9
Vakavaꞌibodivarani bana ida kodivarani.
Khaki bana ida mahi Deus ijaꞌari-ra nanokiahivini kaꞌdaꞌdi danoki hina.
Vaabinirina oadani bana adani ijaꞌari ahararana vahojaki,
vanokiki bana ida vaꞌora oniꞌavini hiki — vaꞌora niꞌaha ada Jesus.
Pedroa vanokiꞌiki ida Jesus jahana, vagana hiki
2 Hari.
Radahahi ida 6 mahi ipohini.
Oniaroa,
arabo namahikia vigaimoriꞌaha adani Jesus.
Vaꞌora avigaimoriha adani Pedro,
Tiago,
João vihiki kaꞌoa.
Avakhanomoriꞌaha,
kamaꞌdaꞌihi ida Jesus vagana nokiani.
Nokho vagani vanokiꞌaha ada Jesus.
3 Safini vagana fori hiki ida.
Kidimakari vaforini vagaki jaboni.
4 Oniaroa,
Jesus ipohina avahoarabakosiki vaꞌora vanokiꞌaha adani ijaꞌari kohana avajaꞌdina viꞌbamiki.
Hoarana onina Elias.
Hoariha onina Moisés.
Jesus khama vara vakhaniꞌaha adani viꞌbamiki.
5 Oniaroa,
Pedro Jesu-ra niꞌaha:
—Aajo,
hida vania arihojana jahaja.
Oniania,
onamonahaki bana ida gora itxani ahoarabakosiki.
Hoarani kadaimoni,
hoariha Moisés kaimoni,
hoariha Elias kaimoni — niha ada Pedro.
6 Hari.
Vaimahidakarahoꞌaha adani Jesus ipohina.
Visoniꞌaha ada Pedro,
ni-biogaki ida vara bivaniꞌavini kaimoni.
7 Oniaroa,
khaꞌaha ada bahi vaforiki.
Amokhinina vaꞌora karahobarariꞌaha.
Bahi kania vakamithaꞌihi ida athii:
—Hiꞌo kodisai,
onofijahakiki o.
Mitha vaniꞌa oni kodisai athi.
8 Hari.
Vada vakhaniribaniꞌaha,
ni-vahoariha-ra vaꞌora vanokijanaki.
Jesus oavani ada vanokiꞌaha vakadiania hojana.
9 Ai vihiꞌaha,
vajoifonina vani vaꞌora honariaꞌaha:
—Hariꞌa bana vahoariha-ra vaꞌora vara vaniꞌa arabo namahikia avanokiꞌikia.
Hovani ijaꞌari hahavi vakadiꞌaajo ho.
Oabinina oahokina kamahini vahoariha-ra vaꞌora vara vaniꞌa bana hidakabaꞌi avanokiꞌikia.
10 Vakavaꞌibodivaraniꞌihi ida athi.
Vikharafonina kabaꞌi vaabono vakananaꞌdohikhamaꞌaha:
—Ni-aogajahakiki ida Jesus abinina ahokina kavaranina.
11 Oniaroa,
Jesu-ra vaniꞌaha adani kidipohi:
—Jesus,
nahina mani ida judeus kaijaꞌari vakaꞌojomoꞌiva abono haria vaniꞌabakhiavini hija:
“Deua bikaronaꞌimidiaki bana ada Elias,
naothinia bikaronaki ada Cristo oniki.”
Vakhaniha.
12-13 Jesus vaꞌora niꞌaha:
—Asohiki ida vakadivarani.
Okhananavaki ada Elias kohana fori hiki,
ijaꞌari-ra vaꞌora navaꞌisohijoravini hiki vakadimahi-ra vanasohivini,
okaikahina viahania.
Aꞌonira onavaꞌisohivini hiki ada kaikahiꞌina Elias fori hiki.
Ni-avigaꞌiki ada makhira Elias kohana fori hina,
oniani ida vanaimaꞌbanavini hiꞌia.
Nimania ida Deus athi kapapirania bivavaꞌisohihijoraki.
Elias fori hiki-ra vakajonivini.
Hovani ijaꞌari hahavi vakadiꞌaajo ohina kabaꞌi,
hora vanaimaꞌbanaki jaboni bana adani.
Hora vakajoniki jaboni bana.
