Akarai kaihinikani karajomihi kavaranihi
22
Hari.
Rajomi kavaranihi hoariha vaꞌora vara niꞌaha ada Jesus:
2 —Okavarajomiki ida Deus ijaꞌari-ra vakaꞌdaꞌdivini,
arabo kaꞌdaꞌdini akarai kaihinikani amonahani-ra vahonariahivini kidisai kaimoni.
3 Arabo kakaꞌdaꞌdini vaꞌora karonaki adani kidihonai abono vaꞌora avanaaminaonivini adani kanori abono baranahi vihiꞌina afojora.
Ni-vikhana-ra vanofiki afohanana.
4 Hari.
Arabo kakaꞌdaꞌdini vaꞌora karonaꞌianaha adani honai abono vahoariha,
vaꞌora navaꞌisohijoravini hiki ida athi vanamoniki kaimoni kanori abono vakadiania:
“Aꞌdiahiki ida akarai
kaihinikani amonahani
kabadanihi.
Vaꞌora ovahonariahiki adani ꞌdaama kahidari vadorohana,
ꞌdaama kahidari vanaꞌbahaki vabasinaki vihiki jaboni vaabinina.
Akaiꞌiki ida ihinika koꞌbaini.
Vikhaꞌa bana ihinika kania.”
Niha.
5 Oniaroa,
avikhaꞌaha adani honai abono,
vaꞌora vanavaꞌisohira kaimoni adani kanori abono.
Kanori abonoa mitha vaniꞌahi ida kaꞌdaꞌdi athi vaꞌora kaboaꞌiꞌavini,
ni-vanofiki ida avikhana.
Avikhaꞌaha afohanana vakadibadani kania bada vakhanira kaimoni.
Hoariha kidisiroia okhaꞌiki,
hoariha kidinisika-ra pavakari nihavini ibavinia okhaꞌiki.
6 Vahoariha vaꞌora vagathiꞌaha adani honai abono,
vaꞌora vidafiaꞌaha,
vaꞌora vanaabiniꞌaha.
7 Hari.
Ihamahikarahoꞌaha ada arabo kakaꞌdaꞌdini.
Vaꞌora karonaꞌaha adani kidisorara kanori abono vakadiania avikhana,
vaꞌora vaniꞌaha:
“Kanori abono vakadiania avikhaꞌa mahija vaꞌora avanaabinivini.
Avanahaꞌdihaꞌa bana ida vaibavi.”
8 Hari.
Kanori abono vaabinihahavina naothinia arabo kakaꞌdaꞌdini vaꞌora vara niꞌaꞌianaha adani kidihonai abono:
“Vaꞌora onofivini vanivaha kodihinika kania
vikhana.
Hora vanofiki vaꞌora ovanihavini.
Hora vakajonivini mani ida
akarai kaihinikani kania vahojana vaꞌora onofijanaravini hija.
9 Oniania,
avikha bana.
Hagihia ijaꞌari-ra vaꞌora avakaragahi,
vaꞌora vakaboaꞌihahaviꞌa bana akarai kaihinikani kania vikhana.”
10 Hari.
Ai vihiꞌaha adani honai abono,
hagihi ipohikia avaadahaonina,
vaꞌora vakaragaꞌaha adani ijaꞌari hojai jahakia vakahojaiki,
hojai jaharikia vakahojaiki jaboni,
vaꞌora vakaboaꞌihahaviꞌaha akarai kaihinikani kania vajoronina.
Akarai kaihinikani kagorani kania vakaikahiꞌina adani kanori abono,
vagathanihananaꞌihi ida makari jahaki vakaimahaki kaimoni gora bodinia,
oniania jiꞌbiniꞌihi ida gora ijaꞌaria.
11 Oniaroa,
kaikahiꞌaha ada arabo kakaꞌdaꞌdini,
vaꞌora navanavanahaꞌaha adani kanori abono.
Binokiꞌaha ada makhira,
ovaria ni-bikaimahaki ida ihinika kavamakarini jahaki.
