Uva kasiroini vakabadaniki varani vihina
20
Hari.
Jesus vaꞌora niꞌaha:
—Aꞌonira vara oniꞌavini hiki ida bana rajomi kavaranihi.
Uva kasiroini kakaꞌdaꞌdini honai abono-ra nakoꞌdihavini vani fori hiki ida Deus ijaꞌari-ra vakaꞌdaꞌdivini.
Mahi avagani kamaꞌdani ajihiꞌaha ada kaꞌdaꞌdi,
honai abono-ra vaꞌora nakoꞌdihavini,
kidiuva kasiroinia bada vakhanira kaimoni.
2 Honai abono-ra vaꞌora karagaha,
vaꞌora niꞌaha:
“Kodisiroia bada avakhanini-ra avanofihi;
aꞌonira onoꞌavini hiki ida jiniro ꞌbaꞌdani prata
amonahaki hoarani afohanana,
mahi hoarani badani abosini.”
Vaꞌora niꞌaha.
Vaniꞌaha:
“Jahaki ida badani abosini.
Bada akhaniki hari kadasiroia.”
Vakhaniꞌaha.
Vakadihojai hiki ida honai abono gahinana hiki jiniro ꞌbaꞌdani prata amonahaki hoarania,
kidibadani abosini mahi hahavi.
Oniaroa,
vaꞌora karonaꞌaha kidisiroia bada vakhanihana.
Ajoiꞌaha ada kaꞌdaꞌdi gorana.
3 Safini namahikajomana vani,
ajihiꞌianaha ada kaꞌdaꞌdi,
ijaꞌari ꞌbai-ra vakapavakarivini ibavini kania okhaꞌaha.
Vaꞌora nokiꞌaha adani makhira vakabadaniriki.
4 Hari.
Vaꞌora niꞌaha:
“Kodiuva kasiroinia avikhaꞌa mahija bada avakhanivini.
Mithani vani aꞌonira onoꞌaja bana avakadibadani abosinia asohiki.”
Safini sohirarina okhaꞌianaha ijaꞌari ꞌbai-ra kapavakarihavini ibavini kania,
makhira vahoariha bada vakhaniriki-ra vaꞌora karagahaꞌianaha,
vaꞌora navaꞌisohivini hiꞌihi ida mithani vakadibadani binaabosivini.
Naothinia,
vaꞌora karonaꞌianaha adani makhira kidisiroia.
Safini aadosina vani,
onivani fori hiꞌianahi ida kaꞌdaꞌdi kabadani.
6 Safini ajorana vani okhaꞌianaha ada kaꞌdaꞌdi.
Vaꞌora nokiꞌaha adani makhira vahoariha bada vakhaniriki,
vaꞌora nanaꞌdohiꞌaha:
“Niha avakhanimanija mahi oadani bada avakhaniriki?”
7 “Ni-kaꞌdaꞌdi haria honariafiahaki badania.”
Vakhaniha.
Oniaroa,
uva kasiroini kakaꞌdaꞌdini vaꞌora niꞌaha:
“Aꞌonivani jaboni kodisiroia avikhaꞌa mahija bada avakhanivini.”
8 Hari.
Mithani vani kaꞌdaꞌdia biniꞌaha ada kidisiroi akadavaꞌava abono:
“Vaꞌora baranaha adani honai abono mahija vaꞌora inaabosivini vakadibadani abosinia.
Vaꞌora naabosiꞌimidia adani makhira kodisiroia avikhaki safini ajorana.
Safini aadosina vakadibadani kamaꞌdaki maina-ra vaꞌora naabosi bana.
Safini khanomananina vakadibadani kamaꞌdaki maina-ra vaꞌora naabosi bana.
Vaꞌora naabosisiaga adani mahi oadani bada vakhaniki.”
Niha ada kaꞌdaꞌdi.
Oniaroa,
siroi avakadavaꞌava abonoa binaabaki ida athi.
9 Makhira safini ajorana vakadibadani kamaꞌdaki vagahinaꞌiki jiniro ꞌbaꞌdani hoarani afohanana.
10 Hari.
Makhira mahi avagani vakadibadani kamaꞌdaki vavaꞌi bodini vara niꞌiki:
“Mahi oadani bada akhaniꞌiki hari.
Kaꞌdaꞌdia binaipohiki bana ida akadibadani abosini.”
Vaabono vaniꞌaha.
Ni-kaꞌdaꞌdia binaipohiki ida vakadibadani abosini.
Vaꞌoaniaro maina vagahinaꞌaha vakadibadani abosini jiniro ꞌbaꞌdani hoarania afohanana.
