Makhira kidigamo-ra nahojahavini kavaranihi hida
19
Hari.
Vaꞌora vara niꞌavini naothinia,
Galiléia kaarabonia vaꞌajihiꞌaha adani Jesus.
Jordão vainia avikafianiꞌaha.
Judéia kaarabonia avajoiꞌaha.
2 Jesus naothia vikasiagaꞌaha adani ijaꞌari vâipohiki.
Jesus vaꞌora anaihotahahaviꞌaha adani vakavamoniki ijaꞌari vahararana vahojaki.
3 Jesu-ra vanamaakariꞌaha adani farisio vaipohiriki.
Jesus Deus kavaꞌisohihi-ra kajonivini-ra vanofivini,
oniani ida vakaborovini hija.
Vananaꞌdohiꞌaha:
—Deus kavaꞌisohihi jirikia hojaki ida makhira kidigamo-ra nahojahavini kavaranihi.
Gamoa bada biniꞌaki ida badani kidimakhira bivajahariki,
Deua bivaꞌahamanira ada makhira kidigamo-ra nahojahavini?
4 Jesus vaꞌora niꞌaha:
—Avanokiria koda ida athi Deus athi kapapirani pitania hojaki?
Niha:
“Hahavi-ra nakamaꞌdavini kari ada Deus,
vaꞌora namonahaꞌiki adani makhira,
kidigamo khama.”
5 Niha ada Deus:
“Kidigamo-ra anakaravini mani ida
makhira kidiamia,
kidiabiꞌi vihiki-ra vaꞌora aakaraꞌovini hija.
Makhira,
kidigamo khama avakarana viahania viꞌbamiha.
Avaakaraꞌina naothinia,
ijaꞌari hoarani fori vihina vahojaꞌaha kidigamo khama.”
Nimania ida Deus athi.
6 Deus vaꞌora anakaraꞌiki adani makhira,
kidigamo khama,
ijaꞌari hoarani fori vihira kaimoni.
Deus vani vaꞌora anakaramisiꞌaha.
Hariꞌa ijaꞌari vaabono avakakaraꞌokhamava!
7 Farisioa vananaꞌdohiꞌianaha:
—Nahina mani ida Deus kavaꞌisohihi jiriki makhira kidigamo-ra nahojahavini-ra vaꞌahavini hija?
Binahojahavini viahani ida kidigamo,
papira jirikia binoꞌaꞌihi kidigamo hijanaria kaimoni.
Binoꞌavini naothinia bihonariaꞌihi ajihini.
Nimania ida Moisés athi akadijaꞌari avikhananavaki-ra vaꞌora honariavini hiki.
8 Jesus vaꞌora niꞌaha:
—Ni-vanofiki ida Deus athi-ra vanaabajahakivini,
oniani ida Moisés kohana makhira-ra vaꞌahavini hija kidigamo-ra nahojahavini.
Asia vakhanina adani ijaꞌari vahokiki hidakabaꞌi.
Aꞌonivani jaboni ni-Deus athi-ra avanaabajahakivini-ra avanofiki.
Hahavi kamaꞌdani kari vani ni-makhira kidigamo-ra nahojahavini Deua binofiki.
9 Kaꞌoa hiki hida kodivarani.
Gamo makhira hoariha-ra viꞌomaravini kabaꞌi,
kidimakhira binahojahahi,
gamo hoariha-ra anakarara kaimoni,
Jahari kabadania kabadaniki ada makhira.
10 Jesus ipohina vaniꞌaha:
—Jesus,
jahariki ida makhira kidigamo-ra nahojahavini-ra ikahivini.
Kidigamo-ra vajahajanaravini kabaꞌi,
jahaki ida bivahojahahaꞌoadahavini ikahivini,
oniani ida makhira gamo-ra anakaravini jahariki-ra akavaꞌibodivaranivini hija.
11 Jesus vaꞌora niꞌaha:
—Ni-ijaꞌari hahavia vakaabokaki ida akararini hojani.
Deua binofiki ida ijaꞌari akarani hojani.
Hojaki ida ijaꞌari hoariha Deua binofiki akararini.