12 Kaꞌdaꞌdia binanaꞌdohiꞌaha:
“Ivani,
nihaniki vania ikhajakosija ihinika kagorania ikaimaharavini oadani ida makari jahaki?”
Makhira ni-bigathaniꞌiki ida naꞌdohi hina.
13 Oniaroa,
kaꞌdaꞌdi vaꞌora honariaha adani kidihonai abono:
“Vakodaboha bana hida makhira saꞌa,
ꞌdama kihiki.
Baniniaja vanahokahiꞌa bakibakini kania.
Oniaja abarariariaki bana ada,
kakiroromisiki bana ida kanada.”
14 Hari hiꞌihi ida rajomi kavaranihi Jesua vara bivaniꞌaꞌiki.
Vaꞌora niꞌaha adani vajoroniki:
—Vaipohiki adani ijaꞌari Deus vaꞌora kaboaꞌiki kidiania vikhana.
Vaipohiriki vani adani vaꞌora nagathogathoha kidijaꞌari kaimoni.
Jesu-ra vakaboroki adani ijaꞌari
15 Hari.
Jesus kania ai vihiꞌaha adani farisio.
Vaabono vakanavaꞌisohikhamaꞌaha:
—Jahaki ida Jesu-ra ananaꞌdohibakhiavini asohijanarija kaimoni ida kidivarani,
oniani ida anaathidanoararivini hija.
16 Oniaroa,
farisio vaꞌora vahonariaha adani vaipohina,
Iroji ipohina vaipohiriki khama Jesus kania avikhana,
Jesu-ra vakaboroborora kaimoni vakadinaꞌdohia.
Hari.
Jesus kania avikhaꞌaha adani makhira.
Vaniꞌaꞌaha:
—Jesus,
aogaki ida ijaꞌari vavaꞌi-ra ivajaharavini kadavarania.
Ijaꞌari hahavi-ra vaꞌora ikaꞌojomoꞌivini hiki ida badani Deua binofiki bada vaniꞌahahaꞌoadahaja kaimoni.
Ijaꞌaria vavajaharavini kabaꞌi ida kadavarani,
ni-ianahoarihaki oni iathini khai vaꞌora niꞌaja kaimoni.
Vara ivaniꞌakaꞌoaki ida varani kaꞌoa hini.
17 Haria nanamitha bana Deus kavaꞌisohihia:
Deus haria honariamanija imposto kajinironia arabo kakaꞌdaꞌdini-ra anoꞌavini?
Jahamanija koda ida arabo ipohiki kakaꞌdaꞌdini athi-ra anaabavini?
— Jesu-ra vaniꞌaha.
César oniki ada arabo ipohiki kakaꞌdaꞌdini.
18 Vakaborovini-ra ogaki ada Jesus.
Oniania,
vaꞌora niꞌaha:
—Deus athi-ra avanofivini-ra avakahiꞌbadaraki aꞌoni.
Ni-avarigavini avanofidoroki ida avakadinaꞌdohi.
Avanofiki ida hora avarakaraganahavini,
oniani ida hora avakaborokaꞌoavini hija.
19 Hora vakavikha jiniro ꞌbaꞌdania mahija imposto kajinironi-ra vada oniꞌavini — vaꞌora niꞌaha.
—Hana hina onina mani hida?
Hana hina kaꞌdaꞌdi akamoani mani hida?
21 Vaniꞌaha:
—César kaꞌdaꞌdi akamoani mani oni.
Onina mani oni jaboni.
Oniaroa,
Jesus vaꞌora niꞌaha:
—Césa-ra vanoꞌa bana kidinahina binofikia.
Deu-ra bana vanoꞌa jaboni kidinahina binofikia — vaꞌora niꞌaha.
22 Vakamithahi ida Jesus athi,
vakavaꞌibodivaraniꞌihi ida niha ninini vakadinaꞌdohi bigathanivini.
Ni-Jesu-ra vananaꞌdohijanaki,
vaꞌajihiꞌaha.
Ijaꞌari kohana ajaꞌdini varani hini hida
23 Hari.
Oniaroa,
mitihini vikhaꞌaha adani sadosio.
