Makhira kidigamo-ra nahojahavini kavaranihi hida
10
Hari.
Ai vihiꞌaha adani Jesus.
Judéia kaarabonia avikhaꞌaha.
Jordão vainia avikafianiha.
Nobanija vihiꞌaha.
Vajoroniꞌianaha adani ijaꞌari vaipohiki.
Jesu-ra vanamaakariꞌaha.
Vaꞌora kaꞌojomoꞌiꞌaha.
Kidihojai oamani ida ijaꞌari vaipohiki-ra vaꞌora kaꞌojomoꞌivini.
2 Jesus kania vikhaha adani farisio vaipohiriki.
Vaabono vaniꞌaha:
—Jesua ni-bikapoariki ida Deus kavaꞌisohihi jiriki.
Jesus Deus kavaꞌisohihi-ra kajonivini-ra vanofivini,
oniani ida vakaborovini hija.
Vananaꞌdohiꞌaha:
—Deus kavaꞌisohihi jirikia hojaki ida makhira kidigamo-ra nahojahavini kavaranihi.
Gamoa bada biniꞌahi ida badani kidimakhira bivajahariki,
Deua bivaꞌahamanira ada makhira kidigamo-ra nahojahavini?
3 Jesus vaꞌora niꞌaha:
—Nahina mani ida Moisés kohana aꞌonira honariavini hija?
4 Farisioa vaniꞌaha ada Jesus:
—Moisés kohana bivaꞌahaki ada makhira kidigamo-ra nahojahavini.
Binahojahavini viahania papira jirikia binoꞌaꞌihi,
kidigamo hijanaria kaimoni.
Binoꞌavini naothinia,
bihonariaꞌihi ajihini.
Nimania ida Moisés athi Deus kavaꞌisohihi jirikia hojaki — Jesu-ra vaniꞌaha adani farisio.
5 Jesus vaꞌora niꞌaha:
—Ni-avanofiki ida Deus athi-ra avanaabajahakivini,
oniani ida Moisés kohana makhira-ra vaꞌahavini hija,
kidigamo-ra nahojahavini.
Asia vakhaniki adani ijaꞌari vahokiki hidakabaꞌi,
Deus athi-ra vanaabajahakivini-ra vanofiravini.
6 Deus vaꞌora namonahaki adani makhira gamo khama.
7 Kidigamo-ra anakaravini mani ida makhira,
kidiamia,
kidiabiꞌi vihiki-ra vaꞌora aakaraꞌovini hija.
8 Makhira,
kidigamo khama avaakarana viahania viꞌbamiha.
Avaakaraꞌina naothinia,
ijaꞌari hoarani fori vihina vahojaꞌaha kidigamo khama.
9 Deus vani vaꞌora anakaramisiꞌara adani.
Hariꞌa ijaꞌari vaabono vakanahoarihakhamava.
10 Hari.
Anokhomiꞌihi ida Jesus kavarani.
Ai vihiꞌaha,
gora bodinia aviꞌoiꞌaha.
Ipohina vananaꞌdohiꞌaha kidivarania.
11 Vakadinaꞌdohi bigathaniꞌaha:
—Makhira binahojahahi ida kidigamo,
gamo hoariha-ra anakarara kaimoni,
jahariꞌoamanija ida makhira kahojai.
12 Gamoa binahojahaha ada kidimakhira,
makhira hoariha-ra anakaraja kaimoni,
jahariꞌoamanija ida gamo kahojai — niha ada Jesus.
Jesus vaꞌora kajoamoraki adani isai
13 Hari.
Oniaroa,
ijaꞌari vaꞌora vavikhaha adani vakadisai Jesus kania.
Vanofiki ida Jesus vakadisai-ra vaꞌora kajoamoravini.
Oniaroa,
kidipohi vaꞌora vakaabaniꞌaha adani isai-ra vavikhaki:
—Hariꞌa vaꞌora vavikha vaꞌoani isai.
14 Jesus ipohina-ra vaꞌora nokiha,
vaꞌora kajaꞌoriaꞌaha,
vaꞌora niꞌaꞌaha:
—Jakaho vikhava vaꞌoani isai kodiania.
Hariꞌa vaꞌora vakaabani kodiania vikhana.
Hiꞌadani isai fori vihiki vani hadani Deu-ra vanofijahakira.
Isai vania vanofira ada Deus vaꞌora vakaꞌdaꞌdira kaimoni.
Isai fori vihiꞌa bana mahija Deu-ra avagathanivini,
avakadikaꞌdaꞌdi hiꞌara kaimoni.
15 Vakavaꞌibodivarani hida oathi.
Isai fori vihiꞌa mahija Deu-ra avagathanivini avakadikaꞌdaꞌdi hiꞌara kaimoni.
