌiponiꞌimarinivini.
Deu-ra kanavaꞌigavini ibavini namania hojaki ida igitha abononi ahaꞌdiki.
Ijaꞌaria bidioniki ida igitha abononi ahaꞌdiki onini,
ni-jahaki ida hoariha-ra navaꞌiponiꞌimarinivini.”
Avakhani ꞌbadaraki aꞌoni.
19 Vajorami kamaodorohaki fori avihiki aꞌoni!
Deua binakaidivavini arafiaki ida kanavaꞌigana ibavini.
Deua binakaidivaꞌbamakhamaki ida kanavaꞌigana ibavini,
igitha abononi ahaꞌdiki hiki jaboni.
Ni-nahina-ra kaimoni ijaꞌaria bidioniki ida igitha abononi ahaꞌdiki onini,
kanavaꞌigana ibavini onini hiki.
Ni-Deua binofiki ida hoariha-ra anavaꞌiponiꞌimarinivini.
20 Oniania ijaꞌaria bidioniki ida Deus kanavaꞌigana ibavini onini,
hoariha biogaja kaimoni ida kidivarani kaꞌoa hini,
vara bivaniꞌaki jaboni ida nahina hahavi Deus kanavaꞌigana ibavini namania hojaki.
21 Ijaꞌaria bidioniki ida Deu-ra khai vaniꞌavini kagorani onini,
hoariha biogaja kaimoni ida kidivarani kaꞌoa hini,
vara bivaniꞌaki jaboni ada Deus gora bodinia hojaki.
22 Ijaꞌaria bidioniki ida nama onini,
hoariha biogaja kaimoni ida kidivarani kaꞌoa hini,
vara bivaniꞌaki jaboni ida Deus kavithi ibavini,
vara bivaniꞌara jaboni ada Deus kavithi ibavini namania vithiki.
23 —Judeus kaijaꞌari vakaꞌojomoꞌiva abono,
mitha vaniꞌa hida aꞌonira vara oniꞌavini.
Farisio,
mitha vaniꞌa jaboni hida aꞌonira vara oniꞌavini.
Deus athi-ra avanofivini-ra avakahiꞌbadaraki aꞌoni!
Jahariki ida avakadimoni bana!
Avanajoroniki ida nahina hahavi avagahinani hiki,
avanapitahatahaꞌiki ida saꞌai koꞌbamihani hini.
Kaidivarini kabaꞌi ida ꞌbai kakabodihini afani,
chá afani hiki avanapitahatahaꞌiki jaboni.
Deus kavaꞌisohihi jiriki pitani-ra avanaabavini kabaꞌi,
ni-avanaabaki ida vaꞌisohihi jiriki hahavi.
Deua binofiki ida hojai asohikia avakahojaini.
Binofiki jaboni ida ijaꞌari vahoariha-ra vaꞌora avanakaidivavini.
Binofiki jaboni ida athi avanaabajahakivini.
Nimania ida hojai binofikia avakahojaini.
Jahaki ida avakadinahina pitania Deu-ra avanoꞌavini.
Jahani arafiaki ida hahavi Deua binofiki-ra avanaabavini.
24 Vajorami kamaodorohaki fori avihiki aꞌoni!
Avanofivini kabaꞌi ida Deus kavaꞌisohihi jiriki pitani paꞌitxi-ra avanaabavini,
ni-avavamakhaniki ida hojai jahaki pitani karaho-ra avaragarivini.
25 —Judeus kaijaꞌari vakaꞌojomoꞌiva abono,
mitha vaniꞌa hida aꞌonira vara oniꞌavini.
Farisio,
mitha vaniꞌa jaboni hida aꞌonira vara oniꞌavini.
Deus athi-ra avanofivini-ra avakahiꞌbadaraki aꞌoni.
Jahariki bana ida avakadimoni.
Ijaꞌari prato-ra sokojahakiriki fori avihiki aꞌoni.
Visokohi ida copo,
prato hiki namanija,
ni-bodinija avisokoki.
Jahahi ida avanokiani.
Copo,
prato hiki bodini sokoariki fori hiki ida nahina jahariki avavaꞌini bodinia ahojaki.
Vahoariha vakadinahina-ra avanofivini mani ida avisaaribakhiavini hija.
Avanofivini arafiaki ida avakadinahina aꞌbaꞌdini jaboni.
26 Vara oniꞌaki ada farisio.
Kamaodorohaki fori ihiki i!
Ianiꞌimidia ida nahina jahariki ahojaki ivaꞌini bodinia.
Aniani naothinia,
sohiki jaboni bana ida kadahojai ijaꞌaria vanokiki.
27 —Judeus kaijaꞌari vakaꞌojomoꞌiva abono,
mitha vaniꞌa hida aꞌonira vara oniꞌavini.
Farisio,
mitha vaniꞌa jaboni hida aꞌonira vara oniꞌavini.
Deus athi-ra avanofivini-ra avakahiꞌbadaraki aꞌoni!
Jahariki bana ida avakadimoni.
Aꞌonivani abaꞌoi kaꞌdamahani ibavini fori avihiki aꞌoni.
Ijaꞌaria vanavaforiki ida ibavi namanija,
jahaja kaimoni ida nokiani.
Abaꞌoi kaꞌdamahani ibavinia hojaki imai ꞌbathani,
jaroi hiki.
28 Jahaki ida avakadihojai nokiani.
Ijaꞌaria ni-vanokiki ida avavaꞌini bodini.
Ni-vanokiki ida korijanahi kavaranihi,
hojai asohiriki hiki avavaꞌini bodinia hojaki.
