Jesua bianaihotaki ada makhira jaroꞌbarara kakavamoniki
14
Hari.
Oniaroa,
akoiri kamahini vani oꞌoiꞌara ada Jesus farisio vakadikaꞌdaꞌdi gorana ꞌbaira kaimoni kidiania.
Ijaꞌari vahoariha vada vaniꞌahahaꞌoadahaha ada Jesus.
2 Oniaroa,
hojaha ada makhira jaroꞌbarara kakavamoniki,
Jesu-ra namaakariꞌaha.
Lucas 14:1-35
3 Oniaroa,
Jesus vaꞌora nanaꞌdohiꞌaha adani judeus kaijaꞌari vakaꞌojomoꞌiva abono farisio khama:
—Akadijaꞌari kahonari jirikia bivaꞌahamanija koda ida ijaꞌari ijaꞌari kavamoniki-ra anaihotavini aakoirina kamahini?
Bivaꞌahamanija koda ida?
Bivaꞌaharia koda ida?
4 Hari.
Viso vakhaniha.
Ni-vagathaniꞌiki ida Jesus kanaꞌdohi.
Oniaroa,
Jesua bikaabadaꞌaha ada makhira jaroꞌbarara kakavamoniki,
bianaihotaha,
ajihiꞌina bihonariaꞌaha.
5 Bianaihotavini naothinia vaꞌora niꞌaha adani vajoroniki:
—Ijaꞌari-ra oanaihotavini aakoirina kamahini vani fori hiki ida avakadisai-ra avakajoamoravini aakoirina kamahini.
Voroniki vahabini bana ida avakadisai paha aniani ibavini bihiakia.
Joraki vania koda bana avaanira bana ada avakadisai?
Haꞌa.
Voroniki vahabini bana ada avakadiꞌdaama kahidari paha aniani ibavini bihiakia.
Joraki vania koda bana avaanira bana ada,
aakoirina kamahini kabaꞌi?
Haꞌa.
6 Hari.
Ni-vakaabokaki ida Jesus kanaꞌdohi-ra vagathanivini.
Jesus vara vaꞌora niꞌaha adani kanori abono
7 Hari.
Oniaroa,
Jesus vada vaꞌora niꞌaha adani ijaꞌari vakaikahiki.
Gora kakaꞌdaꞌdini vaꞌora kaboaꞌivini hiki viꞌbaira kaimoni kidiania.
Vanakoꞌdihaki ida ibavi jahaki mesa kania vavithira kaimoni gora kakaꞌdaꞌdini maakarina.
Oniaroa,
Jesus vaꞌora kaꞌojomoꞌiꞌaha:
8 —Ijaꞌari ira kaboaꞌihi akarai kaihinikani kania ikanorini,
hariꞌa bana inakoꞌdi ida ibavi jahaki mesa kania ivavithiki kaimoni.
Ira kaboaꞌikia vahabini bikaboaꞌiꞌiki jaboni ada ijaꞌari vakaꞌdaꞌdiva.
9 Ikavaꞌibodivarani bana,
ijaꞌari vakaꞌdaꞌdiva kaikahina viahania,
ivani ivithijorakihi ibavi jahakia.
Oniaroa,
kaikahiha ada kaꞌdaꞌdi.
Ira kaboaꞌikia binakoꞌdiki bana ida ibavi jahaki kaꞌdaꞌdi kaimoni.
Ibavi jahakia ivithini-ra nokiha,
ira niꞌaki bana ada:
“Kaꞌdaꞌdi hada hoariha,
inoꞌavinihi bana ida ibavi jahaki ivavithiki
kidimoni hini.”
Nimania bana ida varani ivaꞌini-ra anaipahihiki.
Igaamananihi napaja paꞌitxia ivithirariꞌihi.
Jahariki hida kadaimoni hini.
10 Oniania,
ira onavaꞌisohivini hiki bana ida hojai hoariha jahaki.
Akarai kaihinikani kania ikaikahini vani vithiꞌimidia bana ira kaboaꞌiꞌiki napaja nina paꞌitxia.
Ivaꞌaha bana ida hoariha vithini ibavini jahakia.
Oniaroa,
ira kaboaꞌiꞌiki ira niꞌaki bana i:
“Kodivaꞌahi,
khami bana
mahija ibavi jahakia
ivithivini.”