Sadosio vakadivarani hiki ida ijaꞌari abinini naothinia abononi ahokirini.
—Jesus,
Moisés kohana ijaꞌari-ra vaꞌora kaꞌojomoꞌivini hida:
“Isarina oadani abiniꞌaha ada aajojahiki,
kaariha hiꞌihi ida kidigamo,
kajoꞌojahikia bianakaraꞌihi ida kaariha,
bivaisaja kaimoni ida gamo,
kidiꞌaajo kohana kaisai hija kaimoni ida kidisai.”
Nimania ida Moisés athi Deus kavaꞌisohihi jirikia hojaki.
25 Hari.
Ahararana vahojaha adani 7 vihiki imakhinava kohana.
Vaigamina adani.
Aajojahikia bianakaraꞌihi ida kidigamo.
Kidigamo-ra vaisaravini oadani abiniꞌaha.
26 Oniaroa,
kidikajoꞌoa bianakaraꞌihi ida kidigamo kaariha binihaꞌiki.
Bivaisaravini vani abiniꞌaha ovari maina.
Kidikajoꞌo hoariha bianakaraꞌianahi ida vakadigamo kaariha vanihaki.
Bivaisaravini vani abiniꞌianaha ovari jaboni.
Kidikajoꞌo hoariha bianakaraꞌianahi ida vakadigamo kaariha vanihaki.
Onivani fori vihira adani kajoꞌojahiki vahoariha avanakarahananavini ida kaariha afohanana.
Vavaisaravini vani vaabiniꞌaha afohanana.
27 Vaabinihahavina naothinia abiniꞌihi ida gamo jaboni.
28 Haria nanamitha bana Deus kavaꞌisohihia:
7 vaigamina vaabinina viahania avanakarahananaꞌiki ida gamo.
Ijaꞌari kohana ahokini kamahini,
hana hina vani bana kagamo hija ida gamo?
29-30 Hari.
Jesus vaꞌora niꞌaha:
—Iniani,
asohirihi ida avaniꞌaki!
Ijaꞌari abinini ahokini kamahini makhira ni-vaagamojanaki.
Gamo ni-vakamakhirajanaki jaboni.
Deus ibavi kaijaꞌarini avakararina vani fori hija ida ijaꞌari ahokiki.
Ni-avarigaki ida Deus athi papira hojaki.
Deus athi-ra avarigaravini mani ida avakadivarani-ra avakanasohikhamaravini hija.
Avarigarihi jaboni ida Deus danona.
31 Hora avananaꞌdohivini hiki ida ijaꞌari abiniki ahokiꞌini.
Deus athi kapapirani aꞌonira navaꞌisohivini hiki.
Deua biniꞌaha:
32 “Moisés,
hovani
Abraão kaDeus ho,
Isaque kaDeus ho,
Jacó kaDeus ho.”
Niha ada Deus.
Deus Moisé-ra vara niꞌavini kari,
vaabiniꞌboꞌdaꞌiki adani Abraão,
Isaque,
Jacó vihiki.
Kidimoni vihina asia vahokiki adani,
ni-ihimiki ida vakadimahi.
Avahokiꞌiki adani ijaꞌari vaabiniꞌiki,
asia vakadiDeus hiki ada Deus — vaꞌora niꞌaha ada Jesus.
33 Oniaroa,
ijaꞌari vaipohiki vajoronikia vakamithaꞌihi ida Jesus kavarani,
vakavaꞌibodivaraniꞌihi ida kidiꞌojomoꞌihi athini.
Deus kavaꞌisohihi-ra anaabavini varani hini hida
34 Oniaroa,
Jesus vakadinaꞌdohi bigathanijahakivini mani ida sadosio vaathi-ra viso niꞌaja.
Hari.
Farisio vihikia vakamithaꞌiki ida sadosio Jesus khama vara vakhanina.
Jesus sadosio vaathi-ra anavisonivini mani ida farisio Jesus kania vaꞌora najoronija.
