Kaꞌdaꞌdi nofiana varani hina hida
18
Hari.
Oniaroa,
Jesu-ra vanamaakariꞌaha adani ipohina,
vananaꞌdohiꞌaha:
—Jesus,
Deus ijaꞌari hahavi-ra vaꞌora vakaꞌdaꞌdivini kamahini,
hana hina ada akadiania hojana jahara haria vakaꞌdaꞌdiki kaimoni hina?
2 Jesua bikaboaꞌiꞌaha ada isai paꞌitxi,
vaviaha binahojaha,
vaꞌora niꞌaꞌaha:
3 —Vakavaꞌibodivarani bana hida kodivarani.
Vakavaꞌipahiniꞌa bana ida avaabononi avavaboraborahavini.
Isai paꞌitxi kidiabiꞌi-ra vakaijokavini vani fori vihiꞌa.
Isai paꞌitxi fori avihirihi;
ni-avariꞌoiki bana Deus ijaꞌari-ra vaꞌora vakaꞌdaꞌdivini ibavinia.
4 Avanofihi ida avariꞌoini Deus ijaꞌari-ra vaꞌora vakaꞌdaꞌdivini ibavinia,
isai fori vihiꞌa bana,
hora avavakaijokajahakivini.
Nimania ida ijaꞌari kahojai hora kakodiavini ijaꞌari hahavi-ra vaꞌora ovakaꞌdaꞌdivinia.
5 Deus vaꞌora vajahaki adani isai,
vaꞌora kakodiavini vaꞌora nofiki.
Ijaꞌari abononi niꞌahi:
“Jesus kaijaꞌari ohina mani ida isai-ra ogathanijahakivini hija.”
Nihi.
Bigathanihi ida isai hihida isai fori hihi,
hora gathanivini jaboni — vaꞌora niꞌaha ada Jesus.
Jahari kabadani abosini kavaranihi
6 Vara niꞌianaha ada Jesus:
—Vaꞌora onakaidivaki adani isai hora vavakaijokaki.
Ijaꞌari vaꞌora kaborobakhiaha adani isai,
hora vakavaꞌipahinira kaimoni,
isai-ra kaborovini kabadanihi,
Deua binaabosivini bana nahina jaharikia.
Jahaki ida jaꞌdi karaho ijaꞌari mathani ahoni paha bihiakia hokahini,
ahidaja kaimoni ida ijaꞌari isai-ra kaboroboroki.
7 Jahariꞌoamanija ida ijaꞌari hora vanofiriki oipohina-ra kaborovini hora vakavaꞌipahinira kaimoni.
Namithaki bana ida ijaꞌari hora vakavaꞌipahinivini.
Jahariki ida oipohina-ra vaꞌora vakaboroboroki vakadimoni.
8 Avaabononi avakavaꞌigairi bana mahija Jahari kabadania avakabadaniravini.
Ijaꞌaria binofihi ida Jahari kabadani-ra bada niꞌavini,
biakavaꞌboavini kajahaki ida saꞌani,
bada biniꞌaria kaimoni ida Jahari kabadani.
Jahari kabadania kabadanihi;
Ibavi Jaharikaꞌoaki siho kaihimiriki kania hokahihi.
Jahaki ida saꞌani kahoaranini kabaꞌi Deus Ibavi Jahakaꞌoakia okhani.
Jahariki ida saꞌani koꞌbamini kabaꞌi Ibavi Jaharikaꞌoakia hokahini.
Ijaꞌaria binofihi ida Jahari kabadani kania adahani,
biakavaꞌboavini kajahaki ida ꞌdamani kahoarani,
bada biniꞌaria kaimoni ida Jahari kabadani.
Jahaki ida ꞌdamani kahoaranini kabaꞌi Deus Ibavi Jahakaꞌoakia okhani.
Jahariki ida ꞌdamani koꞌbamini kabaꞌi,
Ibavi Jaharikaꞌoaki siho kaihimiriki kania hokahini.
9 Ijaꞌaria binokivini bivajahahi ida Jahari kabadani,
bianivini jahaki ida nokhoni ꞌbaꞌdani hoarani,
vada biniꞌaria kaimoni ida Jahari kabadani.
Jahaki ida nokhoni ꞌbaꞌdani hoaranini kabaꞌi Deus Ibavi Jahakaꞌoakia okhani.
Jahariki ida nokhoni ꞌbaꞌdani ꞌbamini kabaꞌi,
Ibavi Jaharikaꞌoaki siho kaihimiriki kania hokahini.
Ovilia akamadaki karajomihi hida
10 Hari.
Asia vara niꞌaha ada Jesus:
—Vaꞌora vanakaidiva bana adani isai hora vakajariꞌdariki.
Kaꞌoa hiki hida vara aꞌonira oniꞌavini hiki.
Deus ibavi kaijaꞌarini vaꞌora avakadavaꞌahaꞌoadahaki adani isai hora vakajariꞌdariki.
Kodiabiꞌi nama hojaki kania vahojahahaꞌoadaki adani.