Kanori abono vahoariha vanokiki bana ida ivithirarini,
vaabono vakaniꞌakhamavini:
“Haria kaboaꞌikia bihonariaki hada ibavi jahakia vithina.
Kaꞌdaꞌdi jahaki vahabini ada.”
“Hovani ojahakaꞌoaki ho.”
Deus biniꞌaki bana ida ijaꞌari:
“Ivani ni-nahina
ihipaꞌitxirihi.”
Vaꞌini aipahihiki bana ida.
Ijaꞌari hoariha bikavaꞌibodivaraniki ida nahina hirini.
Deus biniꞌaki bana ida ijaꞌari:
“Ivani ijahaꞌoamanija.”
— Jesus vaꞌora niꞌaha adani vajoroniki.
12 Hari.
Oniaroa,
Jesua biniꞌaha ada vaꞌora kaboaꞌiꞌiki:
—Avakadihojai hiki ida vaꞌora ikaboaꞌivini adani kadavaꞌahi,
iigamini,
kadabiꞌi,
kadamia,
vakadijaꞌari vihiki,
ijaꞌari vakanahinaꞌahapikiki vihiki igorani maakarinia vahojaki,
viꞌbaira kaimoni igorania,
bona ira vakaboaꞌiha jaboni vagorana,
ira vakoꞌbaihavini-ra avanaabosira kaimoni.
Vaꞌora ikaboaꞌivini ira vanaabosivini mani ida Deus ira naabosiravini hija.
13 Hari.
Aꞌonira onavaꞌisohivini hiki ida hojai jahani arafiaki.
Ijaꞌari viꞌbaina-ra ikaboaꞌivini kamahini kadania,
vaꞌora kaboaꞌiꞌa bana adani vakanahinariki,
vatonorohaki,
vajoꞌo abaꞌoronisiagaki,
vakamaodorohaki vihiki.
14 Vaꞌora ikaboaꞌiha,
bona Deus ira kajoamorahi.
Vaꞌoaniaroa ni-vakaabokaki ida vaꞌora ikoꞌbaihavini-ra vanaabosivini.
Deus vani ira naabosija bana.
Ijaꞌari hojai jahakia vakahojaibakhiaki kohana avahokina kamahini vani,
Deus ira naabosiki bana i — vaꞌora niꞌaha ada Jesus.
Ijaꞌaria vahaki ida ihinika karaho koꞌbaini
15 Hari.
Asia mesa kania vavithiha,
viꞌbaina,
hoarana Jesus athi-ra mitha niꞌakia biniꞌaha:
—Jesus,
Deus kidijaꞌari-ra vakaꞌdaꞌdivini kamahini khai vakhaniki adani viꞌbaiki kidiania.
16 Oniaroa,
Jesua vara bivaniꞌahi ida rajomi kavaranihi ijaꞌari Deus kania ꞌbaini.
—Ihinika koꞌbaini karaho-ra honariaha ada kaꞌdaꞌdi.
Bikaronahi ida athi vaꞌora kaboaꞌiha adani kanori abono vaipohiki.
17 Ihinika koꞌbaini aꞌdiahini kamahini bikaronaꞌianaha ada kidihonai abono,
vaꞌora navaꞌisohihavini adani kidikanori abono vaipohiki:
“Vikhaꞌa.
Ida aꞌdiahiꞌihi
ihinika koꞌbaini kaimoni.”
Nihi ida kaꞌdaꞌdi athi.
18 Hari.
Vaꞌora kaboaꞌiha,
ni-vanofiki vanaabavini hida kaꞌdaꞌdi athi.
Hoariha biniꞌaha ada honai abono:
“Okapavakariꞌiki ida siroi,
oniani ida onavanavanahavini onofivini hija.
Jokoa ookharihi kidihinika onakanorivini.
Ookharihi bana
iathini-ra onaabahavini.”
19 Hari.
Hoariha biniꞌaha:
“Vaꞌora okapavakariki adani ꞌdaama kahidari saꞌai koꞌbamihani vihiki,
varahokaja kaimoni ida ava siroi kanamini-ra
nakhomakhomaki.