Isai fori avihirihi;
jokoa avakadikaꞌdaꞌdi hiriha ada Deus,
jokoa Deus ibavia avarikharihi — vaꞌora niꞌaha ada Jesus.
16 Oniaroa,
Jesus isai-ra vaꞌora gathanihananaꞌaha,
vaꞌora kaabadaronahahahaviꞌaha,
Deu-ra kanikhariaꞌaha vaꞌora kajoamorara kaimoni.
Makhira kanahinaꞌahapikiki varani hina hida
17 Hari.
Ajihina kabaꞌi ada Jesus,
khaꞌaha ada makhira kiꞌdarahana.
Jesus viaha kajoꞌatharariꞌaha,
biniꞌaꞌaha:
—Jesus,
ijahaꞌoamanija.
Onofiki bana ida kodimahi anokhomiriki Deus kania.
Hana hini badani jahaki ida bada oniꞌaja kaimoni,
oabinina kamahini Ibavi Jahakaꞌoakia ookhaja kaimoni?
18 Jesua bigathaniꞌihi ida kidinaꞌdohi:
—Nahina ida ojahana-ra ikahivini hija?
Deus oavani ada jahara.
Ni-nahina hoariha jahaki.
19 Iogaki ida Deus kavaꞌisohihi jiriki.
“Hariꞌa hoariha-ra naabini!
Hariꞌa iviꞌoma oni makhira hoariha kagamo!
Hariꞌa boꞌdia!
Hariꞌa hoariha-ra korijanahia akaraganaha!
Hariꞌa hoariha-ra korijanaha!
Ikamithaꞌa oni kadabiꞌi,
kadamia vihiki ira vara vaniꞌavini.”
Nimania hida Deus kavaꞌisohihi jiriki.
20 Hari.
Niha ada makhira:
—Jesus,
isai ohina kari vani,
onaabaja hida Deus kavaꞌisohihi jiriki afobakhia.
21 Jesua vada biniꞌaꞌaha,
bivajahamanihi ida hojana,
biniꞌaꞌaha:
—Ida asia mani hojahi badani hoarani bada iniꞌaki kaimoni.
Okhaꞌa bana.
Kadanahina,
kadainisika hiki-ra pavakari nihaꞌa afohahavi.
Ijaꞌari vakanahinariki-ra vaꞌora noꞌavinihi ida kadajiniro.
Deus ibavia iokhani kamahini ni-nahina-ra bana ikainamoki.
Kadapavakarihi naothinia hora vaipohihaꞌa.
22 Hari.
Makhira mitha biniꞌaꞌihi ida Jesus athi.
Kidinahina ahapini gahinai hini varani hini mani ida vaꞌi mokara niꞌani hija.
Ni-noꞌai hini binofiki.
Ajihiꞌaha.
23 Hari.
Jesua binokiribaniꞌaha,
ipohina-ra vaꞌora niꞌaꞌaha:
—Vakanahinaꞌahapikiki vakadinahina ipohiki-ra vanofivini mani ida Deu-ra vagathaniravini hija vakadikaꞌdaꞌdi kaimoni hina.
24 Vakavaꞌibodivaraniꞌihi ida athi.
Jesus vaꞌora niꞌaꞌianaha:
—Oipohina,
vakadinahina vaꞌora kakodiaki vaabono vavanihavini mani ida Deu-ra vagathaniravini hija vakadikaꞌdaꞌdi kaimoni.
Ijaꞌaria vanofivini kabaꞌi ida Deus ibavia okhani,
ni-vakaabokaki.
25 Oniaroa,
Jesus vaꞌora kavarajomiki adani ijaꞌari cavalo avi joꞌonia okhajavarina-ra kaabokaravini vani fori vihina.
Avi joꞌonia cavalo okhajavarina-ra kaabokariki fori vihiki adani vakanahinaꞌahapikiki.
Vakadinahina-ra vanofijahakivini mani ida Deus vakadikaꞌdaꞌdi hina-ra vagathaniravini hija,
oniani ida Deus ibavia vaꞌora arakharija.
Ni-vakaabokaki ida avikhana.
Ijaꞌari vakadinahina-ra vavakaijokavini oadani,
ni-vakaabokaki ida Deus ibavia avikhana.
26 Jesus ipohina vakamithahi ida athi.
Vakavaꞌibodivaraniꞌahapikiꞌihi,
vaabono vakananaꞌdohikhamaꞌaha:
—Kaꞌoa mani ida koda iathini,
ni-nihanikia ijaꞌari abononi akavaꞌijoaki,
Ibavi Jaharikaꞌoakia okharia kaimoni?