11 Vagathaniꞌihi ida jiniro,
vakadikaꞌdaꞌdi-ra vakaꞌdaꞌdigariaꞌaha:
12 “Hiꞌadani aripohina safini ajorana bada vakhanipaꞌitxiki adani.
Harivani mahi oadani bada akhaniꞌiki hari safini afakia.
Akadibadani abosini vakadibadani abosini fori hiki.
Ni-asohiki ida kaꞌdaꞌdi badani-ra naabosivini nini.”
13 Hari.
Vakadikaꞌdaꞌdia biniꞌaha ada makhira hoarana:
“Ivani,
mitha iniꞌa bana hida kodivarani.
Asohiki ida ira onoꞌavini
jiniro ꞌbaꞌdani hoarani.
Kodisiroia iokhani viahania ira onavaꞌisohivini hiki ida kadabadani abosini.
Jahani ikahiki ida jiniro
ꞌbaꞌdani hoarania ira onaabosivini.
14 Oniania igathaniꞌa hida kadabadani abosini,
igorania okhaꞌa.
Onofiki ida kodisiroia okasiagaki-ra onoꞌavini hini kidibadani abosini ipohini,
kadabadani abosini ipohini vani fori hija ida onoꞌavini hiki.
15 Kodijiniro oamani hida.
Kodijiniroa onoꞌavini onofihi;
onoꞌahi.
Onoꞌavini onofirihi;
ni-onoꞌaki.
Asohiriki ivanihamanija ida hoariha-ra onoꞌavini hiki jiniro ꞌbaꞌdani hoarani?
Iakabaimanija ida hoariha-ra okajoamoravini?”
Niha ada kaꞌdaꞌdi.
16 Hari.
Anokhomiꞌihi ida Jesus rajomi kavaranihia kavaranina.
Jesus vaꞌora niꞌaha adani vajoroniki:
—Makhira mahi avagani badania kabadanini kamaꞌdaki fori vihiki adani kodihojai-ra vaꞌoaniaro imidia vagathaniki vakadikaꞌdaꞌdi ohina.
Makhira safini ajorana vakadibadani kamaꞌdaki fori vihiki adani vahoariha vikasiagaki vaꞌora ovakaꞌdaꞌdiki.
Vakhanina vani vaꞌora onaibavijahajahakiki adani oipohina vaꞌora ovakaꞌdaꞌdiki — vaꞌora niꞌaha ada Jesus.
Jesua vara bivaniꞌaꞌianaki ida abinina kamahini
17 Hari.
Oniaroa,
ai vihiꞌaha adani Jesus,
Jerusalém sidajia avigaimoriꞌaha.
Vaadahana kabaꞌi,
ipohina 12 vihiki-ra vaꞌora avikharibanipaꞌitxiꞌaha,
vahoariha vakamitharia kaimoni ida kidivarani,
vaꞌora navaꞌisohiꞌianavini hiki ida namithaꞌiariki:
18 —Mitha vaniꞌa.
Jerusaléa aokhaki hari.
Hovani ijaꞌari hahavi vakadiꞌaajo ho.
Hora avarakhaki bana adani vahoariha sasidotxi vavakaꞌdaꞌdiva,
judeus kaijaꞌari vakaꞌojomoꞌiva abono khama vasaꞌa kabodinia.
Vaꞌoaniaro vakhaniki bana adani:
“Jahaki ida abinina.”
Vakhaniki bana adani.
19 Oniani ida ijaꞌari Deu-ra avigariki vasaꞌa kabodinia hora avarakhavini hija bana.
Oniaroa,
hora avigarahaki bana adani,
hora vidafiavini,
ava akasanakhamakia hora avakaꞌitapoamisahanaki,
hora vanaabiniki bana adani.
Hari.
Mahi ahoarabakosiki radahaꞌihi oahokiki bana ho — vaꞌora navaꞌisohijoraꞌaha ada Jesus.
Tiago vakadiamia bikanikhariaki ada Jesus
20 Oniaroa,
Jesu-ra vanamaakariꞌaha adani Zebedeu kaisai viꞌbamiki vakadiamia khama.
Jesus viaha aasiarariꞌihi ida vakadiamia,
Jesu-ra kanikhariavini hiki kajoamorani hina.
21 Jesua binanaꞌdohiꞌihi:
—Nahina mani ida inofija?
—Ijaꞌari hahavi-ra ivakaꞌdaꞌdivini kamahini,
vaꞌora honaria bana adani kodisai iꞌdihania vavithina ijaꞌari-ra vaꞌora vavakaꞌdaꞌdivini kadania.
Vaꞌora onofiki hadani kodisai hoarana ipitani aniaja vithina,
hoariha ipitani kajasonija vithina — nihi.
