Jiniro-ra nakavithimaki ada kaꞌdaꞌdi kahonai abono
16
Hari.
Oniaroa,
Jesus vaꞌora vara niꞌaha adani kidipohi rajomi kavaranihia:
—Hojaki ada kaꞌdaꞌdi kanahinaꞌahapikiki.
Hojaki jaboni ada kaꞌdaꞌdi kahonai abono,
ovaria biakadavaꞌahahaviꞌiki ida kidikaꞌdaꞌdi kanahina,
inisika hiki.
Hari.
Ijaꞌari vahoariha vaniꞌaha ada kaꞌdaꞌdi:
“Kadahonai abonoa binakavithimaki ida kadajiniro.”
2 Hari.
Oniaroa,
kaꞌdaꞌdia bihonariaha ada kidihonai abono khana.
Biniꞌaha:
“Vahoariha vara ira
vavaniꞌavini
kodijiniro-ra inakavithimavini-ra vakahivini.
Ni-iakadavaꞌajahakiki ida
kodijiniro.
Inajiri bana ida papira,
vaꞌora oogara kaimoni adani ijaꞌari kodijiniro-ra varihaꞌiki.
Jiniro abosiriki kapapirani-ra onokivini naothinia,
ni-onofijanaki ida
kodihonai abono ihini.”
Niha ada kaꞌdaꞌdi.
Lucas 16:1-31
3 Hari,
honai abonoa bikavaꞌibodivaraniꞌihi ida kidikaꞌdaꞌdi athi.
Abono-ra niꞌaha:
“Kodikaꞌdaꞌdia ni-binofijanaki ida kidinahina
oakadavaꞌavini.
Niha oniki koda ho?
Odanorina mani ida badani khanaki-ra okaabokaravini hija.
Ni-okaabokaki ida nami
khorahani kabadanihi.
Vahoariha vakadiania jiniro-ra okanikhariavini
ovaꞌi-ra anaipahihiki bana ho.
Niha oniki koda ho?
4 Hai!
Oogaꞌoamanija bana ida bada oniꞌaki kaimoni.
Inisika kajinironi abosiriki kapapirani-ra onamonahahi,
inisika abosiriki kajinironi onapaꞌitxihi.
Hora vavajahaki bana adani vahoariha.
Kodikaꞌdaꞌdi kainisika-ra
oakadavaꞌajanarihi,
vagorana hora vagathanijahakiki bana adani.”
5 Abono-ra navaꞌibodivaranijoraꞌaha ada honai abono.
Oniaroa,
vaꞌora baranahaꞌaha adani makhira kidikaꞌdaꞌdi kainisika-ra naabosiꞌiariki.
Binanaꞌdohiꞌaha ada hoarana:
“Nihafori himania ida
inisika kajinironi
kodikaꞌdaꞌdi-ra inaabosiꞌiaravini hiki?”
Bigathaniꞌihi ida kidinaꞌdohi:
6 “Okapavakariꞌiki ida basina kabavini karaho 100 hiki ipohini.
Ni-abosiꞌiaki ida basina.”
Niha ada makhira.
Oniaroa,
kaꞌdaꞌdi kahonai abonoa bihonariaꞌaha:
“Hidavani papira basina
kaidivani kakapapirani.
Inapaꞌitxi bana ida basina kaidivani kajinironi.
Inajiri bana ida basina
bavini 50 hiki ipohini.”
Niha ada kaꞌdaꞌdi kahonai abono.
7 Makhira binajirivini naothinia,
kaꞌdaꞌdi kahonai abonoa binanaꞌdohiꞌaha ada hoariha:
“Ivani,
nihafori himanija ida inisika kajinironi
inaabosiriki?”
Makhira bigathaniꞌihi ida kidinaꞌdohi:
“Okapavakariꞌiki ida
karagoahi kasoꞌoroni
1 mil hiki ipohini.
Ni-abosiꞌiaki ida karagoahi okapavakariꞌiki.”
Niꞌaha.
Oniaroa,
kaꞌdaꞌdi kahonai abonoa bihonariaꞌaha:
“Inapaꞌitxi bana ida
karagoahi kaidivani
kajinironi.
Inajiri bana 800.”
Niha ada kaꞌdaꞌdi kahonai abono.
8 Hari.
Oniaroa,
kaꞌdaꞌdia bikamithaꞌihi ida kidihonai abono varani hina.
Biniꞌaha:
“Jaharini kabaꞌi ida
kodijiniro-ra iakadavaꞌajahakiravini,
jahaki ida ikavaꞌibodivaranijoraꞌavini kadamahi.
Honai abono ogahaki i.”
Oniaroa,
Jesus vaꞌora navaꞌisohivini ida rajomi kavaranihi nahina hini.