Vaꞌora onakaidivavini arafiaki adani isai.
11 Hovani ijaꞌari hahavi vakadiꞌaajo ho.
Hora rakhaki hida vaꞌora oakavaꞌijoahavini adani Deus kahagihi-ra varagariki kidiania avikhara kaimoni.
12 Aꞌonira okavarajomivini hiki ada ovilia akadavaꞌava abono.
Makhira vaꞌora vahojaki adani 100 ovilia vaipohina.
Hari.
Hoarana akamadaꞌiki.
Oniaroa,
binakoꞌdihaki ada.
Vaꞌora nahojaꞌimidiaꞌaha adani ovilia vahoariha 99 vihiki arabo namahikia hogoi-ra vahavini.
Vaꞌora nahojaꞌimidiaha,
binakoꞌdihaꞌaha ada ovilia akamadaki.
13 Aꞌonira onavaꞌisohivini hiki,
khai biniꞌavini ida ovilia-ra karagavini.
Khai vaꞌora niꞌavini kabaꞌi adani kidiꞌovilia avakamadariki,
khai biniꞌavini arafiaki ida kidiꞌovilia akamadaki bikaragaꞌiki.
14 Onivani fori hiki ida kodiabiꞌi nama hojaki kahojai.
Ni-binofipaꞌitxiki ida isai hoarani akamadani Ibavi Jaharikaꞌoakia okhani — vaꞌora niꞌaha ada Jesus.
Avaigaminia bada biniꞌaki ida Jahari kabadani
15 Asia vara niha ada Jesus:
—Iigaminia bada biniꞌaki ida Jahari kabadani,
okhaꞌa bana kidiania mahija kidibadani asohirikia inavaꞌisohivini.
Hariꞌa vahoariha vakadiania vara ivaniꞌa ida iigamini kabadani asohiriki.
Iigamini kahojakosoana okhaꞌa kidiania mahija aꞌonivani aviꞌbamiki vara avakhanivini.
Inavaꞌisohivini hiki athini-ra kamithaha;
joiribaniꞌaha Deus kania okhara kaimoni.
16 Inavaꞌisohivini hiki athini-ra kamithariha;
vaꞌora anikha bana adani iigamini hoarana viꞌbamiki.
Vaꞌora vavikha bana kidiania mahija vara avaniꞌavini.
Nimania hida athii Deus athi kapapirania hojaki:
“Ijaꞌari akaathidanoarari kamahini
vaꞌora vikha bana adani kidibadani jahariki nokiva viꞌbamiki avahoarabakosiki
vara vavaniꞌaja kaimoni ida nahina vanokiꞌiki.”
17 Hari.
Iigamini avaathini-ra kamithariha,
kidibadania vara vaꞌora vaniꞌa bana adani Deus kaijaꞌari vajoroniki.
Vaathi binaabariha;
vaniꞌa bana:
“Arigamina ihijanarihi,
Jahari kabadani abono
ihiꞌoamaniꞌia.”
Vaniꞌa bana.
18 Oniaroa,
aꞌonira onavaꞌisohiki bana ho:
Ijaꞌari kahojai-ra avaꞌaharihi araboa;
Deua bivaꞌaharihi jaboni nama.
Ijaꞌari kahojai-ra avaꞌahahi araboa;
Deua bivaꞌahahi jaboni nama.
19 Aviꞌbamini avahojani Deu-ra vara avaniꞌavini vani,
avakanikhariaꞌbamakhamahi ida nahina hoarani avanofiꞌbamakhamaki,
kodiabiꞌi nama hojakia bada biniꞌaki bana ida avakanikhariavini hiki.
20 Ibavi hana hini kodijaꞌari viꞌbamiki avahoarabakosiki vakajoronikosoaha vara hora vaniꞌara kaimoni,
ohojaki bana ho vahararana.
Ijaꞌari abononi aakariakakhamavini varani hini
21 Hari.
Oniaroa,
Jesus kania okhamiha ada Pedro,
binanaꞌdohiꞌaha:
—Jesus,
oigamina bada biniꞌabakhiaki ida badani asohiriki kodiania,
vara bivaniꞌaki ida varani jahariki kodiania jaboni.
Nihafori himaniꞌia koda ida oakariakavini?
Arajomamaniꞌia koda ida 7 hiki ipohini oakariakavini?
22 Jesua bigathaniꞌihi ida Pedro kanaꞌdohi:
—Iniani,
arajomarihi ida 7 hiki ipohini iakariakavini.
Arajomaki ida mahi hahavi iakariakavini.
Deus kidijaꞌari-ra honariavini hiki hoariha-ra akariakabakhiajorakivini.
Onivani fori hiki bana ida Deus kahojai.
23 Oniaroa,
Jesus vaꞌora niꞌaꞌaha:
—Aꞌonira onanamithavini hiki bana hida rajomi kavaranihi.
Okavarajomiki ada Deus ijaꞌari-ra vakaꞌdaꞌdivini arabo kakaꞌdaꞌdinia.