Okaijoꞌaki ida bana vakadibadani,
kodisiroi-ra bada vaniꞌara kaimoni adani ꞌdaama kahidari.
Jokoa ookharihi kidihinika onakanorivini.
Ookharihi bana iathini-ra onaabahavini.”
20 Hari.
Hoariha biniꞌaha ada honai abono:
“Oagamoꞌiki ho hidakabaꞌi,
oniani ida hora arakharija bana.
Ookharihi bana iathini-ra onaabahavini.”
21 Hari.
Ijaꞌari vaipohiki vakadiania aadahaoniha ada honai abono ihinika-ra avaaminavini.
Ni-avikhana-ra vanofiki.
Vaipohikia vanaabarihi ida kaꞌdaꞌdi athi.
Kaꞌdaꞌdi kania joiꞌaha ada kidihonai abono,
binamonihi ida vaniꞌaki.
Hari.
Ihamahiꞌaha ada kaꞌdaꞌdi.
Kidihonai-ra niꞌaha:
“Ajihiꞌa jorakia.
Okhaꞌa bana hagihi,
sidaji hikia.
Vaꞌora anikhaꞌa adani
vakanahinariki,
vatonorohaki,
vajoꞌo abaꞌoronisiagaki,
vakamaodorohaki vihiki
mahija kodihinika-ra vanakanorivini.
Vaibavia vaꞌora nakoꞌdihaꞌa.”
Niha ada kaꞌdaꞌdi.
Hari.
Ajihiꞌianaha ada honai abono,
vaꞌora nakoꞌdihaꞌianavini adani ijaꞌari vahoariha.
22 Vaꞌora kaboaꞌivini naothinia joiꞌianaha,
biniꞌaꞌianaha ada kaꞌdaꞌdi:
“Kodikaꞌdaꞌdi,
onaabaꞌiki ida iathini
ijaꞌari-ra vaꞌora onakoꞌdihavini,
kadaihinika-ra oavaaminavini.
Ni-jiꞌbiniꞌiaki kaho ida
kanori abono vaibavi.”
23 Oniaroa,
kaꞌdaꞌdia bihonariaꞌianaha ada kidihonai abono:
“Ajihiꞌiana.
Ibavi hoariha
kagorani hoaraharahakia aadahaoniꞌa.
Vaꞌora honaria bana adani ijaꞌari vahoariha vikhana
mahija ogorana jiꞌbinivini ijaꞌaria.
24 Jokoa kodiania viꞌbairiha adani vahoariha vaꞌora okaboaꞌiꞌiki.
Ni-oathi-ra vanaabaꞌiki.”
Niha ada kaꞌdaꞌdi — vaꞌora niꞌaha ada Jesus.
Jesus athi hini ida Deus ijaꞌari-ra kaboaꞌivini kidiania avikhana.
Athi naabani vihiha;
kidiania avikhaha.
Jesus ipohina hini-ra nofiki varani hini
25 Hari.
Oniaroa,
ijaꞌari vaipohiki Jesu-ra vavaipohihaꞌaha.
Roiribaniꞌaha,
vaꞌora navaꞌisohiꞌaha:
26 —Ijaꞌaria binofiki ida oipohina hini,
jahaki ida hora vanofivini arafiani.
Ijaꞌari hora nofivini arafiarihi;
ni-bikaabokaki ida oipohina hini.
Oipohina vaꞌora nofiki adani kidiabiꞌi,
kidiamia,
igamini,
kidigamo,
kidisai vihiki.
Oniani abononi nofihi jaboni ida oipohina.
Arafiarihi ida hora nofivini;
ni-oipohina hirihi ida ijaꞌari.
27 Ijaꞌari hora vavaipohihaki,
ijaꞌari ava akasanakhamaki-ra kaibaꞌivini fori hiki.
Ijaꞌari ava akasanakhamaki-ra kaibaꞌivini fori hirihi,
ni-oipohina hini-ra kaabokarihi.
Ijaꞌari abononi vaꞌaharihi ida abinini kodimoni hini,
bikajonihi jaboni ida oathi-ra naabavini,
ni-arajomaki ida oipohina hini — vaꞌora niꞌaha ada Jesus.
28 Hari.
Rajomi kavaranihia kavaraniki ada Jesus.