Nimania ida hora vanaimaꞌbanavini Deus athi kapapirania bivavaꞌisohihijoraki — niha ada Jesus.
Jesua bianaihotaki ada isai
14 Hari.
Oniaroa,
vakhanofoniꞌaha adani Jesus,
Pedro,
João,
Tiago vihiki.
Vaꞌora vanamaakariꞌaha adani Jesus ipohina vahoariha.
Vahararana vaꞌora vanokiꞌaha adani ijaꞌari vaipohiki.
Vahojaki jaboni adani judeus kaijaꞌari vakaꞌojomoꞌiva abono vaipohiriki.
Vaabono vara vakaniꞌakhamaꞌaha.
Jesus cura um menino dominado por um espírito mau (Marcos 9:14)
15 Hari.
Ijaꞌari vaipohiki vaꞌora vanokiha adani Jesus vakaikahiꞌina,
vakavaꞌibodivaraniꞌihi,
vakiꞌdarahaꞌaha,
Jesu-ra vakaꞌivanitiꞌaha.
16 Vaꞌora nanaꞌdohiꞌaha:
—Nahina mani hida avakadivarani hija?
17 Hoarana bigathaniꞌihi ida Jesus athi:
—Jesus,
kodisai mani hada ovikhara kadania.
Bajadia bigathivini mani ida abani anaꞌdakhararini hija.
18 Bajadia bigathivini mani ida binaadaribakhiavini hija.
Iꞌbana thorothoronaniki bodia,
kanada kakiroromisiki raiꞌana.
Kadaipohi-ra vaꞌora okanikhariahi bajadi akaraꞌoni-ra vahonariara kaimoni.
Vahonariavini kabaꞌi,
ni-akaraꞌoꞌiki ida bajadi — niha ada isai kaabiꞌi.
19 Oniaroa,
Jesus vaꞌora niꞌaha adani vajoroniki:
—Aꞌonivani,
asia Deu-ra avakajariꞌdaki aꞌoni.
Ovaꞌi-ra avanamokaraki aꞌoni.
Avanokibakhiaki ida Deus kabadani danokia okabadanina,
kabaꞌi,
ni-Deu-ra avavakaijokaki aꞌonira kakodiara kaimoni kidibadani danokia avakabadanini.
Isai kaabiꞌi-ra niꞌaha:
—Kodiania ivikha o kadaisai.
20 Vavikhavini kabaꞌi ada isai,
bajadia binokiꞌaha ada Jesus.
Bajadia binaraiꞌaꞌaha ada isai.
Raiꞌaha,
adariꞌaha,
roaroaꞌaha iꞌbana thorothoronaniꞌiki bodia.
21 Isai kaabiꞌi-ra nanaꞌdohiha ada Jesus:
—Niha ninimania hida kamaꞌdani?
—Isai paꞌitxina kari vani kamaꞌdaja hida raiꞌana.
22 Siho kabodinia bajadia biosonabakhiaki hada,
paha bodinia biosonabakhiaki jaboni hada,
abinira kaimoni.
Isai-ra ianaihotavini-ra ikaabokahi;
isai-ra kajoamora bana.
Haria nakaidiva bana!
Haria kajoamora jaboni.
23 Jesua biniꞌaha:
—Oanaihotavini ikajariꞌdariha;
oanaihotaha.
Deu-ra kajariꞌdarikia bikaabokaki ida badani danoki hahavi.
24 Isai kaabiꞌia bigathanijorakihi ida Jesus athi:
—Okajariꞌdarihi oni.
Ira ovakaijokavini-ra onofiki ho.
Hora kakodia bana mahija ojariꞌdaravini.
25 Oniaroa,
Jesus vaꞌora nokiꞌaha adani ijaꞌari vaipohiki vamaakarina,
bajadi-ra niꞌaꞌaha:
—Bajadi,
isai abani-ra ianaꞌdakharariꞌiki i.
Morobo ikanamokhihaꞌiki i jaboni.
Ira ohonariavini isai kania akaraꞌoꞌa!
Hariꞌa igathijana!
26 Jesus vara nina naothinia,
bodiꞌbarahaꞌihi ida bajadi,
binaraiꞌakarahoꞌaha ada isai,
ajihiꞌihi ida bajadi.
Isai abono abaꞌoi fori hini hojaꞌiki.
Oniaroa,
vanokiva vaniꞌaha:
—Ada abiniꞌaha isai.