22 Jesus vaꞌora niꞌaha adani kidisai:
—Ni-avakadiamia biogajahakiki ida bikanikhariaki avakadimoni hini.
Okapoariki bana ida oimana ꞌbanani.
Aꞌonivani avakapoarimania koda bana ida avaimani ꞌbanani jaboni?
Hofori avihimania koda bana?
—Avakapoarimania bana ida avaimani ꞌbanani.
Hofori avihiki bana aꞌoni,
avakamithaki jaboni bana ida avaimani ꞌbanani.
Avavithini-ra avanofihi oꞌdihana.
Kodibadani hirihi ida ijaꞌari-ra onagathogathovini oꞌdihana vavithira kaimoni.
Kodiabiꞌia binaibavijahaki ida ibavi opitana kaꞌaniajanija kajasonija jaboni,
vaꞌora nagathogathoꞌiki adani ijaꞌari vavithiki kaimoni oꞌdihana.
24 Hari.
Oniaroa,
vakadivarani kamithamahani vihiha adani 10 vihiki vaipohina,
oniani ida Tiago,
João vihiki-ra vaꞌora vakajaꞌoriavini hija.
Vaꞌoaniaroa vanofihananaki ida vithi ibavini jahaki Jesus ꞌdihana vavithina,
Jesus ijaꞌari hahavi-ra vakaꞌdaꞌdivini kamahini.
25 Hari.
Jesus vaꞌora baranahaꞌaha adani ipohina hahavi vamaakarina.
Vaꞌora niꞌaha:
—Vaꞌora avarigamanira adani ijaꞌari Deu-ra avigariki vakadikaꞌdaꞌdi vahojana.
Vaꞌora avavadadamiki adani vakadijaꞌari.
Ijaꞌari Deu-ra avigariki vakadikaꞌdaꞌdi vaꞌora vahonariafiahaki adani jaboni vakadipamoari vaathi naabani vihina.
26 Ni-onofiki ida ijaꞌari-ra avahonariavini vaꞌoaniaro ijaꞌari-ra vahonariavini fori hini.
Kaꞌdaꞌdi avihini-ra avanofihi;
vahoariha vakadihonai abono fori vihiꞌa bana.
27 Kaꞌdaꞌdi avihini-ra avanofihi;
vahoariha-ra vaꞌora vaakodia bana!
28 Hovani ijaꞌari hahavi vakadiꞌaajo ho.
Vahoariha-ra vaꞌora okajoamoravini hida hora rakhaja.
Vahoariha hora vakajoamoravini hirihi hida hora rakhaja.
Ibavi Jaharikaꞌoakia avikhaki bana adani ijaꞌari vaipohiki.
Oabono ovaꞌahaki ho oabinina ijaꞌari hahavi-ra vaꞌora oakavaꞌijoaja kaimoni — vaꞌora niꞌaha ada Jesus.
Jesus vaꞌora anaihotaki adani vakamaodorohaki viꞌbamiki
29 Hari.
Jericó sidajia vikhaonaniꞌaha adani Jesus.
Ijaꞌari vaipohikia vavaipohihaꞌaha ada Jesus.
30 Ai vihina kabaꞌi,
hagihi vadinia vavithimaꞌoꞌaha adani makhira viꞌbamiki vakamaodorohaki.
Vakamithaki ida Jesus varani hina.
Jesus radahana-ra vanamoniha adani vahoariha.
Vakamithahi,
vabodiꞌbarahaꞌaha:
—Jesus,
ivani Davi kohana kaijaꞌari namitharonisiagaki i,
haria vaꞌadi bana!
31 Ijaꞌari vaipohiki vahoariha vaꞌora vakaabaniha:
—Vavisoniꞌa bana!
Hariꞌa bana vabodiꞌbarahajana!
Ni-avavisoniki.
Vaꞌora vakaabaniha,
vaꞌora anaꞌbarahaꞌoamanihi.
—Jesus,
haria vaꞌadi bana!
32 Ogaakosoaha ada Jesus,
vaꞌora baranahaꞌaha adani vakamaodorohaki,
vaꞌora nanaꞌdohiꞌaha:
—Nahina mani hida avanofija?
33 —Jesus,
anofiki hida anokho-ra ianavagahavini — vaniꞌaha.
34 Jesus vaꞌora nakaidivaki adani vakamaodorohaki.
Vanokho ꞌbaꞌdani bikadasaꞌaha.
Jorakia avagahaꞌihi ida vanokho ꞌbaꞌdani,
oniaroa,
Jesu-ra vavaipohihaꞌaha.