Jaharikia Deus vaꞌora arakhaki adani ijaꞌari vajahana-ra vakahiꞌbadaraki
29 Asia vara niha ada Jesus:
—Judeus kaijaꞌari vakaꞌojomoꞌiva abono,
mitha vaniꞌa hida aꞌonira vara oniꞌavini.
Farisio,
mitha vaniꞌa jaboni hida aꞌonira vara oniꞌavini.
Deus athi-ra avanofivini-ra avakahiꞌbadaraki aꞌoni!
Jahariki ida avakadimoni bana.
Avakanajahaki ida afohanana Deus athi namoniva abono kohana vakaꞌdamana kanamani,
kajahaja kaimoni ida ꞌdama kanamani.
Avanaibaviki ida jaꞌdi karaho ijaꞌari vajahaki kohana vakaꞌdamana ꞌdaꞌdini aꞌani namania,
vaꞌora avakavaꞌihokira kaimoni.
Avanajahaki jaboni ida jaꞌdi.
30 Avakhanihi:
“Akadiꞌarahoda avikhananavaki vahokina kari arihokija vaha;
ni-vakadibadania akabadaniki vaha;
ni-vaꞌora anaabiniki vaha adani
Deus athi namoniva abono kohana afohanana.”
Nimania ida avaathini.
31 Ijaꞌari Deus athi namoniva abono-ra naabiniki kaijaꞌari vanamitharonisiagaki aꞌoni avakahiki aꞌoni.
32 Asia mani avakadijaꞌari avikhananavaki vakadibadania avakabadanihaꞌoadahaja.
Avanaꞌdiahiki ida badani vanakamaꞌdaki.
33 Makha ꞌbanana fori avihiki aꞌoni,
ijaꞌari-ra avanapohimajavini.
Avakadihojai makha kahojai fori hiꞌoamanija!
Ni-nihanikia avaabononi avarakavaꞌijoaki bana.
Deus aꞌonira karonaki bana aꞌoni Ibavi Jaharikaꞌoakia avarikhani.
34 Aꞌonira onavaꞌisohijoraki bana aꞌoni.
Vaꞌora okaronahananaki bana adani Deus athi namoniva abono,
ijaꞌari avigahaki,
ijaꞌari vakaꞌojomoꞌiva vihiki jaboni avakadiania.
Vaꞌora avagathihananaki bana adani,
vaꞌora avanaabiniki adani vahoarahanana,
ava akasanakhamaki kania vaꞌora avarakaꞌitapoamisahananaki adani vahoariha,
vaꞌora avidafiaki adani vahoariha.
Akadijaꞌari Deu-ra vara avaniꞌavini kagorani bodinia vaꞌora avanajaharihariki bana adani vahoariha sidaji ipohikia avigaonanibakhiana avaꞌaihotara kaimoni.
35 Nimania bana ida Jahari kabadania avakabadanini.
Oniani ida Deus kaijaꞌari hahavi kidai vihiki vaabinina abosini-ra avagathanivini hija bana.
Avakadiꞌarahoda avikhananavaki vaꞌora vanaabinihananaki adani ijaꞌari vaipohiki hojai jahakia vakahojaiki.
Hojai jahakia kahojaina kabaꞌi ada Abel,
ovari miroꞌa vanaabiniꞌiki ada.
Badara ipohiki radahani naothinia,
vakadijaꞌari vikharonisiagakia vanaabiniꞌaha ada Zacarias kohana jaboni.
Baraquias kohana kaisai ada.
Deus athi namoniva abono ada Zacarias.
Igitha ahaꞌdini ibavini,
Ibavi Katokini Jahakaꞌoakia kahararakhamania vanaabiniꞌiki ada.
36 Kaꞌoa hiki hida kodivarani.
Deus jaharikia vaꞌora arakhaki bana adani ijaꞌari hidakabaꞌi vahokiki.
Vakadihojai jahariki,
vakadijaꞌari avikhananavaki kahojai jahariki hiki abosini ida nahina jaharikia vagahinana bana.
Jesus vaꞌora nakaidivaki adani Jerusalém sidaji kaijaꞌarini
37 Hari.
Kidivarani anokhomiꞌaha ada Jesus,
vaꞌora niꞌaꞌaha:
—Jerusalém sidaji kaijaꞌarini!
Vaꞌora avanaabinibakhiaki adani Deus athi namoniva abono.
Jaꞌdia vaꞌora avanagahabakhiaki adani athi avikhava abono Deus vaꞌora karonaꞌiki avakadiania.
Kabaꞌi,
aꞌonira onakaidivaki ho.
Onofiki ida aꞌonira oakavaꞌijoavini.
Arakava kidisai-ra bihini naboꞌania najoroniki fori aꞌonira onihavini-ra onofibakhiahi,
ni-avanofipaꞌitxiki!
38 Aꞌonira oakavaꞌijoavini-ra avanofiravini mani ida Deus avakadisidaji-ra kavaꞌipahinivini hija bana.
39 Kaꞌoa hiki hida kodivarani,
Jerusalém sidaji kaijaꞌarini aꞌonira vara oniꞌavini hiki.
Ni-jorakia okhaꞌianaki bana ho avakadiania.
Hora vanokiꞌianavini kamahini Jerusalém sidaji kaijaꞌarini hora vanofiki adani,
vara vavaniꞌaki bana hida varani ohina:
“Khaki ada ovari Deua bikaronaki ijaꞌari-ra vakaꞌdaꞌdira kaimoni.
Deua bikajoamoraki bana ada khaki.”
Niha ada Jesus.