27 Jesua biagathihi ida isai saꞌa,
biragaaꞌaha.
Aihotaꞌaha ada isai.
28 Hari.
Ai vihiꞌaha adani Jesus.
Gora avikhaꞌaha.
Aviꞌoina naothinia,
ipohina vananaꞌdohiꞌaha:
—Jesus,
niha akhanimanija bajadi akaraꞌoni-ra akaabokariki?
29 —Deus khama vara avakhanirihi;
ni-avakaabokaki oni bajadi fori hiki akaraꞌoni.
Jesua vara bivaniꞌaꞌianaki ida abinina, ahokina hiki
(Mateus 17.22-23; Lucas 9.43b-45)
30 Hari.
Oniaroa,
ai vihiꞌaha adani Jesus,
ipohina khama.
Galiléia kaarabonia varadahana.
Jesua ni-binofiki ida hana vahojana vahoariha avigavini.
31 Binofiki vaꞌora kaꞌojomoꞌivini adani ipohina kaꞌoa.
Vaadahana kabaꞌi,
vaꞌora kaꞌojomoꞌiꞌaha:
—Hovani ijaꞌari hahavi vakadiꞌaajo ho.
Ijaꞌari vakadiania hora avarakhaki bana ho,
vahoariha hora vanaabinira kaimoni.
Mahi ahoarabakosiki radahahi,
oahokiki bana ho — vaꞌora niꞌaha ada Jesus.
32 Hari.
Ipohina mitha vaniꞌahi,
ni-nahina nini avigaki.
Vifinivini mani ida vananaꞌdohiravini hija.
Kaꞌdaꞌdi nofiana varani hina hida
33 Hari.
Oniaroa,
Cafarnaum sidajia avakhanoꞌaha.
Gora bodinia aviꞌoiꞌina,
Jesus vaꞌora nanaꞌdohiꞌaha:
—Ariadahana oadani,
nahina mani oni avakadivarani hija?
34 Vaadahana kabaꞌi,
vaabono vakananaꞌdohikhamaꞌaha adani Jesus ipohina:
—Hana hina ada akadiania hojana jahara haria vakaꞌdaꞌdiki kaimoni?
—Hovani kaꞌdaꞌdi ohina jahaja — vakhanihahaviꞌaha afohanana.
Kaꞌdaꞌdi vihina kavaranihi-ra vakaipahivini mani ida Jesus kanaꞌdohi-ra vagathaniravini hija.
35 Hari.
Vithiꞌaha ada Jesus,
kidipohi-ra vaꞌora baranahaha,
vaꞌora niꞌaha:
—Jakaho vahoariha-ra kakodiava ada kaꞌdaꞌdi hina-ra nofiki.
Jakaho ijaꞌari hahavi vakadihonai abono hiva ada kaꞌdaꞌdi hina-ra nofiki — niha ada Jesus.
36 Hari.
Vahararana hojahi ida isai,
bianikhahi,
bikabaꞌonaꞌihi,
vaꞌora niꞌaꞌaha:
37 —Ijaꞌari hora nofijahakivini mani ida isai-ra gathanijahakivini hija,
oniani ida hora gathanijahakivini hija jaboni.
Hora gathanijahakihi;
bigathanijahakiha ada hora karonaꞌiki jaboni — vaꞌora niꞌaha ada Jesus.
Jesus vaꞌora kaꞌojomoꞌiki adani ipohina
38 Hari.
Oniaroa,
Joãoa biniꞌaha ada Jesus:
—Aajo,
anokiꞌiki ada makhira bajadi akaraꞌoni-ra honariavini.
Bidioniki ida ionini akaraꞌoja kaimoni ida bajadi.
Aripohina hiriha ada,
oniani ida akaabanivini hija:
“Ni-Jesus ira honariaki
bajadi akaraꞌoni-ra ihonariavini.
Ikavaꞌipahini bana ida kadabadani.”
Aniꞌaha ada makhira.
39 Oniaroa,
Jesua bigathanihi ida João athi:
—Hariꞌa vakaabani ada makhira!
Hora kajariꞌdaravini mani ida badani danoki-ra kaabokavini hija.
Hora kajariꞌdariki ni-hora kanavaranihaki.
40 Ijaꞌari akadibadani-ra nadabarihi;
haria kakodiahi.