Vaꞌora niꞌaha:
—Deu-ra vanofirikia avigaki ida vakadinahina-ra vakavaꞌibodivaranijoravini aꞌbaꞌdija kaimoni.
Deu-ra vanofikia ni-avigajahakiki,
ni-vakavaꞌibodivaranijoraki.
9 Kaꞌdaꞌdi kahonai abonoa bikavaꞌibodivaranijoravini mani ida vakanahinariki-ra vaꞌora kakodiavini hija.
Binofiki ida kidijiniro ihimini naothinia vaꞌoaniaro maina vakajoamoravini.
Aꞌonivani jaboni vaꞌora vakajoamora bana adani vakanahinariki mahija avakadinahina aꞌbaꞌdivini Deus kania.
Avakaikahini avagahinahi.
10 Oniani ida aꞌonira onavaꞌisohivini hija.
Ijaꞌaria biogajahakihi ida hoariha kanahina paꞌitxi-ra akadavaꞌavini;
biogahi jaboni ida nahina karaho-ra akadavaꞌavini.
Ijaꞌaria biogarihi ida hoariha kanahina paꞌitxi-ra akadavaꞌajahakivini;
ni-biogaki ida jaboni hoariha kanahina karaho-ra akadavaꞌavini.
11 Avarigarihi ida hoariha kanahina kaidivaki-ra avarakadavaꞌavini;
ni-Deus aꞌonira noꞌaki kidinahina kaidivakia avarakadavaꞌaki kaimoni.
12 Avarakadavaꞌajahakirihi ida hoariha kanahina.
Ni-vahoariha noꞌai hini vanofiki avakadimoni hini.
13 Hari.
Honai abonoa ni-bikaabokaki ida kaꞌdaꞌdi viꞌbamiki vaathi-ra naabahahaꞌoadahavini.
Bivajahaki ada kaꞌdaꞌdi hoarana,
athi-ra naabavini jaboni.
Bada biniꞌavini oadani ida kaꞌdaꞌdi kabadani,
ni-bikaabokaki ida kaꞌdaꞌdi hoariha athi-ra naabavini,
oniani ida bikajonivini hija.
Kaꞌdaꞌdi ada Deus.
Kaꞌdaꞌdi fori hiki ida jiniro.
Ijaꞌari vaꞌini-ra nahonariahihivini fori hiki ida jiniro.
Ijaꞌaria bivaꞌahavini oadani ida jiniro vaꞌini nahonariahihini hini,
ni-bivaꞌahaki ada Deus vaꞌi nahonariahihini hini — vaꞌora niꞌaha ada Jesus.
14 Hari.
Farisioa vakamithaꞌihi ida Jesus athi.
Jiniro-ra vanofijahakivini mani ida Jesus athi-ra vakanahahanihavini hija.
15 Oniaroa,
Jesus vaꞌora niꞌaha:
—Vahoariha avakadihojai-ra vada vaniꞌahi;
avajahakaꞌoaki aꞌonira vavanihaha.
Deus vania biogaja ida avakadivaꞌibodivarani.
Ijaꞌaria vavajahaki ida avakadihojai.
Deus vania bivajahapaꞌitxirija ida — niha ada Jesus.
16 Oniaroa,
Jesus vaꞌora niꞌaha adani ijaꞌari vajoroniki:
—Moisés kohana binajiriꞌboꞌdaꞌiki ida Deus kavaꞌisohihi jiriki.
Deus athi namoniva abonoa vanajiriꞌboꞌdaꞌiki jaboni ida Deus vaꞌora navaꞌisohijoravini hiꞌiki.
João Batista kharina oadani,
ijaꞌaria mitha vaniꞌabakhiahi ida Deus athi vanajiriꞌiki.
João Batista naothia kamaꞌdaꞌiki ida Deus monina jahaki akarafarakhamaꞌini.
Ijaꞌaria vakamithaki ida Deus kaꞌdaꞌdi hina kavaranihi.
Vanofiki afohanana ida Deus vaꞌora vakaꞌdaꞌdivini,
oniani ida kidiania vakaikahina vaabono avanadodovini hija.
17 Hari.
Asia vara niꞌaha ada Jesus:
—Ihimiki bana ida nama,
arabo hiki.
Ni-ihimirihi ida Deus kavaꞌisohihi jiriki.
Ni-athi pitani paꞌitxi hoarani Deua vara bivaniꞌaki avisonirihi.
18 Hari.
Deua bivajahariki ida makhira kidigamo-ra nahojahavini,
gamo hoariha-ra anakaravini.
Ni-asohipaꞌitxiki ida kidihojai.
Makhira hoariha bianakaraki ida gamo kidimakhira binahojahaꞌiki,
hiꞌada makhira jaboni badani Deua bivajaharikia kabadaniki ada.