27 Oniaroa,
Jesus vada vaꞌora niꞌaha,
vaꞌora niꞌaꞌaha:
—Ni-ijaꞌari abononi akavaꞌijoavini-ra kaabokaki.
Deus kaꞌoa ijaꞌari-ra akavaꞌijoavini-ra kaabokaki.
Deua bikaabokaki ida badani hahavi danoki bada niꞌani.
28 Hari.
Pedroa biniꞌaha:
—Mitha iniꞌa.
Harivani akadinahina,
agorana,
akadijaꞌari vihiki-ra vaꞌora anahojahahahaviꞌiki hari,
ira avaipohihaja kaimoni.
29 Jesus vaꞌora niꞌaha:
—Kaꞌoa hiki ida kodivarani.
Kodipohia binahojahaꞌiki ida gorana,
igamina,
kidiabiꞌi,
kidiamia,
kidisai,
kidiarabo hiki,
vara bivaniꞌakaꞌoaja kaimoni ida omonina jahaki,
ovari abinirina oadani gahinaki bana nahina ipohikia.
30 Paꞌitxi-ra nahojahaki,
karaho ida bigathaniki bana.
Karahohi ida binahojahaki,
karahoni arafiaki ida bigathaniki bana.
Kodipohia binahojahi ida kidinahina hoarani hora kakodiaja kaimoni,
Deua bianaipohiꞌianahi 100 hiki ipohinia.
Hora vanofiriki vaꞌora vavajahariki jaboni adani oipohina,
oniani ida vaꞌora vanajahariharivini hija bana.
Hari.
Abinina naothinia gahinaki jaboni bana kidimahi jahaki anokhomirikia Deus kania.
31 Hari.
Ijaꞌari vaipohiki vaꞌoaniaro miroꞌa Deus vaꞌora baranahavini,
aviꞌoisiagaki adani Deus ijaꞌari-ra vakaꞌdaꞌdivini kania.
Ijaꞌari vahoariha Deus vaꞌora baranahavini-ra vakamitharonisiagaki,
vaꞌoaniaro miroꞌa aviꞌoiki bana adani Deus ijaꞌari-ra vakaꞌdaꞌdivini kania — vaꞌora niꞌaha ada Jesus.
Jesua vara bivaniꞌaꞌianaki ida abinina kamahini
32 Hari.
Oniaroa,
ai vihiꞌaha adani Jesus,
Jerusalém sidajia avikharimananina.
Okhananavaha ada Jesus.
Avikasiagaha adani ipohina.
Jesu-ra vakavaꞌibodivaraniꞌaha.
Vahoariha avikasiagaki vavaꞌi soko iniki.
Ipohina vihiki-ra vaꞌora avikhananavapaꞌitxiha,
vaꞌora navaꞌisohiꞌianavini hiki ida namithaꞌiariki kidiania.
33 —Mitha vaniꞌa.
Jerusaléa aokhaki hari.
Hovani ijaꞌari hahavi vakadiꞌaajo ho.
Hora avarakhaki bana adani vahoariha sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama vasaꞌa kabodinia.
Vaꞌoaniaro vakhaniki bana adani:
“Jahaki ida abinina.”
Vakhaniki bana adani.
Oniani ida ijaꞌari Deu-ra avigariki vasaꞌa kabodinia hora avarakhavini hija bana.
34 Oniaroa,
hora avigarahaki bana adani,
hora vakaathovini,
hora vidafiavini,
hora vanaabiniki bana adani.
Hari.
Mahi ahoarabakosiki radahaꞌihi,
oahokiki bana ho — vaꞌora navaꞌisohijoraꞌaha ada Jesus.
Tiago, João khama vanofiki ida Jesus iꞌoaria vavithina
35 Hari.
Oniaroa,
Jesu-ra vanamaakariha adani Tiago,
João khama.
Vaꞌoaniaro Zebedeu kaisai ꞌbamakhama adani.
Jesu-ra vaniꞌaha:
—Aajo,
anofiki bana ida bada iniꞌaki ira akanikhariavini hiki.
—Ijaꞌari hahavi-ra ivakaꞌdaꞌdivini kamahini ijahani ivagani nokiaki bana i,
ijaꞌari khai ira vaniꞌaki bana adani.
Iꞌdihania avithina-ra anofiki hari,
hoarana ipitani aniaja,
hoariha ipitani kajasonija — Jesu-ra vaniꞌaha adani Tiago,
João khama.
38 Vaꞌora niꞌaha:
—Ni-avarigajahakiki ida avakanikhariaki.
Okapoariki bana ida oimana ꞌbanani.
Aꞌonivani avakapoarimania koda bana ida avaimani ꞌbanani jaboni?
Ni-okajoniki bana ida hora vanajahariharivini.
Avakajonimania koda ida bana aꞌonira vanajahariharivini?