41 Hari.
Asia vara niha ada Jesus.
Vaꞌora niꞌaha:
—Kaꞌoa hiki bana ida vara aꞌonira oniꞌavini hiki.
Ijaꞌari aꞌonira noꞌaki bana aꞌoni paha kodipohi aꞌoni.
Hovani onaabosiki ida kodipohi-ra kajoamoraki.
Jahari kabadani abosini kavaranihi
42 Hari.
Vara niꞌianaha ada Jesus:
—Vaꞌora onakaidivaki adani isai hora vavakaijokaki.
Ijaꞌari vaꞌora kaboroborobakhiaha adani isai,
hora vakavaꞌipahinira kaimoni,
isai-ra kaborovini kabadanihi,
Deua binaabosivini bana nahina jaharikia.
Jahaki ida jaꞌdi karaho ijaꞌari mathani ahoni paha bihiakia hokahini,
ahidaja kaimoni ida ijaꞌari isai-ra kaboroboroki.
43 Avaabononi avakavaꞌigairi bana mahija Jahari kabadania avakabadaniravini.
Ijaꞌaria binofihi ida Jahari kabadani-ra bada niꞌavini,
biakavaꞌboavini kajahaki ida saꞌani,
bada biniꞌaria kaimoni ida Jahari kabadani.
Jahari kabadania kabadanihi;
Ibavi Jaharikaꞌoakia okhahi.
Jahaki ida saꞌani kahoaranini kabaꞌi,
Deus Ibavi Jahakaꞌoakia okhani.
Jahariki ida saꞌani koꞌbamini kabaꞌi,
Ibavi Jaharikaꞌoakia hokahini.
44 Ibavi Jaharikaꞌoakia ijaꞌaria bikamithaki ida imai ꞌbanani arafiaki.
Ni-kamokhiki ida siho kakaraho.
Ni-karadahaki ida siho kaafani.
45 Ijaꞌaria binofihi ida Jahari kabadani kania adahani,
biakavaꞌboavini kajahaki ida ꞌdamani kahoarani,
bada biniꞌaria kaimoni ida Jahari kabadani.
Jahaki ida ꞌdamani kahoaranini kabaꞌi,
Deus Ibavi Jahakaꞌoakia okhani.
Jahariki ida ꞌdamani koꞌbamini kabaꞌi,
Ibavi Jaharikaꞌoakia hokahini.
46 Ibavi Jaharikaꞌoakia ijaꞌaria bikamithaki ida imai ꞌbanani arafiaki.
Ni-kamokhiki ida siho kakaraho.
Ni-karadahaki ida siho kaafani.
47 Ijaꞌaria binokihi bivajahaki ida Jahari kabadani,
bianivini jahaki ida nokhoni ꞌbaꞌdani hoarani,
vada biniꞌaria kaimoni ida Jahari kabadani.
Jahaki ida nokhoni ꞌbaꞌdani hoaranini kabaꞌi,
Deus Ibavi Jahakaꞌoakia okhani.
Jahariki ida nokhoni ꞌbaꞌdani ꞌbamini kabaꞌi,
Ibavi Jaharikaꞌoakia hokahini.
48 Ibavi Jaharikaꞌoakia ijaꞌaria bikamithaki ida imai ꞌbanani arafiaki.
Ni-ihimiki ida ꞌbathaki arafiaki.
Ni-kamokhiki ida siho kakaraho.
49 Jokira fori hiki ida ijaꞌari kamahi.
Jokira binajahaki ida igitha abono ahaꞌdiki ijaꞌari gahinai binihaki Deus kania.
Siho fori hiki ida ijaꞌari jahariharini.
Deua bivaꞌahaki ida ijaꞌari jahariharini,
binajahaja kaimoni ida ijaꞌari kamahi,
binadanoja kaimoni ida jariꞌdarini.
50 Jokira fori vihiki adani ijaꞌari Deu-ra vanofiki.
Jahaki ida jokira,
ꞌbai-ra naponiki kaimoni hini.
Jokira jahaki fori avihihi;
avaabononi avakanakaramisikhamahi.
Nahina binajaharihi ida jokira,
ni-ponini jahajanaki.
Jokira ponini jahajanariki fori avihihi;
ni-nahina jahaki avihiki — vaꞌora niꞌaha ada Jesus.