Jesus vaꞌora kaꞌojomoꞌiki adani kidipohi
17
Oniaroa,
Jesus vaꞌora niꞌaha adani kidipohi:
—Ijaꞌari vaꞌora kaborobakhiaki adani ijaꞌari vahoariha,
Jahari kabadania vakabadanira kaimoni.
Hoariha-ra kaborovinia kabadanihi,
Deua binaabosiki bana ida nahina jaharikia.
2 Jahaki ida jaꞌdi karaho ijaꞌari mathani ahoni paha bihiakia hokahini ahidaja kaimoni ida ijaꞌari kodijaꞌari-ra kaboroboroki.
Jahariꞌoamanija ida oipohina-ra kaborovini Jahari kabadania kabadanija kaimoni.
Lucas 17:1-37
3 Iabono akavaꞌigairi bana.
Ikaabani bana ada iigamini Jahari kabadania kabadaniki mahija bikavaꞌipahinivini.
Bikavaꞌipahinihi;
hariꞌa ikavaꞌihokijana bana ida kidihojai asohiriki.
4 Khahi ida iigamini,
ira niꞌahi:
“Jahariꞌoamanija ida kodihojai kadania,
hora akariaka bana.”
Nihi.
Iakariaka bana ida iigamini.
Hariꞌa ikavaꞌihokijana ida bada biniꞌaꞌiki.
Kidihojai asohiriki ira naihamahiꞌianahi;
kadania ira kanikhariaꞌianahi,
iakariakaꞌiana bana!
Mahi hoarani bada biniꞌabakhiaki ida ivajahariki,
ira kanikhariabakhiahi jaboni,
iakariaka bana jaboni — vaꞌora niꞌaha ada Jesus.
Deu-ra vakajariꞌdaravini varani hini hida
5 Hari.
Oniaroa,
Jesus athi avavaadahaoniva abonoa vakanikhariaꞌaha:
—Aajo,
haria kajoamora bana mahija avijavavini ida Deu-ra akajariꞌdaravini.
6 Oniaroa,
Jesus vaꞌora niꞌaha:
—Paꞌitxini kabaꞌi ida Deu-ra avakajariꞌdaravini,
Deu-ra avakanikhariavini hihi,
aꞌonira noꞌavini hihi ida avakanikhariaki.
Deu-ra avakajariꞌdaravini oadani,
avakaabokaki ida ihiꞌai avani rasohani-ra avahonariavini:
“Rasohahi oni ꞌdamani
abohani,
paha bihiakia irakhaihi.”
Ihiꞌai avani-ra avahonariahi bana,
Deu-ra avakajariꞌdarihi,
oniani ida Deua binanamithavini hija bana avakanikhariaki — niha ada Jesus.
Honai abono kabadani varani hini hida
7 Hari.
Vara niꞌianaha ada Jesus:
—Rajomi kavaranihia okavaraniki bana ho.
Kaꞌdaꞌdi ihiki i.
Ivahojaki ada kadahonai abono.
Kadahonai abono ira kasiroihaki,
vaꞌora akadavaꞌaki jaboni adani kadaꞌovilia.
Mahi oadani bada biniꞌaki ida badani ihonariavini hiꞌiki.
Hari.
Mithani vaivaini joina vani ni-kadahonai abono-ra iniꞌaki:
“Hidiaja kha mahija iꞌbaivini.”
8 Ni-niki ida kadavarani.
Kadahonai abono-ra iniꞌahi:
“Hora koꞌbaihaꞌa.
Aꞌdiahihi ida ꞌbai,
hora kavikha bana oibavia mahija oꞌbaiꞌimidiavini.
Oꞌbaina naothinia imaina iꞌbaihi.”
9 Nimania ida kaꞌdaꞌdi kidihonai abono-ra vara niꞌavini.
Honai abonoa bada biniꞌahahavivini kabaꞌi ida kidikaꞌdaꞌdi bihonariavini hiki,
ni-kidikaꞌdaꞌdia biniꞌaki:
“Ijahaꞌoamanija kodibadani-ra bada iniꞌahahaviꞌiki i.”
Ni-niki ida kidivarani.
10 Onivani fori avihini jahaja.
Deus kahonai abono avihiki aꞌoni.
Deus aꞌonira honariavini hiꞌikia avakabadanihahaviꞌini naothinia avaabononi vaniꞌaꞌa bana:
“Ni-nahina arihijahakirihi.
Deus kahonai abono kaꞌoa arihiki hari.
Haria honariavini hiki ida badani jahakia akabadanina.