12 Ni-makhira hahavia bikaabokaki ida kagamoni.
Vahoariha vatanana isai vihina vani vakaabokarija ida.
Makhira vahoariha isai-ra vanamonahavini-ra vakaabokaravini hiki vakananafa kaꞌbaꞌdani kaaniani,
oniani ida vagamona-ra vakaabokaravini hija.
Vahoariha ni-vanofiki ida avakarana,
vanofiki ida vaabono gahinai vanihavini Deus kania,
kidibadani kaꞌoa vakabadanira kaimoni,
oniani ida avakarana-ra vanofiravini hija.
Ijaꞌaria vanofiki ida avakararina vahojana,
vakadimoni hida ojomoꞌihi kavaranihi — vaꞌora niꞌaha ada Jesus.
Jesus vaꞌora kajoamoraki adani isai
13 Hari.
Oniaroa,
ijaꞌari vaꞌora vavikhaha adani vakadisai Jesus kania.
Vanofiki ida Jesus vakadisai-ra vaꞌora kaabadaronahavini,
Deu-ra kanikhariavini isai vakadimoni afohanana.
Ipohina vaꞌora vakaabaniꞌaha:
—Hariꞌa vaꞌora vavikha vaꞌoani isai!
14 Hari.
Jesus vaꞌora niꞌaha:
—Jakaho vikhava vaꞌoani isai kodiania.
Hariꞌa vaꞌora vakaabani kodiania vikhana.
Hiꞌadani isai fori vihiki vani hadani Deu-ra vanofijahakira.
Isai vania vanofira ada Deus vaꞌora vakaꞌdaꞌdira kaimoni.
15 Oniaroa,
Jesus isai-ra vaꞌora kaabadaronahahahaviꞌaha.
Deu-ra kanikhariaꞌaha vaꞌora kajoamorara kaimoni.
Vaꞌora kaabadavini naothinia ajihiꞌaha.
Makhira kanahinaꞌahapikiki varani hina hida
16 Hari.
Oniaroa,
Jesu-ra namaakariꞌaha ada makhira,
binanaꞌdohiꞌaha:
—Jesus,
onofiki bana ida kodimahi anokhomirini Deus kania.
Hana hini badani jahaki ida bada oniꞌaja kaimoni,
oabinina kamahini Ibavi Jahakaꞌoakia ookhaja kaimoni?
17 Jesua bigathaniꞌihi ida kidinaꞌdohi:
—Nahina kaimoni hora inanaꞌdohivini hiki ida badani jahaki?
Deus oavani ada jahara.
Mahi anokhomiriki-ra inofihi Deus kania,
inaabaꞌa bana ida Deus kavaꞌisohihi jiriki afohahavi.
18 — Hana hini vaꞌisohihi jirikia hora ihonariahi onaabaja kaimoni?
— binanaꞌdohiꞌaha.
Jesua biniꞌaha:
“Hariꞌa hoariha-ra naabini.
Hariꞌa iviꞌoma oni makhira hoariha kagamo.
Hariꞌa boꞌdia.
Hariꞌa hoariha-ra korijanahia akaraganaha.
19 Ikamithaꞌa oni kadabiꞌi,
kadamia vihiki ira vara vaniꞌavini.
Iabono inakaidivavini vani fori iniha ida ijaꞌari hoariha-ra inakaidivavini.”
Nimania hida Deus kavaꞌisohihi jiriki.
20 Niha ada makhira:
—Jesus,
onaabaki hida Deus kavaꞌisohihi jiriki afobakhia.
Nahina hoariha-ra bada oniꞌavini jahaja koda?
21 Jesua biogaki ida makhira kidinahina-ra nofivini arafiani,
oniani ida biniꞌavini hija:
—Kadahojai jahakaꞌoani-ra inofihi,
kadanahina-ra pavakari nihaꞌa afohahavi.
Ijaꞌari vakanahinariki-ra vaꞌora noꞌavinihi ida jiniro.
Deus ibavia nama iokhani kamahini,
ikanahinaꞌahapikiꞌianaki bana i.
Kadapavakarihi naothinia,
hora vaipohihaꞌa.
22 Hari.
Mitha biniꞌahi ida Jesus athi.