Adultério oniki ida vakadibadani niki.
Lázaro varani hina hida
19 Asia vara niꞌaha ada Jesus:
—Hojaki ada makhira kanahinaꞌahapikiki.
Bikaimahaki ida makari kaidivaki.
Vaꞌora kaboaꞌibakhiaki adani kidivaꞌahi ihinika karaho koꞌbaini-ra vahara kaimoni.
Ni-nahina-ra kainamoki ada makhira.
20 Hari.
Hojamaniha ada makhira hoariha kanahinariki,
onina Lázaro.
Samosamohi naꞌbahaki abani hiki ada Lázaro.
Oniaroa,
kanahinaꞌahapikiki gorana banininija hojabakhiaha ada Lázaro.
21 Binokhahi ida hoariha koꞌbai ahabarini abono-ra vidorahavini kaimoni hini.
Jomahia kidisamosamohi avakaabanaha.
22 Hari.
Oniaroa,
abiniꞌaha ada Lázaro.
Deus ibavi kaijaꞌarinia avisaꞌaha Deus ibavia.
Akadiꞌarahoda okhananavaki Abraão kohana ꞌdihana vithiꞌaha ada Lázaro.
Viꞌbaijabanaki adani ijaꞌari Deus kania,
khai vakhanina.
Hari.
Abiniꞌaha ada makhira kanahinaꞌahapikiki jaboni,
kaꞌdamahaꞌaha.
23 Ijaꞌari abiniꞌiki abononi ibavinia okhaꞌaha.
Oniaroa,
bikamithahi ida imana ꞌbanani karaho Ibavi Jaharikaꞌoaki kania.
Hari.
Napaja nobanija vaꞌora anokifianiꞌaha adani Abraão,
Lázaro khama.
Abraão ꞌdihana hojaha ada Lázaro.
24 Oniania,
abono-ra vibaranahaꞌaha:
“Biꞌi Abraão,
hora vaꞌadi bana.
Ihonaria bana ada Lázaro saꞌa nokhoni-ra naꞌbavini paha
mahija oabani-ra naꞌbavini.
Aforaꞌoamanija hida oabani.
Okamithaki hida oimana
ꞌbanani karaho,
siho kakhororoki kabodinia ohojaki ho.”
25 Abraãoa biniꞌaha:
“Iniani,
kodisai.
Ikavaꞌihokiria ida iabinirini oadani
kadanahina jahaki-ra
igathanibakhiavini.
Lázaro,
ni-nahina jahaki-ra
gathaniki abinirina
oadani.
Hidakabaꞌi Lázaroa khai
biniꞌaꞌiki ida Ibavi
Jahakaꞌoakia hojaꞌina.
Imaina,
ikamithaꞌiki ida
iimani ꞌbanani karaho.
26 Aakhaninihakhamaki ida hodi bihiani arafiaki,
oadaki,
rabodiki.
Ni-nahina okafianini-ra kaabokaki.
Ni-idiaja hodi pitanija hojaki,
ni-kafianini-ra kaabokaki jaboni.
Iborohihaꞌoadahaki i.”
Niha ada Abraão.
27 Oniaroa,
Abraão-ra niꞌaha ada makhira:
“Biꞌi Abraão,
ikaronaꞌa o bana Lázaro kodiabiꞌi
gorana okhana.
28 Kodikajoꞌo saꞌai kahoarani vihiki vahojaki kodiabiꞌi gorana.
Vaꞌora kaabaniva ada Lázaro
mahija imai ꞌbanani
arafiani ibavini kania
vikharavini.”
29 Abraãoa biniꞌaha:
“Iniani.
Kadakajoꞌoa vavahojaki ida Deus athi kapapirani,
Moisés kohana,
Deus athi namoniva abono vahoariha khama vanajiriꞌiki,
kadakajoꞌo-ra vaꞌora kaabaniki kaimoni.
Jakana papira athini-ra vanaabaꞌava kaho.”
30 Makhira biniꞌaꞌianaha:
“Iniani.
Biꞌi Abraão,
arajomarihi ida Deus athi
kapapirani.
Lázaro kohana ahokiꞌina-ra vanokiha;
ni-vakajariꞌdajanaki ida Deus athi.
Vakavaꞌipahinikaꞌoahi ida Jahari kahojai.”
31 Abraãoa biniꞌaha:
“Iniani.
Moisés kohana athi-ra vakajariꞌdaki adani,
vakajariꞌdaki jaboni ida Deus athi namoniva abono vaathi,
vakajariꞌdaki bana jaboni ida ahokiꞌiki athi.”
Niha ada Abraão.
Aꞌdiahiꞌihi ida rajomi kavaranihi,
Jesus vara vaꞌora niꞌavini hiꞌiki.