Ni-nahina jahani arafiakia akabadaniki.”
Jesus vaꞌora anaihotaki adani makhira vakavamoniki
11 Hari.
Oniaroa,
Galiléia kaarabonia ajihiha ada Jesus.
Samaria kaarabonia okafianiha,
Jerusalém sidaji-ra anikhahaꞌaha.
Aadahaonina oadani ibavi kagoraki kania maakarinia akhanoꞌaha ada Jesus.
12 Hari.
Sidaji banininia vahojaki adani 10 vihiki makhira vakavamoniki.
Asafi namani-ra najaharikia vakavamonina mani ida vaꞌora nahojaja napaja sidaji banininija.
Jesus kania avikhana kabaꞌi,
ni-Jesu-ra vanamaakariki.
13 Oniaroa,
vibaranahaꞌaha:
—Jesus,
haria vaꞌadi bana.
14 Jesus vaꞌora nokiꞌaha,
vaꞌora niꞌaha:
—Ai vihiꞌa bana mahija sasidotxi vakadiania avarikhavini.
Sasidotxi-ra vananokiahivini hiꞌoni avaasafini namani jahaꞌiki — vaꞌora niꞌaha ada Jesus.
Oniaroa,
avikhana kabaꞌi vajahahahaviꞌaha.
15 Hari.
Hoarana abono-ra nokiꞌaha kavamonijanarina,
ajoiꞌaha Jesus kania.
Samaria kaaraboni kaijaꞌarini ada makhira ajoiꞌiki.
Ajoina oadani bodiꞌbarahaha Deus jahana-ra khai niꞌavini.
Jesus kania akhanoꞌaha,
16 Hari.
Jesus viaha kajoꞌatharariꞌaha,
Jesu-ra khai niꞌaꞌaha:
—Jesus ijahaki i kodimoni ihini,
hora inajahaꞌiki i — niha.
17 Jesua biniꞌaha:
—Vaꞌora onajahaꞌiki adani makhira vaipohina 10 vihiki.
Deu-ra khai niꞌaꞌiki ada hihada makhira hoarana,
akadijaꞌari hirina kabaꞌi.
Adani hanaja vahojaha vahoariha 9 vihiki?
18 Niha vakhanimanira adani vahoariha vajoiriki Deu-ra khai vaniꞌara kaimoni?
19 Hari.
Jesua biniꞌaha ada jahaꞌiki:
—Gaaꞌa,
adahaꞌa.
Hora ikajariꞌdaravini mani ida ira onajahavini hiꞌia — niha ada Jesus.
Deus ijaꞌari hahavi-ra vaꞌora vakaꞌdaꞌdivini kamahini
20 Hari.
Oniaroa,
farisio vaipohirikia vananaꞌdohiꞌaha ada Jesus:
—Asia mani kamahini ipohija ida Deus ijaꞌari hahavi-ra vaꞌora vakaꞌdaꞌdivini kamaꞌdani?
Jesua vakadinaꞌdohi bigathaniꞌaha:
—Nokiariki bana ida Deus ijaꞌari-ra vakaꞌdaꞌdivini kamaꞌdani.
21 Ni-ijaꞌaria binavaꞌisohirihi ida hoariha:
“Vada iniꞌa hida kamaꞌdani.”
Ni-ijaꞌaria biniꞌaki jaboni:
“Vada iniꞌa oni kamaꞌdani.”
Nokiarihi bana ida Deus ijaꞌari-ra vakaꞌdaꞌdivini.
Deua bivakaꞌdaꞌdivini ida ijaꞌari vaꞌini bodinia.
22 Hari.
Jesus vaꞌora navaꞌisohiꞌaha adani kidipohi:
—Khaki bana ida mahi hora avanokiꞌianavini-ra avanofivini kamahini,
hidakabaꞌi hora avanokivini fori hiki.
Ohojana kabaꞌi avakadiania,
ni-hoaranija hora avanokiꞌianaki hora avanokivini fori hiki hidakabaꞌi.
23 Vahoariha aꞌonira vaniꞌaki bana aꞌoni:
“Vada vaniꞌa hada vani Cristo.”
Vahoariha aꞌonira vaniꞌaki bana aꞌoni jaboni:
“Vada vaniꞌa hiꞌo Cristo.”
Aꞌonira vaniꞌavini kamahini,
hariꞌa bana vanavanavanahaꞌa.
24 Bahi korikorihana nama-ra navagajorakivini vani fori hija bana ida ojoina kamahini.
Hovani ijaꞌari hahavi vakadiꞌaajo ho.