Kidinahina ahapini gahinai hini varani hini mani ida vaꞌi mokara niꞌakarahoni hija.
Ni-noꞌai hini binofiki,
oniania,
ajihiꞌaha ada makhira.
23 Hari.
Jesus vaꞌora niꞌaha adani kidipohi:
—Kaꞌoa hiki hida kodivarani.
Vakanahinaꞌahapikiki,
vakadinahina ipohiki-ra vanofivini mani ida Deu-ra vagathaniravini hija vakadikaꞌdaꞌdi kaimoni hina — vaꞌora niꞌavini.
24 Jesus vaꞌora kavarajomiki adani ijaꞌari vakanahinakarahoki cavalo avi joꞌonia okhajavarina-ra kaabokaravini fori vihina:
—Avi joꞌonia cavalo okhajavarina-ra kaabokariki fori vihiki adani vakanahinaꞌahapikiki.
Vakadinahina-ra vanofijahakivini mani ida Deus vakadikaꞌdaꞌdi hina-ra vagathaniravini hija,
oniani ida Deus ibavia vaꞌora arakharija.
Ni-vakaabokaki ida avikhana.
Ijaꞌari vakadinahina-ra vavakaijokavini oadani,
ni-vakaabokaki ida Deus ibavia avikhana.
25 Jesus ipohina vakamithahi ida athi,
vakavaꞌibodivaraniꞌahapikiꞌihi,
vananaꞌdohiꞌaha:
—Kaꞌoa mani ida koda iathini,
ni-nihanikia ijaꞌari abononi akavaꞌijoaki,
Ibavi Jaharikaꞌoakia okharia kaimoni?
26 Oniaroa,
Jesus vada vaꞌora niꞌaha,
vaꞌora niꞌaꞌaha:
—Ni-ijaꞌari abononi akavaꞌijoavini-ra kaabokaki.
Deus kaꞌoa ijaꞌari-ra akavaꞌijoavini-ra kaabokaki.
Deua bikaabokaki ida badani hahavi danoki bada niꞌani.
27 Hari.
Pedroa biniꞌaha:
—Harivani akadinahina,
agorana,
akadijaꞌari vihiki-ra vaꞌora anahojahahahaviꞌiki hari,
ira avaipohihaja kaimoni.
Nahina agahinaki bana hari?
28 Jesus vaꞌora niꞌaha:
—Kaꞌoa hiki hida kodivarani:
Hovani ijaꞌari hahavi vakadiꞌaajo ho.
Hahavi ajaꞌdini kamahini vani,
kaꞌdaꞌdi kavithi ibavinia ovithiki bana ho.
Jahaki vagaki nokiani ida kaꞌdaꞌdi kavithi ibavini.
Aꞌonivani oipohina avihini mani ida kodiania aꞌonira navithijabanaja bana.
12 avihiki aꞌoni.
12 hiki ida kaꞌdaꞌdi kavithi ibavini avakadimoni.
Aꞌonivani vaꞌora avanasohiki bana adani Israel kaijaꞌari hahavi.
29 Kodipohia binahojahaꞌiki ida gorana,
igamina,
kidiabiꞌi,
kidiamia,
kidisai,
kidiarabo hiki,
vara bivaniꞌakaꞌoaja kaimoni ida omonina jahaki,
ovari abinirina oadani gahinaki bana ada nahina ipohikia.
Paꞌitxi ida binahojahaki,
karaho ida bigathaniki bana.
Karaho ida binahojahaki,
karaho arafiaki ida bigathaniki bana.
Abinina naothinia gahinaki jaboni ada bana kidimahi jahaki anokhomiriki Deus kania.
30 Hari.
Ijaꞌari vaipohiki Deus vaꞌora baranahavini vaꞌoaniaro miroꞌa aviꞌoiki bana adani Deus ijaꞌari-ra vakaꞌdaꞌdivini kania.
Ijaꞌari vahoariha vaꞌoaniaro miroꞌa Deus vaꞌora baranahavini kabaꞌi aviꞌoisiagaki adani,
vahoariha ni-aviꞌoiki Deus ijaꞌari-ra vakaꞌdaꞌdivini kania.