Oniaroa,
vaꞌora niꞌaha:
—Ijaꞌari jaꞌdi kagorahi namahiki-ra namonahavini-ra nofihi,
vithiꞌimidiahi,
bikavaꞌibodivaraniꞌimidiahi ida amonahani kaidivani,
biogaja kaimoni ida kidijiniro arajomani arajomarini.
29 Bikavaꞌibodivaraniravini vani binakamaꞌdaꞌihi ida gora namahiki-ra namonahavini.
Aꞌdiahirini kabaꞌi bikainamoki bana ida kidijiniro,
ni-bikaabokaki ida binaaꞌdiahivini.
Oniaroa,
ijaꞌari varadahakia vada vaniꞌaki bana ida gora aꞌdiahiriki,
vakanavaranihaꞌaha ada makhira vaꞌi bodinia vara niriki,
vaabono vakaniꞌakhamaꞌaha:
30 “Binakavithimaki ida
kidijiniro.
Binakamaꞌdaꞌiki ida gora kaidivaki amonahani,
ni-bikaabokaꞌiki ida
binaaꞌdiahivini.”
31-32 Hari.
Rajomi kavaranihi hoariha kavaraniki ada Jesus.
Jesus vaꞌora kaꞌojomoꞌiki adani ipohina vihina-ra vanofiki vakavaꞌibodivaranijahakivini afoꞌimidia vanaabahahavija kaimoni ida Deua bihonariaki.
Jesua bikavarajomiki ada Deus arabo kakaꞌdaꞌdini kasoraraꞌahapikiki fori hina.
Bikavarajomiki ida ipohina hini-ra nofiki arabo kakaꞌdaꞌdini kasorara vaipohiriki fori hina.
Oniaroa,
Jesus vaꞌora niꞌaha:
—Arabo kakaꞌdaꞌdini vaꞌora vakaꞌdaꞌdiꞌaha adani sorara vaipohiriki.
Bikamithaki ida arabo hoariha kakaꞌdaꞌdini monina.
Vaipohiki adani hoariha kasorara.
Hoariha kidisorara khama vaꞌora vidara kaimoni adani sorara vaipohiriki-ra vahojaki.
Sorara vaipohiriki vakadikaꞌdaꞌdia bikamithahi ida vahoariha vamonina,
vithiꞌimidiaha,
bikavaꞌibodivaranijahakiki ida varajomana varajomarina kidisorara vaipohina,
vaꞌora vidara kaimoni adani vikhaki.
Abono-ra niꞌaki bana ada sorara vaipohiriki vakadikaꞌdaꞌdi:
“Ni-avarajomapaꞌitxiki adani kodisorara
vaꞌora adara kaimoni adani vahoariha.
Napaja vahojana kabaꞌi vani,
vaꞌora okaronaki bana adani oathi avikhava abono
arabo hoariha kakaꞌdaꞌdini kania,
oathi forakia vaniꞌara
kaimoni,
ariabono akodakhamarija kaimoni kidisorara khama.”
Hari hiꞌihi ida rajomi kavaranihia Jesus vaꞌora vara niꞌavini.
Vaꞌora niꞌaha adani ijaꞌari vahojaki:
33 —Nimania ida ijaꞌari oipohina hini-ra nofiki.
Bikavaꞌibodivaraniꞌimidiava ida hora vaipohihavini.
Kidinahina hahavi-ra nahojahaꞌimidiava ida oipohina hini-ra nofiki.
Binahojaharihi;
ni-oipohina hini-ra kaabokaki — vaꞌora niꞌaha ada Jesus.
Jokira maina karajomihi varani hini
34 Vara niꞌianaha ada Jesus:
—Jahaki ida jokira,
ꞌbai-ra naponiki kaimoni hini.
Nahina binajaharihi,
ni-ponini jahajanaki.
35 Ijaꞌaria binahokahikaꞌoaki ida jokira jahajanariki,
ni-nahina kaimoni hini jahaki.
Ni-arajomaki ida jokira jahajanariki ꞌbai kajokirani kaimoni hini.
Jokira fori hiki ida kodipohi,
nahina binajahariki bana ida kidihojai;
ni-jahajanaki jaboni.
Avamorobohahi;
mitha vaniꞌa bana hida kodivarani — vaꞌora niꞌaha ada Jesus.