Aꞌonira onavaꞌisohijoravini hiki ida bana okhaꞌianana viahani namithaki kaimoni.
25 Oimana ꞌbanakarahoꞌimidiaki bana ho.
Ijaꞌari hidakabaꞌi vahokiki hora vakajoniki.
26 Noé kohana avaꞌdoroa oꞌoina viahani kari fori hiki bana ida ojoina kamahini.
27 Noé oꞌoirina oadani,
ni-ijaꞌaria vakavaꞌibodivaranipaꞌitxiki ada Deus.
Ni-vanofiki ida Deus athi-ra vanaabavini.
Vakavaꞌibodivaranihaꞌoadahaki ida vakadimahi,
vakadiꞌbai,
makhira gamo khama avaakarana hiki.
Noé avaꞌdoroa oꞌoina naothinia,
Deua bikaronaꞌiki ida paha karaho,
avahidahahaviꞌiki adani ijaꞌari.
28 Hari.
Onivani fori hija ida jaboni Ló kohana hojana.
Sodoma sidajia akaraꞌorina oadani,
ni-vanofiki ida Deus athi-ra vakamithavini,
ni-vakavaꞌibodivaranipaꞌitxiki jaboni ada Deus.
Ijaꞌari hahavi viꞌbaibakhiaki,
vakapavakariki ida vakadinahina,
pavakari vanihaki jaboni ida vakadinahina,
varakhajahaki adani,
vanamonahaki jaboni ida vagorana.
Nimania ida vakadimahi.
29 Hari.
Ló Sodoma sidajia akaraꞌona naothinia,
Deua bikanakhanorariꞌihi ida siho kahaꞌdini,
siho kanadarani kihiki,
vaꞌora naabinihahaviꞌaha adani Sodoma sidaji kaijaꞌarini.
30 Onivani fori hija ida jaboni bana onokiana kamahini.
31 Vaꞌora onavaꞌisohijoraki bana adani ijaꞌari gora ꞌdaꞌdini aꞌani sohiriamaꞌokia vahojana onokiana kamahini:
“Avigajorakiꞌa bana.
Hariꞌa avikhajakosi bana avagorania,
avakadinahina-ra avaranikhavini.”
Vaꞌora onavaꞌisohijoraki adani ijaꞌari vakadisiroia vahojaki,
vagorana avajoirara kaimoni.
32 Vakavaꞌihoki bana ida Ló kagamo kohana varani hini.
Vada vaꞌora niꞌaribanivini mani ida napohimajani hiꞌia.
33 Hari.
Ijaꞌari vaꞌini bodinia abononi niꞌahi:
“Jesus kaijaꞌari ohina-ra
avigaha adani vahoariha;
hora vanaabiniha.
Jesus kaijaꞌari ohirina-ra okahiki bana ho.”
Nihi ida ijaꞌari vaꞌini bodini vara nini,
abinini kamahini Ibavi Jaharikaꞌoaki kania okhahi.
Ijaꞌari vaꞌini bodini abononi niꞌahi:
“Jesus kaijaꞌari ohina mani ida vahoariha hora
vanaabinivini-ra vanofivini hija.
Oabinihi;
oabinihi.
Jokoa kidijaꞌari ohirina-ra okahirihi.”
Nihi ida ijaꞌari vaꞌini bodini vara nini,
abinini kamahini Ibavi Jahakaꞌoaki kania okhahi.
34 Hari.
Onokiana kamahini joma vavadiki bana adani ijaꞌari viꞌbamiki vagorana.
Deua bianiki ida bana ijaꞌari hoarani,
hojaroniki ida bana ijaꞌari hoariha.
Kaꞌoa hiki ida aꞌonira onavaꞌisohijoravini hiki bana.
35-36 Gamo viꞌbamikia vigihahi ida boda joꞌdoni.
Deua bianiki ida hoarani.
Hojaroniki bana ida hoariha.
Makhira viꞌbamiki bada vakhaniki jaboni bana vakadisiroia.
Deua bianiki bana ada hoarana.
Hojaroniki bana ada hoariha — vaꞌora niꞌaha ada Jesus.
37 Oniaroa,
ipohina vananaꞌdohiꞌaha ada Jesus:
—Aajo,
hanaja vania bana namithaja ida haria iniꞌavini hiꞌiki?
Jesus vaꞌora niꞌaha:
—Abaꞌoi ꞌbathaki hojaroniꞌihi;
vajorahaki adani majori.
Onivani fori vihira bana adani vahojaroniki bana,
ꞌbanakarahoki bana ida vaimana — niha ada Jesus.