Hofori avihimania koda bana?
39 Vaniꞌaha ada Jesus:
—Haꞌa.
Ni-akajoniki ida aimana ꞌbanani — vaniꞌaha.
Oniaroa,
Jesus vaꞌora niꞌaha:
—Avakapoariki bana ida avaimani ꞌbanani.
Ni-avakajoniki bana ida aꞌonira vanajahariharivini.
Hofori avihiki bana aꞌoni.
40 Avavithini-ra avanofihi oꞌdihana.
Kodibadani hirihi ida ijaꞌari-ra onagathogathovini oꞌdihana vavithira kaimoni.
Deua binaibavijahaki ida ibavi opitana kaꞌaniajanija kajasonija jaboni,
vaꞌora nagathogathoꞌiki adani ijaꞌari vavithiki kaimoni oꞌdihana.
41 Hari.
Oniaroa,
vakadivarani kamithamahani vihiha adani 10 vihiki vaipohina,
oniani ida Tiago,
João vihiki-ra vaꞌora vakajaꞌoriavini hija.
42 Hari.
Jesus vaꞌora baranahaꞌaha adani ipohina hahavi vamaakarina.
Vaꞌora niꞌaha:
—Vaꞌora avarigamanira adani ijaꞌari Deu-ra avigariki vakadikaꞌdaꞌdi vahojana.
Vaꞌora avavadadamiki adani vakadijaꞌari.
Ijaꞌari Deu-ra avigariki vakadikaꞌdaꞌdi vaꞌora vahonariafiahaki adani jaboni vakadipamoari vaathi naabani vihira kaimoni.
43 Ni-onofiki ida ijaꞌari-ra avahonariavini,
vaꞌoaniaro ijaꞌari-ra vahonariavini fori hini.
Kaꞌdaꞌdi avihini-ra avanofihi;
jakaho ijaꞌari hahavi kahonai abono fori vihiꞌa bana.
44 Kaꞌdaꞌdi avihini-ra avanofihi;
vahoariha-ra vaꞌora vaakodia bana!
45 Hovani ijaꞌari hahavi vakadiꞌaajo ho.
Vahoariha-ra vaꞌora okajoamoravini hida hora rakhaja.
Vahoariha hora vakajoamoravini hirihi hida hora rakhaja.
Ibavi Jaharikaꞌoakia avikhaki bana adani ijaꞌari vaipohiki.
Oabono ovaꞌahaki ho oabinina ijaꞌari hahavi-ra vaꞌora oakavaꞌijoaja kaimoni — vaꞌora niꞌaha ada Jesus.
Jesua bianaihotaki ada Bartimeu
46 Hari.
Jericó sidajia avakhanoꞌaha adani Jesus ipohina khama.
Ijaꞌari vaipohiki vaꞌora vavaipohihaha adani Jesus.
Ai vihiꞌianaha.
Ai vihina kabaꞌi Bartimeu kamaodorohaki hagihi vadinia vithimaꞌoki.
Jiniro kanikhariava abono ada Bartimeu,
Timeu kaisai ada.
47 Hari.
Hagihi vadinia vithimaꞌona kabaꞌi vani,
bikamithahi ida Jesus varani hina.
Jesus radahana-ra vanamoniha adani vahoariha.
Bikamithahi,
bodiꞌbarahaꞌaha:
—Jesus,
ivani Davi kohana kaijaꞌari namitharonisiagaki i,
hora vaꞌadi bana!
48 Ijaꞌari vaipohiki vahoariha vakaabaniha:
—Avisoniꞌa bana!
Hariꞌa bana bodiꞌbarahajana!
Ni-avisoniki.
Vakaabaniha anaꞌbarahana hiꞌoamanihi.
—Jesus,
hora vaꞌadi bana!
49 Ogaakosoaꞌaha ada Jesus,
vaꞌora honariaꞌaha:
—Vibaranaha bana!
Oniaroa,
vibaranahaꞌaha.
—Khai iniꞌa bana ida ira baranahavini!
Jorakia bana gaaꞌa — vaniꞌaha.
50 Bianiꞌihi ida kidikarahobi.
Binahojahaꞌihi,
gaajorakiꞌaha,
Jesus kania okhaꞌaha.
51 Jesua binanaꞌdohiha:
—Nahina mani hida inofija kodiania?
—Jesus,
onofiki hida onokho-ra ianavagahavini — biniꞌaha.
52 Oniaroa,
Jesua biniꞌaha:
—Ba adahaꞌa!
Hora ikajariꞌdaravini mani ida inokhoni-ra najahaꞌia.
Jorakia vagahaꞌihi ida nokho ꞌbaꞌdani.
Oniaroa,
Jesus naothia kasiagajabanaꞌaha.