35 Farisio vahararana hojaha ada judeus kaijaꞌari kaꞌojomoꞌiva abono.
Binofiki ida Jesu-ra kaborovini jaboni,
bianahoarihaja kaimoni ida kidivarani,
oniania binanaꞌdohiꞌaha:
36 —Jesus,
ivani ijaꞌari kaꞌojomoꞌiva abono i.
Ipohiki ida honari Deus kavaꞌisohihi jiriki kania.
Hana hini honari ida Deus kavaꞌisohihi jiriki hahavi-ra aradaja?
37-38 Hari.
Jesua bigathanihi ida kidinaꞌdohi:
—Deua binofiki ida kidivaꞌisohihi hahavi anaabavini.
Ira onavaꞌisohiki bana ho hida vaꞌisohihi Deua binofivini arafiaki.
“Akadikaꞌdaꞌdi hiki ada Deus.
Inofijahakiꞌa afohaꞌoadaha o Deus.
Bada inini oadani inofijahakiꞌa o Deus.
Ivaꞌini bodini vara nini oadani inofijahakiꞌa o Deus.
Mahi,
joma hiki inofijahakiꞌa afohaꞌoadaha.”
Nimania ida vaꞌisohihi jiriki.
39 Onivani fori hija ida vaꞌisohihi hoariha Deua binofiki-ra anaabavini jaboni.
Deus haria honariavini hiki ijaꞌari hahavi-ra anofijahakivini.
Nihi ida Deus kavaꞌisohihi jiriki.
“Iabononi inofijahakivini vani fori vaꞌora niha vaꞌoani ijaꞌari hahavi.”
Nihi ida athi.
40 Ijaꞌaria vanaabajahakihi hida honari ꞌbamiki,
vanaabahahaviki jaboni ida Deus kavaꞌisohihi jiriki,
Deus athi namoniva abono kohana afohahavi vaathi hiki ida ijaꞌari-ra vaꞌora vakaꞌojomoꞌivini hiꞌiki — vaꞌora niꞌaha ada Jesus.
Deua bikaronaki ada Cristo
41 Oniaroa,
vajoroniꞌaha adani farisio.
Jesus vaꞌora nanaꞌdohiꞌaha:
42 —Cristo-ra avakavaꞌibodivaranihi,
nahina ida avakavaꞌibodivaranija?
Hana hina kahanodi ada Cristo Deua bikaronara ijaꞌari-ra vakaꞌdaꞌdira kaimoni?
Vagathaniꞌihi ida Jesus athi:
—Davi kohana kahanodi namitharonisiagaki ada.
Vaꞌora nanaꞌdohiꞌianaha ada Jesus:
43 —Nahina mani ida Davi kidihanodi-ra kaꞌdaꞌdia naonivini hija?
Maꞌonahai Jahaki Davi vaꞌi-ra nahonariahihivini vani kidikaꞌdaꞌdia binaoniꞌara ada Cristo.
Davia biniꞌaha:
44 “Deua biniꞌaha ada kodikaꞌdaꞌdi Cristo oniki:
‘Iꞌdamani kanaboꞌania vaꞌora oobaiki adani bana ira vavajahariki,
vaꞌora ikadaꞌahaꞌahaki
kaimoni.
Vaꞌora onihimahahaviravini oadani,
vithi bana hida opitana aniaja kaꞌdaꞌdi ihini kodiania.’
Kodikaꞌdaꞌdi-ra niꞌaha ada Deus.”
Nihi ida Davi kohana athi afojora.
45 Asia vara niꞌaha ada Jesus:
—Davi kohana kahanodi hina kabaꞌi ada Cristo,
ni-Davia kidihanodia binaoniki ada Cristo.
Binaonivini ada Cristo ‘kodikaꞌdaꞌdi’.
Kidihanodi hina kabaꞌi kidikaꞌdaꞌdi oamani ada — Jesus vaꞌora niꞌaha.
46 Viso vakhaniꞌaha adani farisio,
ni-avigaki ida Jesus athi-ra vagathanivini.
Ni-Jesu-ra vananaꞌdohijanaki,
vakaipahiꞌiki ida vananaꞌdohivini.