Hojaki ada arabo kakaꞌdaꞌdini.
Ovaria binofiki ida kidihonai abono afohanana jiniro abosiriki kapapirani-ra avanavathavini.
24 Hari.
Kamaꞌdaꞌihi ida kidibadani.
Vahoariha vavikhaꞌaha ada honai abono jiniro karaho-ra naabosiriki.
Ipohiꞌoamanija ida jiniro ꞌbaꞌdani binaabosiriki.
25 Kajiniroriha ada honai abono,
ni-bikaabokaki ida jiniro abosiriki-ra naabosivini.
Oniaroa,
kidikaꞌdaꞌdia biniꞌaha:
“Hora inaabosiravini mani ida pavakari ira onihavini hija bana.
Ivani,
kadagamo,
avakadisai,
kadanahina hahavi-ra pavakari onihaki bana ho,
abosija kaimoni ida jiniro hora inaabosiravini hiki.”
Kaꞌdaꞌdia biniꞌaha.
26 Hari.
Kaꞌdaꞌdi viaha kajoꞌatharariꞌaha ada kidihonai abono,
biakavaꞌisokonivini ida pavakari vihina kidigamo khama,
bikanikhariaha:
“Haria vaꞌadi bana.
Hariꞌa kaho bana,
viahanokha kaho mahija kadajiniro-ra onaabosihahavivini.”
27 Kaꞌdaꞌdia bikamithahi ida athi,
vaꞌora nakaidivamaniha,
biniꞌaha:
“Ira oakariakaki bana ho.
Onaꞌbiraki bana ida jiniro karaho inaabosiriki kapapirani,
hora inaabosijanaria kaimoni.
Ba ajihiꞌa.”
28 Oniaroa,
ajihiꞌaha ada honai abono,
bikaragarariꞌaha ada kidibadani-ra vaipohivini naabosiꞌiarina hiki.
Jiniro paꞌitxi oamani ida binaabosiꞌiarija kidiania.
Oniani ida kanabidi biagathivini hija,
saꞌa kakhanamisikia biradihadihavini hija.
Biniꞌaha:
“Kodijiniro hora inaabosiꞌiaravini hikia,
hora naabosi bana.”
29 Oniaroa,
hoariha viaha kajoꞌatharariꞌaha ada jiniro paꞌitxi-ra naabosiriki,
bikanikhariaꞌaha:
“Hora vaꞌadi bana.
Hariꞌa kaho bana,
viahanokha kaho mahija kadajiniro-ra onaabosivini.”
30 “Iniani,
jokoa ira onokharihi.
Hora inaabosiravini mani ida cadeia ira obaivini hija bana.
Hora inaabosiravini oadani,
ihojaki bana i cadeia.”
Niha ada kaꞌdaꞌdi kahonai abono jiniro karaho-ra naabosiꞌiariki.
31 Oniaroa,
vakadikaꞌdaꞌdi kahonai abono vahoariha vanokiꞌiki ida vaipohina hoariha-ra nahojavini,
vakaihamahiꞌaha,
vakadikaꞌdaꞌdi kania avikhaꞌaha,
vakanamoniꞌaha hoariha kabadani hikia.
32 Kaꞌdaꞌdia bikamithaꞌihi ida vakadivarani,
bihonariaha ada kidibadani abono jiniro karaho-ra naabosiriki khajakosina.
Khajakosiꞌaha,
biniꞌaha:
“Honai abono jahariki.
Hora ikanikhariahi;
ira ovaꞌadimanihi.
Onaꞌbiraꞌiki ida jiniro karaho inaabosiꞌiariki kapapirani,
ira oakariakaꞌiki ho.
33 Jahariꞌoamanija ida hoariha athi-ra ikamitharavini,
iipohini-ra iakariakaravini.
Hora ikanikhariahi;
ira ovaꞌadimanihi.
Jahaki ida hoariha-ra ivaꞌadivini jaboni.”
34 Kaꞌdaꞌdia bikaihamahikarahoꞌaha ada kidihonai abono,
bihonariaha osahina cadeia,
biniꞌaha:
“Ovahonariahiki ida jiniro karaho inaabosiꞌiarikia hora inaabosivini.
Jaharikia ira oarakhaki bana ho.
Kodijiniro karaho abosihahaviꞌiarini oadani,
cadeia ihojaki bana i.”
Niha ada kaꞌdaꞌdi.
35 Hari hiꞌihi ida rajomi kavaranihia Jesus vaꞌora kaꞌojomoꞌivini adani ijaꞌari namithaki kaimoni vakadiania:
—Kaꞌdaꞌdi fori hiki ada kodiabiꞌi nama hojaki.
Aꞌonivani kidihonai abono fori avihiki aꞌoni.
Hoariha-ra iakariakarihi;
ni-ira akariakaki ada kodiabiꞌi jaboni.
Hoariha-ra iakariakakaꞌoaravini oadani,
jaharikia ira arakhaki bana ada — vaꞌora niꞌaha ada Jesus.